Numela

16 A Kola+ te tama tagata a Isala,+ te tama tagata a Koate,+ te tama tagata a Levi,+ ne ‵kau fakatasi mo Tatano mo Apilamo, ko tama tāgata a Eliapo,+ mo Onu te tama tagata a Pelefa mai tino Leupena.+ 2 Ne ‵tu aka latou o ‵teke atu ki a Mose fakatasi mo tāgata Isalaelu e toko 250 kolā ko takitaki o te fakapotopotoga, ko tino filifilia o te fakapotopotoga, ko tāgata takutakua. 3 Ne maopoopo fakatasi latou o ‵teke+ atu ki a Mose mo Alona kae fai atu ki a lāua: “Matou ko ‵fiu fāka loa i a koulua! A te fakapotopotoga kātoa e tapu,+ mo tino katoa i ei, kae ko Ieova e ‵kau fakatasi mo latou.+ Kaia la e fakamaluga aka ei ne koulua a koulua eiloa mai luga o te fakapotopotoga a Ieova?”

4 I te lagonaga ne Mose a pati konei, ne totuli ifo a ia mo ana mata e ‵fuli ki lalo. 5 Kae ne fai atu a ia ki a Kola mo tino katoa kolā e ‵lago atu ki a ia: “I te tafataeao ka fakailoa mai ne Ieova me ko oi ana tino+ mo tino kolā e tapu mo tino kolā e ‵tau o fakapili‵pili atu ki a ia,+ kae ko so se tino e filifili+ ne ia ka fakapilipili atu ki a ia. 6 Fai a te mea tenei: Puke mai a mea tuku malala ‵ka+ a koutou e Kola mo tino katoa kolā e ‵lago ki a koe,+ 7 kae tuku atu te afi ki loto i ei kae tuku a mea ma‵nogi ki luga i ei ma taeao i mua o Ieova, kae ko te tagata telā ka filifili ne Ieova,+ ko ia tenā te tino e tapu. A koutou e tino Levi+ ko tō silia te otou mea tenei e fai!”

8 Tenā ne fai atu ei a Mose ki a Kola: “Ke na faka‵logo mai fakamolemole, koutou e tama tāgata a Levi. 9 A koutou e manatu mā‵ma me ne ‵vae aka ne te Atua o Isalaelu a koutou mai te fakapotopotoga o tino Isalaelu,+ kae talia ne ia koutou ke fakapili‵pili atu ki a ia ko te mea ke mafai ne koutou o fai te taviniga a Ieova i loto i te faleie tapu kae ‵tu i mua o te fakapotopotoga o tavini atu ki a latou,+ 10 kae ne aumai ne ia a koe, ke pili atu ki a ia fakatasi mo ou taina katoa, ko tama tāgata a Levi? E a, e taumafai foki koutou ke tuku atu a te tofi fakafaitaulaga?+ 11 Ona ko te pogai tenei, a koe mo tino katoa kolā e ‵lago atu ki a koe ko ‵teke atu eiloa ki a Ieova. Kae e pelā mo Alona, ko oi a ia e ‵tau ei o mui‵mui koutou ki a ia?”+

12 Fakamuli ifo, ne ave te fekau a Mose ki a Tatano mo Apilamo+ ko tama tāgata a Eliapo ke olo atu ki a ia, kae ne fai mai lāua: “A māua e se olo atu! 13 A koe e manatu māmā ki te aumaiga ne koe o matou kea‵tea mo te fenua telā e ‵tafe i ei a susu mo hani ke tamate matou i te koga lavaki?+ Nei la, ko manako foki koe o pule katoatoa mai ki a matou? 14 Kae nei la, ne seki aumai ne koe a matou ki loto i se fenua telā e ‵tafe i ei a susu mo hani+ io me tuku mai se fatoaga mo se togavine e pelā me se tofi o matou. E a, ka ‵kape kea‵tea ne koe a mata o tāgata konā? A māua e se olo atu!”

15 Ne kaitaua malosi a Mose kae fai atu ki a Ieova: “Ke mo a ma kilo atu koe ki te lotou taulaga meakai. E seai se asini e tasi ne puke ne au mai i a latou, io me ne fakalogo‵mae ne au se tokotasi o latou.”+

16 Tenā ne fai atu ei a Mose ki a Kola: “O‵mai mo tino katoa kolā e ‵lago ki a koe ki mua o Ieova i te aso ma taeao, ko koe mo latou fakatasi mo Alona. 17 E ‵tau o puke ne tino taki tokotasi olotou mea tuku malala ‵ka kae tuku atu a mea ma‵nogi ki luga i ei, kae ka ofo atu ne tino taki tokotasi olotou mea tuku afi i mua o Ieova, e 250 a mea tuku afi, fakatasi mo koe mo Alona, ko tino taki tokotasi mo olotou mea tuku afi.” 18 Tenā ne puke ei ne tino taki tokotasi olotou mea tuku afi, kae tuku atu a te afi mo mea ma‵nogi ki luga i ei kae ‵tu i te mataloa o te faleie o maopoopoga fakatasi mo Mose mo Alona. 19 I te otiga ne fakamaopoopo mai ne Kola a tino+ kolā e ‵lago ki a ia o ‵teke atu ki a lāua i te mataloa o te faleie o maopoopoga, ne fakaasi mai ei a te ‵malu o Ieova ki te fakapotopotoga kātoa.+

20 Ne toe fai atu a Ieova ki a Mose mo Alona: 21 “Ke ‵vae koulua kea‵tea mai te potukau tenei, ko te mea ke fakaseai fakavave ne au a latou.”+ 22 I konā, ne faka‵siga ifo ei lāua mo lā mata e ‵fuli ki lalo i te laukele kae fai atu: “Te Atua, ko te Atua o te ola o tino katoa,+ e a, ka fai fua ne te agasala a se tagata e tokotasi ke kaitaua koe ki te fakapotopotoga kātoa?”+

23 Tenā ne fai atu ei a Ieova ki a Mose: 24 “Faipati ki te fakapotopotoga kātoa kae fai atu ki a latou, ‘Olo kea‵tea mai faleie o Kola, Tatano mo Apilamo!’”+

25 Tenā ne tu aka ei a Mose kae fanatu ki a Tatano mo Apilamo kae ne olo atu mo ia a toeaina+ o Isalaelu. 26 Ne fai atu a ia ki te fakapotopotoga: “Fakamolemole, olo kea‵tea mai faleie o tāgata ma‵sei konei kae ke mo a eiloa ma pa‵tele ki se mea a latou, ko te mea ke mo a ma fakaseai atu koutou ona ko olotou agasala katoa.” 27 Ne olo fakavave latou kea‵tea mai feitu katoa o faleie o Kola, Tatano mo Apilamo, kae ne o‵mai a Tatano mo Apilamo ki tua o ‵tu i mataloa o lā faleie, fakatasi mo lā avaga, lā tama tāgata mo lā tama‵liki fo‵liki.

28 Tenā ne fai atu ei a Mose: “E auala i te mea tenei ka iloa ei ne koutou me i a au ne uga mai ne Ieova ke fai a mea katoa konei, kae e se ko toku loto eiloa: 29 Kafai e ‵mate a tino konei i te mate masani e pelā eiloa mo tino katoa kae kafai e ‵pau te lotou fakasalaga mo te fakasalaga masani o tino katoa, ko tena uiga ne seki uga mai au ne Ieova.+ 30 Kae kafai e fai ne Ieova se mea fakaofoofogia ki a latou, kae ‵vae* ne ia te laukele ke folo a tāgata konei mo olotou mea katoa, kae tanu ola atu latou i te Tanuga,* ka iloa tonu ei ne koutou me ne fai ne tāgata konei a faifaiga sē āva ki a Ieova.”

31 I te otiga eiloa ne faipati atu ne ia a pati katoa konei, mavaelua ei te laukele mai lalo i a latou.+ 32 Ne mavaelua* te laukele kae folo ne ia latou fakatasi mo olotou kāiga mo tino katoa i te kāiga o Kola+ mo olotou mea katoa. 33 Tela la, ne tanu ola katoa latou i te Tanuga,* kae ne ufi latou ne te laukele, ‵galo atu ei latou mai te fakapotopotoga kātoa.+ 34 A tino Isalaelu katoa kolā ne ‵tu pili atu ki a latou ne fakatau ‵tele valevale i te taimi ne paka‵laga ei latou, olotou muna: “A matou e ma‵taku i a matou ma folo ne te laukele!” 35 Tenā ne tō ifo ei se afi mai i a Ieova+ kae ‵sunu ei a tāgata e toko 250 kolā ne ofo atu ne latou a mea ma‵nogi.+

36 Ne fai atu a Ieova ki a Mose: 37 “Fai ki a Eleasalo te tama tagata a Alona te faitaulaga ke puke a mea tuku malala ‵ka+ kea‵tea mai te afi, me i mea konā e tapu. Fai atu foki ki ei ke fakasalalau atu a te afi ki se koga tai ‵mao. 38 A mea tuku malala ‵ka a tāgata kolā ne agasala kae ‵mate i ei e ‵tau o tuki ke manifi mo ufi a te fatafaitaulaga,+ me ne ofo atu ne latou a mea konā i mua o Ieova, kae fai ei ke tapu. E ‵tau o fai a mea konā e pelā me se fakailoga ki tino Isalaelu.”+ 39 Tenā ne puke ei ne te faitaulaga ko Eleasalo a mea tuku malala ‵ka kopa kolā ne ofo atu ne latou kolā ne ‵ka i te afi, kae tuki a mea konā mo ufi te fatafaitaulaga, 40 e ‵tusa mo te mea ne fai atu ne Ieova ki a ia e auala i a Mose. A te mea tenā se fakamasauaga ki tino Isalaelu ke iloa ne latou me e seai se tino telā e sē se tama a Alona e ‵tau o fakapilipili atu o ‵sunu a mea ma‵nogi i mua o Ieova+ kae seai se tino e ‵tau o fai pelā mo Kola mo ana tino.+

41 I te aso eiloa mai tua ifo, ne kamata ei te fakapotopotoga kātoa o tino Isalaelu o mui‵mui ki a Mose mo Alona,+ olotou muna: “Ko oti ne tamate ne koulua a tino o Ieova.” 42 I te otiga ne maopoopo a te fakapotopotoga o ‵teke atu ki a Mose mo Alona, ne ‵fuli atu latou ki te faleie o maopoopoga, kae kiloke! ne ufi a te faleie ne te kaumana, kae ne kamata o sae mai i ei a te ‵malu o Ieova.+

43 Ne olo atu a Mose mo Alona ki mua o te faleie o maopoopoga,+ 44 kae fai atu a Ieova ki a Mose: 45 “Faka‵mao kea‵tea koulua mai te fakapotopotoga tenei, ko te mea ke fakaseai fakavave ne au latou.”+ I konā ne faka‵siga ifo ei lāua mo lā mata e ‵fuli ki te laukele.+ 46 Tenā ne fai atu ei a Mose ki a Alona: “Puke te mea tuku afi kae tuku ki loto i ei a te afi mai te fatafaitaulaga+ kae tuku ki luga i ei a mea ma‵nogi kae fano fakavave ki te fakapotopotoga o fai se faka‵māga mō latou,+ me i a Ieova ko oko eiloa i te kaitaua. Ko oti ne kamata o tupu te mala!” 47 Ne puke fakavave ne Alona a te mea tuku afi, e ‵tusa eiloa mo pati a Mose, kae tele atu ki loto i te fakapotopotoga, kae kiloke! ko oti ne kamata o tupu te mala ki tino. Tenā ne tuku ei ne ia a mea ma‵nogi ki luga i te mea tuku afi kae kamata o fai te faka‵māga mō tino. 48 Ne tu atu faeloa a ia i te va o tino ‵mate mo tino ola, kae fakamuli ifo ne gata ei a te mala. 49 A tino kolā ne ‵mate i te mala tenā e ‵tusa mo te toko 14,700 i tafa o tino kolā ne ‵mate ona ko Kola. 50 I te taimi ne foki atu ei a Alona ki a Mose i te mataloa o te faleie o maopoopoga, kae ko oti ne fakagata a te mala.