5 Fesokotakiga

TENA UIGA

A fesokotakiga ‵tonu e fai i taimi e fakaasi ‵tonu atu ne mātua mo tama‵liki a olotou mafaufauga mo lagonaga ‵tonu i te taimi e sau‵tala fakatasi ei latou.

TE POGAI E TĀUA I EI

Fesokotakiga e fai mo tama‵liki kolā ko talavou e mafai o oko atu ki se tulaga faigata. I te taimi koi fo‵liki ei au tama‵liki ne fakaasi katoa mai ne latou so se mea ki a koe. Kae i te taimi ko talavou i ei, ko faigata o fai‵pati atu ki a koe, kae ko se iloa foki ne koe olotou mafaufauga mo lagonaga e pelā eiloa me tu atu koe i te suā feitu o te vaitafe kae ko latou i te suā feitu. Kafai ko tupu te mea tenei, e manakogina malosi ei ne tama‵liki se fesokotakiga ‵lei mo mātua!

MEA E MAFAI O FAI NE KOE

Ke fakamafulifuli ou taimi ki te manakoga o tau tamaliki. Ke fai eiloa a sau‵talaga faitalia foki loa me ko leva ‵ki te po.

“Kāti ka fia fai atu a koe penei, ‘E a, ko manako a koe o faipati mai nei? Tāua nei ne ‵nofo tasi loa i te aso kātoa!’ Kaia e fai ei ‵tou fakamasakoga māfai ko fia sau‵tala mai a ‵tou tama‵liki ki a tatou? E se tenā loa te mea e fakamoemoe ki ei a te tokoukega o mātua?”—Lisa.

“E sē ti fiafia au o ‵pula leva i te po, kae ko ‵toe sau‵talaga ‵lei ‵ki ne fai ne au mo aku tama‵liki kolā koi talavou ne fai mai i tua o te valuapo.”—Herbert.

FAKATAKITAKIGA MAI TE TUSI TAPU: “Ke se ‵sala atu faeloa a tino taki tokotasi ki tena ‵lei eiloa, kae ki te ‵lei o te suā tino.”—1 Kolinito 10:24.

Ke fakalogologo faka‵lei. Ne fakailoa mai ne se tamana tokotasi, penei: “I te taimi e fai‵pati mai i ei aku tama‵liki, e se tuku tonu atu toku mafaufau ki a latou. Kae e se mafai o fakaloiloi ne au a latou—me e lavea eiloa ne latou!”

E pelā mo te fakaakoakoga tenei mai luga, ke tamate tau televise io me ne tivaisi. Ke saga tonu atu ki pati a tau tamaliki, kae ke fakatāua ne koe a ia mo ana fakamatalaga faitalia foki māfai e se nā ko tāua.

“E manakogina ke fakamaoni atu ki ‵tou tama‵liki me fakatāua ‵ki ne tatou a olotou lagonaga. Kae kafai e se fai tatou penā, ka tausi eiloa ne latou a olotou lagonaga ki a latou eiloa, io me ‵sala atu latou ki fesoasoani mai i nisi tino.”—Maranda.

“Ke mo a eiloa e fakaasi atu a tou sē fiafia, faitalia foki loa e ‵seke ‵mao a mafaufauga o tau tamaliki mai i a koe.”—Anthony.

FAKATAKITAKIGA MAI TE TUSI TAPU: “Tela la, ‵saga tonu ki te auala e fakalogo‵logo ei koutou.”—Luka 8:18.

Ke fakaaoga faka‵lei a nīsi fakanofonofoga. I nīsi taimi e fia‵fia a tama‵liki o fakaasi mai a mea i olotou loto i vaegā fakanofonofoga kese‵kese.

“Ne fakaaoga faka‵lei ne matou a avanoaga i taimi e olo sāle i te motoka. A te sagasaga atu o tamaliki i ou tafa kae sau‵tala e magoi atu i lō te fakafesagai ‵tonu atu kae sau‵tala.”—Nicole.

Taimi ‵kai se taimi gali foki ke fai i ei a sau‵talaga.

“A te ‵kaiga i te afiafi ko te ‵toe taimi ‵lei ke sau‵tala ki mea ma‵sei mo mea ‵lei ne ‵tupu i te aso tenā ki a matou. A te faifaiga masani tenei e fai ei ke ‵kau fakatasi matou, kae ke iloa ‵lei foki ne matou me e se ‵tau o fakafesagai tokotasi atu a koe ki se fakalavelave.”—Robin.

FAKATAKITAKIGA MAI TE TUSI TAPU: “E ‵tau mo tino katoa o vave o fakalogo‵logo, kae fakatuai o fai‵pati.”—Iakopo 1:19.