Ko Kamata o Faite ne te Atua a Mea

A MEA ‵lei katoa kolā ko maua ne tatou ne aumai mai te Atua. Ne faite ne ia a te la ke tuku mai ki a tatou a te mainaga i te ao, ako te masina mo fetu ke maua ei ne tatou a nisi mainaga i te po. Kae ne faite ne te Atua a te lalolagi mō tatou ke ‵nofo i ei.

Ako te la, te masina, fetu, mo te lalolagi e se ko mea muamua ne faite ne te Atua. E iloa ne koe me se a te mea muamua ne faite? Ne faite muamua ne te Atua a tino pelā mo ia. E se mafai o matea ne tatou a tino konei, e pelā eiloa mo te sē mafai ne tatou o matea te Atua. E fai mai i te Tusi Tapu me i tino konei ko agelu. Ne faite ne te Atua a agelu ke ‵nofo fakatasi mo ia i te lagi.

A te agelu muamua ne faite ne te Atua se tino fakapito eiloa. A ia ko te Tama muamua a te Atua, kae ne ga‵lue fakatasi a ia mo tena Tamana. Ne fesoasoani atu a ia ki te Atua i te faitega o nisi mea katoa. Ne fesoasoani atu a ia ki te Atua i te faitega o te la, te masina, fetu, penā foki loa mo te ‵tou lalolagi.

Ne foliga mai pefea te lalolagi i aso konā? I te kamataga ne seki mafai o ola a tino i te lalolagi. Ne seki ai ne isi mea aka kae na ko te moana lasi telā ne ufi i ei a te laukele. Kae ne manako te Atua ke ‵nofo a tino i te lalolagi. Telā ne kamata ei a ia o fakatoka a mea mō tatou. Ne a ana mea ne fai?

Muamua la, ne manakogina ne te lalolagi a te mainaga. Telā ne fai ei ne te Atua a te mainaga mai te la ke fakamaina ei a te lalolagi. Ne fai ne ia ko te mea ke mafai o isi se po mo te ao. Mai tua ifo i konā ne fai ne te Atua a te laukele ke fanaka mai luga o te vai i te moana.

I te taimi muamua ne seki ai eiloa se mea i te laukele. Ne foliga mai pelā mo te ata telā e lavea ne koe i konei. Ne seki ai ne pulalakau io me ne lakau, io me ne manu. Ke oko eiloa ki ika i te tai ne seki ai foki. E uke atu a galuega e ‵tau o fai ne te Atua ke fai a te lalolagi ke gali ‵ki mō manu mo tino ke ola i ei.