Se Fatoaga Gali

KILO atu ki te lalolagi i konei! E pefea te ‵gali o mea katoa! Kilo atu ki mouku mo lakau, pulalakau mo manu katoa. E mata, e mafai ne koe o fakasino atu ki te elefane mo leona?

Ne māfua mai pefea a te fatoaga gali tenei? Ia, ke onoono aka tatou ki te auala ne fai ei ne te Atua a te lalolagi ke toka mō tatou.

Muamua, ne fai ne te Atua a mouku lanu launiu ke ufi ei te laukele. Kae ne faite foki ne ia a vaegā lakau fo‵liki kese‵kese katoa mo lakau ‵lasi. A mea ola konei e fesoasoani ki te faiga o te lalolagi ke matagali. Kae e uke atu a mea e fai ne mea konei. A te ukega o mea konā e tuku mai foki i ei ki a tatou a mea‵kai kolā ko se faka‵tau eiloa i te ‵lei i te kai.

Ne faite fakamuli ne te Atua a ika ke ‵kau i te tai mo manu ke eva i te lagi. Ne faite ne ia a kuli mo pūsi mo solofanua; manu ‵lasi mo manu fo‵liki. Ne a manu e ‵nofo pili atu ki tou fale? E mata, e se ‵tau o fia‵fia tatou me ne faite ne te Atua a mea katoa konei mō tatou?

Oti aka loa, ne fai ne te Atua se vaega e tasi o te lalolagi mo fai se koga fakapito. Ne fakaigoa ne ia a te koga tenei ki te fatoaga o Etena. Ne ‵lei katoatoa a te koga tenā. A mea katoa i ei ne ‵gali ‵ki. Kae ne manako te Atua ke fai fakamuli a te lalolagi kātoa pelā mo te fatoaga gali tenei ne faite ne ia.

Kae toe kilo atu la ki te ata o te fatoaga tenei. E mata, e iloa ne koe me se a te mea ne iloa ne te Atua me e galo i konā? Ke onoono aka tatou.