Te Tagata mo te Fafine Muamua

SE A te mea e ‵kese i te ata tenei? E tonu, ko tino i loto i ei. A laua ko te tagata mo te fafine muamua. Ko oi ne faite ne ia laua? Ko te Atua. E iloa ne koe tena igoa? Ko Ieova. Kae ne fakaigoa a te tagata mo te fafine ki a Atamu mo Eva.

Tenei te auala ne faite ei ne Ieova te Atua a Atamu. Ne puke aka ne ia ne mu one mai te laukele kae ne faite ne ia mai ei se foitino ‵lei katoatoa, se foitino o te tagata. Oti aka ne ‵pusi atu ne ia te mānava ki te isu o te tagata, kae ne ola ei a Atamu.

Ne isi se galuega ne tuku atu ne Ieova te Atua ki a Atamu. Ne fai atu a ia ki a Atamu ke fakaigoa ne ia a vaegā manu kese‵kese katoa. Kāti ne onoono atu a Atamu ki manu i se taimi leva ‵ki ko te mea ke mafai ne ia o filifili aka a toe igoa ‵lei mō latou katoa. Kae koi fakaigoa ne Atamu a manu, ne kamata o lavea ne ia se mea. E iloa ne koe me se a te mea tenā?

E isi ne soa o manu katoa. E isi ne elefane tāgata mo elefane fāfine, kae e isi foki ne leona tāgata mo leona fāfine. Kae ne seki ai se tino ke fai mo fai te soa o Atamu. Telā ne fai ei ne Ieova a Atamu ke tō tena moe, kae ne puke ne ia se ivi kasokaso mai i tena kaokao. Ne fakaaogā te ivi kasokaso tenei, kae ne faite ne Ieova se fafine mō Atamu, ne fai tou fafine mo fai tena avaga.

Ne pefea la te fiafia o Atamu i te taimi tenā! Kae mafaufau foki ki te fiafia ne ‵tau o maua ne Eva i te taimi ne tuku atu ei a ia ki loto i se fatoaga gali penā ke ola i ei! I te taimi tenā ko mafai ei ne laua o maua lā tama‵liki kae ke ola fakatasi foki ki te se-gata-mai i te fiafia.

Ne manako a Ieova ke ola Atamu mo Eva ki te se-gata-mai. Ne manako a ia ke fai ne laua a te lalolagi kātoa ke gali pelā mo te fatoaga o Etena. E pefea te fia‵fia o Atamu mo Eva i te taimi ne mafau‵fau ei laua ki te faiga o te mea tenei! E mata, moi nofo atu koe i konā, ka fiafia koe o kau atu ki te faiga o te lalolagi pelā me se fatoaga gali? Kae ne seki tumau a te fia‵fia o Atamu mo Eva. Ke onoono aka tatou me se a te pogai.