Te Pogai ne Galo ei te Koga ‵Nofo o Laua

ONOONO atu me se a te mea ko tupu nei. Ko tuku ki tua Atamu mo Eva mai te fatoaga gali o Etena. E iloa ne koe me kaia?

Ne fai penā ona ko te mea ne fai ne laua se mea tafasili i te masei. Kae ko fakasala laua ne Ieova. E iloa ne koe a te mea masei ne fai ne Atamu mo Eva?

Ne fai ne laua se mea telā ne fai atu te Atua ke se fai ne laua. Ko oti ne fai atu te Atua ki a laua me e mafai ne laua o ‵kai ki meakai mai lakau i te fatoaga. Kae ne fai atu te Atua e uiga ki se lakau e tasi ke se ‵kai ki ei, me ka ‵mate laua i ei. Ne tausi ne ia a te lakau tenā e pelā me i ā ia eiloa. Kae e iloa ne tatou me se mea ‵se ke puke ne tatou se mea a te suā tino, i ne? Ia, se a la te mea ne tupu?

I te aso e tasi ne nofo tokotasi ei a Eva i te fatoaga, ne faipati atu se gata ki a ia. Mafaufau ki te mea tenā! Ne fai atu ki a Eva ke kai ki fuaga o te lakau telā ne fai atu te Atua ki a laua ke se ‵kai ki ei. I te taimi ne faite ei ne Ieova a gata ne seki fai ne ia latou ko te mea ke mafai o fai‵pati. Tela la, e fakauiga i ei me ne fai ne se isi tino fakaatea a te gata ke faipati. Ko oi la tenā?

E se ko Atamu. Tela la, e ‵tau o fai te tino tenā mo fai se tino e tokotasi mai tino kolā ne faite ne Ieova i se taimi leva ‵ki mai mua o te faitega ne ia o te lalolagi. A tino konā ko agelu, kae e se mafai ne tatou o matea latou. A te agelu e tasi tenei ne kamata o fakamatamata. Ne kamata o mafaufau i a ia e ‵tau o fai mo fai se pule pelā mo te Atua. Kae ne manako a ia ke faka‵logo a tino ki a ia i lō te faka‵logo ki a Ieova. A ia ko te agelu telā ne fakafaipati ne ia te gata.

Ne mafai ne te agelu tenei o fakaloiloi a Eva. I te taimi ne fai atu ei a ia ki tou fafine me ka fai a ia pelā mo te Atua māfai e kai a ia ki te fuaga, ne talitonu tou fafine ki ei. Telā ne kai ei ne ia, kae ne kai foki a Atamu ki ei. Ne seki faka‵logo Atamu mo Eva ki te Atua, kae tenā eiloa te pogai ne galo ei i a laua te lā fatoaga gali.

Kae ka isi se taimi ka fai ei ne te Atua a te lalolagi kātoa ke gali e pelā eiloa mo te fatoaga o Etena. Fakamuli ka tauloto tatou ki te auala e mafai ei ne koe o kau atu ki te faiga o te lalolagi penei. Kae nei la, ke onoono aka tatou me se a te mea ne tupu ki a Atamu mo Eva.