Te Auala ne Sao ei te Pepe ko Mose

ONOONO atu ki te tamā pepe e tagi, kae taofi ne ia a te maikao o te fafine. A te pepe tenei ko Mose. E iloa ne koe me ko oi a te fafine matagali tenei? A ia se pelenise fafine Aikupito, ko te tama eiloa a Falao.

Ne ‵funa ne te mātua o Mose a tena pepe ke oko eiloa ki te taimi ko tolu ei ana masina, me ne seki manako tou fafine ke tamate tena tama ne se tino Aikupito. Kae ne iloa ne ia me kāti ka maua aka eiloa a Mose, telā ne fai ei ne ia a te mea tenei ke sao tou tagata i ei.

Ne puke ne ia se ato kae faite faka‵lei ne ia ko te mea ke seai eiloa se vai e tō ki loto. Kae ne tuku ne ia a Mose ki loto i ei, kae tuku a te ato i mouku ‵loa i tafa o te Vaitafe ko te Naila. Ne fakatonu atu ki te tuagane o Mose, ko Miliama, ke tu i ana tafa o onoono me se a te mea ka tupu.

Ne seki leva kae ne oko mai a te tama fafine a Falao ki te vaitafe ko te Naila o koukou i ei. Ne lavea fakapoi ne ia a te ato i mouku ‵loa. Ne kalaga atu a ia ki tena tavini fafine e tokotasi: ‘Fano o puke mai a te ato tenā ki a au.’ I te taimi ne ‵tala aka ei ne te pelenise fafine a te ato, e pefea te gali o te pepe ne lavea ne ia! Ne tagi a te tamā pepe ko Mose, kae ne alofa a te pelenise fafine ki a ia. Ne seki manako tou fafine ke tamategina te pepe.

I te taimi tenā ne vau ei a Miliama. E lavea ne koe a ia i te ata. Ne fesili atu a Miliama ki te tama fafine a Falao: ‘Ke fano au o fai atu ki se fafine Isalaelu ke tausi ne ia a te pepe mō koe?’

‘Fakamolemole ke fai la ne koe penā,’ ne fai atu a te pelenise fafine.

Telā ne tele fakavave atu ei a Miliama o fai atu ki tena mātua. I te vauga o te mātua o Mose ki te pelenise fafine, ne fai atu a te pelenise fafine: ‘Puke a te pepe tenei kae tausi ne koe mō oku, kae ka ‵togi ne au a koe.’

Telā ne tausi ei ne te mātua eiloa o Mose a tena pepe. Fakamuli ifo i te taimi ko matua ei a Mose, ne ave a ia ne tou fafine ki te tama fafine a Falao, telā ne puke ne ia tou tagata. Tenā eiloa a te auala ne tupu aka ei a Mose i te kāiga o Falao.