Te Pogai ne Tele Kea‵tea ei a Mose

KILO atu ki a Mose ko tele kea‵tea mai Aikupito. E lavea ne koe a tāgata kolā e afuli ne laua a ia? E iloa ne koe me kaia e ma‵nako ei laua o tamate a Mose? Ke onoono aka me e mafai o maua aka ne tatou te pogai.

Ne tupu aka a Mose i te kāiga o Falao, te pule o Aikupito. Ne fai a ia mo fai se tagata poto ‵ki kae maluga. Ne iloa ne Mose me i a ia e se se tino Aikupito, kae ko ana mātua ‵tonu ne pologa Isalaelu.

I te aso e tasi, i te taimi ko 40 ei ana tausaga, ne fakaiku aka ne Mose ke fanatu a ia o onoono me e pefea ana tino. Ko se faka‵tau eiloa i te matagā o faifaiga ne fai ki a latou. Ne lavea ne ia se tino Aikupito e ‵kini ne ia se pologa Isalaelu. Ne kilo aka a Mose ki ana tafa, kae ne lavea atu ne ia me e seai se tino e kilo mai, ne ‵pago ne ia te tino Aikupito, kae ne mate atu ei a te tino Aikupito. Telā ne ‵funa ei ne Mose tena foitino i te one.

I te suā aso ne fanatu a Mose o toe onoono ki ana tino. Ne mafaufau a ia me ne mafai ne ia o fesoasoani atu ki a latou ko te mea ke se toe fai latou mo fai ne pologa. Kae ne lavea ne ia a tino Isalaelu e tokolua e ‵fusu, telā ne fai atu ei a Mose ki te tino e tokotasi telā e ‵se: ‘Kaia e fusu ei ne koe tou taina?’

Muna a te tagata: ‘Ko oi ne fai ne ia koe mo fai te motou pule mo te motou famasino? E a, ka tamate ne koe au pelā mo te tamatega ne koe o te tino Aikupito?’

Ne kamata o mataku a Mose. Ne iloa ne ia me ko oti ne iloa aka ne tino a te mea telā ne fai ne ia ki te tino Aikupito. Ke oko foki ki a Falao ne logo i te mea tenā, kae ne uga atu ne ia a tāgata ke tamate a Mose. Tenā eiloa a te pogai ne ‵tau ei mo Mose o tele kea‵tea mai Aikupito.

I te taimi ne tiakina ei ne Mose a Aikupito, ne fano ‵mao atu a ia kea‵tea ki te fenua o Mitiana. I konā ne fetaui ei a ia mo te kāiga o Ietelo, kae ne avaga a ia ki se tama fafine e tokotasi a tou tagata e igoa ki a Sepola. Ne fai a Mose mo fai se tausi mamoe kae ne tausi faka‵lei ne ia a mamoe a Ietelo. Ne nofo atu a ia i te fenua ko Mitiana mō tausaga e 40. I te taimi tenā ko 80 ei ana tausaga. Kae i te aso e tasi, i te taimi ne tausi ei ne Mose a mamoe a Ietelo, ne tupu se mea fakaofoofogia telā ne ‵fuli ei a te olaga kātoa o Mose. ‵Suke ki te suā itulau, kae ke onoono aka tatou me se a te mea fakaofoofogia tenā.