Ko Mala e 10

KILO aka ki ata konei. E fakaasi mai i ata takitasi se mala e tasi telā ne tuku atu ne Ieova ki Aikupito. I te ata muamua e mafai o lavea ne koe a te ‵kiniga ne Alona o te vaitafe ko te Naila ki tena tokotoko. I te taimi ne fai ei ne ia penā, ne ‵fuli a te vai ki toto. Ne ‵mate a ika, kae ne kamata o ‵pou a te vaitafe.

‵Soko atu ki ei, ne fai ne Ieova ke o‵mai a lane mai te vaitafe ko te Naila. Ne oko atu a lane ki koga katoa—i ogāumu, ulo fai mea‵kai, moega o tino—i koga katoa. I te taimi ne ‵mate ei a lane ne fakaputu aka ne tino Aikupito a lane ‵mate i faka‵tuga ‵lasi, kae ne ‵pou a te fenua i ei.

A te suā mea, ne ‵kini ne Alona a te laukele ki tena tokotoko, kae ne ‵fuli a te pefu ki kutu. Ko manu fo‵liki kolā e eva kae ū. A kutu ko te tolu o mala i te fenua o Aikupito.

A te ‵toega o mala ne fakalogo‵mae atu fua ki tino Aikupito, kae se ko tino Isalaelu. A te fa o mala ko lago ‵lasi kolā ne ua‵lolo atu ki loto i fale o tino Aikupito katoa. A te lima o mala ne oko atu ki manu. A te ukega o pulumakau mo mamoe mo kouti a te kau Aikupito ne ‵mate.

‵Soko atu ki ei, ne puke ne Mose mo Alona a nāi lefu kae ne ‵pei atu ki luga i te ea. Ne fai ei ke maua ne tino mo manu a fakafoa. Tenā te ono o mala.

Mai tua ifo i konā ne sisi aka ne Mose tena lima ki te lagi, kae ne faka‵to ifo ei ne Ieova a te vaiua fatu. Ko te ‵toe vaiua fatu masei eiloa ne maua ne tino Aikupito.

A te valu o mala ko te mumugā sē akelise. Ne seki ai aka eiloa se taimi penā muamua io me mai tua ifo i konā telā ne uke katoa ei a sē akelise. Ne kai ne latou a mea katoa kolā ne seki fakamasei ne te vaiua fatu.

A te iva o mala ko te pouliga. Ne ufi a te fenua ki te pouliga matolu mō aso e tolu, kae ne maua eiloa ne tino Isalaelu a te mainaga i te koga ne ‵nofo ei latou.

Fakamuli loa, ne fai atu te Atua ki ana tino ke nani a toto o se tamā kouti io me se tamā mamoe i olotou mataloa. I konā eiloa ne eva atu se agelu a te Atua i luga i Aikupito. Kafai ne lavea ne te agelu a te toto, ne seki tamate ne ia se tino i te fale tenā. Kae i fale katoa kolā ne seki ai ne toto i mataloa, ne tamate ne te agelu a te Atua a uluma‵tua katoa a tāgata mo manu. Tenā eiloa te 10 o mala.

Mai tua ifo o te mala tenei, ne fai atu a Falao ki tino Isalaelu ke olo keatea. Ne toka a tino katoa o te Atua ke olo, kae ko te po eiloa tenā ne kamata ei o māti atu latou ki tua mo Aikupito.