Te Oloatuga i Loto i te Tai ‵Kula

KILOKE ki te mea ko tupu! Ko Mose tenā mo tena tokotoko ko sisi aka o fakasaga atu ki te Tai ‵Kula. A tino kolā e ‵nofo tasi mo ia i te saogalēmū i te suā feitu ko te kau Isalaelu. Kae ko Falao mo tena kautau kātoa ko ma‵lemu i te tai. Ke onoono aka tatou me ne tupu pefea a te mea tenei.

E pelā mo mea ne tauloto ne tatou, ne fai atu a Falao ki te kau Isalaelu ke tiakina a Aikupito mai tua ifo o te avatuga ne te Atua o te sefulu o mala ki tino Aikupito. Kāti e ‵tusa mo te toko 600,000 tāgata Isalaelu ne olo, fakatasi mo fāfine mo tama‵liki e tokouke. E tokouke foki a nisi tino kolā ne fai mo fai ne tino tali‵tonu ki a Ieova, ne olo fakatasi atu mo te kau Isalaelu. Ne ave katoa ne latou olotou mamoe mo kouti mo pulumakau.

A koi tuai o olo kea‵tea latou, ne fakamolemole atu a tino Isalaelu ki tino Aikupito mō gatu mo mea kolā e faite ki aulo mo siliva. Ne ma‵taku malosi a tino Aikupito, ona ko te ‵toe mala ne oko atu ki a latou. Telā ne avatu ei ne latou ki te kau Isalaelu a mea katoa kolā ne fakamolemole mai ei latou.

I nāi aso mai tua ifo i ei ne oko atu a te kau Isalaelu ki te Tai ‵Kula. I konā ne ma‵nava ei latou. I te vaitaimi tenā, ne kamata o fanoa‵noa a Falao mo ana tāgata me ne uga atu ne latou a te kau Isalaelu ke olo kea‵tea. ‘Ko oti ne talia ne tatou ‵tou pologa ke olo!’ ko olotou muna.

Telā ne toe ‵fuli ei te mafaufau o Falao. Ne fakatoka fakavave ne ia tena kaliota tau mo tena kautau. Ne kamata o afuli ne ia a te kau Isalaelu mo kaliota fakapito e 600, e pelā foki mo nisi kaliota a te kau Aikupito.

I te taimi ne lavea ei ne te kau Isalaelu a Falao mo tena kautau ko olo atu o afuli latou, ne ma‵taku malosi latou. Ko seai se koga ke ‵tele atu latou ki ei. Ko te Tai ‵Kula fua i te lotou suā feitu, kae ko o‵mai a te kau Aikupito i te suā feitu. Kae ne tuku atu ne Ieova se kaumana i te va o ana tino mo te kau Aikupito. Telā ne seki mafai ei ne te kau Aikupito o lavea a te kau Isalaelu ke taua atu ki a latou.

Tenā ne fai atu ei a Ieova ki a Mose ke sisi aka tena tokotoko o fakasaga atu ki te Tai ‵Kula. I te faiga ne ia penā, ne fai ei ne Ieova se matagi lasi mai te saegāla ke agi mai. Ne mavaelua a te tai, kae ne taofi aka ki feitu e lua.

Ne kamata o māti atu a te kau Isalaelu i loto i te tai i te koga telā ko ‵masa pakupaku. Ne manakogina a te fia o itula mō te fia miliona o tino mo olotou manu katoa ke olo atu i loto i te tai ki te suā feitu. I te otiga ne toe mafai ei o lavea atu ne te kau Aikupito a tino Isalaelu. Ko olo atu kea‵tea olotou pologa! Telā ne ‵tele fakavave atu ei latou i loto i te tai o afuli latou.

I te taimi ne olo atu ei latou, ne fai ne te Atua a teka o olotou kaliota ke ‵to keatea. Ne kamata o ma‵taku malosi a te kau Aikupito kae ne kamata o ‵tagi atu latou: ‘A Ieova e kau i te kau Isalaelu o taua mai ki a tatou. Ke na olo atu tatou kea‵tea mai i konei!’ Kae ko tō talimuli latou.

Ne tupu eiloa a te mea tenei i te taimi ne fai atu ei a Ieova ki a Mose ke sisi aka tena tokotoko o fakasaga atu ki te Tai ‵Kula, e pelā mo te mea e lavea ne koe i te ata. Kae i te taimi ne fai ei ne Mose, ne kamata o toe ‵foki a ‵pui vai kae ne ufi i ei a te kau Aikupito mo olotou kaliota. Ne tau‵tali atu a te kautau kātoa ki te kau Isalaelu ki loto i te tai. Kae e seai eiloa se tino Aikupito e tokotasi ne sao i ei!

E pefea te fia‵fia o tino katoa o te Atua ke ‵sao atu latou! Ne usu ne tāgata se pese fakafetai ki a Ieova, kae ne usu atu penei: ‘A Ieova ne manumalo i te taua i se auala fakaofoofogia. Ko oti ne ‵pei ne ia a solofanua mo tino i luga i ei ki loto i te tai.’ Ne puke ne te tuagane o Mose ko Miliama a tena samupelini, kae ne fakaakoako atu ki a ia a fāfine katoa mo olotou samupelini. Kae koi ‵saka latou i te fiafia, ne usu foki ne latou a te pese telā ne usu atu ne tāgata: ‘A Ieova ne manumalo i te taua i se auala fakaofoofogia. Ko oti ne ‵pei ne ia a solofanua mo tino i luga i ei ki loto i te tai.’