Ko Olo Atu a Mose mo Alona ki a Falao

I TE taimi ne foki atu ei a Mose ki Aikupito, ne fai atu ne ia ki tena taina ko Alona a mea katoa e uiga ki vavega konā. Kae i te taimi ne fakaasi atu ei ne Mose mo Alona ki te kau Isalaelu a vavega konei, ne tali‵tonu katoa a tino me ne fakatasi atu a Ieova ki a laua.

Tenā ne olo atu ei a Mose mo Alona ki a Falao. Ne fai atu laua ki tou tagata penei: ‘E fai mai a Ieova te Atua o Isalaelu penei, “Tuku mai oku tino ke olo mō aso e tolu, ko te mea ke mafai ne latou o tapuaki mai ki a au i te vao.”’ Kae ne tali atu a Falao: ‘Au e se talitonu ki a Ieova. Kae ka se talia eiloa ne au a tino Isalaelu ke olo keatea.’

Ne kaitaua a Falao, me ne ma‵nako a tino ki ne taimi ma‵lolo mai olotou galuega ke tapuaki atu ki a Ieova. Telā ne faimālō ei ne ia latou ke momea aka te lotou ga‵lue ‵mafa. Ne ‵losi atu a tino Isalaelu ki a Mose mō te ma‵sei o faifaiga ki a latou, kae ne fanoanoa i ei a Mose. Kae ne fai atu a Ieova ki tou tagata ke se manavase. ‘Ka fai ne au a Falao ke talia ne ia oku tino ke olo,’ ne fai atu a Ieova.

Ne toe olo atu a Mose mo Alona ki a Falao. I te taimi tenā ne fai ne laua se vavega. Ne ‵pei ki lalo ne Alona tena tokotoko, kae ne ‵fuli ki se gata lasi. Kae ne ‵pei foki ki lalo ne tāgata ‵poto a Falao a olotou tokotoko, kae ‵sae mai i ei a gata. Kae kiloke! Ne kai ne te gata a Alona a gata a tāgata ‵poto. Kae ne tumau eiloa a te sē talia ne Falao a tino Isalaelu ke olo keatea.

Tela la, ne oko mai a te taimi ke tuku atu ei ne Ieova se fakaakoakoga ki a Falao. E iloa ne koe me se a te mea ne fai ne ia? Ne aumai a mala e 10, io me ko fakalavelave ‵lasi, ki Aikupito.

Mai tua ifo o te fia o mala, ne uga atu a te fekau a Falao ke vau a Mose, ana muna: ‘Fakagata a te mala, kae ka talia ne au a tino Isalaelu ke olo keatea.’ Kae i te taimi ne gata ei a te mala, ne ‵fuli ne Falao tena mafaufau. Ne seki talia ne ia a tino ke olo. Kae fakamuli loa, i te otiga o te 10 o mala, ne uga atu ei ne Falao a tino Isalaelu ke olo.

E iloa ne koe a mala takitasi e 10? ‵Suke ki te suā itulau kae ke tauloto tatou e uiga ki ei.