Se Tupu Masei ko Pule i Aikupito

E FAIMĀLŌ ne tāgata i konei a tino ke ga‵lue. Kilo atu ki te tagata telā e ‵pago ne ia se tino galue e tokotasi ki se lakau! A tino ga‵lue konei ko te kāiga o Iakopo, kolā ne fakaigoa ki tino Isalaelu. Ako tāgata kolā e faimālō atu ki a latou ke ga‵lue, ko tino Aikupito. Ko fai a te kau Isalaelu mo fai ne pologa a te kau Aikupito. Ne tupu pefea a te mea tenei?

I tausaga e uke ne ‵nofo atu ei a te kāiga lasi o Iakopo i te filemu i Aikupito. A Iosefa, telā ko te ‵toe tagata tāua i Aikupito e tafa atu ki a Falao te tupu, ne tausi atu ki a latou. Kae fakamuli ifo ne mate a Iosefa. Ako te Falao fou, telā ne seki fiafia ki te kau Isalaelu, ne fai mo fai te tupu i Aikupito.

Telā ne fai ei ne te Falao tenei a tino Isalaelu pelā me ne pologa. Kae ne tuku atu a tāgata kolā e se uiga a‵lofa kae fakasauā ke tausi atu ki a latou. Ne faimālō a tino Isalaelu ke ga‵lue malosi i te faitega o fa‵kai mō Falao. Kae ne gasolo aka faeloa o tokouke te aofaki o tino Isalaelu. Mai tua malie ifo ne kamata o ma‵taku a te kau Aikupito i te mea ma tō tokouke a tino Isalaelu kae tō ma‵losi foki.

E iloa ne koe me se a te mea ne fai ne Falao? Ne faipati a ia ki fāfine kolā ne fesoasoani atu ki mātua Isalaelu māfai ko fa‵nau olotou pepe, ana muna: ‘E ‵tau o tamate ne koulua a pepe tāgata katoa.’ Kae ko laua konā ne fāfine ‵lei, kae ne seki tamate ne laua a pepe.

Telā ne tuku atu ei ne Falao a te fakatonuga tenei ki ana tino katoa: ‘Puke a pepe tāgata Isalaelu kae tamate latou. Tuku fua i ei a pepe fāfine ke ola.’ E matagā ‵ki te fakatonuga tenā, i ne? Ke onoono aka tatou ki te auala ne sao ei se pepe tagata e tokotasi.