Ko Fai a Iosua mo Takitaki

NE MANAKO a Mose o fano ki te fenua o Kanana fakatasi mo te kau Isalaelu. Telā ne fakamolemole atu ei a ia: ‘Talia mai au ke fanatu ki te suā feitu o te vaitafe ko te Iolitana, e Ieova, kae ke lavea ne au a te fenua gali.’ Kae ne fai atu a Ieova: ‘Ko lava! Sa toe faipati ki te mea tenā!’ E iloa ne koe me kaia ne fai atu ei ne Ieova a te mea tenā?

Ne fai penā ona ko te mea telā ne tupu i te taimi ne ‵kini ei ne Mose a te kaupapa. Masaua, ko laua mo Alona ne seki fakaaloalo atu ki a Ieova. Ne seki fai atu laua ki tino konā me ko Ieova telā ne aumai ne ia a te vai mai te kaupapa. Ona ko te pogai tenei ne fai atu ei a Ieova me ka se talia ne ia laua ke olo atu ki loto i Kanana.

Tela la, i ne nāi masina mai tua ifo o te matega o Alona, ne fai atu a Ieova ki a Mose: ‘Puke a Iosua, kae fakatu a ia i mua o Eliesa te faitaulaga, pelā foki mo tino katoa. I konā i mua o latou katoa, fai atu ki a latou me i a Iosua ko te takitaki fou.’ Ne fai eiloa ne Mose a mea ne fai atu ne Ieova, e pelā eiloa mo te mea e mafai o lavea ne koe i te ata tenei.

Ne fai atu a Ieova ki a Iosua: ‘Fakamalosi, kae sa mataku. Ka takitaki ne koe a te kau Isalaelu ki loto i te fenua o Kanana telā ko oti ne tauto au ke tuku atu ki a latou, kae ka fakatasi au mo koe.’

Fakamuli ifo ne fai atu a Ieova ki a Mose ke kake aka ki luga i te tāulu o te Mauga o Nepo i te fenua o Moapi. Mai i konā ne mafai ei ne Mose o kilo atu ki te fenua gali o Kanana. Muna a Ieova: ‘Tenei te fenua ne folafola atu ne au ke tuku atu ki tama‵liki a Apelaamo, Isaako, mo Iakopo. Ko talia ne au ke lavea ne koe, kae ka se talia ne au ke fanatu koe ki ei.’

I konā loa, i luga i te Mauga o Nepo ne mate ei a Mose. Ko 120 ei ana tausaga. Koi malosi eiloa a ia, kae koi ‵lei foki eiloa ana mata. Ne fanoa‵noa malosi a tino kae ne ‵tagi me ne mate a Mose. Kae ne fia‵fia latou me ko fai a Iosua mo fai te lotou takitaki fou.