Ne ‵Kini ne Mose a te Kaupapa

KO ‵TEKA atu a te fia tausaga—e 10 tausaga, e 20 tausaga, e 30 tausaga, e 39 tausaga! Kae koi ‵nofo atu eiloa a te kau Isalaelu i te togāvao. Kae ne tausi atu eiloa a Ieova ki ana tino i tausaga katoa konā. Ne fagai ne ia latou ki manai. Ne takitaki atu ne ia latou i te ao ki se pou kaumana, kae takitaki latou i te po ki se pou afi. Kae ko tausaga katoa konei ne seki ma‵sae olotou gatu kae ne seki ‵mae foki olotou vae.

Ne oko atu latou ki te masina muamua o te 40 tausaga talu mai te tiakinaga ne latou o Aikupito. Ne toe ‵nofo atu a te kau Isalaelu i Katesa. Tenei eiloa a te koga ne uga atu mai i ei a sipai e toko 12 ke onoono faka‵lei ki te fenua o Kanana i tausaga e tai kātoa te 40 mai mua atu i ei. A te tuagane o Mose ko Miliama ne mate i Katesa. Kae e pelā mo aso mua, ne toe gaki mai se fakalavelave i konā.

Ne seki mafai o maua ne tino a vai. Telā ne fāmeo atu ei latou ki a Mose: ‘E ‵lei atu moi ne ‵mate matou. Kaia ne aumai ei ne koe matou kea‵tea mo Aikupito ki te koga matagā tenei telā e seai eiloa se mea e ola i ei? E seai ne saito, seai ne mati, seai ne vine, e seai ne pomekalanite. E seai foki eiloa ne vai ke inu ki ei.’

I te taimi ne olo atu ei a Mose mo Alona ki te faleie o ‵talo, ne fai atu a Ieova ki a Mose: ‘Fakamaopoopo mai a tino. Kae i mua o latou katoa, faipati atu ki te kaupapa tenā i konā. Ka lava a vai e ‵tafe mai i ei mō tino mo manu katoa.’

Tela la, ne fakamaopoopo ne Mose a tino, ana muna: ‘Faka‵logo mai, a koutou kolā e seai eiloa se otou tali‵tonu ki te Atua! E mata, e ‵tau o aumai ne maua mo Alona a vai mai i te kaupapa tenei mō koutou?’ Telā ne ‵kini fakalua ei ne Mose a te kaupapa, kae ne ‵sali mai ei a vai e uke mai i te kaupapa. Ne lava a vai mō tino mo manu katoa ke inu ki ei.

Kae ne kaitaua a Ieova ki a Mose mo Alona. E iloa ne koe me kaia? Me ne fai atu a Mose mo Alona me ne aumai ne laua a te vai mai te kaupapa. Kae ko te tonuga eiloa, ne fai ne Ieova te mea tenā. Kae ona ko te mea ne seki fai atu ne Mose mo Alona a te munatonu e uiga ki te mea tenei, ne fai atu ei a Ieova me ka fakasala ne ia laua. ‘Ka se takitaki ne koulua oku tino ki loto i Kanana,’ ko ana muna.

E seki leva kae tiakina ne te kau Isalaelu a Katesa. Mai tua o se taimi toetoe ne oko atu latou ki te Mauga o Holo. I konā, i luga i te mauga, ne mate ei a Alona. Ko 123 ana tausaga i te taimi ne mate ei a ia. Ne fanoa‵noa a te kau Isalaelu, kae ne ‵tagi fanoa‵noa a tino katoa i aso e 30 mō Alona. A tena tama tagata ko Eliesa ne fai mo fai a te suā faitaulaga sili o te fenua o Isalaelu.