Te Toko 12 Sipai

KE NA kilo atu ki fuagālakau e amo aka ne tāgata konei. Onoono aka ki te ‵lasi o kau fui vine. E ‵tau o tokolua a tāgata e sau ne laua i luga i se amo. Kae onoono aka ki mati mo pomekalanite. Ne aumai mai i fea a fuagālakau ‵gali konei? Mai te fenua o Kanana. Masaua, a Kanana ko te koga ne ‵nofo ei a Apelaamo, Isaako, mo Iakopo. Kae ona ko te ogegā meakai i konā, ne olo atu ei a Iakopo fakatasi mo tena kāiga ki Aikupito. I te taimi tenā, kāti ko 216 tausaga mai tua ifo i ei, ne takitaki atu ei ne Mose a te kau Isalaelu ke foki atu latou ki Kanana. Ko oti ne oko atu latou ki se koga i te togāvao e igoa ki a Katesa.

Ne ‵nofo atu a tino ma‵sei i te fenua o Kanana. Telā ne uga atu ei ne Mose a te toko 12 sipai, kae fai atu ki a latou: ‘Taumafai ke iloa aka me e tokofia a tino e ‵nofo i konā, kae e pefea foki te lotou ma‵losi. Onoono aka me e ‵lei a te laukele mō ‵toki a mea. Kae masaua ke aumai ne koutou ne nāi fuagalakau.’

I te taimi ne ‵foki mai ei a sipai ki Katesa, ne fai atu latou ki a Mose: ‘Ko se faka‵tau eiloa i te ‵lei o te fenua.’ Ke fakamaoni aka a te mea tenā, ne fakaasi atu ne latou ki a Mose a fuagālakau. Kae ne fai atu a te toko 10 sipai mai i a latou: ‘A tino kolā e ‵nofo i ei ne tino ‵lasi kae ‵mafi. Ka tamate tatou māfai e taumafai tatou o puke a te fenua.’

Ne ma‵taku a te kau Isalaelu i te lagonaga ne latou a te mea tenei. ‘Ne ‵lei atu moi ne ‵mate tatou i Aikupito io me i te togāvao tenei,’ ne fai mai latou. ‘Ka tamate tatou i te taua, kae ka puke fakapagota ‵tou avaga mo ‵tou tama‵liki. Ke na filifili aka ne tatou se takitaki fou ke sui ei a Mose, kae ke na toe ‵foki atu ki Aikupito!’

Kae e tokolua sipai mai i a latou ne tali‵tonu ki a Ieova, kae ne taumafai o fakafilemu aka a tino. A lā igoa ko Iosua mo Kalepo. Ne fai atu laua: ‘Sa ma‵taku. A Ieova e fakatasi mo tatou. Se mea faigofie fua ke puke a te fenua.’ Kae ne seki faka‵logo a tino. Ne ma‵nako foki eiloa latou ke tamate a Iosua mo Kalepo.

A te mea tenei ne fai ei a Ieova ke kaitaua malosi, kae ne fai atu a ia ki a Mose: ‘E seai eiloa se tino mai i te 20 tausaga o fano ki luga ka fano ki loto i te fenua o Kanana. Ko oti ne lavea ne latou a vavega ne fai ne au i Aikupito mo te togāvao, kae koi tumau eiloa te lotou sē tali‵tonu mai ki a au. Tela la, ka takase‵se latou i te togāvao mō tausaga e 40 ke oko eiloa ki te taimi e mate ei a te ‵toe tino. Ko Iosua fua mo Kalepo ka olo atu ki loto i te fenua o Kanana.’