Setema

Ne tuku atu ne te Atua ki a Iesu a te malosi ke faka‵lei a fakalavelave katoa o tino. E auala i ana vavega, ne fakaasi mai ne Iesu me maua ne ia te malosi ke fakaseai a fakalavelave faiga‵ta kolā e se mafai o faka‵lei aka ne tatou i a tatou eiloa. E pelā mo te malosi e maua ne ia ke fakasaoloto tatou mai te māfuaga o fakalavelave o tino—ko te agasala telā ne fa‵nau mai mo tatou mo ana ikuga ma‵sei, ko masaki mo te mate. (Mata. 9:​1-6; Loma 5:​12, 18, 19) Ne fakamaoni mai i ana vavega ‵mana konā me e mafai eiloa o faka‵lei ne ia a “vaegā” masaki katoa kae toe faka‵tu aka foki a tino ‵mate. (Mata. 4:23; Ioa. 11:​43, 44) E se gata i ei, e maua ne ia te ‵mana ke pule faka‵lei atu ki matagi ma‵losi kae fakasaoloto a tino mai agaga ma‵sei. (Male. 4:​37-39; Luka 8:2) Ko oko eiloa i te fakamalosi loto ke iloa atu me ne tuku atu ne Ieova a te vaegā ‵mana tenā ki lima o tena Tama! E mafai o tali‵tonu katoatoa tatou me ka fakataunu eiloa a fakamanuiaga i aso mai mua e auala i te Malo o te Atua. A vavega kolā ne fai ne Iesu i tena nofoga i te lalolagi nei, e akoako mai ei me i mea kolā ka fai ne ia e pelā me ko te Tupu i te Malo o te Atua, ka sili fakafia atu i te ‵lei. w23.04 3 ¶5-7

Kafai e nofo atu koe i fakapotopotoga ‵lasi kae ko se lavea sāle i ei tou lima, e mafai o tofotofogina koe ke se toe fai au tali. Kae ke mo a ma ‵fiu koe. Fakatoka au tali kese‵kese mō fakatasiga katoa. Me kafai e seki fili koe ke tali i te kamataga o te fakatasiga, koi mafai loa o maua se avanoaga ke fai sau tali i vaega ki tua o te fakatasiga. Kafai e fakatoka koe ki te Sukesukega ki te Faleleoleo Maluga, mafaufau ki te auala e soko ei a palakalafa takitasi ki te matua o te mataupu. Kafai e fai penā, ka isi eiloa sau tali e mafai o fai i te mataupu tenā. E se gata i ei, e mafai o fakatoka au tali ki palakalafa kolā e fakamatala mai ei a muna‵tonu ‵loto kolā e faigata ke fakamatala. Kaia? Me e mafai o se tokouke a tino e sisi olotou lima i palakalafa konā. Kae e a māfai koi faigata loa o maua sou avanoaga ke fai sau tali? Fai ki te taina e fai ne ia te akoga mai mua o kamata te fakatasiga te palakalafa telā e manako koe ke tali i ei. w23.04 21-22 ¶9-10

Ne loto fiafia Iosefa o fakalogo ki tulafono a Ieova, kae ne fai i ei a ia mo fai se tagata avaga ‵lei. E tolu taimi ne maua ne ia fakatonuga mai te Atua e uiga ki tena kāiga. Ne fakalogo fakavave a ia ki fakatonuga konā, faitalia me manakogina ke fai ne ia ne fakama‵fuliga ‵lasi ‵ki. (Mata. 1:20; 2:​13-15, 19-21) Mai te tautali ki fakatonuga a te Atua ne puipui ne Iosefa a Malia, fesoasoani atu ki tou fafine, kae tausi atu ki a ia. Mafaufau la ki te auala ne fai ei ne faifaiga a Iosefa ke momea aka te lasi o te alofa mo te āva o Malia ki tou tagata! Tāgata a‵vaga, e mafai o fakaakoako koutou ki a Iosefa mai te ‵sala atu ki pati fakatonutonu kolā e fakavae ki te Tusi Tapu e uiga ki te tausiga o otou kāiga. Kafai e fakagalue ne koutou a pati fakatonutonu konei, faitalia foki loa me manakogina i ei ke fai ne koutou ne fakama‵fuliga ‵lasi, ko fakaasi atu eiloa ne koutou te otou a‵lofa ki otou avaga kae fakamalosi aka i ei te fesokotakiga i loto i te otou olaga avaga. Ne fai mai se tuagane i Vanuatu, telā ko 20 tupu tausaga ne avaga i ei, penei: “Kafai e ‵sala kae fakagalue ne taku avaga a fakatonuga a Ieova, e fai ei ke āva malosi au ki a ia. E maua ne au se lagonaga tokagamalie, kae talitonu foki ki ana fakaikuga e fai.” w23.05 21 ¶5

A tino Iutaia kolā ne toe ‵foki mai Papelonia ne fai mo “tino tapu” ki te lotou Atua. (Teu. 7:6) Kae e se fakauiga te mea tenā, me e se manakogina ke fai ne latou a ‵fuliga ko te mea ke fakafiafia atu ki a Ieova. E tokouke a tino Iutaia ne fa‵nau i Papelonia, ko masani latou ki mafaufauga mo tulaga o te kau Papelonia. I se fia sefulu tausaga mai tua o te ‵toe ‵fokiatuga o tino Iutaia muamua ki Isalaelu, ne poi te kovana ko Neemia ke iloa atu me i tama‵liki kolā ne fa‵nau i Isalaelu ne seki tauloto lele eiloa ki te ‵gana a tino Iutaia. (Teu. 6:​6, 7; Nee. 13:​23, 24) E mafai pefea ne tama‵liki konā o tauloto ke a‵lofa kae tapuaki ki a Ieova māfai e se malamalama latou i te ‵gana Epelu—te ‵gana ne tusi ki ei a te Muna a te Atua? (Esela 10:​3, 44) Tela la, ne ‵tau o fai ne tino Iutaia konā a ‵fuliga ‵lasi e manakogina, kae ka faigofie atu ki a latou ke fai a ‵fuliga konā i Isalaelu, te koga telā ko kamata o toe fakatu aka i ei a te tapuakiga ‵ma.—Nee. 8:​8, 9. w23.05 15 ¶6-7

Se mea fakafanoanoa me faitalia te lasi o ‵tou manakoga tonu io me ko te ‵saga tonu atu o tatou, e mafai eiloa o isi se mea e fakalavelave mai. E pelā mo “mea ‵tupu fakafuasei” e mafai loa o kaisoa ne ia ‵tou taimi kolā e manakogina ke fakataunu ‵tou fakamoemoega. (Fai. 9:11) E mafai o tupu se fakalavelave telā e fakavāivāi mai kae fai ei ke se lava ‵tou malosi. (Faata. 24:10) A ‵tou tulaga se ‵lei katoatoa e mafai o fai ei tatou ke fai a mea kolā e se aoga ki te fakataunuga o ‵tou fakamoemoega. (Loma 7:23) Io me kāti ko tai fi‵ta tatou. (Mata. 26:43) Ne a mea e mafai o fesoasoani mai māfai ko fakalavelave mai se mea io me māfai ko se ‵lei te aso o tatou? Masaua me kafai e isi se mea e fakalavelave atu e se ko tena uiga me ko faigata ke fakataunu tou fakamoemoega. E fai mai te Tusi Tapu me uke taimi e fe‵paki tatou mo fakalavelave mo tulaga faiga‵ta. Kae e fakaasi manino mai foki i ei me e mafai eiloa o toe ‵tu aka tatou. E tonu, a te gasolo faeloa ki mua faitalia a mea e fakalavelave mai, e fakamaoni atu ei ne koe ki a Ieova me manako koe o fakafiafia a ia. Ko tafaga la te fiafia o Ieova māfai e lavea ne ia koe e tumau i te kausaki atu ke fakataunu tou fakamoemoega! w23.05 30 ¶14-15

A te galuega paenia e fesoasoani atu ke iloa ne se talavou o ga‵lue fakatasi mo tino kese‵kese i se auala magoi. E fesoasoani atu foki ke iloa ne ia o fakasoa faka‵lei ana tupe ke lava tena tausiga. (Fili. 4:​11-13) A te auala ‵lei ke kamata o kau atu ki te taviniga tumau, ko te paenia lagolago, kae ne fesoasoani atu ke toka se tino o paenia tumau. A te paenia e ‵tala mai ne ia a avanoaga e uke ki nisi vaega o te taviniga tumau, pelā mo te galue i galuega fakatu‵tu a te fakapotopotoga io me i te Peteli. E ‵tau o kausaki atu a tāgata Kelisiano ke fetaui ‵lei latou ke tavini atu ki olotou taina mo tuagane e pelā me ne toeaina i te fakapotopotoga. E fai mai te Tusi Tapu me i tāgata kolā e kausaki atu mō te tauliaga tenei e “manakogina ke fai ne [latou] a galuega ‵lei.” (1 Timo. 3:1) Muamua la, e ‵tau o fetaui ‵lei se taina ke fai pelā me se tavini fesoasoani. A tavini fesoasoani e ‵lago atu ki toeaina i auala aoga e uke. E tavini atu a toeaina mo tavini fesoasoani mo te loto maulalo ki olotou taina mo tuagane kae ga‵lue mo te loto finafinau i te galuega talai. w23.12 28 ¶14-16

Ko 16 a tausaga o te Tupu ko Iosia kae kamata o ‵sala atu ki a Ieova. Ne manako a ia o tauloto e uiga ki a Ieova kae fai Tena loto. Kae ne seki faigofie te olaga ki te tupu foliki tenei. Ne ‵tau o tu a ia mō te tapuakiga ‵ma i te taimi ne tapuaki atu ei a tino e tokouke ki atua ‵se. Kae ne fai eiloa ne ia te mea tenā! Koi tuai o kātoa te 20 tausaga o Iosia, ne kamata o tapale kea‵tea ne ia a tapuakiga ‵se mai te fenua. (2 Nofo. 34:​1, 2) Faitalia foki loa tou foliki, e mafai o fakaiku aka ke tautali atu koe i te fakaakoakoga a Iosia mai te ‵sala atu ki a Ieova kae tauloto ki Ana uiga ‵gali. Ka fai ne koe te mea tenei, ka fakamalosi atu ei ke tuku atu koe ki a ia. Se a te uiga o te tukuatuga tenā ki tou olaga i aso takitasi? A Luke, telā ne papatiso kae ko 14 ana tausaga ne fai mai, “Mai te taimi nei, ka fakamuamua ne au a te taviniga ki a Ieova i toku olaga kae taumafai o fakafiafia a ia.” (Male. 12:30) Se fakamanuiaga eiloa mō koe, māfai e fai foki koe penā! w23.09 11 ¶12-13

I te tusiga ne te apositolo ko Paulo te tusi tenei, kae seki kātoa te tasi tausaga ne fakatu i ei te fakapotopotoga i Tesalonia. Kāti a tāgata kolā ne fai te takitakiga i ei e se apo malosi kae kāti e isi ne mea ‵se ne fai ne latou. Kae koi manakogina loa ke fakaasi atu te āva ki a latou. I te pili mai o te fakalavelave lasi, kāti ka sili atu te manakogina ke fakalago‵lago malosi tatou ki te takitakiga a toeaina i ‵tou fakapotopotoga i te taimi tenā i lō te taimi nei. Kāti ka oko mai te taimi ka se mafai o fesokotaki tatou mo taina i ‵tou laumua mo te ofisa lagolago; tela la, e tāua ke na fakamasani tatou o fakaasi te alofa mo te āva ki ‵tou toeaina i te taimi nei. Faitalia me ne a mea e mafai o ‵tupu, ke na tausi faka‵lei ‵tou mafaufau ke ‵lei, mai te sē ‵saga atu ki olotou vāivāiga, kae ‵saga atu ki te manatu me ko Ieova mo Keliso e takitaki ne lāua a tāgata fakamaoni konei. E pelā eiloa mo te puloutau o se sotia e puipui ne ia tena ulu, e puipui foki ne te ‵tou fakamoemoega ki te fakaolataga a ‵tou mafaufauga. E iloa ne tatou me e seai se aoga o mea a te lalolagi konei e ofo mai ki a tatou. (Fili. 3:8) E fesoasoani mai ‵tou fakamoemoega ke tokagamalie tatou kae ke toka foki. w23.06 11-12 ¶11-12

A tino kolā ne lagona ne latou te “fafine valea” e ‵tau o fai se lotou fakaikuga: E mata, ka talia ne latou tena ‵kamiga io me ikai? E isi ne pogai tāua e ‵tau ei ‵kalo kea‵tea tatou mai te aofia i faifaiga fakatauavaga sē ‵tau. E fai mai te tala me ne fai atu ne te “fafine valea” a pati konei: “A te vai ne kaisoa e magalo atu.” (Faata. 9:17) Ne a “vai ne kaisoa”? E faka‵pau ne te Tusi Tapu a faifaiga fakatauavaga e fai ne se tauavaga ki vai kolā e maua i ei te malosi fou. (Faata. 5:​15-18) A te tagata mo te fafine kolā ne fakaipoipo faka‵lei e saoloto o fai ne lāua a amioga fakatauavaga i a lāua eiloa. Kae e ‵kese eiloa mo “vai ne kaisoa.” E mafai o fakasino atu ki faifaiga fakatauavaga kolā e tapu. Ko faifaiga kolā e fai ‵funa, e pelā loa mo te tino kaisoa e kaisoa ne ia a mea i se auala ‵funa. A “vai ne kaisoa” e mafai o foliga ma‵galo māfai e mafau‵fau a tino kolā ne aofia i ei me ka se iloa ne nisi tino a te agasala matagā tenā. Ma‵faga o mafaufauga faka‵se tino! E lavea ne Ieova a mea katoa. E seai se mea e sili atu i te fakalogo‵mae māfai ko galo i a tatou tena taliaga, kae e sē se mea “magalo” te mea tenā.—1 Koli. 6:​9, 10. w23.06 22 ¶7-9

Kae pefea la māfai ko iloa ne koe me ko se ‵talo atu koe mo tou loto kātoa kae ko se fiafia foki koe ki tau galuega talai? Ke mo a ma fakaiku fakavave aka me ko galo i a koe te agaga tapu o Ieova. A koe se tino sē ‵lei katoatoa, kae e mafai fua o mafuli‵fuli ou lagonaga. Kafai ko kamata o galo atu tou loto finafinau, ke mafaufau ‵loto ki te fakaakoakoga a te apositolo ko Paulo. E tiga loa ne taumafai a ia o fakaakoako ki a Iesu, ne iloa ne ia me isi ne taimi ka se lasi tena loto finafinau e pelā mo nisi taimi. Ne fakaiku aka ne Paulo ke fakataunu te faiga o tena galuega talai faitalia ana lagonaga i te taimi tenā. Ke mo a foki ma talia ne koe ke fakavae au fakaikuga ki ou lagonaga sē ‵lei katoatoa. Ke na fakaiku aka ke fai ne koe te mea tonu faitalia ou lagonaga i te taimi tenā. Kafai e fai faeloa ne koe te mea tonu, e mafai eiloa o ma‵fuli ou lagonaga fakamuli ifo.—1 Koli. 9:16. w24.03 11-12 ¶12-13

E mafai o fakaasi atu te ‵tou a‵lofa ki taina mo tuagane mai te talia a latou ke fai taugasoa mo tatou. (2 Koli. 6:​11-13) E tokouke i a tatou e ‵kau ki fakapotopotoga kolā e isi ne taina mo tuagane kolā e kese‵kese a olaga ne ‵tupu aka ei latou mo olotou uiga. E mafai o momea aka te lasi o te ‵tou a‵lofa ki a latou mai te ‵saga atu fua ki olotou uiga ‵lei. Kafai e fakamasani tatou o faka‵pau ‵tou kilokiloga ki nisi tino e pelā mo Ieova, ko fakamaoni atu i ei me a‵lofa tatou ki a latou. Ka tāua ‵ki eiloa te alofa i te taimi o te fakalavelave lasi. Kafai ko kamata te fakalavelave lasi tenā, ka maua ne tatou i fea te puipuiga? Mafaufau ki te fakatonuga a Ieova ki mea e ‵tau o fai ne ana tino māfai ko taua atu a Papelonia i aso mua: “Olo, e oku tino, ulu ki otou potu tafa ki loto, kae ‵pono otou mataloa mai i otou tua. ‵Muni mō se taimi toetoe ke oko ki te taimi ko seke ei te kaitaua o te Atua.” (Isa. 26:20) E foliga mai me e fakasino foki a pati konā ki a tatou i te taimi o te fakalavelave lasi. w23.07 6-7 ¶14-16

Fai ke iloa ne tino i a koe se tino uiga faigofie. Fesili ifo ki a koe: ‘E mata, e ‵kilo mai a tino ki a au e pelā me se tino uiga faigofie, e loto malamalama, kae taliagofie ne au a mea? Io me ‵kilo mai latou ki a au me e uiga faigata, sauā, io me fai ‵tonu? E mata, e fakalogologo mua au ki nisi tino kae talia olotou manatu māfai e fetaui ‵lei?’ A te lasi o ‵tou uiga faigofie e fakaasi mai ei a te lasi o te fakaakoako o tatou ki a Ieova mo Iesu. E manakogina ke uiga faigofie tatou māfai ko ma‵fuli ‵tou fakanofonofoga. A fakama‵fuliga penā e mafai o fai ei ke ‵sae aka a fakalavelave seki fakamoemoegina. Kāti se masaki fakafuasei. Io me ko mafuli te tulaga o mea tau tupe io me ko mea fakapolitiki i te fenua e ‵nofo tatou i ei kae ko fai i ei ke faigata te olaga. (Fai. 9:11) Ke oko foki loa ki se fakamafuliga ki ou tofiga i te fakapotopotoga e mafai o faiga‵ta ‵ki. E mafai eiloa o manuia tatou māfai e fai ne tatou a mea e fa konei: (1) talia te tulaga ko oko ki ei, (2) ‵kilo ki aso mai mua, (3) ke maua se kilokiloga ‵lei, mo te (4) fai a mea mō nisi tino. w23.07 21-22 ¶7-8

Koi tamataene eiloa te pelofeta ko Tanielu i te taimi ne puke ei a ia ne tino Papelonia e pelā me se pagota i te taimi o te taua kae avatu kea‵tea mai tena fenua. Kae ne fia‵fia a ofisa o te kau Papelonia ki a Tanielu. Ne lavea ne latou “a mea e lavea ki mata”—me i a Tanielu e “seai ne ana pona, e tinogali,” kae ko ia ne vau mai se kāiga tāua ‵ki. (1 Samu. 16:7) Ona ko pogai konā, ne akoako ne tino Papelonia a ia ke fai pelā me se tino tāua i te lotou fenua. (Tani. 1:​3, 4, 6) Ne alofa a Ieova ki a Tanielu ona ko te vaegā olaga ne filifili ne te tamataene talavou tenei. A te ‵tonuga loa, kāti ko 20 tupu fua a tausaga o Tanielu i te taimi ne taku ei a ia ne Ieova e pelā me se tino amiotonu fakatasi mo Noa mo Iopu, ko tāgata kolā ne fakamāumāu ne latou te fia sefulu tausaga ke ati aka se igoa ‵lei i mua o te Atua. (Kene. 5:32; 6:​9, 10; Iopu 42:​16, 17; Eseki. 14:14.) Kae ne alofa faeloa a Ieova ki a Tanielu i tena olaga kātoa kae fakaofoofogia.—Tani. 10:​11, 19. w23.08 2 ¶1-2

Kafai ko fakaiku ne koe ke ‵togi se fale, e manako koe ke lavea ne koe ana feitu katoa mo mea katoa e uiga ki tou fale. E mafai foki o fai ne tatou se mea tai ‵pau māfai e fai‵tau kae suke‵suke ki te Tusi Tapu. Kafai e faitau fakavave koe ki ei, ka tauloto fua koe ki mea faigofie—ko “akoakoga fakavae o folafolaga tapu mai te Atua.” (Epe. 5: 12) I lō te fai penā, ke fano “ki loto” e pelā mo koe e ulu ki se fale, ke iloilo a fakamatalaga ‵loto i ei. A te ‵toe auala ‵lei ke sukesuke ki te Tusi Tapu ko te onoono aka me fetaui pefea a mea e fakaasi mai i se koga e tasi mo mea e fakaasi mai i te suā koga. Taumafai ke malamalama koe i mea o te munatonu kolā e talitonu koe ki ei kae kaia foki e talitonu ei koe ki ei. Ke malamalama faka‵lei i te Muna a te Atua, e ‵tau o tauloto tatou ki muna‵tonu ‵loto mai te Tusi Tapu. Ne fakamalosi atu te apositolo ko Paulo ki ana taina mo tuagane Kelisiano ke sukesuke faka‵lei ki te Muna a te Atua ko te mea ke “malamalama katoatoa i te lauefa, te loa, te maluga, mo te ‵poko o te munatonu.” Tenā ko “‵mautakitaki eiloa [olotou] aka” i te fakatuanaki. (Efe. 3:​14-19) E ‵tau foki o fai tatou penā. w23.10 18 ¶1-3

E maua i te Tusi Tapu a nisi tala e uke o tino kolā ne kufaki. Kaia e se fai ei ne au sukesukega ki tala konā? E pelā mo Tavita, e tiga loa ko leva ne faū a ia ke fai mo tupu o Isalaelu, kae ne ‵tau o faka‵tali a ia i se fia tausaga ke pule mai pelā me se tupu. Ne tapuaki mo te fakamaoni a Simeona mo Ana ki a Ieova i te taimi ne ‵nofo fakatalitali lāua ki te oko mai o te Mesia telā ne folafola mai. (Luka 2:​25, 36-38) Kafai e sukesuke koe ki tala konei, ‵sala ki tali o fesili konei: Se a te mea kāti ne fesoasoani ki te tino tenei ke fakaasi atu te kufaki? Ne maua pefea ne ia a mea aoga ona ko tena kufaki? E mafai pefea o fakaakoako au ki a ia? Kāti ka aoga foki ki a koe a te tauloto e uiga ki tino kolā ne seki fakaasi atu te kufaki. (1 Samu. 13:​8-14) Kāti ka fesili ifo koe: ‘Se a te mea ne fai ei ke se lava te lotou kufaki? Ne a ikuga sē ‵lei ne maua ne latou?’ w23.08 25 ¶15

Ne tumau te apositolo ko Petelu i te fakamaoni; ne seki talia ne ia se mea ke taofi ei a ia mai te tautali atu i a Iesu. Ne fakaasi atu ne ia tena fakamaoni i te taimi ne fai atu ei ne Iesu se mea telā ne seki malamalama i ei ana soko. (Ioa. 6:68) E tokouke a tino ne tiaki ne latou a Iesu, e aunoa mo te faka‵tali io me ‵sala atu ki ne fakamatalaga. Kae e se ko Petelu. Ne iloa ne ia me ko Iesu fua e maua i ei a “muna o te ola se-gata-mai.” Ne iloa ne Iesu me ka tiaki a ia ne Petelu mo nisi apositolo. Kae ne fakaasi atu eiloa ne Iesu tena loto talitonu ki a Petelu me ka toe foki mai kae tumau i te fakamaoni. (Luka 22:​31, 32) Ne malamalama a Iesu me “e manako ki ei te loto, kae ko vāivāi te foitino.” (Male. 14:38) Tela la, i te taimi ne fakafiti ei ne Petelu a ia, ne seki ‵fiu vave a Iesu i tena apositolo. Ne fakasae atu a Iesu telā ko oti ne ‵toe tu aka ki a Petelu—i te taimi telā ne nofo tokotasi ei a Petelu. (Male. 16:7; Luka 24:34; 1 Koli. 15:5) Ko oko loa i te fakamalosi loto a te mea tenā ki te apositolo loto vāivāi! w23.09 22 ¶9-10

E fakamagalo io me pulou ne te Atua a agasala a latou kolā e fakatuanaki ki a ia. E fakamagalo katoatoa ne ia latou kae fakapuli atu olotou agasala. (Sala. 32:​1, 2) E kilo atu a ia ki tino konā e pelā me ne tino e seai ne olotou agasala kae e amio‵tonu ona ko te lotou fakatuanaki. E tiga loa ne taku a Apelaamo, Tavita, mo nisi tino tapuaki fakamaoni a te Atua me e amio‵tonu, kae koi fai eiloa latou e pelā me ne tino agasala kolā e se ‵lei katoatoa. Kae ona ko te lotou fakatuanaki, ne kilo atu a te Atua ki a latou e pelā me ne tino e seai ne olotou mea ‵se, maise māfai e fakatusa ki a latou kolā e se tapuaki atu ki a ia. (Efe. 2:12) E pelā mo te mea ne fakaasi manino mai ne te apositolo ko Paulo i tena tusi, e ‵tau o fakatuanaki tatou ko te mea ke fai tatou mo taugasoa o te Atua. Tenā loa te mea ne fai ne Apelaamo mo Tavita, kae mafai foki o fai tatou penā. w23.12 3 ¶6-7

E maua ne Kelisiano katoa i aso nei a te tauliaga ke ofo atu a taulaga ki a Ieova mai te fakaaogaga o olotou taimi, malosi mo kope ke fakalauefa atu i ei a manakoga o te Malo o te Atua. E mafai o fakaasi atu me e fakatāua ne tatou a te ‵tou tauliaga ke tapuaki atu ki a Ieova mai te ofoatuga o ‵tou toe mea ‵lei ki a ia. Ne faka‵mafa atu ne te apositolo ko Paulo a nisi vaega o ‵tou tapuakiga kolā e se ‵tau eiloa o manatu mā‵ma ki ei. (Epe. 10:​22-25) E aofia i mea konei ko te fakapili‵pili atu ki a Ieova i ‵talo, folafola atu te ‵tou fakamoemoega ki tino katoa, maopoopo fakatasi e pelā me se fakapotopotoga, kae fakamalosi te suā tino ki te suā tino “maise eiloa me ko iloa ne [tatou] me i te aso [o Ieova] ko pili mai.” I te fakaotiotiga o te tala i te Fakaasiga, ne fai mai ne te agelu a Ieova a pati konei mai lalo fakalua taimi, ke faka‵mafa mai ei te tāua: “Tapuaki ki te Atua!” (Faka. 19:10; 22:9) Ke mo a ma puli i a tatou a te munatonu faka-te-agaga ‵loto tenei e uiga ki te faletapu sili faka-te-agaga a Ieova mo te tauliaga tāua ko maua ne tatou ke tapuaki atu ki te ‵tou Atua sili! w23.10 29 ¶17-18

A tatou katoa e ma‵nako o “fakatau a‵lofa.” Kae e tāua ke masaua me ne fakailoa mai a Iesu me ‘ka gasolo ifo o se a‵lofa a tino e tokouke.’ (Mata. 24:12) Ne seki fai mai a Iesu me ka tokouke ana soko ka sē fakatau a‵lofa. Kae e ‵tau o tumau tatou i te matapula‵pula ke mo a ma pokotia tatou i te kilokiloga sē alofa a tino o te lalolagi. E uiga ki ei, ke na mafau‵fau tatou ki te fesili tāua tenei: E isi se auala ke tofotofo aka ei me e mata, e malosi ‵tou a‵lofa ki ‵tou taina io me ikai? Tasi te auala ke fakaiku aka me e malosi te ‵tou a‵lofa, ko te sukesuke ki te auala e ‵saga atu ei tatou ki tulaga o te olaga. (2 Koli. 8:8) Tasi mai i ei, ko te mea telā ne fakasae mai ne te apositolo ko Petelu: “E sili atu i mea katoa, ke fakatau a‵lofa koutou, me e ‵tao ne te alofa a agasala e uke.” (1 Pe. 4:8) Tela la, a vāivāiga mo te tulaga sē ‵lei katoatoa o ‵tou taina e mafai o fai pelā me se tofotofoga ki te ‵tou a‵lofa. w23.11 10-11 ¶12-13

E se mafai o faka‵logo tatou ki te fakatonuga a Iesu e uiga ki te alofa māfai e a‵lofa fua tatou ki nisi tino i te fakapotopotoga kae e se ko nisi tino. E tonu, e mafai o ‵pili atu tatou ki nisi tino i lō nisi tino, e pelā mo Iesu. (Ioa. 13:23; 20:2) Kae ne fakamasaua mai a Petelu me e ‵tau o taumafai tatou ke fakaasi atu te “alofa fakataina”—ko te alofa fakakāiga—ki ‵tou taina mo tuagane katoa. (1 Pe. 2:17 ) Ne fakamalosi mai Petelu ke “fakatau a‵lofa malosi la koutou i a koutou eiloa i otou loto.” (1 Pe. 1:22) I te mataupu kātoa, a te alofa “malosi” e aofia i ei te fakaasiatuga o te alofa ki se tino faitalia me faigata ke fakaasi atu ne koe te alofa ki a ia. E pelā me se fakaakoakoga, e a, māfai ne fai ne se taina ke kaitaua io me logo‵mae koe? Kāti te lagonaga muamua e oko mai ko te taui ma sui i lō te fakaasi atu te alofa. Kae ne tauloto ne Petelu mai i a Iesu me i te Atua e se fiafia ki te taui ma sui. (Ioa. 18:​10, 11) Ne tusi mai a Petelu: “Ke se taui atu te masei ki te masei io me ko pati fakama‵sei ki pati fakama‵sei. I lō te fai penā, toe taui atu ki se fakamanuiaga.” (1 Pe. 3:9) Ke na fakamalosi eiloa koe ne te alofa malosi ke fakaasi atu te atafai mo te saga tonu atu. w23.09 28-29 ¶9-11

E ofo faeloa tatou i te gasolo vave o matua se tamaliki. A te ‵tupuakaga tenei e foliga mai pelā me se mea ne tupu fakafuasei. Kae ke matua ‵lei se tino e pelā me se Kelisiano, e manakogina a taumafaiga e uke. (1 Koli. 13:11; Epe. 6:1) Ke taunu te fakamoemoega tenā, e ‵tau o ‵pili ‵tou va fakataugasoa mo Ieova. E manakogina foki ne tatou a tena agaga tapu i te taimi e ati aka ei ne tatou a uiga o te Atua, tauloto ki atamai aoga, kae fakatoka mō tiute i aso mai mua. (Faata. 1:5) Ne faite ne Ieova a te tagata mo te fafine. (Kene 1:27.) E laveagofie fua te ‵kese o te tagata mai te fafine, kae e ‵kese foki lāua i nisi feitu. E pelā me se fakaakoakoga, ne faite ne Ieova te tagata mo te fafine ke mafai o fakataunu ne lāua a tiute kese‵kese, tela la, e ‵tau o ati aka ne lāua a uiga mo atamai e manakogina ke mafai o fakataunu a lā tiute konā.—Kene. 2:18. w23.12 18 ¶1-2

E mata, ne manako a Iesu ke fakaaoga ne nisi tino a te igoa totino o tena Tamana? Ao. Kāti e tali‵tonu a nisi takitaki lotu me e se ‵tau o takutaku te igoa o te Atua me ko tō ‵malu, kae ne seki taofi aka a Iesu ne akoakoga sē ‵tonu konā mai te fakaaloalo atu ki te igoa o tena Tamana. Mafaufau ki te taimi ne faka‵lei ne ia se tagata e pukea ne se temoni i te fenua o tino Kelasa. Ne ma‵taku a tino kae fakamolemole atu ki a Iesu ke fano kea‵tea, tenā ne seki nofo ei a ia i te kogā fenua tenā. (Male. 5:​16, 17) Kae ko Iesu ne manako ke fakasalalau atu te igoa o Ieova i konā. Tenā ne fakatonu atu a ia ki te tagata ne faka‵lei ne ia ke fakailoa atu ki tino, a mea ne fai ne Ieova, kae e se ko mea ne fai ne Iesu. (Male. 5:19) Tenā foki te mea e manako a ia ke fai i aso nei—ke fakasalalau atu ne tatou te igoa o tena Tamana ke iloa ne tino i te lalolagi kātoa! (Mata. 24:14; 28: 20) Kafai e fai a ‵tou tiute, ko fakafiafia ne tatou te ‵tou Tupu, ko Iesu. w24.02 10 ¶10

Se fakamanuiaga ke aofia tatou i te fakapotopotoga a Ieova i taimi faiga‵ta konei o aso fakaoti. I te taimi e gasolo aka eiloa o faigata te olaga i te lalolagi nei, kae ne tuku mai ne Ieova ki a tatou se kāiga faka-te-agaga o taina mo tuagane kolā e ‵kau fakatasi. (Sala. 133:1) E fesoasoani mai a ia o fakamalosi aka a va o kāiga. (Efe. 5:33–6:1) Kae e tuku mai ne ia te atamai mo te poto e manakogina ke maua i ei te loto filemu. Tela la, e ‵tau o ga‵lue malosi tatou ke tumau i te tavini fakamaoni atu ki a Ieova. Kaia? Me i nisi taimi e mafai o kaitāua tatou ona ko mea e fai ne nisi tino. E mafai foki o faigata ki a tatou ke fa‵ki i ‵tou vāivāiga, maise māfai e fai faeloa ne tatou te mea ‵se tenā. E ‵tau mo tatou o fa‵ki i te taviniga ki a Ieova (1) māfai ne fai ne se taina talitonu se mea ke kaitāua tatou, (2) māfai ko fakafanoanoa ne ‵tou avaga a tatou, mo te (3) māfai ko se fia‵fia tatou ki a tatou eiloa. w24.03 14 ¶1-2

I nisi taimi ka lagona ne koe a tala o taina mo tuagane kolā ne fakaiku aka ke uke olotou mea e fai i te taviniga ki a Ieova. Kāti ne ‵kau atu latou ki te Akoga mō Tino Talai o te Malo io me olo atu o tavini i se koga e manakogina a tino talai i ei. Kafai e mafai o kausaki atu koe ki fakamoemoega penā, ke na kausaki atu eiloa ki ei. E ma‵nako a tino o Ieova ke uke atu olotou mea e fai i te galuega talai. (Galu. 16:9) Kae pefea la māfai e se mafai o fai koe penā i te taimi nei? Ke mo a ma mafaufau me e se ‵lei koe e pelā mo latou kolā e mafai o fai penā. E manakogina a te kufaki i te fakatau‵telega faka-Kelisiano. (Mata. 10:22) Ke mo a ma manatu māmā ki te tāua o te tavini atu ki a Ieova e ‵tusa mo ou fakanofonofoga mo au mea e mafai o fai. A te mea tenā se auala ‵lei e tasi ke tumau koe i te tautali atu i a Iesu mai tua o te papatisoga.—Sala. 26:1. w24.03 10 ¶11

E tauto mai te ‵tou Tamana faka-te-lagi me ka fakamagalo ne ia tatou māfai e sala‵mo tatou. (Sala. 86:5) Tela la, kafai e sala‵mo tonu tatou ki ‵tou agasala ne fai, e mafai o tali‵tonu tatou me e ‵tonu eiloa a pati a Ieova—ko fakamagalo ne ia tatou. Masaua i a Ieova e loto malamalama. E se fakamoemoe a ia ke fai ne tatou a mea e uke atu i lō mea e mafai ne tatou o fai. E fiafia a ia ki te ‵toe mea ‵lei e fai ne tatou mō ia. E se gata i ei, ke mafaufau ‵loto ki tala i te Tusi Tapu o latou kolā ne tavini atu ki a Ieova mo te loto kātoa. Mafaufau ki te apositolo ko Paulo. Ne galue malosi a ia i tausaga e uke, faimalaga atu i se fia afe o maila kae faka‵tu aka a fakapotopotoga e uke. Kae i te taimi ko ma‵fuli ana fakanofonofoga kae ko se uke ana mea e fai i te galuega talai, e mata, ko se talia a ia ne te Atua? Ikai. Ne tumau a ia i te faiga o te ‵toe mea e mafai, kae ne fakamanuia ne Ieova a ia. (Galu. 28:​30, 31) E penā foki tatou, e kese‵kese a mea e mafai o tuku atu ne tatou ki a Ieova i nisi taimi. Kae ko te mea telā e tāua ki a ia, ko te pogai tonu e tavini atu ei tatou ki a ia. w24.03 27 ¶7, 9

E auala i ana ‵talo totino ki a Ieova, ne tuku atu ne Iesu se fakaakoakoga ke tau‵tali ki ei ana soko. I tena galuega talai, ne ‵talo a Iesu i taimi katoa. Ne ‵tau o fakaavanoa ne ia se taimi ke ‵talo, me ne fakalavelave faeloa a ia kae tokouke a tino e olo atu faeloa ki a ia. (Male. 6:​31, 45, 46) Ne alausu a ia i tafataeao ko te mea ke mafai o isi sena taimi ke ‵talo atu i a ia eiloa. Kae i se taimi e tasi, ne ‵talo a ia i te po kātoa a koi tuai o fai ne ia se fakaikuga tāua. (Luka 6:​12, 13) Kae i tena toe po a koi tuai o mate, ne ‵talo faeloa a Iesu ko te mea ke fakataunu a te ‵toe vaega faigata o tena galuega i te lalolagi. (Mata. 26:​39, 42, 44) E akoako mai a Iesu me faitalia te fakalave‵lave o tatou, e ‵tau o fakaavanoa a ‵tou taimi ke ‵talo. E pelā mo Iesu, kāti e manakogina ke ‵sala ne tatou se taimi ke ‵talo—ke ala aka i te vaveao io me tai ‵pula malie i se taimi o te po. Kafai e fai penā, ko fakaasi atu ei ne tatou a te loto fakafetai ki a Ieova mō te meaalofa tenā. w23.05 3 ¶4-5

Mafaufau ki te tugapati “ne ‵ligi” i te tusi siki mai luga. E fai mai se fakamatalaga e tasi e uiga ki te mea tenā me “e ‵tafe mai ki a tatou e pelā me se vaitafe.” E lavea faka‵lei atu i te fakatusaga tenei a te lasi o te alofa o Ieova ki te kau fakaekegina! E iloa ne te kau fakaekegina me i a latou ko tino kolā e “alofa ki ei te Atua.” (Iuta 1) Ne fakaasi mai ne te apositolo ko Ioane a olotou lagonaga i te taimi ne tusi mai a ia, penei: “Onoono la ki te vaegā alofa telā ne tuku mai ne te Tamana ki a tatou, ko te mea ke fakaigoa tatou ki tama‵liki a te Atua!” (1 Ioa. 3:1) E mata, ko te kau fakaekegina fua e alofa a Ieova ki ei? Ikai, ko oti ne fakaasi mai ne Ieova a tena alofa mō tatou katoa. Se a te ‵toe fakamaoniga sili o te alofa o Ieova? Ko te togiola—te ‵toe alofa tu ‵kese ne lavea atu i te iunivesi!—Ioa. 3:16; Loma 5:8. w24.01 28 ¶9-10

E fakaasi mai i te fuaiupu mai luga a te auala ne manumalo ei a Tavita i ana lagonaga mataku. E tiga eiloa koi tu tena ola i se tulaga fakamataku, ne mafaufau ‵loto a ia ki mea ka fai ne Ieova mō ia i aso mai mua. Ne iloa ne Tavita me ka fakasao ne Ieova a ia i te taimi tonu. A te ‵tonuga loa, ko oti ne folafola mai a Ieova me ka fai a Tavita mo tupu o Isalaelu. (1 Samu. 16:​1, 13) Ki a Tavita, so se mea ko oti ne folafola mai ne Ieova ko pelā loa me ko taunu. Se a te mea ne tauto mai a Ieova me ka fai ne ia mō koe? E se fakamoe‵moe tatou ke puipui ne ia tatou mai fakalavelave katoa. Kae faitalia so se fakalavelave e mafai o fepaki mo koe i te olaga tenei, ka fakaseai atu eiloa ne Ieova i te lalolagi fou telā ka oko mai. (Isa. 25:​7-9) E mautinoa me e maua ne te ‵tou Mafuaga a te malosi ke faka‵tu aka a tino ‵mate, ke faka‵lei a masaki mo logo‵maega, kae fakaseai atu a tino ‵teke katoa.—1 Ioa. 4:4. w24.01 6 ¶12-13

Mafaufau ‵loto ki tau tukuatuga mo te papatisoga. Ne fai ne koe a mea konā me ne manako koe o tu i te feitu o Ieova. Toe mafaufau ki mea kolā ne fesoasoani atu ki a koe ke talitonu me ko maua eiloa ne koe a te munatonu. Ne maua ne koe a te iloaga tonu e uiga ki a Ieova kae kamata o āva kae alofa koe ki a ia e pelā me ko tou Tamana faka-te-lagi. Ne ati aka ne koe a te fakatuanaki kae fakamalosi aka ei ke salamō koe. Ne loto malosi koe o tiaki a faifaiga ma‵sei kae ke ola e ‵tusa mo te loto o te Atua. Ne maua ne koe se fakatapūga i te laveaga ne koe te alofa fakamagalo o te Atua. (Sala. 32:​1, 2) Ne kau koe ki fakatasiga Kelisiano kae kamata o fakailoa atu ki nisi tino a mea ‵gali ne tauloto ne koe. E pelā me se Kelisiano telā ne tukugina atu kae papatiso, ko sasale nei koe i te auala ki te ola, kae fakaiku aka ke tumau i te sasale i ei. (Mata. 7:​13, 14) Ke na tumau takitaki koe kae se gasuesue i tau taviniga ki a Ieova mo te fakalogo ki ana tulafono. w23.07 17 ¶14; 19 ¶19

Mai te mafaufau ‵loto ki ‵talo ne fai i tau tukuatuga ki a Ieova, ka maua ei ne koe te malosi ke ‵teke so se tofotofoga. E pelā me se fakaakoakoga, e mata, e mafai o fiafai koe ki te avaga a te suā tino? Ikai! Ko leva ne ‵teke atu koe ki te mea tenā. Kafai e ‵teke ne koe a lagonaga se ‵lei konā, ka se logo‵mae koe fakamuli i te taumafaiga ke tapale kea‵tea. Ka “‵fuli kea‵tea” eiloa koe mai “te ala o tino amio ma‵sei.” (Faata. 4:​14, 15) Kafai e masaua ne koe te fakaikuga a Iesu ke fakafiafia faeloa tena Tamana, ka ‵teke fakavave eiloa koe ki so se mea telā ka fakafanoanoa ei te Atua, telā ne fai ki ei tau tukuatuga. (Mata. 4:10; Ioa. 8:29) E tonu, a fakalavelave mo tofotofoga e tuku mai ei se avanoaga ke fakaasi atu me ko oti ne fakaiku aka ne koe ke “tumau i te tautali” i a Iesu. Kafai e fai koe penā, ke talitonu me ka fesoasoani atu a Ieova ki a koe. w24.03 9-10 ¶8-10