Aokuso

Mafau‵fau ki manatu tāua e lua i te salamo tenei mai luga: (1) E fe‵paki a tino amio‵tonu mo fakalavelave. (2) E faka‵sao ne Ieova tatou mai ‵tou fakalavelave. E faka‵sao pefea ne Ieova tatou? Te auala e tasi, e fesoasoani mai a ia ke maua ne tatou se kilokiloga tonu e uiga ki te olaga i te lalolagi tenei. E tiga eiloa e tauto mai a Ieova me ka maua ne tatou a te fiafia i te tavini atu ki a ia, e seki tauto mai a ia me ka seai eiloa ne fakalavelave e fe‵paki mo tatou i te taimi nei. (Isa. 66:14) E fakamalosi mai a ia ke ‵saga tonu atu tatou ki aso mai mua—te taimi ka maua i ei ne tatou a te olaga telā e manako a ia ke maua ne tatou, te ola se-gata-mai. (2 Koli. 4:​16-18) I te taimi nei, e fesoasoani mai a ia ke tumau tatou i te tavini atu ki a ia i aso takitasi. (Tagi. 3:​22-24) Ne a akoakoga e mafai o tauloto ne tatou mai tino tapuaki fakamaoni a Ieova i aso o te Tusi Tapu mo ‵tou aso nei? E mafai o fe‵paki tatou mo fakalavelave seki fakamoemoegina. Kae kafai e faka‵na tatou ki a Ieova, ka tausi mai faeloa a ia ki a tatou.—Sala. 55:22. w23.04 14-15 ¶3-4

E mafai o tauloto tatou mai te fakaakoakoga a Iosefa mo Malia, kolā ne toka o faka‵logo ki pule ma‵luga faitalia me faigata ki a lāua ke fai penā. (Luka 2:​1-6.) I te taimi ko iva masina o Malia, kae ko pili fua o fanau, ne tofotofogina te faka‵logo o lāua mo Iosefa. Ne fai te fakatonuga a Aokuso, te pule o te malo o Loma, ke fai se lauga o tino. Ne ‵tau o faima‵laga a Iosefa mo Malia ki Peteleema, telā e nofo ki te 150 kilomita (93 mai) i loto i fenua maugā. Ka se faigofie te malaga tenā, maise ki a Malia. Kati ne manavase te tauavaga ki te ‵lei o tou fafine pelā foki mo te lā tama telā e seki fanau mai. E a, mafai ko ‵tau o fanau a ia i te taimi o te malaga? E tauave ne ia i tena moegatama a te Mesia telā ka sae mai i aso mai mua. E mata, ka taofi aka ne te mea tena a lāua ke se faka‵logo ki te fakatonuga mai te malo? Ne seki talia ne Iosefa mo Malia a mea konā ke fai ei ke fakalotolotolua lāua me e ‵tau o faka‵logo lāua ki te tulafono io me ikai. Ne fakamanuia ne Ieova te lā faka‵logo. Ne taunu mo te manuia a Malia ki Peteleema, ne fanau ne ia se tamaliki tagata telā e malosi ‵lei, kae ne fakataunu i ei se valoaga i te Tusi Tapu!—Mika 5:2. w23.10 8 ¶9; 9 ¶11-12

Kae e a māfai ko tō polepole koe ke fai sau tali i fakatasiga? Kāti ka aoga ki a koe te fakatoka faka‵lei. (Faata. 21:5) Ko te maina faka‵lei o koe i te mataupu, ko te faigofie ki a koe ke fai sau tali. E se gata i ei, ke fakatoe‵toe au tali. (Faata. 15:23; 17:27) A tali toe‵toe e fai i ei ke se manavase malosi koe. A te faiga o se tali toetoe i au pati eiloa, e fakaasi atu i ei me ne fakatoka faka‵lei koe kae e malamalama foki koe i te mataupu. Kae e a māfai ne tofotofo ne koe a mea konā kae koi polepole eiloa ma fai sau tali e tasi io me lua? Ke masaua me fiafia eiloa a Ieova ki au taumafaiga ke fai te ‵toe mea e mafai ne koe o fai. (Luka 21:​1-4) A te tukuatuga ne koe a te ‵toe mea ‵lei e se fakauiga ki te fakafi‵ta ne koe a koe eiloa. (Fili. 4:5) Fakaiku aka te mea e mafai ne koe o fai, fakatoka se mea ke kausaki ki ei, kae ‵talo ke mo a ma polepole koe. Muamua la, kāti e mafai o kausaki atu koe ke fai se tali toetoe. w23.04 21 ¶6-8

E fakatusa ne te apositolo Paulo a tatou ki sotia matapula‵pula kolā e ‵pei ki te gatu tau. A te sotia tū e ‵tau o toka o taua i so se taimi. E penā foki tatou. E toka tatou mō te aso o Ieova māfai e ‵pei tatou ki te ufi fatafata o te fakatuanaki mo te alofa mo te puloutau o te fakamoemoega. A te ufi fatafata e puipui i ei te fatu o te sotia. A te fakatuanaki mo te alofa e puipui i ei ‵tou loto. Ka fesoasoani mai i ei ke tumau tatou i te tavini atu ki te Atua kae tau‵tali i a Iesu. A te fakatuanaki e fakamautinoa mai ne ia me ka tuku mai eiloa ne Ieova te ‵tou taui māfai e ‵sala tatou ki a ia mo ‵tou loto kātoa. (Epe. 11:6) Ka fakamalosi i ei tatou ke tumau i te fakamaoni ki te ‵tou Takitaki, ko Iesu, ke oko foki loa ki taimi kolā e ‵tau o kufaki tatou i tulaga faiga‵ta. E mafai o ati aka ne tatou te fakatuanaki ke fakafesagai atu ki tulaga faiga‵ta mai te mafau‵fau ki fakaakoakoga ‵gali o tino i aso nei kolā ne ‵mautakitaki i te fakamaoni faitalia a fakasauaga io me ko fakalavelave i mea tau tupe. Kae mafai o ‵kalo keatea tatou mai te malei ko te fia fai kope mai te fakaakoako ki tino kolā ne fakafaigofie olotou olaga ke fakamuamua a manakoga o te Malo. w23.06 10 ¶8-9

A te loto pulea ko te malosi o se tino ke tataofi ana lagonaga mo faifaiga. E manakogina te loto pulea ke fakamalosi ei tatou ke fakataunu ‵tou fakamoemoega, maise māfai e faigata io me seai se manakoga tonu i a tatou ke fai kausaki atu ki ei. Masaua me i te loto pulea se vaega o fuataga o te agaga, tela la, fakamolemole atu ki a Ieova ke tuku mai tena agaga tapu ke fesoasoani atu ke ati aka te uiga tāua tenei. (Luka 11:13; Kala. 5:​22, 23) Sa faka‵tali ke ‵lei katoatoa ou fakanofonofoga. I te lalolagi nei, ailoga koi mafai o ‵lei katoatoa ‵tou fakanofonofoga. Kafai e faka‵tali tatou ki te taimi tenā, e se mafai eiloa o taunu ‵tou fakamoemoega. E mafai o galo te manakoga tonu i a tatou me i te fakamoemoega e kausaki tatou ki ei e foliga faigata. Kafai e penā loa, e mata, e mafai o vaevae ne koe tou fakamoemoega ki mea tai fo‵liki? Kafai e fakamoemoe koe ke ati aka se uiga gali e tasi, kaia e se galue muamua ei koe o fakaasi atu te uiga tenā i auala faigofie? Kafai e fakamoemoe koe ke faitau ki te Tusi Tapu kātoa, e mata, e mafai o kamata koe mai te faitau ki ei i ne nai minute fua? w23.05 29 ¶11-13

I aso fakaoti konei, ne fakaaoga ne Ieova tena fakapotopotoga ke tumau i te tuku mai faeloa a mea‵kai faka-te-agaga ke fesoasoani mai ki a tatou katoa ke tumau i te sa‵sale atu i loto i “te Ala Tapu.” (Isa. 48:17; 60:17) Kāti e fai atu tatou me i so se tino e talia ne ia se akoga faka-te-Tusi Tapu, ko maua ne ia te avanoaga ke sasale atu i “te Ala Tapu.” Nisi tino e sa‵sale atu i te auala lasi tenā mō se taimi toetoe ko tiakina ei ne latou. Kae ne fakaiku aka ne nisi tino ke tumau i te sa‵sale atu i loto i ei ke oko atu ki te koga e fakamoe‵moe latou ki ei. Se a la te koga tenā? Mō latou kolā e fakamoe‵moe ke ola i te lagi, a “te Ala Tapu” e sa‵sale i ei latou e iku atu ki “te palataiso o te Atua” i te lagi. (Faka. 2:7) Mō latou kolā e fakamoe‵moe ke ola i te lalolagi nei, a te auala telā ka sa‵sale i ei latou e iku atu ki te tulaga ‵lei katoatoa i te fakaotiga o te 1,000 tausaga. Kafai ko sasale koe i te auala lasi tenā i aso nei, sa toe kilo ki ou tua. Kae sa tiakina ne koe ke oko ki te taimi ko taunu ei tau malaga ki te lalolagi fou! w23.05 17 ¶15; 19 ¶16-18

A te fakaikuga ke tuku atu koe ki a Ieova, se lagonaga telā e sae aka loa i a ia māfai e mafaufau ‵loto koe ki mea katoa ne fai ne ia mō koe. (Sala. 116:​12-14) E taku ‵tonu mai i te Tusi Tapu a Ieova e pelā me ko te Tino e tuku mai ne ia “a meaalofa ‵lei katoa mo mea ‵lei katoatoa.” (Iako. 1:17) A te ‵toe meaalofa sili i meaalofa konā ko te taulaga a tena Tama, ko Iesu. Mafaufau la! Ona ko te taulaga togiola, ko mafai ei o maua ne koe se fesokotakiga pili mo Ieova. Kae ko oti ne tuku atu ne ia ki a koe a te fakamoemoega ke ola ki te se-gata-mai. (1 Ioa. 4:​9, 10) A tau tukuatuga ki a Ieova se auala e fakaasi atu ei tou loto fakafetai mō te ‵toe fakaasiga sili o te alofa tenā, fakatasi mo nisi fakamanuiaga mai i a Ieova.—Teu. 16:17; 2 Koli. 5:15. w24.03 5 ¶8

Kafai e lavea ne tatou a te ma‵sei o amioga i te lalolagi nei, e ‵pau eiloa ‵tou lagonaga mo te tagata amiotonu ko Lota. Ne “mafatia malosi i amioga matafatu mo te sē āva o tino solitulafono,” me iloa ne ia te takalialia o te ‵tou Tamana i te lagi ki amioga ma‵sei. (2 Pe. 2:​7, 8) Ona ko te lasi o tena mataku mo tena alofa ki te Atua ne fai ei ke takalialia malosi a ia ki amioga matagā a tino i ana tafa. E ola fakatasi foki tatou mo tino kolā e se fakatāua io me e se āva eiloa ki tulaga o Ieova i mea tau amioga. Kae e ui ei, e mafai eiloa o tumau te ‵ma o ‵tou amioga māfai e fakatumau te ‵tou a‵lofa ki te Atua kae fakamalosi aka te mataku tonu ki a ia. E tuku mai ne Ieova a fakamalosiga a‵lofa mo te manakoga tonu ke fai penā e auala i te tusi ko Faataoto. E mafai eiloa o maua ne Kelisiano katoa, tāgata mo fāfine, tama‵liki mo tino ma‵tua a mea aoga tonu mai te mafaufau faka‵lei ki polopolokiga ‵poto e maua i ei. Kafai e ma‵taku tatou ki a Ieova, e fakaeteete tatou ke mo a ma fai taugasoa ki tino amio ma‵sei. w23.06 20 ¶1-2; 21 ¶5

Kāti ne fepaki koe mo ‵tekemaiga mai ou kāiga, io me kāti ko oti ne tiakina ne koe tau galuega ‵togi telā e uke a tupe e maua mai ei ko te mea ke fakamuamua a manakoga o te Malo o te Atua. (Mata. 6:33) Kafai e penā loa, e mautinoa i a koe me e lavea eiloa ne Ieova au galuega ne fai mo te fakamaoni. (Epe. 6:10) Kāti ko oti ne lavea ne koe te ‵tonu o pati a Iesu konei: “So se tino e tiaki ne ia tena fale, ana taina, ana tuagane io me ko tena tamana io me ko tena mātua io me ko ana tama‵liki io me ko ana manafa ona ko au mo te tala ‵lei, ka uke faka-100 atu ana mea e maua i te vaitaimi tenei—ko fale, taina, tuagane, mātua, tama‵liki, mo manafa, fakatasi mo fakasauaga—kae ka maua foki ne ia i taimi mai mua, a te ola se-gata-mai.” (Male. 10:​29, 30) A fakamanuiaga kolā ne maua ne koe e sili fakafia atu i lō mea faiga‵ta ne fakafesagai mo koe.—Sala. 37:4. w24.03 9 ¶5

I te taimi ne poko ei se oge lasi i Iuta, a taina i te fakapotopotoga i Anitioka ne “fakaiku aka . . . ke avatu se fesoasoani ki taina kolā e ‵nofo i Iuta.” (Galu. 11:​27-30) E tiga loa e tai ‵mao te koga e ‵nofo i ei a taina kolā ne pokotia i te oge, ne fakaiku aka ne Kelisiano i Anitioka ke fesoasoani ki a latou. (1 Ioa. 3:​17, 18) E mafai foki o fakaasi atu ne tatou te alofa atafai i aso nei māfai ko ‵logo tatou me pokotia ‵tou taina tapuaki i se fakalavelave. E ofo atu tatou o fesoasoani—kāti mai te fesili atu ki toeaina māfai e mafai o fesoasoani tatou ki se galuega, mai te faiga o meaalofa tupe ki te galuega i te lalolagi kātoa, io me ‵talo mō latou kolā e pokotia i te fakalavelave. Kāti ka ma‵nako foki a ‵tou taina mo tuagane ki se fesoasoani ke maua a mea mo tausi latou. Kafai ko vau te ‵tou Tupu, ko Keliso Iesu o fakamasino a tino, talosia ke maua mai ne ia tatou e fakaasi atu te alofa atafai kae ‵kami mai tatou ke “fai mō [tatou] te Malo.”—Mata. 25:​34-40. w23.07 4 ¶9-10; 6 ¶12

Ne fakaakoako a Iesu ki te uiga faigofie o Ieova. Ne uga mai a ia ki te lalolagi ke talai ki “mamoe o te fenua o Isalaelu kolā ko ‵galo.” Kae ne uiga faigofie a ia i te faiga o te galuega tenā. I se taimi e tasi, ne fakamolemole atu se fafine telā e sē se Isalaelu ke faka‵lei aka tena tama fafine ne “pukea malosi ne te temoni.” Ne fai eiloa ne Iesu mo te alofa atafai a te manakoga o te fafine tenā kae faka‵lei ne ia tena tama fafine. (Mata. 15:​21-28) Mafaufau ki te suā fakaakoakoga. I te kamataga o tena galuega talai, ne fai atu a Iesu: “So se tino e fakafiti ne ia au . . . , ka fakafiti foki ne au a ia.” (Mata. 10:33) Kae e mata, ne fai ne ia te mea tenā ki a Petelu, telā ne fakafiti ne ia a ia fakatolu taimi? Ikai. Ne iloa ne Iesu me ne salamō tonu a Petelu kae fakatuanaki foki. Mai tua o tena toetuga, ne fakasae atu a Iesu ki a Petelu kae kāti ne fakamautinoa atu me ko oti ne fakamagalo ne ia a ia kae koi alofa eiloa a ia ki a Petelu. (Luke 24:​33, 34) A Ieova te Atua mo Iesu Keliso ne tino uiga faigofie. Kae e pefea tatou? E manako a Ieova ko tatou ke uiga faigofie. w23.07 21 ¶6-7

Ne a fakamaoniga e mafai o fakaasi atu ne koe ki a latou kolā e fakalotolotolua ki te folafolaga a te Atua e uiga ki te Palataiso? Muamua la, ko Ieova eiloa ne fai mai ne ia te folafolaga tenā. E fai mai te tusi ko Fakaasiga: “Te Atua telā e sagasaga i luga i te nofogaaliki, ne fai mai: ‘Kiloke! Ko faka‵fou ne au a mea katoa.’” E maua ne ia te poto, te malosi, kae manako foki ke fakataunu tena folafolaga. Te lua, e mautinoa eiloa te fakataunuga o te folafolaga tenei, me i te kilokiloga a Ieova, a te mea tenei ko pelā eiloa me ko oti ne tupu. Tenā te pogai e fai mai a ia: “Pati konei e fakamaoni kae ‵tonu. . . . Ko taunu a mea konā!” Te tolu, kafai e kamata ne Ieova se mea, e galue loa a ia ki ei ke oko ki te taimi ko taunu ei, e pelā mo te mea e fakamautinoa mai i te tugapati tenei: “Au ko te Alefa mo te Omeka.” (Faka. 21:6) Ka fakamaoni mai ei ne Ieova me i a Satani se tino loi telā e seai sena mea e mafai o fai. Kafai e fai atu se tino penei, “Ko tō ‵gali katoa a mea konei ke fakataunu,” ke faitau kae fakamatala atu ne koe ki a ia te Fakaasiga 21: 5, 6. Fakaasi atu te auala ne fakamautinoa mai ne Ieova te ‵tonu o tena folafolaga, e pelā eiloa me ne saina ne ia tena igoa ki ei.—Isa. 65:16. w23.11 7 ¶18-19

Ne fai ne Ieova te tautoga ki a Apelaamo i te taimi ko 75 ei ana tausaga kae seki ai sena tamaliki. E mata, ne lavea ne Apelaamo te fakataunuga o te tautoga tenā? E se ko mea katoa. I te otiga ne olo atu ki te suā feitu o te Vaitafe ko te Eufilate kae faka‵tali i tausaga e 25, ne lavea ne Apelaamo te fanauga fakavavega o tena tama tagata ko Isaako, kae mai tua o se 60 tausaga ne fa‵nau mai ana mokopuna ko Esau mo Iakopo. (Epe. 6:15) Kae ko Apelaamo ne seki ola ke lavea ne ia a tino kolā ne ‵tupu mai i a ia ke fai pelā me se fenua takutakua kae ulu atu ki te Fenua o te Folafolaga. Kae ne maua eiloa ne te tagata fakamaoni tenei se vā fakataugasoa ‵pili mo tena Mafuaga. (Iako. 2:23) Kafai ko toe fakatu aka a Apelaamo mai te mate, ka fiafia malosi a ia ke iloa atu me ona ko tena fakatuanaki mo tena kufaki ne fakamanuia ei a atufenua katoa! (Kene. 22:18) Se a te akoakoga? Kāti e se lavea ne tatou te fakataunuga o folafolaga katoa a Ieova i te taimi nei. Kae kafai e kufaki tatou pelā mo Apelaamo, e mafai o mautinoa i a tatou me ka maua ne tatou te taui mai i a Ieova i te taimi nei kae maise i Tena lalolagi fou telā ne folafola mai.—Male. 10:​29, 30. w23.08 24 ¶14

E pelā me se talavou, ne loto maulalo a Usia. Ne tauloto a ia “ke mataku ki te Atua tonu.” Kae ne fakamanuia ne Ieova te lasiga o te 68 tausaga o tena olaga. (2 Nofo. 26:​1-4) Ne fakatakavale ne Usia a te ukega o fili o te fenua kae fakamautinoa aka ne ia me puipui faka‵lei a Ielusalema. (2 Nofo. 26:​6-15) E mautinoa eiloa me ne fiafia a Usia ki te fesoasoani o te Atua ki mea ne fai ne ia. (Fai. 3:​12, 13) Ne masani o fakailoa atu ne Usia ki nisi tino ke tau‵tali i ana fakatonuga. E mata, ne fai ne te mea tenā ke mafaufau me e mafai o fai ne ia so se mea e manako a ia ki ei? I te aso e tasi, ne fakaiku aka ne Usia ke ulu atu a ia ki loto i te faletapu o Ieova kae taumafai mo te fakamatamata o ‵sunu a mea ma‵nogi i luga i te fatafaitaulaga, se mea telā e se ‵tau o fai ne tupu. (2 Nofo. 26:​16-18) Ne taumafai te faitaulaga ko Asalia o faka‵tonu a tena mea ‵se ne fai, kae ne kaitaua ‵ki a Usia. Se mea fakafanoanoa, me ne fakamasei ne Usia a tena fakamaoni ki a Ieova kae ne fakasala ei a ia ki te lepela. (2 Nofo. 26:​19-21) Moi ne tumau a ia i te loto maulalo, penei e ‵lei fakafia atu a tena olaga! w23.09 10 ¶9-10

Mai tua foki loa o tena faiga mo fai se Kelisiano fakaekegina, ne fakafesagai atu a te apositolo ko Petelu ki ana vāivāiga. I te 36 T.A., ne nofo atu a Petelu i te koga telā ne fakaeke i ei a Konelio, se tagata mai Fenua Fakaa‵tea, ki te agaga tapu, telā se fakaasiga manino me i “te Atua e se fakailoga tino” kae ko mafai o fai a tino mai Fenua Fakaa‵tea mo vaega o te fakapotopotoga Kelisiano. (Galu. 10:​34, 44, 45) Mai tua ifo, ne kamata o ‵kai fakatasi a Petelu mo tino mai Fenua Fakaa‵tea, se mea telā ne seki mafai o fai ne ia i aso mua. Kae ne mafau‵fau a nisi Kelisiano Iutaia me e se ‵tau eiloa o ‵kai fakatasi a tino Iutaia mo tino mai Fenua Fakaa‵tea. I te taimi ne olo atu ki Anitioka a nisi tino kolā ne maua ne latou te kilokiloga tenā, ne taofi aka ne Petelu a tena ‵kai tasi mo ana taina mai Fenua Fakaa‵tea, kāti ona ko te manavase i te mea ma sē fia‵fia a Kelisiano Iutaia. Ne lavea ne te apositolo ko Paulo a te uiga fakaloiloi tenei kae ‵liko ne ia a Petelu i mua o tino e tokouke. (Kala. 2:​13, 14) Faitalia tena mea ‵se tenei, ne tumau eiloa a Petelu i te fakamaoni. w23.09 22 ¶8

A te iloilo ne koe a koe eiloa mo te fakamaoni e mafai o fakaasi mai ei me e isi ne vāivāiga o koe, kae ke mo a ma loto vāivāi. ‘A te Aliki e atafai,’ kae ka fesoasoani atu a ia ke gasolo koe o ‵lei atu. (1 Pe. 2:3) Ne fakamautinoa mai a te apositolo ko Petelu: “A te Atua . . . ka fakakatoatoa ne ia otou akoakoga. Ka faka‵mautakitaki ne ia koutou.” E isi se taimi ne maua ne Petelu a lagonaga me e se ‵tau o nofo atu a ia i tafa o te Tama a te Atua. (Luka 5:8) Kae mai te fesoasoani alofa o Ieova mo Iesu, ne tumau eiloa a Petelu i te tavini atu pelā me se soko o Keliso. Tenā ne talia ei a Petelu “ke ulu ki loto i te Malo se-gata-mai o te ‵tou Aliki mo te Fakaola ko Iesu Keliso.” (2 Pe. 1:11) Ma‵faga o taui gali! Kafai e tumau koe i te fakamaoni pelā mo Petelu kae talia ke akoako koe ne Ieova, ka maua foki ne koe te taui ko te ola se-gata-mai. Ka maua ne koe “te taui o te otou fakatuanaki, ko te otou fakaolataga.”—1 Pe. 1:9. w23.09 31 ¶16-17

A te faleie tapu i aso mua e tasi tena koga ateatea—se koga lasi ne ‵pui faka‵lei telā e fai i ei a galuega a faitaulaga. A te fatafaitaulaga kopa lasi o taulaga ‵sunu ne fakatu i te koga ateatea, fakatasi mo te pesini kopa vai telā ne fakaaoga ne faitaulaga ke kou‵kou i ei latou ke ‵ma a koi tuai o fai olotou taviniga tapu. (Eso. 30:​17-20; 40:​6-8) I aso nei, e tavini fakamaoni atu te ‵toega o taina fakaekegina o Iesu i te koga ateatea tafa ki loto o te faletapu faka-te-agaga. A te pesini vai lasi se fakamasauaga tāua ki a latou, e penā foki ki Kelisiano katoa, ke tumau latou i te ‵ma i mea tau amioga mo te feitu faka-te-agaga. Kae tefea te koga ka tapuaki atu i ei a te “vaitino tokouke,”? Ne lavea ne te apositolo ko Ioane a latou e “‵tu i mua o te nofogaaliki,” telā e tai ‵pau mo te koga ateatea tafa ki tua i te lalolagi telā “e fai ne latou te taviniga tapu ki [te Atua] i te ao mo te po i tena faletapu.” (Faka. 7:​9, 13-15) Ko oko eiloa i te ‵tou loto fakafetai ke maua se tulaga o tatou i te fakatokaga a Ieova mō te tapuakiga ‵ma! w23.10 28 ¶15-16

Tasi o auala e tuku mai ne Ieova te malosi ki a tatou ko toeaina. (Isa. 32:​1, 2) Tela la, kafai e manavase koe, fakaasi atu ou lagonaga ki toeaina. Kafai e tuku atu ne latou se fesoasoani, ke loto fiafia o talia. E mafai o fakamalosi ne Ieova a koe e auala i a latou. A te fakamoemoega telā ne folafola mai i te Tusi Tapu ke ola ki te se-gata-mai—i te lalolagi Palataiso io me i te Malo i te lagi—e mafai o fakamalosi ne ia tatou. (Loma 4:​3, 18, 19) E fakamalosi mai ‵tou fakamoemoega ke kufaki i mea faiga‵ta, talai atu te tala ‵lei, kae fakataunu a nisi tōfiga i te fakapotopotoga. (1 Tesa. 1:3) Ko te fakamoemoega eiloa tenā ne fakamalosi ne ia te apositolo ko Paulo. A ia ne “taotaomaki,” “‵numi masei,” “fakasauagina,” kae “‵pei tuki ki lalo.” Ne tu atu foki tena ola i se tulaga fakamataku. (2 Koli. 4:​8-10) Ne maua ne Paulo te loto malosi ke kufaki mai te saga tonu atu ki tena fakamoemoega. (2 Koli. 4:​16-18) Ne saga tonu atu a Paulo ki tena olaga i aso mai mua, tena fakamoemoega ke ola i te lagi. Ne mafaufau ‵loto a Paulo ki te fakamoemoega tenā, tela la, ne “fakafou faeloa [tena] malosi i aso takitasi.” w23.10 15-16 ¶14-17

Kafai e ‵talo, mafaufau me e mata tenei te taimi tonu ke tali mai ne Ieova tau fakatagi. Kāti e ma‵nako fakavave tatou ki se tali ki ‵tou ‵talo. Kae e iloa ‵lei ne Ieova te taimi tonu ke fesoasoani mai a ia. (Epe. 4:16.) Kafai e se tali fakavave mai a Ieova ki ‵tou ‵talo, e mafai o mafau‵fau tatou me i tena tali ko te ‘Ikai.’ Kae kāti a tena tali ko te ‘Koi tuai.’ Mafaufau ki se taina talavou ne ‵talo ke faka‵lei tena masaki. Kae ne seki ‵lei tena masaki. Moi ne faka‵lei fakavavega ne Ieova a ia, penei ko kinau atu a Satani me e tavini atu faeloa te taina tenā ki a Ieova me ne faka‵lei ne ia tena masaki. (Iopu 1:​9-11; 2:4) Kae ko Ieova ko oti ne fakatoka ne ia te taimi ke faka‵lei i ei a ma‵saki katoa. (Isa. 33:24; Faka. 21:​3, 4) Ke oko atu ki te taimi tenā, e se fakamoe‵moe eiloa tatou ke faka‵lei fakavavega ne ia a ma‵saki. E mafai eiloa o fakamolemole atu te taina ki a Ieova ke tuku atu te malosi mo te filemu o te mafaufau ke kufaki a ia i tena masaki kae ke tumau i te tavini atu mo te fakamaoni ki te Atua. w23.11 24 ¶13

Ne fai ne Samasoni se mea ‵se matagā, kae ne seki ‵fiu vave a ia i te tavini atu ki a Ieova. Ne ‵sala a ia ki se avanoaga ke fakataunu a tena tōfiga mai te Atua ke fakatakavale a te kau Filisitia. (Fama. 16:​28-30.) Ne fakamolemole atu a Samasoni ki a Ieova: “Tuku mai ke taui atu ne au a te mea ne fai ne tino Filisitia.” Ne tali ne te Atua tonu a te fakamolemole a Samasoni kae ne toe tuku atu ne ia i se auala fakavavega a tena malosi. Ona ko te mea tenā, ne tamate ne Samasoni a tino Filisitia e tokouke atu i te taimi tenei i lō taimi mua. E tiga eiloa ne fakafesagai atu a Samasoni ki ikuga fakalogo‵mae o tena mea ‵se ne fai, ne seki gata tena taumafai o fai a te loto o Ieova. Kafai foki loa e fai ne tatou se mea ‵se kae polopoloki ‵mafa tatou io me galo atu se tauliaga, e se ‵tau eiloa mo tatou o ‵fiu vave. Masaua, e se ‵fiu vave a Ieova i a tatou. (Sala. 103:8, 9) Faitalia ‵tou mea ‵se, koi mafai loa o aoga tatou ki a Ieova, e pelā eiloa mo Samasoni. w23.09 6 ¶15-16

Kafai e kufaki koe ka maua ne koe te taliaga a Ieova. E se ko tena uiga me fiafia a Ieova ki tofotofoga mo fakalavelave e fepaki mo koe. Ko koe te tino telā e talia ne te Atua. Ona ko tou kufaki ko maua ei ne koe te taliaga a te Atua. Ko oko eiloa i te gali o te fakamanuiaga tenā! (Sala. 5:12) Ke masaua me ne kufaki ne Apelaamo a tofotofoga e uke kae ne maua ne ia te taliaga a te Atua. Ne kilo atu a Ieova ki a ia e pelā me ko Tena taugasoa kae taku ne ia tou tagata me e amiotonu. (Kene. 15:6; Loma 4:​13, 22) Kae e mafai foki o fai tatou penā. A te taliaga a te Atua e se fakavae ki te uke o ‵tou galuega e fai i tena taviniga io me ko tauliaga e maua ne tatou. E talia ne ia tatou ona ko ‵tou kufaki mo te fakamaoni. Kae faitalia me pefea ‵tou ma‵tua, ‵tou fakanofonofoga, io me ko mea e mafai o fai, e mafai ne tatou katoa o kufaki. E mata, e isi se tofotofoga e kufaki nei ne koe mo te fakamaoni? Kafai e penā loa, ke masaua me ko fakafiafia eiloa ne koe te loto o te Atua. Kae ko te iloa atu me ne fakafiafia ne tatou a te Atua ka mafai o fakamalosi mai ki a tatou. E mafai foki o fakamalosi ne ia te ‵tou fakamoemoega. w23.12 11 ¶13-14

E ‵tau o tauloto se tagata Kelisiano ke iloa o fesokotaki faka‵lei mo tino. A te tagata telā e apo i te fesokotaki faka‵lei mo tino, e fakalogologo kae taumafai ke malamalama i mafaufauga mo lagonaga o nisi tino. (Faata. 20:5) E mafai o iloa ne ia a lagonaga o te tino e auala i tena leo, ana foliga mo ana mea e fai. E se mafai o iloa ne koe a mea māfai e se uke ou taimi e fakamāumāu mo tino konā. Kafai e fesokotaki atu faeloa koe e auala i telefoni io me i meli, ka faigata eiloa ki a koe ke fesokotaki atu ki tino konā mata ki mata. Tela la, ke ‵sala faeloa ki avanoaga ke fesokotaki atu ki nisi tino mata ki mata. (2 Ioa 12) E ‵tau foki o iloa ne se tagata Kelisiano telā ko matua ‵lei o tausi ki a ia mo tena kāiga. (1 Timo. 5:8) Se mea ‵lei ke tauloto ki se atamai telā ka fesoasoani atu ke maua ne koe se galuega ‵togi. (Galu. 18:​2, 3; 20:34; Efe. 4:28) Fai ke iloa ne tino i a koe se vaegā tino telā e galue malosi o fakaoti a te galuega ne tuku atu ke fai ne koe. Kafai e fai koe penā, ka faigofie o maua sau galuega kae tumau i ei. w23.12 27 ¶12-13

Kafai e faipati te Tusi Tapu ki te “aso o Ieova,” e fakauiga loa ki te taimi ka fakaseai ei ne Ieova ana fili kae faka‵sao ana tino. I aso mua, ne fakasala sāle ne Ieova a nisi atufenua. (Isa. 13:​1, 6; Eseki. 13:5; Sefa. 1:8) I ‵tou aso nei, ka kamata te “aso o Ieova” ki te fakaseaiga o Papelonia te Sili telā ka iku atu ki te taua o Amaketo. Ke ‵sao tatou i te “aso” tenā, e ‵tau mo tatou o na fakatoka atu nei. Ne akoako mai a Iesu me e se ‵tau fua o fakatoka tatou mō te “fakalavelave lasi” kae e ‵tau foki o “toka faeloa” tatou ki ei. (Mata. 24:21; Luka 12:40) I tena tusi muamua ki te kau Tesalonia, ne fakaaoga ne te apositolo ko Paulo a nai ata fakatusa ke fesoasoani ki Kelisiano ke toka faeloa mō te aso o te fakamasinoga sili a Ieova. Ne iloa ne Paulo me ka se oko mai te aso o Ieova i te taimi tenā. (2 Tesa. 2:​1-3) Kae ne fakamalosi atu a ia ki ana taina ke fakatoka mō te aso tenā e pelā eiloa me oko mai ma taeao, kae e mafai foki o fai tatou penā. w23.06 8 ¶1-2

I te fakaotiotiga o tausaga mai te 1970 o vau, ne faite i ei se fale maluga e 60 ana fata i Tokyo, Tiapani. Ne mafau‵fau a tino me ka mafai pefea o tu ‵mautakitaki ona ko te uke o mafuie e ‵poko sāle i te fakai tenā. Se a te mea ‵funa e uiga ki ei? Ne faite ne initinia a te fale maluga tenā ke ‵mautakitaki, ke mafai o gasuesue kae sē maofa māfai ko ‵poko a mafuie. E fai eiloa a Kelisiano e pelā mo te fale maluga tenā. I te auala fea? E ‵tau o fakatumau ne se Kelisiano a tena paleni ‵lei mai te ‵mautakitaki kae uiga faigofie. E ‵tau mo ia o ‵mautakitaki kae se gasuesue māfai ko fakaiku aka ke fakalogo a ia ki tulafono mo tulaga o Ieova. A ia e “toka o fakalogo” kae e se gutugutulua. I te suā feitu, e manakogina ke “loto malamalama,” io me uiga faigofie a ia, māfai e manakogina ke fai penā. (Iako. 3:17) A te Kelisiano telā ne tauloto ke maua ne ia te kilokiloga paleni tenei ka kalo kea‵tea mai te uiga faigata io me manatu māmā. w23.07 14 ¶1-2

Ne ‵teke atu a Iesu ki a Satani te Tiapolo telā ne tofotofo ne ia a tou tagata ke agasala, kae fai ‵tonu atu ki a ia ke mo a ma fakamaoni ki te Atua. (Mata. 4:​1-11) Ne taumafai malosi a Satani o fai ke agasala a Iesu ko te mea ke se mafai o ‵togi ne ia a te togiola. I tena galuega talai i te lalolagi nei, ne kufaki a Iesu i nisi tofotofoga. Ne fakasaua a ia ne ana fili kae taumafai o tamate a ia. (Luka 4:​28, 29; 13:31) Ne kufaki ne ia a vāivāiga o ana soko. (Male. 9:​33, 34) I te taimi ne fakamasino ei a ia i mua o te fono ke tamate, ne ‵kini kae fakatauemu atu a tino ki a ia. Oti aka, tamate ei a ia i se auala fakalogo‵mae kae fakamasiasi. (Epe. 12:​1-3) Ne kufaki tokotasi ne ia tena toe tofotofoga e aunoa mo te puipuiga a Ieova. (Mata. 27:46) E manino ‵lei me ne logo‵mae malosi a Iesu, ko te mea fua ke tuku mai ne ia te togiola. Kafai e mafaufau ‵loto tatou ki te lasi o te loto fiafia o Iesu ke logo‵mae a ia ke tuku mai tena ola mō tatou, e a, e se fai ei ke momea aka te lasi o te ‵tou a‵lofa ki a ia? w24.01 10-11 ¶7-9

E aoga te kufaki ki fesokotakiga o tatou mo nisi tino. E fesoasoani mai ke fakalogo‵logo faka‵lei māfai ko fai‵pati a nisi tino. (Iako. 1:19) E fakamalosi aka foki ne te kufaki a vā filemu. E puipui ei tatou mai te fai fakavave o se mea e aunoa mo te mafaufau faka‵lei io me fai atu a pati se ‵lei māfai ko kaitāua. Kae kafai tatou e kufaki, ka tuai o ita tatou māfai ne fakalogo‵mae ne se tino a tatou. I lō te taui ma sui, ka tumau tatou i te “fakatau fa‵ki faeloa . . . kae fakatau fakamagalo atu te suā tino ki te suā tino.” (Ko. 3:​12, 13) E fesoasoani mai foki te kufaki ke fai ne tatou a fakaikuga ‵lei. I lō te fai fakavave se fakaikuga e aunoa mo te mafaufau faka‵lei, ka fakaaoga ne tatou a taimi ke sukesuke kae iloilo a mea e mafai o fai koi tuai o fai se fakaikuga. E pelā loa māfai e salasala ki se galuega ‵togi, kāti ka ma‵nako fua tatou o talia so se galuega e maua ne tatou. Kae kafai tatou e kufaki, ka fakaaoga ne tatou a taimi ke iloilo faka‵lei te pokotiaga ka maua ne te kāiga mo ‵tou olaga faka-te-agaga ona ko te galuega tenā. Kafai e kufaki tatou, ka ‵kalo kea‵tea tatou mai te faiga o se fakaikuga sē ‵lei. w23.08 22 ¶8-9

Kafai e loto vāivāi koe ona ko au taumafaiga ke ‵teke atu ou vāivāiga, kafai e mafaufau koe ki tau tautoga ne fai ki a Ieova i te taimi ne fai ei tau tukuatuga ki a ia, ka fakamalosi aka ei tau fakaikuga ke ‵teke atu a tofotofoga. E pefea la? Ko fai tau tukuatuga ki a Ieova, ko fakafiti ne koe a koe eiloa. Ko tena uiga ko fakaiku ne koe ke se talia ou manakoga mo ou fakamoemoega kolā e se fiafia ki ei a Ieova. (Mata. 16:24) Tela la, kafai ko fepaki koe mo se tofotofoga, e se manakogina ke fakamāumāu ou taimi o mafaufau me se a tau mea ka fai. Ko oti eiloa ne ‵pono ne koe te mataloa ki so se mea kae ko te mea fua e tasi—ko te fakamaoni ki a Ieova. Ka fakaiku katoatoa aka ne koe ke fakafiafia a Ieova. Mai te fai penā ko fai eiloa koe e pelā mo Iopu. E tiga eiloa ne fepaki a ia mo tofotofoga faiga‵ta ‵ki, ne fai ‵tonu mai a ia: “Ka se tiaki eiloa ne au toku fakamaoni!”—Iopu 27:5. w24.03 9 ¶6-7

Ieova “te Atua o te alofa,” e fakatasi mai ki a tatou! (2 Koli. 13:11) A ia e fiafia ki a tatou taki tokotasi. E tali‵tonu tatou me e “fakatamilo [tatou] ne Tena alofa fakamaoni.” (Sala. 32:10) Ko te lasi o te mafaufau ‵loto o tatou ki te auala ne fakaasi mai ne ia tena alofa, ko te lavea ‵lei foki ne tatou a ia e pelā me se tino tonu kae ka gasolo o ‵pili malosi atu tatou ki a ia. E mafai o ‵talo atu tatou ki a ia e aunoa mo te ma‵taku kae fakaasi atu a te lasi o te manakogina ne tatou a tena alofa. E mafai o fakaasi atu ne tatou a ‵tou manava‵sega katoa ki a ia, mo te talitonu me e malamalama kae toka foki a ia o fesoasoani mai ki a tatou. (Sala. 145:19) E pelā loa mo te fia fakapili‵pili atu o tatou ki te mafanafana o se afi i se aso ‵moko, ka fia fakapili‵pili atu foki tatou ki te alofa atafai o Ieova. E tiga eiloa e malosi a te alofa o Ieova, kae e atafai foki. Tela la, ke na talia mo te fiafia ne koe a te alofa atafai o Ieova. Kae ke ‵saga tonu atu tatou ki tena alofa mai te fai atu, penei: “Au e alofa ki a Ieova”!—Sala. 116:1. w24.01 31 ¶19-20

E uke a mea ne fai ne Iesu i tafa o te fakailoa atu ki tino me i te igoa o te Atua ko Ieova. Ko leva ne iloa ne tino Iutaia kolā ne akoako ne Iesu, a te igoa o te Atua. Kae ne mua eiloa a Iesu o “fakamatala mai ne ia a te Tamana.” (Ioa. 1:​17, 18) E pelā me se mea e tasi, e fakamatala mai i Tusitusiga Epelu me i a Ieova e alofa fakamagalo kae alofa atafai. (Eso. 34:​5-7) Ne fakamaina faka‵lei mai ne Iesu te munatonu tenā i tena tala fakatusa e uiga ki te tama fakamāumāu mea mo tena tamana. Kafai e fai‵tau tatou i te taimi ne lavea ei ne te tamana a tena tama telā ko salamō “kae koi ‵mao a ia,” kae tele atu o fakafetaui ki a ia, ‵sai atu ki ei, kae fakamagalo ne ia mo te loto kātoa, ko lavea faka‵lei eiloa ne tatou i ei a te lasi o te alofa fakamagalo mo te alofa atafai o Ieova. (Luka 15:​11-32) Ne fesoasoani atu a Iesu ki nisi tino ke lavea faka‵lei ne latou me ko tena Tamana se vaegā tino pefea. w24.02 10 ¶8-9

E aumai ne Ieova a te malosi fou mo fakamafanafanaga ki tino loto mafatia. E mafai pefea o fakaakoako tatou ki te alofa atafai o Ieova kae fakamafanafana atu a nisi tino? Tasi te auala e mafai ne tatou o fai penā, ko te ati aka o uiga kolā ka fesoasoani mai ke tuku atu ne tatou a fakamafanafanaga. Ne a nisi uiga konā? Ne a mea ka fesoasoani mai ke fakatumau ne tatou te alofa telā e manakogina ko te mea ke “tumau i te fakamafanafana atu te suā tino ki te suā tino” i aso takitasi? (1 Tesa. 4:18) E ‵tau o ati aka ne tatou a vaegā uiga e pelā mo lagonaga fakataina, alofa fakataina, mo te alofa atafai. (Ko. 3:12; 1 Pe. 3:8.) Ka fesoasoani mai pefea a uiga konei? Kafai e fakaasi ‵tonu atu ne tatou te alofa atafai ki ‵tou taina, ko tuku atu eiloa ne tatou a fakamafanafanaga ki a latou. E pelā mo pati a Iesu, “e faipati mai ne te gutu a mea kolā e ‵fonu i te loto. A te tagata ‵lei e aumai sāle ne ia mai i ana koloa ‵lei a mea ‵lei.” (Mata. 12:​34, 35) A te tukuatuga o fakamafanafanaga ki ‵tou taina mo tuagane, se auala tāua ‵ki ke fakaasi atu ei a te ‵tou a‵lofa ki a latou. w23.11 10 ¶10-11

Kafai e fia malama‵lama tatou i valoaga i te Tusi Tapu, e ‵tau o ‵sala atu tatou ki se fesoasoani. Mafaufau ki te fakatusaga tenei. Fakaataata aka me ko fanatu koe ki se koga e se masani koe ki ei, kae ko tou taugasoa telā e olo tasi koulua e masani ‵lei mo te koga tenā. E iloa ne ia te koga tenā e ‵nofo koulua i ei mo auala takitasi. E mautinoa eiloa me ka fiafia koe me ne vau tou taugasoa i a koe! I se auala tai ‵pau, e iloa ‵lei ne Ieova te vaitaimi ko ‵nofo tatou i ei kae iloa foki ne ia a mea ka ‵tupu fakamuli i te auala tenei e sa‵sale tatou i ei. Tela la, ke malama‵lama i valoaga i te Tusi Tapu, e ‵tau o ‵sala atu tatou mo te loto maulalo ki te fesoasoani o Ieova. (Tani. 2:28; 2 Pe. 1:​19, 20) E pelā mo so se mātua ‵lei, e manako a Ieova ke maua ne ana tama‵liki se olaga fiafia i aso mai mua. (Iele. 29:11.) Kae e ‵kese eiloa a Ieova mai so se mātua, me e mafai o ‵valo ne ia a mea ka ‵tupu i aso mai mua, kae e ‵tonu faeloa. Ne fai ne Ieova ke fakamau a valoaga konā i tena Muna ko te mea ke iloa ne tatou a mea tāua konā a koi tuai o ‵tupu.—Isa. 46:10. w23.08 8 ¶3-4