Ke Tumau i te Fakaasiatuga o te Aga‵lei
“Me i fua o te mainaga, e maua i mea ‵lei katoa, i te amiotonu mo mea tonu.”—EFESO 5:9.
A TE ‵toe mea ‵lei telā e mafai o fai ne se tino ko te tukuatuga o tavaega ki a Ieova. I aso nei, e lau i miliona a tino kolā e fai ne latou a te mea tenei mai te avatuga o vikiga ki te Atua mō tena aga‵lei. E pelā me ne Molimau fakamaoni a Ieova, e lotoma‵lie kātoatoa tatou ki te pese a te faisalamo telā ne usu mai, penei: “Ko oko eiloa te fakaofoofogia o mea ‵lei e tausi ne koe mo tino kola e fakaaloalo ki a koe!”—Salamo 31:19.
2 E gasue‵sue tatou ke tavae atu ki a Ieova mō tena aga‵lei māfai e ma‵taku kae fakaaloalo foki tatou ki a ia. E fakamalosi aka foki i ei tatou ke ‘viki ki a Ieova, fakafetai atu ki a ia, kae ke fakaasi atu foki a te ‵malu o tona malo.’ (Salamo 145:10-13) Tenā eiloa te pogai e ‵kau atu ei tatou mo te loto finafinau ki te talaiatuga o te Malo mo te galuega ko te faiga o soko. (Mataio 24:14; 28:19, 20) E tonu, e ‵tau o fetaui ‵lei te ‵tou galuega talai mo amioga ‵lei ko te mea ke se fakamasiasi i ei ne tatou a te igoa o Ieova.
3 E fai mai a te tokoukega o tino me e tapuaki atu latou ki te Atua, kae e se fetaui eiloa olotou faifaiga mo fakatakitakiga kolā e fakaasi mai i loto i tena Muna fakaosofia. Kae e pelā mo latou kolā e se mafai o tau‵tali atu ki olotou pati i te faiga o mea ‵lei, ne tusi mai a te apositolo ko Paulo, penei: “Ai a e akoako ei ne koe a nisi tino, kae se akoako koe ki a koe eiloa? E lauga atu ne koe te se kaisoa, ka ko koe e kaisoa. Ne fai mai koe me se ‵tau se tino o mulilua, ka ko koe e mulilua. . . . I te mea ne muna mai te Tusi, ‘Ko takumaseigina a te igoa o te Atua i fenua fakaatea ona ko koutou.’ ”—Loma 2:21, 22, 24.
4 I lō te fakamasiasi atu ki te igoa o Ieova, e taumafai malosi tatou ke tuku atu a vikiga ki ei e auala i ‵tou amioga ‵lei. E fai a te mea tenei e pelā me se fakaakoakoga ‵lei ki tino mai tua o te fakapotopotoga Kelisiano. Kae e fesoasoani atu foki a te faiga o mea ‵lei ke fakafilemu aka ne tatou a pati a tino ‵teke. (1 Petelu 2: 15) Kae e sili atu i ei, e fai ne ‵tou amioga ‵lei ke fakapili‵pili mai a tino ki te fakapotopotoga a Ieova, kae ‵tala atu foki a te avanoaga ki a latou ke tuku atu i ei ana tavaega kae ke maua a te ola-se-gata-mai.—Galuega 13:48.
5 Ona la ko te ‵tou tulaga sē ‵lei katoatoa, e mafai pefea o ‵kalo kea‵tea tatou mai faifaiga kolā e mafai o fakamasiasi atu i ei ki a Ieova kae fai ei ke loto vāi‵vāi a tino kolā koi ‵sala ki te munatonu? E mafai pefea o manuia tatou i te fakaasiatuga o te aga‵lei?
Se Fuataga o te Mainaga
6 E fia‵fia tatou, tino Kelisiano kolā ko oti ne tukugina atu, ki se mea telā e fesoasoani mai ke ‵teke atu ki “amioga se aoga, kola ko amioga o te pouliga.” E aofia i mea konei ko galuega ma‵sei e pelā mo te pati loi, kaisoa, pati masei, faipati ki faifaiga fakatauavaga sē ‵tau, amioga ma‵sei, pati va‵lea, mo te ko‵na. (Efeso 4:25, 28, 31; 5:3, 4, 11, 12, 18) I lō te aofia o tatou i vaegā galuega penā, e tumau eiloa tatou i te “ola e pela mo tino e ‵nofo i te mainaga.” Ne fai mai a te apositolo ko Paulo me i te “fua o te mainaga, e maua i mea ‵lei katoa, i te amiotonu mo mea tonu.” (Efeso 5:8, 9) Tela la, e mafai ne tatou o fakaasi atu a te aga‵lei ona ko te sa‵sale atu o tatou i te mainaga. Kae se a la te vaegā mainaga tenā?
7 Faitalia a te tulaga sē ‵lei katoatoa o tatou, e mafai ne tatou o fakaasi atu a uiga ‵lei mai te tumau i te ola i te mainaga faka-te-agaga. Ne usu mai a te faisalamo, penei: “A tau muna se moli e takitaki ne ia au, se mainaga foki ki toku auala.” (Salamo 119:105) Kafai e ma‵nako tatou ke tumau i te fakaasiatuga o “fua o te mainaga” e auala i “mea ‵lei katoa,” e ‵tau o tumau faeloa tatou i te mafaufau ‵mafa ki te mainaga faka-te-agaga telā e maua i loto i te Muna a te Atua, kae e fakamatala faka‵lei mai i loto i tusi faka-Kelisiano kae sautala faeloa ki ei i ‵tou fakatasiga mo tapuakiga. (Luka 12:42; Loma 15:4; Epelu 10:24, 25) E manakogina malosi foki ke ‵saga malosi atu tatou ki te fakaakoakoga mo akoakoga a Iesu Keliso, “ko te mainaga o te lalolagi” kae e maina i a ia “te ‵malu o te Atua.”—Ioane 8:12; Epelu 1:1-3.
Se Fuataga o te Agaga
8 E seai se fakalotolotolua i ei me e fesoasoani mai eiloa a te mainaga faka-te-agaga ke fakaasi atu a uiga ‵lei. I tafa i ei, e mafai foki ne tatou o fakaasi atu a te uiga tenei me e takitakigina tatou ne te agaga tapu o te Atua, io me ko tena malosi galue. A te aga‵lei se vaega o te “fua o te Agaga.” (Kalatia 5:22, 23) Kafai e tuku atu ne tatou a tatou eiloa ki te puipuiga o te agaga tapu o Ieova, ka ‵fua aka i loto i a tatou a fuataga ‵gali o te ‵lei.
9 A te ‵tou manakoga ke fakafiafia atu ki a Ieova mai te fakaasiatuga o te fuataga o te agaga ko te faiga o mea ‵lei e ‵tau o fakagasuesue aka i ei tatou ke fai a mea kolā e fetaui ‵lei mo pati konei a Iesu: “Akai atu, kae ka tuku mai ki a koutou; salasala atu, kae ka maua ne koutou; tukituki atu, kae ka ‵tala mai ki a koutou. So se tino e akai atu, e tuku mai ki a ia; a ia foki tela e tukituki atu, ka ‵tala mai ki a ia. Ko oi se tamana i a koutou na, e mafai o tuku atu se gata ki tena tama manafai e fakamolemole mai ki se ika? Io, me e fakamolemole mai ki se fuamoa, kae tuku atu ki a ia se akalava? Tela la, kafai koutou e ma‵sei [me e se ‵lei katoatoa tatou], kae e iloa ne koutou o tuku atu a mea ‵lei ki otou tama‵liki, e se sili atu la te otou Tamana i te lagi, i te fia tuku atu o te Agaga Tapu ki tino kola e fakamolemole atu ki a ia?” (Luka 11:9-13) Ke tau‵tali atu tatou ki pati polopoloki a Iesu mai te ‵talo atu ki te agaga o Ieova ko te mea ke mafai ne tatou o tumau i te fakaasiatuga o tena fuataga ko te aga ‵lei.
“Fai ne Koe te Mea ‵Lei”
10 E auala i te mainaga faka-te-agaga fakatasi mo te fesoasoani o te agaga tapu o te Atua e mafai o ‘fai ne tatou te mea ‵lei.’ (Loma 13:3) E auala i te sukesuke faeloa ki te Tusi Tapu, ka tau‵loto tatou ki mea e uke atu e uiga ki te auala e mafai ei o fakaakoako tatou ki te aga‵lei o Ieova. I te mataupu muamua ne mafau‵fau tatou ki nisi feitu o te aga‵lei o te Atua kolā ne folafola ne ia ki a Mose kae ne tusi ki lalo i te Esoto 34: 6, 7, telā e fai‵tau tatou, penei: “Ko au ko te Aliki, ko te Atua tela e fonu i te alofa mo te kaimalie, e tuai o ita kae lasi tena alofa mo tena fakamaoni. E tausi ne au taku feagaiga i afe o tupulaga, e fakamagalo fua ne au agasala mo amioga masei katoa; kae e fakasala eiloa ne au a olotou tama mo tama a olotou tama.” Kafai e kilo‵kilo faka‵lei tatou ki nisi fakaasiga o te aga‵lei o Ieova ka fesoasoani mai ei ki a tatou ke “fai te mea ‵lei.”
11 E fakailoa mai ne te folafolaga faka-te-Atua tenei a te manakoga ke fakaakoako tatou ki uiga o Ieova ko te alofa fakamagalo mo te uiga kaimalie. Ne fai mai a Iesu: “Amutia a latou kola e a‵lofa atu [“e uiga kaimalie,” NW] me a‵lofagina latou.” (Mataio 5:7; Luka 6:36) Ona ko te iloaga me e uiga kaimalie a Ieova, e fakamalosi mai ei ki a tatou ke fakaasi atu foki ne tatou a te uiga kaimalie mo te mata fiafia ki nisi tino, kae aofia foki i ei a tino kolā e talai atu tatou ki ei. E fetaui ‵tonu a mea konei mo pati polopoloki a Paulo, konei: “Ke isi se alofa i otou pati e fai sale, ke faka‵kona foki ki te masima ke tumau tena aoga, ko te mea ke iloa ne koutou o tali atu ki so se tino e fesili mai ki a koutou.”—Kolose 4:6.
12 Ona ko te Atua e tuai o kaitaua, a te manakoga ke ‘fai ne tatou a te mea ‵lei’ e fakamalosi mai i ei ke se ‵kilo atu ki tamā mea ‵se a ‵tou taina tali‵tonu kae ke ‵saga tonu atu ki olotou uiga ‵lei. (Mataio 7:5; Iakopo 1:19) A te alofa kaimalie o Ieova e fakamalosi mai ei ki a tatou ke fakaasi atu a te alofa fakamaoni faitalia me e ‵nofo atu tatou i se tulaga faigata. E manakogina malosi te fakaasiatuga o te uiga tenā.—Faataoto 19:22.
13 Ona ko te mea e ‘lasi tena fakamaoni,’ a te ‵tou Tamana faka-te-lagi, e ‵fakamaonia ne tatou te motou fai mo tavini a te Atua i te lauga atu i te munatonu.’ (2 Kolinito 6: 3-7) Mai i mea e fitu kolā e takalialia ki ei a Ieova ko te “laulaufaiva pelo” mo te “molimau fai tala loi.” (Faataoto 6:16-19) Tela la, a te ‵tou manakoga ke fakafiafia atu ki te Atua ko oti ne fakamalosi aka ei tatou ‘ke se toe iai se loi kae ke faipati ki te mea tonu.’ (Efeso 4: 25) Ke se fakata‵mala eiloa tatou i te fakaasiatuga o te uiga ‵lei i te auala tāua tenei.
14 A te folafolaga a te Atua ki a Mose e ‵tau o fakamalosi mai ei ki a tatou ke loto fakamagalo me i a Ieova e toka faeloa o fakamagalo. (Mataio 6: 14, 15) E tonu, e tuku mai eiloa ne Ieova a te fakasalaga ki luga i tino agasala kolā e se salamō. Tela la, e ‵tau mo tatou o puke ‵mau ki ana akoakoga ‵lei ko te mea ke fakatumau ei te fakapotopotoga i te ‵mā i te feitu faka-te-agaga.—Levitiko 5:1; 1 Kolinito 5:11, 12; 1 Timoteo 5:22.
“Ke Mafaufau Faka‵lei”
15 Ko te mea ke tumau faeloa i te fakaasiatuga o te uiga ‵lei faitalia a mea ma‵sei konei i ‵tou tafa, e manakogina ke faka‵fonu ne tatou a tatou eiloa ki te agaga o te Atua kae ke onoono ki te auala e sa‵sale ei tatou. Ne fakamalosi atu a Paulo ki te kau Kelisiano i Efeso, penei: “Mafaufau faka‵lei ki auala e ‵tau o ola koutou i ei. Sa ola e pela mo ne tino va‵lea, kae ke pela mo tino ‵poto. Fakaaoga faka‵lei so se avanoa e maua ne koutou, i te mea ko aso masei a aso nei. Sa fakavale‵vale, kae taumafai o salasala ake, me se a te mea e loto ki ei te Aliki ke fai ne koutou. Ke mo a e ko‵na koutou i te uaina, tela e fakamasei ne ia a koutou, ka ke ‵fonu koutou i te Agaga. Ke fakatau faipati koutou ki muna o salamo, ki muna o pese, e pela foki ki muna o pese tapu; ke usu foki ne koutou a pese lotu mo salamo ki te Aliki mo otou loto tavae.” (Efeso 5:15-19) E fetaui ‵tonu eiloa a pati polopoloki konei ki a tatou i aso fakaoti konei.—2 Timoteo 3:1.
16 Kafai e ma‵nako tatou ke tumau i te fakaasiatuga o mea ‵lei, e ‵tau o mafaufau faka‵lei tatou ki te auala e ‵tau o olo ei tatou e pelā me ne tino kolā e fakagalue aka ne latou a te poto faka-te-Atua. (Iakopo 3:17) E ‵tau mo tatou o ‵kalo kea‵tea mai amioga matagā kae ke faka‵fonu a tatou ki te agaga tapu, ke takitaki ne ia tatou. (Kalatia 5:19-25) E mafai o tumau tatou i te faiga o mea ‵lei māfai e fakagalue aka ne tatou a fakatakitakiga faka-te-agaga kolā e maua ne tatou i fakatasiga faka-Kelisiano, tamā fono, mo fono ‵lasi. E mafai foki o fakamasaua mai ki a tatou a pati a Paulo ki te kau i Efeso me i te ukega o fakatasiga faka-te-tapuakiga kolā e ‵kau atu tatou ki ei e maua i ei a mea tāua mai te usuatuga o “pese tapu” mo ‵tou loto kātoa—kae e fakasino sāle atu a pese e uke konā ki uiga faka-te-agaga, e pelā mo te aga‵lei.
17 Kae e pefea la a ‵tou taina tali‵tonu kolā e se mafai o ‵kau atu faeloa ki fakatasiga faka-Kelisiano ona ko masaki? Kāti ka loto vāivāi latou me e se mafai ne latou o tapuaki atu ki a Ieova fakatasi mo olotou taina mo tuagane Kelisiano. Kae e mafai o tali‵tonu latou me e malamalama a Ieova i olotou fakanofonofoga, ka fakatumau ne ia latou i te mainaga, ka avatu ne ia ki a latou a tena agaga tapu, kae ka fesoasoani atu foki ki a latou ke fai faeloa a te mea telā e ‵lei.—Isaia 57:15.
18 A te tumau i te sasale i te auala ‵lei e manakogina ei a te matapulapula ki tino kolā e ‵kau atu tatou ki ei kae ke fulitua atu ki tino kolā “e ita ki te ‵lei.” (2 Timoteo 3:2-5; 1 Kolinito 15:33) A te fakagalueakaga o pati polopoloki konei ka fesoasoani mai ei ke ‵kalo kea‵tea tatou mai te faiga ke “fanoanoa te Agaga Tapu o te Atua” mo te faiga o mea kolā e se fetaui mo tena takitakiga. (Efeso 4:30) Kae e sili i mea katoa, kafai e fakamalosi aka ne tatou a te va fealofani o tatou mo latou kolā e fakamaoni mai me i a latou ne tino kolā e fiafia malosi ki mea ‵lei kae e takitakigina latou ne te agaga tapu o Ieova, ka fesoasoani mai ei ke tumau tatou i te faiga o mea ‵lei.—Amosa 5:15; Loma 8:14; Kalatia 5:18.
E Aumai ne te Aga‵lei a Ikuga ‵Gali
19 A te sasale i te mainaga faka-te-agaga, te taliaga ke takitaki tatou ne te agaga o te Atua, mo te mafaufau faka‵lei ki te auala e sa‵sale ei tatou ka fesoasoani mai ke ‵kalo kea‵tea tatou mai mea ma‵sei kae ‘fai ne tatou a mea ‵lei.’ I te faiga penā, ka mafai ei o maua ne tatou a ikuga ‵lei. Ke mafau‵fau ki te tala o Zongezile, se tokotasi o Molimau a Ieova i Afelika ki Saute. I tena auala ki te akoga i te tafataeao e tasi, ne onoono a ia ki te aofaki o ana sene kolā ne ‵teu aka. Ne fakaasi ‵se mai ne te tamā pepa telā ne sae mai i loto i te masini te aofaki o ana sene i te pagike kae ne fakaopoopo ki ei a te $6,000 (tupe Amelika). Ne fakamalosi atu a tino leoleo o te pagike e pelā foki mo nisi tino aka ke na tapale ne ia a sene konā kae ke ‵toe fāulu aka ki te suā pagike. Ko te tauavaga Molimau fua kolā ne nofo a ia i ei ne fakamālō atu ki a ia me ne seki tapale ne ia a sene konā.
20 I te suā taeaoakega, ne fakailoa atu ne Zongezile a te mea ‵se tenā ki te kau o te pagike. Ne maua aka fakamuli me e isi se suā tagata fai pisinisi telā e tai ‵pau a lā napa kae ne faulu ‵se ne ia ana sene ki loto i te akauni o Zongezile. Ona ko te ofo o te tagata tenei me ne seki fakaaogā ne Zongezile ana sene, ne fesili atu a te tagata fai pisinisi ki a ia, penei: “Se a tau lotu?” Ne fakamatala atu ne Zongezile me i a ia se tokotasi o Molimau a Ieova. Ne fakamālō atu a te kau ga‵lue o te pagike ki a ia kae fai atu, penei: “Moi fakamaoni faeloa a tino e pelā mo Molimau a Ieova.” E tonu, a faifaiga fakamaoni mo faifaiga ‵lei e mafai o fai ei ke tavae ne nisi tino a Ieova.—Epelu 13:18.
21 E se manakogina te faiga o mea ‵lei e uke ko te mea ke mafai o maua mai ei a ikuga gali. E fai mai penei se tala: Ne fanatu ki te fa‵kaimasaki se tamataene Molimau telā e fai pelā me se tino talai tumau i te fenua ko Samoa. Ne faka‵tali a tino katoa ke olo atu latou ki te tokitā, kae ne lavea ne te Molimau tenei se lomatua telā ko matua ‵ki i ona tafa ko oko eiloa i te masaki malosi. Ne fai ne ia a fakatokaga ke mua a te lōmatua tenei i a ia ko te mea ke na fanatu fakavave tou fafine ki te tokitā. Fakamuli ifo, ne fetaui a te Molimau mo te lōmatua tenei i te maketi. Ne masaua eiloa ne tou fafine a ia mo ana faifaiga ‵lei ki a ia i te fa‵kaimasaki. Ne fai mai tou fafine, penei: “Nei la ko iloa ne au me e a‵lofa ‵tonu eiloa a Molimau a Ieova ki olotou tuakoi.” Muamua la, ne se tī fia saga malosi atu tou fafine ki te fekau o te Malo, kae ne maua se ikuga gali ona ko faifaiga ‵lei a te Molimau ki a ia. Ne talia ne ia ke fai sena akoga faka-te-Tusi Tapu kae ne kamata foki eiloa o maua ne ia a te iloaga e uiga ki te Muna a te Atua.
22 E se taumate e mafai foki o fakamatala mai ne koe a nisi tala kolā e fakaasi atu i ei a te faiga o mea ‵lei. A te ‵toe auala ‵lei ke tumau faeloa i te faiga o “mea ‵lei,” ko te kau atu faeloa ki te talaiatuga o te tala ‵lei o te Malo o te Atua. (Mataio 24:14) Ke na tumau eiloa tatou i te ‵kau atu faeloa ki te tauliaga tāua tenei mo te loto finafinau, kae ke iloa ne tatou me tenei eiloa a te auala e tasi ke fai ei ne tatou a mea ‵lei, maise ki tino kolā e ‵saga tonu mai ki te ‵tou galuega. A te ‵toe mea tāua, ko te ‵tou galuega fakatasi mo ‵tou faifaiga ‵lei e avatu ei a tavaega ki a Ieova, te mafuaga tonu o mea ‵lei.—Mataio 19:16, 17.
Ke Tumau i te Faiga o “Mea ‵Lei”
23 E seai se fakalotolotolua me i ‵tou galuega talai se galuega ‵lei. E mafai o iku atu ki te mauaga ne tatou a te fakaolataga fakatasi mo latou kolā e faka‵logo ki te fekau mai te Tusi Tapu kae sa‵sale atu i te auala telā e takitaki atu ei ki te ola. (Mataio 7:13, 14; 1 Timoteo 4:16) Kafai e ‵tau o fai ne tatou a filifiliga, kāti ka fakamalosi mai ne te manakoga ke fai a mea ‵lei ke fesili ifo tatou, penei: ‘E mata, ka fakalavelave atu te faiga tenei ki taku galuega talai o te Malo? E mata, e ‵lei eiloa a te faifaiga tenei e mafaufau au ki ei? E mata, ka ‵lago mai a te faiga tenei ki toku fia fesoasoani atu ki nisi tino ke talia ne latou te “talaiga se gata mai” kae ke maua foki ei se fesokotakiga pili mo Ieova te Atua?’ (Fakaasiga 14:6) Ka iku atu te faiga o filifiliga kolā e fakaavanoa ei tatou ke fai a mea e uke mō te Malo ki te fiafia lasi.—Mataio 6:33; Galuega 20:35.
24 Ke mo a eiloa ma manatu mā‵mā tatou ki mea tāua kolā e mafai o iku mai i te faiga o mea ‵lei. E mafai eiloa o tumau tatou i te fakaasiatuga o te uiga tenei mai te ‵lago atu ki te fakapotopotoga faka-Kelisiano kae ke fai eiloa ne tatou a mea katoa kolā e mafai ne tatou o fai ke fakamalosi atu ki ei. E mautinoa eiloa me kafai e ‵kau faeloa tatou ki fakatasiga faka-Kelisiano fakatasi mo te faiga o ‵tou tusaga i ei e fai eiloa ne tatou a mea ‵lei. A te ‵tou ‵nofo atu i te fakatasiga e fakamalosi aka i ei a ‵tou taina tapuaki, kae e fakamalosi aka ne ‵tou tusaga kolā ne fakatoka faka‵lei a latou i te feitu faka-te-agaga. E fakaasi atu foki ne tatou a uiga ‵lei māfai e fakaaogā ne tatou ‵tou sene totino ki te tausiga o te Kingdom Hall mo te fakatau fesoasoani o tausi faka‵lei ki ei. (2 Tupu 22:3-7; 2 Kolinito 9:6, 7) A te ‵tonuga loa, “e ‵tau mo tatou o fai te mea ‵lei ki tino katoa, kae fakasilisili ki a latou kola e i loto i te kaiga Kelisiano.”—Kalatia 6:10.
25 E se mafai ne tatou o iloa katoatoa nei a mea kolā ka ‵tupu kae e manakogina i ei ke fakaasi atu ei a uiga ‵lei. Ona ko te mea e fe‵paki faeloa tatou mo fakalavelave ‵fou, ke na ‵sala atu tatou ki te mainaga mai te Muna a te Atua, ‵talo atu mō te agaga tapu o Ieova kae fai te ‵toe mea ‵lei e mafai ne tatou o fai ke fai tena loto telā e ‵lei kae kātoatoa foki. (Loma 2:9, 10; 12:2) E mafai o maua ne tatou a te loto talitonu me ka fakamanuiagina tatou ne Ieova mai te tumau i te fakaasiatuga o te aga‵lei.
Ka Tali Mai Pefea ne Koe?
• E mafai pefea ne tatou o fai a mea ‵lei e uke?
• Kaia e fai atu ei me i te aga‵lei se ‘fuataga o te mainaga’?
• Kaia e fai ei a te aga‵lei e pelā me se ‘fuataga o te agaga’?
• Se a te ikuga o ‵tou faifaiga ‵lei?
[Fesili mo te Sukesukega]
1. E fakaasi mai pefea ne te fia miliona o tino i aso nei me e lotoma‵lie latou ki pati i te Salamo 31:19?
2, 3. Se a te mea e mafai o tupu māfai e se fetaui ‵lei ‵tou amioga ‵lei mo te galuega ko te faiga o soko?
4. Ne a ikuga o ‵tou amioga ‵lei?
5. Ne a fesili e ‵tau o mafau‵fau nei tatou ki ei?
6. Ne a nisi “amioga se aoga kola ko amioga o te pouliga,” kae ne a fuataga e ‵tau o fakaasi atu ne Kelisiano?
7. Ne a mea e ‵tau o fai ke tumau ei tatou i te fakaasiatuga o fuataga ‵lei?
8. Kaia e mafai ei ne tatou o fakaasi atu a uiga ‵lei?
9. E mafai pefea o fetaui ‵lei ‵tou faifaiga mo pati a Iesu kolā ne siki mai i te Luka 11:9-13?
10. Ne a uiga ‵lei o Ieova e siki mai i te Esoto 34:6, 7?
11. E ‵tau o aofia pefea tatou i te iloaga me i a Ieova e alofa fakamagalo kae e uiga kaimalie?
12. (a) Ona ko te mea e tuai o ita a te Atua, e ‵tau o pefea ‵tou faifaiga ki nisi tino? (e) Se a te mea e fakamalosi mai ne te alofa kaimalie o Ieova ke fai ne tatou?
13. E ‵tau o fai pefea ‵tou faifaiga ke fakaasi atu i ei me e lasi te fakamaoni o Ieova’?
14. Kaia e ‵tau ei o loto fakamagalo tatou?
15, 16. E mafai pefea o fesoasoani mai a pati polopoloki a Paulo i te Efeso 5:15-19 ke tumau tatou i te faiga o mea ‵lei?
17. Kafai e se mafai ne nisi tino o ‵kau atu ki fakatasiga ona ko olotou fakalavelave, se a te mea e mafai o loto tali‵tonu ki ei a Kelisiano kolā e ma‵saki ‵ki?
18. Se a te mea e fesoasoani mai ke tumau tatou i te faiga o mea ‵lei?
19-21. Ke fakamatala mai a tala kolā e fakaasi mai ei a te aogā o te faiga o mea ‵lei.
22. Se a te ‵toe auala tāua e tasi telā e mafai ne tatou o tumau i te faiga o “mea ‵lei”?
23. Kaia e fai ei a te galuega faka-Kelisiano e pelā me se galuega ‵lei?
24, 25. Ne a nisi mea ‵lei e mafai ne tatou o fai i te fakapotopotoga, kae se a te mea e ‵tau o loto tali‵tonu tatou ki ei māfai e tumau faeloa i te fakaasiatuga o te aga‵lei?
[Ata i te itulau e 15]
E fesoasoani mai a te Muna a te Atua mo tena agaga tapu ke fakaasi atu ne tatou a te aga‵lei
[Ata i te itulau e 16]
Te fakaasiatuga o te aga‵lei e aumai ei a ikuga gali