Fai ke Iloa ne Koe a Auala o Ieova
“Fai aka ke iloa ne au ou auala,ko te mea ke mafai o iloa ne au koe.” —Esoto 33:13, Tusi Paia, Samoa.
1, 2. (a) Kaia ne fai ei ne Mose te mea telā ne fai ne ia i te mateaga ne ia se tino Isalaelu e fakasauā ne se tagata Aikupito? (e) Ko te mea ke mafai o tavini atu a Mose ki a Ieova, ne a mea ne tau o iloa ne ia?
NE TUPU aka Mose i te kau kāiga o Falao kae ne akoakogina ki poto kolā ne fakatāua ne kāiga Aliki i Aikupito. Kae ne iloa ne Mose i a ia e se se tino Aikupito. Ana mātua ne tino Isalaelu. I te taimi ko 40 ei ana tausaga, ne fanatu ei a ia o āsi ki ana taina, ko tino Isalaelu. I te taimi ne lavea ei ne ia te fakasauāga o se tino Isalaelu e tokotasi ne se tagata Aikupito, ne seki fulitua atu fua a Mose ki ei. Ne tamate ne ia te tagata Aikupito. Ne fakaiku aka ne Mose ke kau atu a ia ki tino o Ieova kae ne mafaufau tou tagata me ko fakaaogā a ia ne te Atua ke faka‵sao ne ia ana taina. (Galuega 7:21-25; Epelu 11:24, 25) I te taimi ne salalau atu ei te mea tenei, ne ‵kilo atu ei te kāiga tupu i Aikupito ki a Mose e pelā me se tino ‵teke, kae ne ‵tau o tele a ia keatea. (Esoto 2:11-15) Kafai ne manako te Atua o fakaaogā a Mose, ne ‵tau o masani a ia ki auala o Ieova. E mata, ne mafai o akoakogina a Mose?—Salamo 25:9.
2 Ne ola a Mose e pelā me se fakaalofa mo se tausi mamoe i tausaga e 40 mai tua i ei. I lō te talia ne ia ke nofo a ia mo te kaitaua ona ko te seai o se loto fakafetai o ana taina Isalaelu ki a ia, ne fakalogo eiloa a Mose ki mea kolā ne talia ne te Atua e uiga ki a ia. E tiga eiloa te uke o tausaga ne seki iloa atu ei a ia, ne talia eiloa ne Mose ke galue ne Ieova a mea e uiga ki a ia. Ne tusi fakamuli mai a ia ona ko te fakamalosiga o te agaga tapu o te Atua, kae sē ko ana manatu totino e uiga ki a ia i ana pati: “A Mose se tagata loto malalo; ko te ‵toe tagata loto malalo eiloa i te lalolagi.” (Numela 12:3) Ne fakaaogā ne Ieova a Mose i auala fakaofoofogia. Kafai foki e loto mau‵lalo tatou, ka fakamanuia eiloa a tatou ne Ieova.—Sefanaia 2:3.
Ne Tuku Atu se Galuega ki a ia
3, 4. (a) Se a te galuega ne tuku atu ne Ieova ki a Mose? (e) Se a te fesoasoani ne tuku atu ki a Mose?
3 I te aso e tasi ne faipati atu se agelu telā ne sui ne ia a Ieova ki a Mose i tafa o te Mauga o Olepa i te kogā koga ko te Sinai. Ne fai atu a ia ki a Mose: “Ko oti ne lavea ne au te fakapologa fi‵ta o tino Isalaelu ne tino Aikupito; ko oti ne lagona ne au te lotou ‵tagi ke faka‵sao latou mai te fakapologa ne tāgata Aikupito. E iloa ne au olotou puapuagā katoa, tenei ko fanaifo ei au ki lalo ke faka‵sao latou mai tino Aikupito, ke ‵taki foki latou keatea mai Aikupito, ki se fenua e ‵lei kae lasi, se fenua e maumea kae laukele ola.” (Esoto 3:2, 7, 8) Ona ko te mea tenei, ne manako ei te Atua ke fai ne Mose se galuega, kae ne ‵tau eiloa o fai ne ia i te auala o Ieova.
4 Ne toe fai atu te agelu a Ieova: “Tenei la ka uga atu koe ne au ki te tupu o Aikupito ke tuku atu oku tino ke ‵taki ne koe keatea mai tona fenua.” Ne fakatalave a Mose. Ne seki lava tena loto talitonu ki a ia eiloa, kae ne mafaufau tou tagata me ne seki ‵tau o fai ne ia te mea tenā. Kae ne fakatalitonu atu a Ieova ki a Mose: “Au e fakatasi atu ki a koe.” (Esoto 3:10-12) Ne tuku atu ne Ieova te ‵mana ke fai ne Mose a vavega fakaofoofogia ke fai mo fakamaoniga me ne uga atu eiloa a ia ne te Atua. Ne ‵tau foki o fanatu a Alona, te taina o Mose, ke fai mo fai se tuku muna. Kae ne akoako ne Ieova a laua e uiga ki pati mo mea e ‵tau o fai ne laua. (Esoto 4:1-17) E mata, ne fakataunu eiloa ne Mose mo te fakamaoni te tofiga tenā?
5. Kaia ne fai ei te kilokiloga a te kau Isalaelu mo fai se fakalavelave ki a Mose?
5 Ne tali‵tonu muamua eiloa a toeaina o Isalaelu ki a Mose mo Alona. (Esoto 4:29-31) Ne seki leva kae ‵losi atu a “takitaki Isalaelu” ki a Mose mo tena taina mō te faiga o te tupu ko Falao mo ana tavini “ke ita” ki a latou. (Esoto 5:19-21; 6:9) I te taimi ne tiakina ei ne te kau Isalaelu a Aikupito, ne ma‵taku latou i te laveaatuga o kaliota a te kau Aikupito e ‵tele atu o afuli latou. Ne matea ne te kau Isalaelu me ko ‵nofo latou i loto i se malei, ko te ‵Tai Kula i olotou mua a ko kaliota tau i olotou tua ne ‵losi atu latou ki a Mose e uiga mo te mea tenā. Ne a au ka fai moi ne nofo atu koe i konā? E tiga eiloa e seai ne vaka o te kau Isalaelu, ne fakamalosi atu a Ieova e auala i a Mose ke fakatoka a tino mō te faigā malaga. Ne fai ei ne te Atua ke mavaelua te Tai Kula, kae ne ‵masa pakupaku te ‵takele papa ko te mea ke olo atu i ei a te kau Isalaelu.—Esoto 14:1-22.
Se Kinauga Telā e Sili Atu Tena Tāua i lō te Lotou Faka‵saoga
6. Se a te mea ne faka‵mafa atu ne Ieova i te tukuatuga te galuega ki a Mose?
6 I te tukuatuga o te galuega ki a Mose, ne faka‵mafa atu ei ne Ieova te tāua o tena igoa. Ne tāua ‵ki eiloa te āva ki te igoa tenā mo te Tino telā i ō ia te igoa tenā. I te taimi ne fesili atu ei e uiga ki tena igoa, ne fai atu a Ieova ki a Mose, penei: “Ko au telā ka fakataunu ne au aku fuafuaga katoa.” NW. E se gata i ei, ne ‵tau foki o fakailoa atu ne Mose ki tino Isalaelu a te mea tenei: “Te Aliki [ko Ieova], te Atua o Apelaamo, Isaako mo Iakopo ne uga mai ne ia koe ki a latou. Tenā toku igoa ki te se gata mai. Tenei toku igoa ke fakaigoa ei au ne tupulaga katoa fakamuli.” (Esoto 3:13-15) Ko te igoa foki eiloa tenā o te Atua, ko Ieova, e iloa ei a ia ne ana tavini i te lalolagi kātoa.—Isaia 12:4, 5; 43:10-12.
7. Se a te mea ne fakamalosi atu ne te Atua ki a Mose ke fai faitalia te kaitaua o Falao?
7 I te lā ‵tuatuga i mua o Falao, ne fakaoko atu ei ne Mose mo Alona te lā fekau i te igoa o Ieova. Kae ne fai atu a Falao mo te kaitaua: “Ko oi te Aliki [ko Ieova] tenā ka fakalogo fua ei au ki a ia kae tuku tino Isalaelu ke olo? E se iloa ne au te Aliki [ko Ieova]; kae ka se tuku atu foki ne au a tino Isalaelu ke olo.” (Esoto 5:1, 2) Ne loto makeke kae ne fai togafiti foki a Falao, kae ne fakamalosi atu eiloa a Ieova ki a Mose ke fakaoko atu a fekau ki a ia i te fia o taimi. (Esoto 7:14-16, 20-23; 8:1, 2, 20) Ne matea ne Mose me ko oko eiloa i te kaitaua o Falao. E mata, se mea ‵lei ke olo atu faeloa ki a ia? Ko oko eiloa te ma‵nako o te kau Isalaelu ke fakasaoloto latou. Kae ne ita fitifiti eiloa a Falao ma fakasaoloto latou. Ne a au mea ka fai moi fai koe ko Mose?
8. Se a te mea aogā ne maua mai i te auala ne saga atu ei a Ieova ki a Falao, kae e pokotia pefea tatou i faifaiga konā?
8 Ne toe fakaoko atu ne Mose te suā fekau tenei: “Te Aliki [ko Ieova], te Atua o tino Epelu e fai atu ki a ia penei, ‘Tuku mai oku tino ke olo, ko te mea ke tapuaki mai ki a au.’ ” Ne toe fai atu foki te Atua: “Moi ne ‵ta ne au a koutou mo tino Aikupito ki faamai, penei la ko leva eiloa koutou ne seai. Ka ko tuku atu ne au a koe ke ola ko te mea ke lavea ne koe toku malosi; ka ko au foki ke takutakua i te lalolagi kātoa.” (Esoto 9:13-16) Ona ko fakasalaga kolā ka fai ki a Falao loto makeke, ne manako a Ieova ke fakaasi atu tena ‵mana i se auala telā ka lavea ‵lei ei ne tino katoa kolā e ‵teke atu ki a ia. E aofia i ei a Satani te Tiapolo, ko te tino telā ne taku fakamuli ne Iesu Keliso ki “te aliki masei o te lalolagi nei.” (Ioane 14:30; Loma 9:17-24) E pelā eiloa mo te mea ne ‵valo mai, ne lauiloa ei te igoa o Ieova i te lalolagi kātoa. Ne iku atu eiloa tena kufaki ki te faka‵saoga o te kau Isalaelu fakatasi mo te vaitino e tokouke kolā ne ‵kau atu ki a latou o tapuaki atu ki a ia. (Esoto 9:20, 21; 12:37, 38) Talu mai te taimi tenā, ne aogā eiloa te fakasalalauatuga o te igoa o Ieova ki te fia miliona o tino kolā ko oti ne puke ‵mau ki te tapuakiga tonu.
Ana Faifaiga ki Tino Uiga Faiga‵ta
9. Ne fakaasi atu pefea ne tino tonu o Mose a te se āva ki a Ieova?
9 Ne iloa ne tino Epelu te igoa o te Atua. Ne fakaaogā ne Mose te igoa tenā i taimi ne faipati ei a ia ki a latou, kae ne seki fakaasi atu faeloa ne latou te āva ‵tau ki te Tino i ō ia te igoa tenā. Ne seki leva mai tua o te faka‵saoga fakavavega ne Ieova o te kau Isalaelu mai Aikupito, se a te mea ne tupu i te taimi ne seki maua fakavave ei ne latou ne vai ‵lei mo olotou inu? Ne mui‵mui latou ki a Mose. Ne toe fāmeo foki latou e uiga mō mea‵kai. Ne fakailoa atu ne Mose ke fakaeteete latou me ne seki mui‵mui fua latou ki a laua mo Alona kae ki a Ieova foki. (Esoto 15:22-24; 16:2-12) I te Mauga o Sinai, ne tuku atu ne Ieova ki te kau Isalaelu a te Tulafono kae ne ‵pa a fa‵tili kae ‵lapa uila i ei. E tiga te feitu tenā, ne ‵teke atu a tino mai te faitega o se tamā pulumakau aulo ke tapuaki atu ki ei kae fakamuna ne latou ki se “‵kaiga fiafia e fakaaloalo ei te Aliki [ko Ieova].”—Esoto 32:1-9.
10. Kaia e tāua malosi ei a te fakamolemole a Mose i te Esoto 33:13 ki ovasia Kelisiano i aso nei?
10 Ne pefea a faifaiga a Mose ki tino kolā ne fai mai a Ieova me ko oko eiloa te ma‵keke o olotou loto? Ne fakamolemole atu a Mose ki a Ieova: “Kafai koe e fai penā, taku mai nei ki a au au fuafuaga, ko te mea ke tavini au o fakafiafia atu faeloa ki a koe.” (Esoto 33:13) I te tausi atu ki Molimau a Ieova i aso nei, e tausi eiloa ne ovasia Kelisiano se lafu telā e sili fakafia atu te lotou loto mau‵lalo i lō te kau Isalaelu. Kae e ui i ei, e penā foki te olotou ‵talo: “Te Aliki [ko Ieova], akoako mai ki a au ou auala; fakaasi mai foki ke iloa ‵lei ne au.” (Salamo 25:4) A te lotou iloa ‵lei o auala o Ieova e fesoasoani atu ei ki ovasia ke iloa ne latou a mea e ‵tau o fai i tulaga kese‵kese i se auala telā e fetaui mo te Muna a te Atua kae e fetaui foki mo ana uiga.
Mea Kolā e Manako a Ieova ke Fai ne Ana Tino
11. Ne a fakatakitakiga ne tuku atu ne Ieova ki a Mose, kae kaia e amanaia ei tatou ki ei?
11 Ne faigutu atu a mea kolā ne manako a Ieova ke fai ne ana tino i te Mauga o Sinai. Ne maua fakamuli ne Mose a papa fatu e lua kolā e tusi i ei a Tulafono e Sefulu. I tena fokiifoga mai te mauga, ne lavea ne ia te kau Isalaelu e tapuaki atu ki se pulumakau faite kae ne ‵pei ei ne ia mo te kaitaua a papa fatu ki lalo kae ne ma‵fā likiliki i ei. Ne toe tusi ne Ieova a Tulafono e Sefulu i luga i papa ma kolā ne faite ne Mose. (Esoto 32:19; 34:1) Ne seki toe ‵fuli eiloa a tulafono konei talu mai te taimi muamua ne tuku atu i ei. Ne ‵tau o tautali faka‵lei atu a Mose ki ei. Ne faka‵mafa atu ne te Atua ki a Mose a te tāua ke iloa tonu ne ia, ko te mea ke iloa ne Mose o fai a mea e pelā me se sui o Ieova. Ko se ‵nofo atu a Kelisiano mai lalo i te Tulafono faka-Mose, kae e aofia i mea kolā ne fai atu ne Ieova ki a Mose a akoakoga fakavae e uke kolā e seki ‵fuli eiloa kae koi fakaaogā eiloa ki tino katoa kolā e tapuaki atu ki a Ieova. (Loma 6:14; 13:8-10) Ke na mafau‵fau nei tatou ki nāi mea konā.
12. Ne ‵tau o pokotia pefea a te kau Isalaelu i te tapuaki katoatoa atu ki a Ieova?
12 Ke tuku katoatoa atu te tapuakiga ki a Ieova. Ne ‵nofo atu eiloa a tino katoa o Isalaelu i te taimi ne folafola atu ei ne Ieova me e ‵tau o katoatoa te olotou tapuakiga ki a ia. (Esoto 20:2-5) Ne lava kae ‵toe a fakamaoniga ne lavea ne te kau Isalaelu me i a Ieova ko te Atua tonu. (Teutelonome 4:33-35) Ne fakamaina faka‵lei atu ne Ieova me faitalia a mea ne fai ne nisi atufenua, e se talia lele eiloa ne ia ke aofia ana tino i so se vaega o te ifo ki tupua io me ko faifaiga faivailakau. E se ‵tau o fai te lotou tapuakiga ki a ia e pelā fua me se mea masani. Ne ‵tau mo latou katoa o a‵lofa ki a Ieova mo olotou loto kātoa, olotou foitino kātoa, mo olotou malosi kātoa. (Teutelonome 6:5, 6) E aofia i ei olotou pati, olotou amioga—e tonu, penā foki loa mo feitu katoa o olotou olaga. (Levitiko 20:27; 24:15, 16; 26:1) Ne fakaasi manino mai foki ne Iesu Keliso me e ‵tau o katoatoa te tapuakiga ki a Ieova.—Maleko 12:28-30; Luka 4:8.
13. Kaia ne ‵tau ei o faka‵logo katoatoa a te kau Isalaelu ki te Atua, kae se a te mea e fakamalosi mai ke faka‵logo tatou ki a ia? (Failauga 12:13)
13 E ‵tau o faka‵logo katoatoa ki tulafono a Ieova. Ne ‵tau o fakamasaua atu ki tino Isalaelu me i te taimi ne fai ei ne latou se feagaiga i te va o latou mo Ieova, ne fai ei ne latou se tautoga faka‵logo katoatoa latou ki a ia. Ne maua ne latou taki tokotasi a saolotoga e uke, kae ko mea kolā ne fakatonu atu a Ieova ke fai ne latou, ne ‵tau eiloa o faka‵logo katoatoa latou ki ei. A te faiga penā e fakamaoni atu ei te lotou a‵lofa ki te Atua kae e maua foki ei ne latou mo olotou fanau a mea aogā me i fakatonuga katoa a Ieova ne fai mō te ‵lei o latou.—Esoto 19:5-8; Teutelonome 5:27-33; 11:22, 23.
14. Ne faka‵mafa atu pefea ne te Atua ki te kau Isalaelu a te tāua o te fakamuamua faeloa o mea faka-te-agaga?
14 Ke fakamuamua faeloa a mea faka-te-agaga. Ne seki saoloto te atufenua o Isalaelu ke fakamuamua a manakoga faka-te-foitino ke fakasēaogā ei a mea faka-te-agaga. Ne seki ‵tau o fakavae katoatoa a olaga o te kau Isalaelu ki mea faka-te-foitino. Ne fakatoka ne Ieova se taimi i vaiaso takitasi ke fai pelā me ne taimi tapu, ko taimi kolā ne fakaaogā fua mō mea e uiga ki te tapuakiga ki te Atua tonu. (Esoto 35:1-3; Numela 15:32-36) Ne fakatoka foki a taimi i tausaga takitasi mō te faiga o fakamanatuga tapu. (Levitiko 23:4-44) Ne tuku mai i taimi konei a avanoaga ke toe mafaufau ‵loto ki faifaiga fakaofoofogia a Ieova, ke toe fakamasausau ki ana auala, kae ke fakaasi atu foki te lotou loto fakafetai ki a ia mō mea ‵lei katoa ne fai ne ia. I taimi e fakaasi atu ei te lotou tapuaki katoatoa atu ki a Ieova, ne momea aka ei te lotou ma‵taku mo te lotou a‵lofa ki te Atua kae fesoasoani atu foki i ei ke tau‵tali atu latou i ana auala. (Teutelonome 10:12, 13) E aogā eiloa a akoakoga fakavae kolā e aofia i fakatonuga konā ki tavini a Ieova i aso nei.—Epelu 10:24, 25.
Ke Malamalama Kae Loto Fakafetai mō Uiga o Ieova
15. (a) Kaia ne aogā ei a te malamalama mo te loto fakafetai o Mose mō uiga ‵gali o Ieova ki a ia? (e) Ne a fesili e mafai o fesoasoani mai ke mafaufau ‵loto tatou ki uiga ‵gali takitasi o Ieova?
15 A te malamalama mo te loto fakafetai o Mose mō uiga o Ieova ne fesoasoani atu foki ki a ia i ana faifaiga ki tino. E fai mai te Esoto 34:5-7 me ne fakasili atu te Atua i mua o Mose kae folafola atu: “Ko au ko te Aliki [ko Ieova], ko te Atua telā e ‵fonu i te alofa mo te kaimalie, e tuai o ita kae lasi tena alofa mo tena fakamaoni. E tausi ne au taku feagaiga i afe o tupulaga, e fakamagalo fua ne au agasala mo amioga ma‵sei katoa; kae e fakasala eiloa ne au a olotou tama mo tama a olotou tama, ke oko eiloa ki te tolu mo te fa o tupulaga ona ko agasala a olotou mātua.” Mafaufau malie aka ki pati konā. Fesili ifo ki a koe: ‘Se a te mea e fakauiga ki ei a uiga takitasi konā? Ne fakaasi mai pefea ne Ieova a uiga takitasi konā? E mafai pefea o fakaasi atu ne ovasia Kelisiano te uiga tenei? E pokotia pefea a mea kolā e fai ne tatou taki tokotasi i te uiga tenei?’ Mafaufau ki nāi fakaakoakoga konei.
16. E mafai pefea o faka‵poko aka te ‵tou malamalama i te alofa fakamagalo o te Atua, kae kaia e tāua ei te faiga o te mea tenei?
16 A Ieova se “Atua telā e ‵fonu i te alofa [“fakamagalo,” NW] mo te kaimalie.” Kafai e isi sau kopi i te Insight on the Scriptures, kaia e se faitau ei koe ki mea kolā e fakaasi mai i lalo o te ulutala ko te “Mercy”? Io me fai au sukesukega ki te mataupu tenā mai te fakaaogāga o te Watchtower Publication Index io me ko te polokalame i te komupiuta ko te Watchtower Library (CD-ROM).a Ke fakaaogā te tusi ko te concordance ke ‵sala aka ei a fuaiupu kolā e fakasino atu ki te mataupu ko te mercy io me ko te alofa fakamagalo. Ka lavea atu ei ne koe me i tafa o te taliaga ne Ieova ke fakamāmā aka te fakasalaga i nisi taimi, e aofia foki eiloa i tena alofa fakamagalo a tena alofa atafai. E fakamalosi atu ei ki te Atua ke gasuesue fakavave o avatu se fakatapūga ki ana tino. E lavea atu eiloa te fakamaoniga o te mea tenei, i te fesoasoani o te Atua ki te kau Isalaelu i te feitu faka-te-foitino mo te feitu faka-te-agaga i te lotou malaga ki te Fenua o te Folafolaga. (Teutelonome 1:30-33; 8:4) Ne talia ne Ieova mo te alofa ke fakamagalo atu olotou mea ‵se e fai. Ne fakaasi atu eiloa ne ia te alofa fakamagalo ki ana tino i aso mua. E pefea la te tāua ke fakatau fakaasi atu ne ana tavini i aso nei a te alofa atafai!—Mataio 9:13; 18:21-35.
17. E ‵lago atu pefea ki te tapuakiga tonu a te ‵tou malamalama i faifaiga atafai a Ieova?
17 Ne tuku fakatasi te alofa fakamagalo o Ieova mo ana faifaiga atafai. Kafai e isi sau tikisionale, faitau ki mea kolā e fakamatala mai i lalo o te pati ko te “gracious” io me ko faifaiga atafai. Ke fakatusatusa aka a fakamatalaga konā mo fuaiupu kolā e fakasino atu ki a Ieova e pelā me se tino atafai. E fakaasi mai i te Tusi Tapu me e aofia i faifaiga atafai a Ieova a tena amanaia mo te alofa ki tino fakaa‵lofa kolā e aofia i ana tino. (Esoto 22:26, 27) I so se fenua, e mafai o ‵nofo fakaa‵lofa a tino mai nisi fenua i ei, io me ko nisi tino foki eiloa o te fenua tenā. I ana akoakoga ki ana tino ke mo a ma fakailoga tino kae ke fakaasi atu te alofa atafai ki vaegā tino penā, ne fakamasaua atu ei ne Ieova ki a latou me ne ‵nofo fakaa‵lofa foki latou penā—i Aikupito. (Teutelonome 24:17-22) Kae e a tatou, tino o te Atua i aso nei? A ‵tou faifaiga atafai e fesoasoani mai ke ‵kau fakatasi tatou i te fealofani kae fai foki i ei a tino ke tosina mai ki te tapuakiga ki a Ieova.—Galuega 10:34, 35; Fakaasiga 7:9, 10.
18. Ne a mea e tauloto ne tatou mai mea kolā ne akoako ne Ieova ki te kau Isalaelu e uiga ki auala o tino o fenua fakaa‵tea?
18 Kae ne seki ‵tau o sili atu te alofa atafai o te kau Isalaelu ki tino mai nisi fenua i lō te lotou a‵lofa ki a Ieova mo ana tulaga i mea tau amioga. Tela la, ne akoako atu ki te kau Isalaelu ke mo a ma fakaakoako latou ki amioga a fenua i olotou tafa, ke mo a ma tau‵tali atu ki olotou faifaiga masani i mea tau tapuakiga mo olotou olaga fai valevale i faifaiga fakatauavaga. (Esoto 34:11-16; Teutelonome 7:1-4) E sē ‵tau foki o fai tatou penā i aso nei. E ‵tau o fai tatou e pelā me ne tino tapu, e pelā mo te ‵tou Atua, ko Ieova e tapu.—1 Petelu 1:15, 16.
19. E puipui pefea a tino o Ieova ona ko te lotou malamalama i tena kilokiloga e uiga ki mea ‵se kolā e fai?
19 Ko te mea ke malamalama ‵lei a Mose i Ana auala, ne fakaasi manino atu ei ne Ieova me e tiga eiloa e se talia ne ia te faiga o agasala, a ia e tuai o ita. E fakaavanoa ne ia a taimi e lava ke tauloto ne tino ana fakatonuga kae ke faka‵logo foki ki ei. Kafai e salamō se tino, e fakamagalo ne Ieova tena agasala, kae e se tapale ne ia a ikuga ma‵sei o te agasala tenā. Ne fakailoa faka‵lei atu ne ia ki a Mose me e mafai o pokotia i ei a tupulaga i aso mai mua, i se auala ‵lei io me ma‵sei, i mea kolā e fai ne te kau Isalaelu. A te malamalama ‵lei mo te loto fakafetai mō auala o Ieova e mafai o puipui ei a tino o te Atua mai te ‵losi atu ki a ia mō tulaga ma‵sei kolā ne avatu eiloa ne latou ki a latou io me mai te fakaiku aka me ko tō tuai a ia.
20. Se a te mea e fesoasoani mai ke iloa ne tatou o fai faka‵lei a ‵tou taina tali‵tonu e pelā foki mo latou kolā e fetaui mo tatou i te galuega talai? (Salamo 86:11)
20 Kafai e manako koe ke momea aka te ‵loto o tou iloa e uiga ki a Ieova mo ana auala, ke tumau i te faiga o au sukesukega kae mafaufau ‵loto ki mea kolā e faitau ne koe i te Tusi Tapu. Ke iloilo faka‵lei ki vaega fakaofoofogia kese‵kese o uiga o Ieova. Fakatasi mo te faiga o ‵talo, mafaufau ki auala e mafai ei o fakaakoako atu koe ki te Atua kae fai tou olaga ke fetaui mo ana fuafuaga. Ka fesoasoani atu te mea tenei ke kalo keatea koe mai matasele o te olaga, ke ‵lei au faifaiga ki ou taina tali‵tonu, kae fesoasoani atu foki ki nisi tino ke iloa ne latou te Atua tafasili i te gali kae a‵lofa foki ki a ia.
[Fakamatalaga mai lalo]
a Ne ‵lomi katoa ne Molimau a Ieova.
Ne a Au Mea ne Tauloto?
• Kaia ne tāua ei te loto maulalo ki a Mose, kae kaia e tāua foki ei ki a tatou?
• Ne a mea ‵lei ne maua mai i te fokifoki atu faeloa mo te fekau a Ieova ki a Falao?
• Ne a nisi akoakoga fakavae kae fakaofoofogia kolā ne akoako atu ki a Mose kae kolā e aogā foki ki a tatou i aso nei?
• E mafai pefea o faka‵poko atu ne tatou te ‵tou malamalama i uiga o Ieova?
[Ata i te itulau e 13]
Ne fakaoko atu eiloa ne Mose mo te fakamaoni a te fekau a Ieova ki a Falao
[Ata i te itulau e 15]
Ne fakaasi atu ne Ieova ki a Mose a mea kolā e manako a ia ki ei
[Ata i te itulau e 16]
Mafaufau ‵loto ki uiga o Ieova