‘Ke Maua te Loto Pulea’ i Mea Matagā
“A te Tavini a te Aliki e se ‵tau mo ia o kinau, kae ke alofa ki so se tino, . . . mo te kufaki io me mo te loto pulea.”—2 TIMOTEO 2:24.
1. Kafai e olo atu tatou i te galuega talai, kaia e fetaui ei tatou i nisi taimi mo tino kolā e fai‵pati mai mo te kaitaūa?
NE A au mea ka fai māfai e fetaui koe mo tino kolā e fakaasi mai te lotou sē fia‵fia ki a koe io me ko te fekau telā e avatu ne koe? I tena fakamatalaga e uiga ki aso fakaoti, ne ‵valo mai ne te apositolo ko Paulo me i tino ka “pati ma‵sei, . . . gutu fatufatu, e faka‵tupu taua, e mata kaitaua.” (2 Timoteo 3:1-5, 12) E mafai o fetaui koe mo vaegā tino penā i te galuega talai io me ko nisi koga aka foki.
2. Ne a fuaiupu kolā e mafai o fesoasoani mai ke ‵poto tatou i ‵tou faifaiga ki tino kolā e pati ‵mafa mai?
2 E se ko tena uiga me i tino katoa kolā e fai‵pati sē ‵lei e se fia‵fia ke fai te mea ‵lei. E mafai o fai‵pati mo te kaitaua a tino ki so se tino i olotou tafa ona ko fakalavelave faiga‵ta io me se mea fakafanoanoa e fe‵paki mo latou. (Failauga 7:7) E fai penei a tino e tokouke ona ko te mea e ‵nofo kae ga‵lue foki latou i koga kolā e lauiloa ei te faiga o pati ma‵sei. E se talia ne Kelisiano a vaegā pati penā, kae e fesoasoani mai i ei ke malamalama tatou i te pogai e fakaaogā ei ne nisi tino a vaegā pati konā. E ‵saga atu pefea tatou ki vaegā pati ma‵sei penā? E fai mai penei te Faataoto 19:11: “Kafai koe se tagata atamai, e mafai eiloa ne koe o taofiofi tou kaitaua.” E polopoloki mai ki a tatou te Loma 12:17, 18: “Sa taui atu te masei ki te masei. . . . Fai te mea e mafai ne koutou, ko te mea ke maua te olaga filemu i te vā o koutou mo nisi tino.”
3. E aofia pefea te filemu i te fekau telā e talai atu ne tatou?
3 Kafai e uiga filemu tonu tatou, ka lavea atu eiloa te mea tenā i uiga kolā e fakaasi atu ne tatou. Ka lavea atu eiloa te mea tenā i ‵tou pati mo ‵tou faifaiga, kāti e lavea atu foki i ‵tou foliga mo te tulaga o ‵tou leo. (Faataoto 17:27) I te taimi ne uga atu ei ne ia ana apositolo ke olo o talai, ne polopoloki atu Iesu ki a latou: “Kafai e ulu atu koutou ki se fale, fai atu ki tino i ei: ‘Ke manuia koutou,’ [“ke i a koutou te filemu,” The New English Bible]. Kafai e talia koutou ne tino i te fale tenā, fakamanuia atu ki a latou; kae kafai e se talia koutou ne latou, fakafoki mai te otou fakamanuiaga io me ko te filemu tenā.” (Mataio 10:12, 13) A te fekau telā e tauave ne tatou ko te tala ‵lei. E taku ne te Tusi Tapu te fekau tenā ki “te Tala ‵Lei o te Filemu,” “te Tala ‵Lei o te alofa tauanoa o te Atua,” mo “te Tala ‵Lei tenei e uiga ki te Malo.” (Efeso 6:15; Galuega 20:24; Mataio 24:14) A te pogai o te ‵tou galuega, e se ko te fakamaseiga o talitonuga o te suā tino io me ko te kinau mo ia e uiga ki ana manatu totino, kae ko te fakaasi atu fua ki a ia te tala ‵lei mai te Muna a te Atua.
4. Ne a au pati e mafai o fai atu māfai ko fai atu se tino “Au e se fiafia” a koi tuai o maua ne koe se avanoaga ke fakaasi atu te pogai o tau āsiga?
4 E aunoa mo te fakalogologo faka‵lei mai, e mafai o fai fakavave mai te tino i te fale: “Au e se fiafia.” I te ukega o taimi, se mea ‵lei ke fai atu, “Au ne fakamoemoe ke faitau atu fua se fuaiupu toetoe e tasi mai te Tusi Tapu.” Kāti ka se ‵teke atu a ia ki te mea tenā. I nisi taimi, kāti e ‵lei ke fai atu penei: “Au ne fakamoemoe ke fakaasi atu ki a koe e uiga ki te taimi telā ka se toe ai ei ne faifaiga sē fakamaoni kae ka fakatau a‵lofa foki i ei a tino katoa.” Kae kafai e se fakaasi fakavave mai ne te tino sena manakoga ki se fakamatalaga, e mafai o toe fai atu penei: “Kae e foliga mai me e se ‵lei te taimi tenei ki a koe.” Kafai foki e se tali mai te tino i te fale i se leo filemu, e mata, e ‵tau o fakaiku aka ne tatou me e seai eiloa “se aogā” o te tino tenā? Faitalia me e ‵saga mai pefea a tino, ke na masaua faeloa ne tatou a pati polopoloki i te Tusi Tapu ke ‘atafai ki so se tino, kae ke maua te loto pulea’ mai lalo i tulaga matagā.—2 Timoteo 2:24.
Ne Ma‵sei Ana Pati kae ne Takitaki ‵Segina
5, 6. Ne a mea ne fai ne Saulo ki soko o Iesu, kae kaia ne fai ei a ia penā?
5 Ne lauiloa te tagata ko Saulo i aso o te kau apositolo, i te faipati faka-se-āva mo te amio fakasauā foki. E fai mai te Tusi Tapu me ne “mau eiloa tona manatu fakasauā mo te fia tamate ki soko o te Aliki.” (Galuega 9:1, 2) Ne taku tonu mai ne ia fakamuli i a ia ne fakatauemu, “fakasauā kae muna masei foki.” (1 Timoteo 1:13) E tiga eiloa kāti ko oti ne fai ana nisi kāiga mo fai ne Kelisiano, ne fai mai a ia e uiga loa ki tena kilokiloga ki soko o Keliso: “Ko oko eiloa i toku sauā ki a latou, telā, fano eiloa au ki fa‵kai o fenua fakaa‵tea o fakasauā ki a latou.” (Galuega 23:16; 26:11; Loma 16:7, 11) E seai se fakamaoniga me ne taumafai a soko ke aofia latou i kinauga mo Saulo i mua o tino e tokouke i te taimi koi amio fakasauā ei a ia.
6 Kaia ne fai ei penā a Saulo? Ne tusi mai a ia i tausaga fakamuli ifo: “Au ne se talitonu ki a Iesu, kae ne fai foki ne au aku mea mo toku sē malamalama.” (1 Timoteo 1:13) A ia se Falesaio, telā ne ‘akoako faka‵lei ki Tulafono o ana tupuga.’ (Galuega 22:3) E tiga eiloa ne lauefa atu te kilokiloga a te faiakoga o Saulo, ko Kamalielu, ne toetoe fua te kilo a te faitaulaga sili ko Kaiafa, telā ne fesokotaki sāle atu a Saulo ki ei. Ne takitaki eiloa ne Kaiafa a te aofaga telā ne iku atu ei ki te tamatega o Iesu Keliso. (Mataio 26:3, 4, 63-66; Galuega 5:34-39) Mai tua ifo i ei, ne aofaga eiloa ne Kaiafa ke ‵kini sāle a apositolo o Iesu, kae fakatonu mālō atu foki ke fakagata te lotou talaiga i te igoa o Iesu. Ne takitaki foki ne Kaiafa te fono o Setefano i te Sanetulini telā ne kai‵taua ei a tino kae iku atu ei ki te tamatega o Setefano. (Galuega 5:27, 28, 40; 7:1-60) Ne maimoa a Saulo ki te peipeiga o Setefano ki fatu, kae ne tuku atu ne Kaiafa ki a ia te saolotoga ke taumafai o taofi te galuega a soko o Iesu mai te puke fakapagotaga o latou i Tamaseko. (Galuega 8:1; 9:1, 2) Ona ko te fakamalosiga tenei, ne mafaufau a Saulo me tenā eiloa te fakamaoniga o tena loto finafinau mō te Atua, kae ne fakaasi atu fua i ei te sē tonu o tena fakatuanaki. (Galuega 22:3-5) Ona ko te mea tenā, ne seki matea ei ne Saulo me i a Iesu ko te Mesia tonu. Kae ne fatoā iloa ne Saulo te matagā o ana faifaiga i te taimi ne faipati fakavavega atu ei ki a ia a Iesu, telā ko oti ne fakatu aka, i tena auala ki Tamaseko.—Galuega 9:3-6.
7. Se te mea ne tupu ki a Saulo i te lā otiga ne fetaui mo Iesu i tena auala ki Tamaseko?
7 Mai tua malie ifo, ne uga atu ei te soko ko Anania ke talai atu ki a Saulo. E mata, ka fiafia koe o fai te mea tenā? Ne fakaeteete a Anania, kae ne faipati atu eiloa a ia ki a Saulo mo te atafai. Ne ‵fuli eiloa a uiga o Saulo i te lā otiga ne fetaui fakavavega mo Iesu i tena auala ki Tamaseko. (Galuega 9:10-22) Ne lauiloa fakamuli a ia e pelā me ko te apositolo ko Paulo, se misionale Kelisiano loto finafinau.
E Loto Maulalo Kae Loto Toa Foki
8. Ne fakaasi mai pefea ne Iesu te kilokiloga a tena Tamana ki tino kolā ko oti ne fai ne latou a amioga ma‵sei?
8 Ne fai a Iesu mo fai se tino talai loto finafinau o te Malo, telā ne loto maulalo kae loto toa foki i ana faifaiga ki tino. (Mataio 11:29) Ne fakaasi mai eiloa ne ia a uiga o tena Tamana faka-te-lagi, telā e fakamalosi atu ki tino amio ma‵sei ke ‵fuli keatea mai i olotou uiga ma‵sei. (Isaia 55:6, 7) I ana faifaiga ki tino agasala, ne lavea ne Iesu a fakamaoniga me e mafai o ‵fuli a uiga o se tino, kae ne fakamalosi atu a ia ki vaegā tino penā. (Luka 7:37-50; 19:2-10) I lō te fakamasino atu ki nisi tino i olotou foliga i tua, ne fakaakoako eiloa a Iesu ki te atafai, te fa‵ki, mo te kufaki o tena Tamana, mo te fakamoemoega ke iku atu ki te lotou sala‵mō ki olotou agasala. (Loma 2:4) Ko te loto eiloa o Ieova ke sala‵mō kae ke ola foki a tino katoa.—1 Timoteo 2:3, 4.
9. Ne a mea e mafai o tauloto ne tatou mai te auala ne fakataunu ei te Isaia 42:1-4 ki a Iesu?
9 Ne siki mai ne te tino tusitala Evagelia ko Mataio, a pati fakavaloaga konei e uiga ki te kilokiloga a Ieova ki a Iesu Keliso: “Muna a te Atua, ko taku tavini tenei ne filifiligina ne au, ko taku fagasele e fiafia au ki ei. E fakaeke ne au a toku Agaga ki luga i a ia, e folafola atu ne ia a te fakamasinoga ki tino katoa. E se fakakinau io me pakalaga, e se lauga foki mo te leo lasi i auala; e se unu ne ia se mouku ko magemage, e se tamate foki ne ia se moli ko tai mate. Ke oko foki eiloa ki te taimi e fai ei ne ia ke manumalo a te fai mea tonu; ko tona igoa foki e fakamoe‵moe ki ei a tino katoa.” (Mataio 12:17-21; Isaia 42:1-4) Ne fetaui ‵tonu eiloa a pati fakavaloaga konā mo mea ne fai ne ia, me ne seki aofia lele a Iesu i se kinauga fakalogoā. Ke oko ki tulaga faiga‵ta, ne faipati faeloa a ia e uiga ki te munatonu i se auala telā e ‵tagi gali ki tino loto fakamaoni.—Ioane 7:32, 40, 45, 46.
10, 11. (a) E tiga eiloa ne aofia a Falesaio i tino kolā ne ‵teke malosi atu ki a Iesu, kaia ne talai atu ei a ia ki nisi o latou? (e) Ne a vaegā tali kolā ne tuku atu ne Iesu i nisi taimi ki tino ‵teke, kae se a te mea telā ne seki fai ne ia?
10 I te faiga o tena galuega talai, ne faipati atu a Iesu ki Falesaio e tokouke. E tiga eiloa ne lamalama a nisi o latou ke ‵po ne latou a ia i ana pati, ne seki fakaiku aka ne Iesu me ne ma‵sei a lagonaga o latou katoa. A Simona, se Falesaio telā ne fia kinau sāle, ne manako ke iloa ‵lei ne ia a Iesu, ‵kami ei ne ia ke ‵kai laua. Ne talia ne Iesu te ‵kamiga kae ne talai atu ei ki tino kolā ne ‵nofo i konā. (Luka 7:36-50) I te suā taimi, ne fanatu ‵funa se Falesaio tai maluga e igoa ki a Nikotemo ki a Iesu i te po. Ne seki taku fakamasei ne Iesu tou tagata me ne faka‵tali a ia ke pouli. I lō te fai penā, ne talai atu a ia ki a Nikotemo e uiga ki te alofa telā ne fakaasi mai ne te Atua i te ugamaiga o tena Tama ke ‵tala mai ei te auala o te fakaolataga ki tino fakatuanaki. Ne fakasino atu foki a Iesu mo te atafai e uiga ki te tāua o te fakalogo ki fakatokaga a te Atua. (Ioane 3:1-21) Fakamuli ifo ne faipati atu a Nikotemo mō Iesu i te taimi ne taku fakamasei ei ne nisi Falesaio se lipoti ‵lei e uiga ki a Iesu.—Ioane 7:46-51.
11 Ne seki ‵kivi a mata o Iesu ki faifaiga ‵loi a tino kolā ne taumafai o fakatogafiti ne latou a ia. Ne seki talia ne ia a fakamalosiga a tino ‵teke ke aofia a ia i kinauga sē aogā. Kafai e fetaui ‵lei, ne tuku atu ne ia a tali toe‵toe kae ma‵losi mai te taku atu o se akoakoga fakavae, se tala fakatusa, io me siki atu se fuaiupu i te Tusi Tapu. (Mataio 12:38-42; 15:1-9; 16:1-4) I nisi taimi, ne seki tuku atu eiloa ne Iesu se tali māfai ne foliga mai me e seai eiloa se aogā ke fai penā.—Maleko 15:2-5; Luka 22:67-70.
12. Ke oko foki eiloa ki taimi kolā ne paka‵laga atu ei a nisi tino mo te kaitaūa ki a ia, ne mafai pefea o fesoasoani atu a Iesu ki tino?
12 E isi ne nāi taimi e paka‵laga atu ei ki a Iesu a tino kolā e pukea ne agaga ma‵sei. I te taimi e tupu ei se vaegā mea penā, ne kufaki a ia kae fakaaogā foki tena ‵mana mai te Atua ke avatu se fakatapūga. (Maleko 1:23-28; 5:2-8, 15) Kafai ko kamata o kaitaūa kae paka‵laga mai a nisi tino i te taimi e olo atu ei tatou i te galuega talai, e ‵tau foki o kufaki tatou, kae e taumafai o tali atu i se auala poto kae atafai.—Kolose 4:6.
I Loto i te Kāiga
13. Kaia e ‵teke atu ei a tino i nisi taimi ki se tino o te kāiga telā ko kamata o sukesuke ki te Tusi Tapu fakatasi mo Molimau a Ieova?
13 E masani o sili atu te manakoga ke fakaasi atu ne soko o Iesu te kufaki io me ko te loto pulea i loto i te kāiga. E manako malosi te tino telā ko otia tena loto i te munatonu i te Tusi Tapu ke fai foki penā tena kāiga. Kae e pelā mo pati a Iesu, e mafai eiloa o ‵teke malosi mai a tino o te kāiga. (Mataio 10:32-37; Ioane 15:20, 21) E kese‵kese a pogai e fai ei latou penā. E pelā mo te fesoasoani mai o akoakoga i te Tusi Tapu ke fakamaoni, ga‵lue malosi, kae āva foki tatou. E akoako mai foki te Tusi Tapu me i so se fakanofonofoga, a te ‵toe mea tāua ko te ‵tou tiute ki te ‵tou Māfuaga. (Failauga 12:1, 13; Galuega 5:29) E mafai o ita se tino o te kāiga telā e mafaufau me ko se malosi tena pulega faka-te-kāiga ona ko te ‵tou fakamaoni ki a Ieova. Kafai ko fe‵paki tatou mo se vaegā tulaga penā, se mea tāua ‵ki ke tau‵tali atu tatou ki te fakaakoakoga o te loto pulea o Iesu!—1 Petelu 2:21-23; 3:1, 2.
14-16. Ne a mea ne ‵fuli ei a nisi tino kolā ne ‵teke atu muamua ki olotou kāiga?
14 E tokouke a tino kolā e tavini atu nei ki a Ieova ne isi ne olotou avaga io me ko nisi tino o te kāiga, ne ‵teke atu ki ‵fuliga kolā ne fai ne latou i te taimi ne kamata ei o suke‵suke latou ki te Tusi Tapu. Kāti ne lagona ne tino ‵teke konā a fakamaseiga e uiga ki Molimau a Ieova, kae manava‵se ei latou e uiga ki fakamalosiga ma‵sei kolā e mafai o oko atu ki olotou kāiga. Ne a mea ne fai ei ke ‵fuli olotou kilokiloga? I te ukega o taimi, ko te faiga eiloa o fakaakoakoga ‵lei. Ona ko te tu ‵mautakitaki o te tino talitonu i te fakagaluega o pati fakatonutonu mai i te Tusi Tapu—ko te kau faeloa ki fakatasiga faka-Kelisiano mo te galuega talai kae fai foki a tiute faka-te-kāiga mo te fakaasiatuga o te loto pulea māfai ko laku mai a pati ma‵sei—ne fakafeoloolo aka ei i nisi taimi a ‵tekemaiga i te kāiga.—1 Petelu 2:12.
15 E mafai foki o se fia fakalogologo mai se tino ‵teke ki so se fakamatalaga mai te Tusi Tapu ona ko manatu fakailoga tino io me ko te fakamatamata. Tenā eiloa te mea ne tupu ki se tagata i Amelika telā ne fai mai me ne lasi ‵ki tena loto fenua. I te taimi e tasi ne nofo atu ei tena avaga i se fono a Molimau a Ieova, ne puke katoa ne ia ana gatu kae sola ei keatea. I te suā taimi, ne sola tou tagata kae ave ne ia se fana ke tamate e a ia. Ne ‵losi atu tou tagata ki te lotu a tena avaga me ko te pogai ne fai ei a ia penā. Kae ne taumafai faeloa tou fafine o fakagalue aka a pati fakatonutonu mai i te Tusi Tapu. I te lua sefulu tausaga mai tua o tena faiga mo fai se Molimau a Ieova, ne fai foki ei tou tagata mo fai se Molimau. Ne kaitaua malosi se fafine i Albania i te taimi ne sukesuke ei tena tama fafine ki te Tusi Tapu mo Molimau a Ieova kae ne papatiso foki. Ne fakamasei ne te mātua i taimi e 12 a kopi o te Tusi Tapu a tena tama fafine. Kae i te aso e tasi, ne ‵tala ne ia te Tusi Tapu fou a tena tama telā ne tiaki ne ia i luga i te taipola. Ne matala te Tusi Tapu ki te Mataio 10:36, kae ne matea ne te mātua me pelā me ne fakauiga eiloa a pati i ei ki a ia. Kae ona ko tena manavase e uiga ki tena tama, ne olo fakatasi atu laua ki te vaka telā ka olo atu ei latou mo nisi Molimau ki se fono i Italia. I te taimi ne lavea atu ei ne te mātua a te alofa, te fakatau ‵sai, te mata kata‵kata, mo te ‵kata fia‵fia o te potukau tenā, ne kamata ei o ‵fuli ana lagonaga. E seki leva mai tua ifo i ei, ne talia ei ne ia ke sukesuke a ia ki te Tusi Tapu. I aso nei, ko taumafai eiloa tou fafine o fesoasoani atu ki nisi tino kolā ne ‵teke muamua.
16 I te taimi e tasi, ne fakaagaga eiloa ne se tagata mo te kaitaua se naifi ki tena avaga kae lau atu a pati ma‵sei a ko pili atu fua ki te Kingdom Hall. Ne tali atu tou fafine i se leo filemu: “Vau ki loto i te Kingdom Hall, ko te mea ke lavea eiloa ne koe ki ou mata.” Ne fanatu eiloa tou tagata, kae fakamuli ifo ne fai tou tagata mo fai se toeaina Kelisiano.
17. Kafai ko kamata o se fealofani a tino i se kāiga Kelisiano i nisi taimi, ne a pati polopoloki i te Tusi Tapu kolā e mafai o fesoasoani mai?
17 Kafai foki eiloa e fai a tino katoa i tou kāiga mo fai ne Kelisiano, e isi eiloa ne taimi e sē tokagamalie ei te kāiga ke oko ki te lakuatuga pati ‵mafa ona ko te tulaga sē ‵lei katoatoa o tatou katoa. Ne lavea atu eiloa te mea tenā i pati polopoloki konei ki Kelisiano i Efeso: “Tiakigina a uiga fakapiau, a uiga faka‵mae loto, mo uiga fakaitaita. Fakagata te sōna paka‵laga valevale mo te pati masei! Fakagata foki a uiga katoa o te loto masei!” (Efeso 4:31) E fakamaoni mai i konei a fakanofonofoga kolā ne ola i ei a Kelisiano i Efeso, ona ko te lotou tulaga sē ‵lei katoatoa, penā foki loa mo fakamalosiga mai i auala ne ola ei a nisi o latou i aso mua. Se a te mea ka fesoasoani atu ke ‵fuli olotou olaga? Ne ‵tau o ‘faka‵fou aka latou i te malosi telā e ga‵lue ei olotou mafaufau.’ (Efeso 4:23) I te lotou suke‵suke ki te Muna a te Atua, mafaufau ‵loto ki auala e fakamalosi atu ei ki olotou olaga, te ‵kau atu ki taina Kelisiano, te ‵talo mo te loto kātoa, ka lavea ‵lei atu ei a fuataga o te agaga o te Atua i olotou olaga. Ka iloa ei ne latou “o fakatau a‵lofa kae fakatau atafai; ke fakatau fakamagalo foki latou, e pelā eiloa mo te Atua ko oti ne fakamagalo ne ia [latou] i a Keliso.” (Efeso 4:32) Faitalia a mea e fai ne nisi tino, e ‵tau mo tatou o fakagalue te loto pulea, te atafai, te alofa, mo te alofa fakamagalo. E tonu, e se ‵tau mo tatou o “taui atu te masei ki te masei.” (Loma 12:17, 18) A te fakaasiatuga o te alofa tonu i te fakaakoako atu ki te Atua ko te mea ‵lei eiloa telā e ‵tau o fai faeloa.—1 Ioane 4:8.
Pati Fakatonutonu mō Kelisiano Katoa
18. Kaia ne fetaui ‵lei ei a pati polopoloki i te 2 Timoteo 2:24 mo se toeaina i te fa‵kai mua ko Efeso, kae e mafai pefea o aogā ki Kelisiano katoa?
18 E fakasino atu a pati polopoloki ke ‘maua faeloa te loto pulea’ mai lalo i tulaga matagā ki Kelisiano katoa. (2 Timoteo 2:24) Kae ne tuku muamua atu eiloa ki a Timoteo, telā ne manako malosi ki ei i te taimi ne tavini atu ei a ia e pelā me se toeaina i Efeso. Ne fakaasi tonu atu ne nisi tino i te fakapotopotoga olotou kilokiloga totino kae ne akoako atu ne latou a akoakoga ‵se. Ona ko te mea ne seki malamalama faka‵lei latou i te uiga tonu o te Tulafono faka-Mose, ne seki mafai ei o malamalama latou i te tāua o te fakatuanaki, te alofa, mo te mauaga o se loto lagona ‵lei. Ne fakamalosi aka ne te fakamatamata a taua i olotou kinauga e uiga ki uiga o pati, ‵galo atu ei a manatu tāua i akoakoga a Keliso mo te tāua o te tapuaki atu ki te Atua mo te loto kātoa. Ke fakafesagai atu ki te tulaga tenei, ne ‵tau o tu ‵mautakitaki a Timoteo i muna‵tonu mai i te Tusi Tapu kae ne ‵tau foki o fakaasi atu ne ia te atafai i ana faifaiga ki ana taina. E pelā mo toeaina i aso nei, ne iloa ne Timoteo me e se i a ia te lafu mamoe kae ne ‵tau o faipati atu a ia ki nisi tino i se auala telā e fakamalosi aka ei te alofa mo te fealofani o Kelisiano.—Efeso 4:1-3; 1 Timoteo 1:3-11; 5:1, 2; 6:3-5.
19. Kaia e tāua ei ke ‵sala atu tatou katoa ki te “loto malalo”?
19 E fakamalosi atu te Atua ki ana tino ke ‵sala ki te “loto malalo.” (Sefanaia 2:3) A te pati Epelu mō te “loto malalo” e fakauiga ki se tulaga telā e mafai ei ne se tino o kufaki se pakiaga, e aunoa mo te kaitaua mo te taui ma sui. Ke na fakamolemole atu tatou mo te loto kātoa ki a Ieova mō se fesoasoani ko te mea ke maua ne tatou te loto pulea kae ke sui faka‵lei foki ne tatou a ia, ke oko ki tulaga faiga‵ta.
Ne a Au Mea ne Tauloto?
• Kafai ko fepaki koe mo pati ‵teke, ne a tusi siki kolā e mafai o fesoasoani atu ki a koe?
• Kaia ne fai ei ne Saulo a faifaiga ‵teke?
• E fesoasoani mai pefea te fakaakoakoga a Iesu i te fai faka‵lei atu ki tino katoa kolā e fetaui mo tatou?
• Ne a mea aogā e mafai o maua mai te fakaasi atu o te loto pulea i ‵tou pati kolā e fai i loto i ‵tou kāiga?
[Ata i te itulau e 18]
Faitalia te ma‵sei o uiga o Saulo, ne faipati atu eiloa a Anania mo te atafai ki a ia
[Ata i te itulau e 21]
A te tausi mo te fakamaoni o se Kelisiano ki ana tiute e mafai o fakafeoloolo aka ei a ‵tekemaiga i te kāiga
[Ata i te itulau e 22]
E fakamalosi aka ne Kelisiano a te alofa mo te fealofani