E Puipui ne Ieova a Latou Kolā e Fakamoe‵moe ki a Ia
“A tou alofa mo tou fakamaoni e tausi mai faeloa ke sao ‵lei au.”—Salamo 40:11.
1. Se a te fakamolemole a te tupu ko Tavita ne fai ki a Ieova, kae e talia pefea te fakamolemole tenā i aso nei?
‘NE FAKAMOEMOE malosi a te tupu ko Tavita ki a Ieova’ kae ne otia tena loto o fai mai me “ne fakalogologo mai a ia ki a au, lagona ei ne ia taku tagi.” (Salamo 40:1) Ne matea tonu faeloa ne ia te auala ne puipui ei ne Ieova a latou kolā ne a‵lofa ki a Ia. Tenā te mea ne mafai ei ne Tavita o fakamolemole atu ke puipui faeloa a ia ne Ieova. (Salamo 40:11) Ona ko tena aofia i tāgata mo fāfine fakamaoni kolā ne folafola atu ki a latou a “te olaga io me ko te toe‵tuga e sili atu i te ‵lei,” e mau eiloa a Tavita i te mafaufau o Ieova e pelā me se tokotasi telā ka maua ne ia te taui tenā. (Epelu 11:32-35) Telā la, a tena tulaga i aso mai mua ko oti eiloa ne fakamautinoa faka‵lei aka. E mau nei tena igoa i te “tusi” o tino kolā e masaua ne Ieova.—Malaki 3:16.
2. E fesoasoani mai pefea te Tusi Tapu ke malamalama tatou i te uiga o te puipuiga a Ieova?
2 E tiga eiloa ne ola a tino fakamaoni konei e fakaasi mai i te mataupu e 11 o te Epelu mai mua o te vauga o Iesu ki te lalolagi, ne ola eiloa latou e ‵tusa mo mea kolā ne akoako mai ne Iesu: “Ko te tino e atafai ki tona ola, ka maumau tona ola; ka ko tino e se fakapelepele ki tona ola i te lalolagi nei, e maua ne ia te ola se gata mai.” (Ioane 12:25) Telā la, a te puipuiga a Ieova e se fakauiga i ei me ka se maua a logo‵maega mo fakasauāga. Kae e fakauiga loa ki te puipuiga faka-te-agaga telā e mafai ei o fakatumau ne tatou te ‵tou tulaga ‵lei i mua o te Atua.
3. Se a te fakamaoniga e maua ne tatou me ne puipui eiloa ne Ieova a Keliso Iesu, kae se a te mea ne iku mai i ei?
3 Ne oko atu eiloa ki a Iesu a toe fakasauāga mo fakatauemuga matagā, kae ne fakaoti eiloa ki tena mate fakalumaluma kae logo‵mae i lima o ana fili. Kae ne seki soli i ei a te feagaiga a te Atua ke puipui ne ia te Mesia. (Isaia 42:1-6) E fakamaoni mai i te ‵toe fakatuakaga o Iesu i te tolu o aso me ne lagona eiloa ne Ieova a tena kalaga mō se fesoasoani—e pelā eiloa mo te lagonaga ne ia o te kalaga a Tavita. Ne tali atu a Ieova mai te tukuatuga ki a Iesu te malosi ke fakatumau ei tena fakamaoni. (Mataio 26:39) Mai te puipuiga tenei, ne maua ei ne Iesu te ola e sē mafai o mate i te lagi, kae ko maua foki ne te fia miliona o tino kolā e fakatuanaki ki te togiola te fakamoemoega ke ola ki te se-gata-mai.
4. Se a te fakatalitonuga telā e tuku atu ki Kelisiano fakaekegina mo ‘nisi mamoe’?
4 E mafai o tali‵tonu tatou me e penā eiloa te fiafia o Ieova o puipui ana tavini i aso nei e pelā eiloa mo ana faiga i aso o Tavita mo Iesu. (Iakopo 1:17) E fakalago‵lago eiloa a nāi taina o Iesu kolā koi ‵toe i te lalolagi ki te folafolaga tenei a Ieova: “Telā la, a matou e ‵kilo mo te fakamoemoe ke maua te fakamanuiaga telā e tausi ne te Atua mo ona tino i aso mai mua. E tausi ne ia i te lagi mō koutou. . . kae e tausi faka‵lei ne te mana o te Atua e alatu i te otou fakatuanaki, kae koi fakatalitali koutou ki te fakaolataga telā ko toka o fakaasi mai i aso fakaoti.” (1 Petelu 1:4, 5) E mafai foki o tali‵tonu a ‘nisi mamoe,’ kolā e fakamoe‵moe ke ola i te lalolagi ki te Atua mo tena folafolaga e auala i te faisalamo: “Alofa atu ki te Aliki, koutou ona tino fakamaoni katoa. E puipui ne te Aliki a tino fakamaoni.”—Ioane 10:16; Salamo 31:23.
Te Tulaga Faka-te-agaga Telā e Puipuigina
5, 6. (a) E puipuigina pefea a tino o te Atua i aso nei? (e) Se a te fesokotakiga e maua ne tino fakaekegina mo Ieova, kae e pefea a latou kolā e fakamoe‵moe ki te lalolagi?
5 Ko oti ne fai ne Ieova a fakatokaga mō te puipuiga o ana tino i te feitu faka-te-agaga i aso nei. E ui eiloa e sē puipui ne ia latou mai i fakasauāga io me mai mea faiga‵ta mo fakalavelave masani o te olaga nei, ko oti eiloa ne tuku atu ne ia ki a latou te fesoasoani mo te fakamalosiga telā e manakogina ke puipui ei te lotou fesokotakiga ‵pili mo ia. A te fakavae telā e ati aka i luga i ei a te fesokotakiga tenei ko te fakatuanaki ki te fakatokaga alofa a Ieova ko te togiola. Ko oti ne fakaeke a nisi Kelisiano fakamaoni konei ne te agaga o te Atua ke pule fakatasi latou mo Keliso i te lagi. Ko oti ne takuamiotonugina latou mo fai ne tama faka-te-agaga a te Atua, kae fakauiga loa ki a latou a pati konei: “Ko oti ne fakasaoloto ne ia tatou mai i te malo o te pouliga, kae ne fakamasiki atu ne ia tatou ki te malo o tena Tama Fagasele, telā e maua mai ei ne tatou i a ia te fakaolataga, ka ko fakamagalogina foki o‵tou agasala.” —Kolose 1:13, 14.
6 E fakamautinoa atu foki ki te fia miliona o nisi Kelisiano fakamaoni me ka aogā foki ki a latou a te fakatokaga a te Atua e uiga ki te togiola. E fai‵tau tatou penei: “Me i a au te Tama a te Tagata ne seki vau ko te mea ke tavini mai tino; kae ne vau au o tavini atu, kae tuku atu foki a toku ola o fakasaoloto ei a tino e tokouke.” (Maleko 10:45) E ‵kilo atu eiloa a Kelisiano konā ke fai latou mo fai ne tino “i te saolotoga ‵malu o te fanau a te Atua.” (Loma 8:21) I te vaitaimi nei, e fakatāua ne latou te lotou vā fakataugasoa mo te Atua kae e fakapalele olotou ‵mafi ke atili fakamalosi aka te fesokotakiga tenā.
7. Ne a mea e fakaaogā ne Ieova ke puipui ei ana tino i te feitu faka-te-agaga?
7 E tasi te auala e puipui ei ne Ieova te tulaga faka-te-agaga ona tino ko fakasoloatuga o polokalame o akoakoga. E fai ei ke gasolo faeloa ki mua te lotou malamalama i te munatonu. E tuku atu foki ne Ieova a fakatakitakiga i taimi katoa e auala tena Muna, tena fakapotopotoga, mo tena agaga tapu. Mai lalo i te takitaki a “te tavini fakamaoni kae poto,” e fai ei a tino o te Atua i te lalolagi kātoa e pelā me se kaukāiga e tasi i te lalolagi. E tausi atu a te tavini ki manakoga faka-te-agaga ke oko ki manakoga faka-te-foitino o te kaukāiga o tavini a Ieova—faitalia olotou fenua mo olotou tulaga i te olaga.—Mataio 24:45.
8. E talitonu pefea a Ieova ki ana tino a‵lofa fakamaoni, kae se a te mea e fakatalitonu atu ne ia ki a latou?
8 E pelā eiloa mo te seki puipuiga ne Ieova a Iesu mai fakasauāga ma‵sei o ana fili, e sē puipui foki ne ia a Kelisiano i se auala penā i aso nei. Kae e se se fakaasiga tenā o te sē fiafia o te Atua. E sē penā loa! I lō te fai penā, e faka‵mafa mai i te mea tenā a tena talitonu me ka ‵kau eiloa latou ki tena feitu i te kinauga lasi e uiga ki te pulega i te lagi mo te lalolagi. (Iopu 1:8-12; Faataoto 27:11) E sē mafai o tiaki ne Ieova a latou kolā e a‵lofa fakamaoni ki a ia, “me i te Aliki e fiafia ki te mea tonu, e se mafai foki o tuku tiaki ne ia ona tino fakamaoni. E puipui faeloa ne ia a latou.”—Salamo 37:28.
E Puipui ne te Alofa Kaimalie mo te Fai Mea Tonu
9, 10. (a) E puipui pefea ne te fai mea tonu o Ieova ana tino? (e) E fakaasi mai pefea i te Tusi Tapu me e puipui ne Ieova ana tino a‵lofa fakamaoni e auala i tena alofa kaimalie?
9 I tena ‵talo telā e tusi i te Salamo 40, ne fakamolemole atu Tavita ke puipui aka a ia ki te alofa kaimalie mo te fai mea tonu o Ieova. E taku manino mai i te fai mea tonu o Ieova ana tulaga amio‵tonu. A latou kolā e ola e ‵tusa mo tulaga amio‵tonu konā e puipuigina i se auala lasi ‵ki mai te loto māfatia, te mataku, mo fakalavelave kolā e pokotia i ei a latou kolā e sē fia ‵saga atu ki ei. E pelā mo te puipuiga e maua ne tatou mo ‵tou kāiga mai fakalavelave fulafulāki mai te ‵kalo keatea mai te sōna fakaaogāga o vailakau tapu mo te kava, amioga finalalolagi, mo se olaga fakasauā. Ke oko ki a latou kolā e ‵seke keatea mo te auala o te fai mea tonu o Ieova—e pelā mo Tavita i nisi taimi—e maua eiloa ne latou te fakatalitonuga me i a te Atua “ko te koga e muni ei” a tino salamō. (Salamo 32:7) Tenei eiloa te fakaasiga tāua e tasi o te alofa kaimalie o te Atua!
10 A te suā fakaasiga o te alofa kaimalie o te Atua ko tena poloakiga ki ana tavini ke tumau i te ‵vae keatea mai te lalolagi matagā, telā ko pili o fakaseai ne ia. E fai‵tau penei: “Sa tuku otou loto ki te lalolagi io me ko so se mea faka te lalolagi. Kafai e a‵lofa koutou ki te lalolagi, ko tona uiga e se a‵lofa koutou ki te Tamana telā e i loto i a koutou. Konei katoa a mea e taku ko mea faka te lalolagi: ko manakoga agasala, ko mea e matea ne tino kae ma‵nako ki ei, mo mea katoa i te lalolagi nei kolā e fakamata‵mata ki ei a tino. E seai eiloa se mea o mea konei e mafua mai i te Tamana; e mafua katoa mai i te lalolagi.” Mai te saga tonu atu ki pati polopoloki konei, ka puipui ei ne taotu a ‵tou ola ke oko eiloa ki te se-gata-mai, me e toe faka‵soko mai penei a fuaiupu konā: “A te lalolagi mo mea katoa i ei kolā e ma‵nako ki ei a tino e palele atu katoa; ka ko te tino telā e fai ne ia a te mea e loto ki ei a te Atua e ola ki te segatamai.”—1 Ioane 2:15-17.
E Puipuigina ne te Malosi o te Mafaufau, te Malamalama, mo te Atamai
11, 12. Fakamatala mai me e maua pefea ne tatou te puipuiga mai te malosi o te mafaufau, te loto malamalama, mo te atamai.
11 Mō tino kolā e fakamoe‵moe ke maua ne latou te taliaga a te Atua, ne tusi mai te tama a Tavita ko Solomona: “A tou atamai mo tou malamalama ka puipui ne ia koe.” Kae ne toe fakamalosi mai a ia: “Taumafai o sala te poto . . . Sa puli i a koe aku pati konā ne fai atu, io me fakaseaoga ne koe. Sa tiakina ne koe te poto, kae ka puipui ne ia koe; alofa ki ei kae ka tausi ne ia koe ke saogalemu.”—Faataoto 2:11; 4:5, 6.
12 E fakaaogā ne tatou te malosi o ‵tou mafaufau māfai e mafaufau ‵loto ki mea e fai‵tau ne tatou mai te Muna a te Atua. Mai te fai penā e fai ei ke sinā ‵loto atu te ‵tou malamalama ko mea ke mateagofie ne tatou a mea kolā e ‵tau o fakamuamua. E tāua te mea tenei, me e iloa ne te tokoukega o tatou—e auala i mea ‵tupu i te olaga masani—me e oko mai a fakalavelave mai te fakamuamuaga o mea ‵se mo te iloa tonu io me ikai. E fakalata tatou ne te lalolagi a Satani ke kausaki atu ki se tulaga maumea, takutakua, mo te fia pule, kae e fakamalosi mai ne Ieova a mea aogā faka-te-agaga kolā e tāua atu. Te fakatamala o fakamuamua a mea faka-te-agaga e mafai o mavae‵vae valevale i ei a kāiga, fakaseai i ei a taugasoa, kae manatu māmā ki fakamoemoega faka-te-agaga. Ko iku atu ei te tino tenā ki te tulaga fakafanoanoa telā ne faipati ki ei a Iesu: “E isi se aogā ki te tino manafai e maua ne ia te lalolagi kātoa, kae telā la e maumau fua i ei a tona ola? E seai lele eiloa!” (Maleko 8:36) E ‵poto tatou māfai e faka‵logo tatou ki te poloakiga a Iesu: “Ke mua koutou o ‵sala tena Malo mo tena amiotonu; kae ka fakaopoopogina atu a mea katoa konā ki a koutou.”—Mataio 6:33.
Te Fakamataku o te Saga Atu Fua ki a Koe Eiloa
13, 14. Se a te uiga o te saga ifo ki ou manakoga totino eiloa, kae kaia e sē ‵lei ei ke fai penā?
13 Te uiga masani o tino ko te saga atu eiloa o te tino ki a ia eiloa. Kae kafai ko fai a manakoga totino mo fai a toe mea tāua i te olaga, ko kamata ei i konā a fakalavelave. Telā la, ke puipui te ‵tou vā fakataugasoa mo ia, e akoako mai a Ieova ke ‵kalo keatea tatou mai te ‵saga ifo ki a tatou eiloa. E fakauiga te mea tenei ki te “saga ifo o te tino ki ana manakoga totino faeloa.” E mata, e se tenā eiloa te tulaga o tino e tokouke i aso nei? Tenā eiloa te mea e ‵valo i te Tusi Tapu me “i aso fakaoti” o te fakanofonofoga matagā tenei a Satani, “ko tino ka ma‵natu fakapito,” io me ka ‵saga ifo ki a latou eiloa.—2 Timoteo 3:1, 2.
14 E malamalama a Kelisiano i te aogā o te fakatonuga i te Tusi Tapu ke amanaia ki manakoga o nisi tino, ke a‵lofa ki a latou e pelā eiloa mo tou alofa ki a koe eiloa. (Luka 10:27; Filipi 2:4) Kāti ka fai mai a tino e tokouke me e se mafai o fai te mea tenā, kae e tāua ‵ki te faiga o te mea tenā māfai e ma‵nako tatou ke manuia kae fia‵fia te tauavaga mō lā kāiga pelā foki eiloa mo lā taugasoa. Telā la, e se ‵tau lele eiloa o talia ne se tavini tonu a Ieova ke pule tena olaga ne ana manakoga masani ko tiakina ei a mea kolā e tāua atu. A ko te ‵toe mea tāua i mea konei ko manakoga o Ieova, ko te Atua telā e tapuaki a ia ki ei.
15, 16. (a) E mafai o iku atu ki te a a te manatu fakapito, kae ne fakaasi mai ne ei te mea tenā? (e) Se a te mea tonu e fai ne se tino telā e fakamasino fakavave aka ne ia a nisi tino?
15 E mafai o iku atu te saga ki manakoga totino ki te mauaga o se kilokiloga fia amiotonu, telā e fai i ei ke toetoe te kilo kae fakamatamata foki. Tenā eiloa te mea e fai mai i te Tusi Tapu: “Telā la, ko seai sau fakamasako e toku tagata, e ‵tusa me ko oi koe, kae kafai e fakamasino atu koe, ko fakamasino eiloa koe ne koe, me i te famasino e fai foki ne ia a mea konā.” (Loma 2:1; 14:4, 10) Ne tali‵tonu katoatoa a takitaki lotu i aso o Iesu ki te tulaga o te lotou amiotonu ke taku fakamasei ei ne latou a Iesu mo ana soko. Mai i olotou faiga konā, ne fai ei ne latou a latou eiloa mo fai ne famasino. Mai te ‵segi ki olotou vāivāiga totino, ne fakamasei ei ne latou a latou eiloa.
16 A Iuta, te soko e tokotasi o Iesu telā ne fakamasei ne ia a ia eiloa, ne talia ne ia ke fakamasino ne ia a nisi tino. I te taimi e tasi i Petania, i te milimiliga ne Malia, te tuagane o Lasalo, a Iesu ki se sinu ‵togi ‵mafa, ne kaitaua ei a Iuta. Ne fakaasi tena kaitaua kae kinau atu: “Ai a seki ‵togi ei te sinu manogi tenei ki se ono sefulu tala, ko ave ei te tupe tenā ki tino ma‵tiva?” Kae ne toe faka‵soko mai te fakamatalaga tenā: “Ana pati konā, e se fai pelā ona ko ia e alofa ki tino ma‵tiva, ka ko te mea ko ia se tino kaisoa; telā e ave sāle ne ia te taga tupe, kae fakaaogā ne ia.” (Ioane 12:1-6) Ke mo a eiloa ma fai tatou pelā mo Iuta io me ko takitaki lotu, kolā ne fakamasino fakavave aka ne latou a nisi tino, ko te mea ke fakamasei fua ne latou a latou eiloa.
17. Fakamatala mai te fakamataku o te fia fai tavaega io me ko te ‵to lasi o tou talitonu ki a koe eiloa.
17 E fakafanoanoa me i nisi Kelisiano i aso mua, e tiga ne seki fai latou mo tino kai‵soa e pelā mo Iuta, ne fai eiloa latou mo fai ne tino fakamata‵mata kae tavae ne latou a latou eiloa. E uiga ki a latou, ne tusi mai penei a Iakopo: “Kae nei, ko fakamata‵mata koutou mo te fia lavea.” Kae ne toe fakaopoopo mai tou tagata: “a uiga fakamata‵mata konā ne mea ‵se io me ne mea matagā katoa.” (Iakopo 4:16) A te tavae ne koe a koe eiloa e uiga ki mea ko oti ne fai ne koe io me ko tou tauliaga i te taviniga ki a Ieova e fakamasei fua ne koe i ei a tou ata. (Faataoto 14:16) E masaua ne tatou te mea telā ne tupu ki te apositolo ko Petelu ona ko te lasi o tena talitonu ki a ia eiloa, fai atu ei mo te fakamatamata: “E ui eiloa e tiaki koe ne latou konei, kae se mafai eiloa ne au o tiaki koe. . . . Kafai eiloa e ‵tau mo au o mate fakatasi mo koe, e se mafai eiloa au o fakafiti ki a koe!” A te tonuga loa, e seai lele eiloa se mea e tasi e ‵tau ei o fakamata‵mata tatou e uiga ki a tatou eiloa. A mea katoa a tatou e maua e maua fua ona ko te alofa kaimalie o Ieova. Ka se fia fai tavaega eiloa tatou māfai e masaua ne tatou te mea tenei.—Mataio 26:33-35, 69-75.
18. Ne a lagonaga o Ieova e uiga ki te fakamatamata?
18 E fai mai penei ki a tatou: “A te fakamatamata e iku ki te malaia, a te fiasili e iku ki te se aogā.” Kaia? E tali mai penei a Ieova: “Au e se fiafia ki te fakamatamata mo te fiasili.” (Faataoto 8:13; 16:18) E se tioa eiloa o kaitaua a Ieova ki “te tupu o Asulia ona ko ana muna fakamatamata mo ona uiga fiasili.” (Isaia 10:12) Ne fakasala a ia ne Ieova ona ko te lasi o tena fakamatamata. Ko pili foki a fakasala a te lalolagi saukātoa a Satani, e aofia i ei ana takitaki matea mo takitaki sē matea kolā ko ‵fonu i te fakamatamata. Ke mo a eiloa ma fakaakoako tatou ki uiga fakamata‵mata o fili konei o Ieova!
19. Se a te pogai e tasi fua e fakamata‵mata ei a tino o te Atua kae loto maulalo foki?
19 E tasi fua te pogai e ‵tau ei o fakamata‵mata a Kelisiano ‵tonu ko te lotou fai mo fai ne tavini a Ieova. (Ielemia 9:24) Kae e ‵tau foki o tumau latou i te loto maulalo. Kaia? Me “ko ‵mao tatou mai te ‵malu o te Atua, me ko agasala a tino katoa.” (Loma 3:23) Telā la, ko te mea ke puipui te ‵tou tulaga e pelā ne tavini a Ieova, e ‵tau o maua ne tatou te kilokiloga a te apositolo ko Paulo, i ana pati: “A Keliso Iesu ne vau ki te lalolagi o fakaola a tino agasala,” kae toe fakaopoopo mai tou tagata: “Ka ko au te tino tafa sili i te masei i a latou.”—1 Timoteo 1:15.
20. E puipui pefea ne Ieova ana tino i aso nei, kae ka puipui pefea ne ia a latou i aso mai mua?
20 Ona ko te mea e fakatulaga lua ne tino o Ieova olotou manakoga ko te mea ke fakamuamua ne latou a manakoga o te Atua, e mautinoa eiloa me ka puipui latou ne Ieova i te feitu faka-te-agaga. E mautinoa foki i a tatou me kafai ko oko mai te fakalavelave lasi, ka sē puipui fua ne Ieova ana tino i te feitu faka-te-agaga kae ka faka‵sao tonu eiloa ne ia a latou i te taimi tenā. I te taimi e ulu atu ei latou ki loto i te lalolagi fou, ko mafai ei o ka‵laga atu latou penei: “A ia ko te motou Atua! Ne talitonu matou ki a ia, kae ne fakaola eiloa ne ia matou. A ia ko te Aliki! Ne talitonu matou ki a ia, kae nei ko fiafia kae lifu matou me ne faka‵sao ne ia matou.”—Isaia 25:9.
E Masaua ne Koe?
• Ne puipuigina pefea a te tupu ko Tavita mo Iesu Keliso?
• E puipuigina pefea a tino o Ieova i aso nei?
• Kaia e ‵tau ei o ‵kalo keatea tatou mai te tō fakatāua ne tatou a tatou eiloa?
• Kaia e mafai ei o fakamata‵mata tatou kae loto maulalo foki?
[Ata i te itulau e 23]
Ne puipui pefea ne Ieova a Tavita mo Iesu?
[Ata i te itulau e 25]
I auala fea e puipui ei a tino o te Atua i te feitu faka-te-agaga i aso nei?
[Ata i te itulau e 26]
E tiga eiloa e fakamata‵mata tatou i te tavini atu ki a Ieova, e ‵tau o tumau tatou i te loto maulalo