Te Fakamaopoopomaiga o Mea i te Lagi mo Mea i te Lalolagi

“Ona ko tena fiafia . . . ke toe fakamaopoopo mai a mea katoa i a Keliso, ko mea i te lagi mo mea i te lalolagi.”— EFESO 1 :9,10, NW.

1. Se a te “fiafia” o Ieova mō te lagi mo te lalolagi?

TE FILEMU I TE LALOLAGI! Tenā eiloa te fuafuaga ‵malu a Ieova, “te Atua o te filemu.” (Epelu13:21) Ne fakamalosi ne ia te apositolo ko Paulo ke tusi mai me i te mea telā e “fiafia” a Ia ki ei ko te “toe fakamaopoopo mai a mea katoa i a Keliso, ko mea i te lagi mo mea i te lalolagi.” (Efeso 1:9, 10, NW) Se a te uiga tonu o te veape telā e ‵fuli ki te ‘‵toe fakamaopoopomaiga o mea katoa’? E fai mai te tino poto i te Tusi Tapu ko J.B. Lightfoot: “E fakauiga te tugāpati tenei ki te fealofani mo te filemu katoatoa i te lagi mo te lalolagi kātoa, telā ka se toe ai i ei ne mea mai tua e fakamakosu ne ia, kae ka ‵kau fakatasi a mea katoa i a Keliso. Ka fakagata atu ei a te agasala mo te mate, te fanoanoa mo te iku vale o mea mo te logo‵mae.”

“Ko Mea i te Lagi”

2. Ne a “mea o te lagi” kolā e ‵tau o fakamaopoopo mai?

² Ne fakaasi fakatoetoe mai ne te apositolo ko Petelu te fakamoemoega tafasili i te gali o Kelisiano ‵tonu i ana pati konei: “Ko oti ne folafola mai ne ia te lagi fou mo te lalolagi fou, e nofo i ei a te amiotonu, kae tenei eiloa e fakatali‵tali tatou ki ei.” (2 Petelu 3:13) A te “lagi fou” telā e folafola mai i konei e fakasino atu eiloa ki se pulega fou, ko te Malo Faka-Mesia. A “mea i te lagi” kolā ne fakaasi mai ne Paulo i tena tusi ki te kau Efeso, e ‵tau o fakamaopoopo mai “i a Keliso.” A mea konā ko te aofaki foliki o tino kolā ne filifiligina ke pule fakatasi mo Keliso i te lagi. (1 Petelu 1:3, 4) A te toko 144,000 konei “ne fakaolagina mai te lalolagi,” “mai te tokoukega o tino,” ke pule fakatasi mo Keliso i tena Malo faka-te-lagi.—Fakaasiga 5:9, 10; 14:3, 4; 2 Kolinito 1:21; Efeso 1:11; 3:6.

3. Kaia e mafai o fai atu me i tino fakaekegina ko ‘pule i te lagi’ a koi ‵nofo latou i te lalolagi?

³ Ne aumai io me ne toe fa‵nau mai a Kelisiano fakaekegina ne te agaga tapu ke fai mo fai ne tama faka-te-agaga a Ieova. (Ioane 1:12, 13; 3:5-7) Me ko oti ne fai latou ne Ieova mo fai ana “tamapuke,” ko fai ei latou mo fai ne taina o Iesu. (Loma 8:15; Efeso 1:5) Ona ko te mea tenā, e ui eiloa koi ‵nofo latou i te lalolagi, kae e fai pelā me ko oti ‘ne faka‵tu ake ke pule fakatasi mo Keliso Iesu i te lagi.’ (Efeso 1:3; 2:6) E ‵nofo latou i te tulaga maluga tenei i te feitu faka-te-agaga me ko oti ne “tuku atu . . . ne te Atua a te Agaga Tapu telā ne folafolagina ke fai mo fakamailoga me e a ia [latou]. A te Agaga ko te fakamaoniga o te [olotou] tofi e maua” i te lagi. (Efeso 1:13, 14; Kolose 1:5) Konei la a “mea i te lagi,” kolā e ‵tau o fakamaopoopogina te lotou aofaki telā ko leva ne ‵valo mai ne Ieova.

Ko Kamata te Fakamaopoopomaiga o Mea

4. Anafea kae pefea foki ne kamata ei te fakamaopoopomaiga o “mea i te lagi”?

⁴ E ‵tusa mo te “fakatokaga” a Ieova, io me ko te auala e fakagalue ei ne ia a “mea i te lagi” ne ‵tau eiloa o kamata i te “taimi tonu.” (Efeso 1:10) Ne oko mai te taimi tenā i te Penitekoso 33 T.A. I te aso tenā, ne ‵ligi ifo ei te agaga tapu ki luga i te kau apositolo mo se potukau o soko, tāgata mo fāfine. (Galuega 1:13-15; 2:1-4) E fakamaoni mai i te mea tenei te kamataga o fakagalue te feagaiga fou, ko te fakailoga tenā o te fanaumaiga o te fakapotopotoga Kelisiano mo te fenua fou o te Isalaelu faka-te-agaga, ko “te Isalaelu a te Atua!”—Kalatia 6:16; Epelu 9:15; 12:23, 24.

5. Kaia ne toe fakatu aka ei ne Ieova se “fenua” fou ke sui ne ia te Isalaelu faka-te-foitino?

⁵ A te feagaiga o te Tulafono telā ne fai mo te Isalaelu faka-te-foitino ne seki filifili mai i ei a “faitaulaga” mo se fenua tapu telā ka tavini atu ki te se-gata-mai i te lagi. (Esoto 19:5, 6) Ne fai atu a Iesu ki takitaki lotu Iutaia: “I te Malo o te Atua e ave keatea mai i a koutou, kae tuku atu ki se fenua telā e fakaasi mai i ei ne fua ‵lei.” (Mataio 21:43) A te fenua tenā, ko te Isalaelu faka-te-agaga, e aofia i ei a Kelisiano fakaekegina kolā ne ulu atu ki loto i te feagaiga fou. Ne tusi atu te apositolo ko Petelu ki tino konei: “A koutou ko te fenua filifilia, ko faitaulaga a te Tupu, ko te fenua tapu, ko tino tonu o te Atua ne filifilia ke folafola atu a galuega fakaofoofogina a te Atua, telā ne kalagagina ne ia a koutou mai i te pouliga ki tona mainaga fakaofoofogina. Ne seki fai koutou mo tino o te Atua i aso mua, kae nei ko fai koutou mo ona tino.” (1 Petelu 2:9, 10) Ne seki toe fai a Isalaelu faka-te-foitino mo fai a tino o Ieova kolā ne fai feagaiga mo ia. (Epelu 8:7-13) E pelā mo te mea ne ‵valo mai ne Iesu, ne ave keatea te tauliaga ke fai latou mo fai ne vaega o te Malo Faka-Mesia kae tuku atu ei ki te toko 144,000 o tino o te Isalaelu faka-te-agaga.—Fakaasiga 7:4-8.

Ne Aofia i te Feagaiga mō te Malo

6, 7. Se a te feagaiga fakapito ne fai ne Iesu mo ana taina faka-te-agaga, kae se a te uiga o te mea tenā mō latou?

⁶ I te po ne kamata ei ne Iesu te Fakamanatuga o tena mate, ne fai atu a ia ki ana apositolo fakamaoni: “Ne ‵kau fakatasi foki koutou mo au i oku tofotofoga. E pelā eiloa mo te tukumaiga ne toku Tamana te pule ki a au, e pelā foki taku feagaiga ki a koutou. Ka ‵kai kae inu koutou i taku taipola i toku Malo, kae ka ‵nofo foki koutou i paepaealiki, o fakamasino atu matakāiga e sefulu lua o Isalaelu.” (Luka 22:28-30) Ne fakasino atu a Iesu i konei ki se feagaiga fakapito telā ne fai ne ia mo ana taina faka-te-agaga e toko 144,000, kolā ka “fakamaoni eiloa ke oko ki te mate” kae fakatalitonu atu ei i a latou ne tino ko “manumalo.”—Fakaasiga 2:10; 3:21.

⁷ E tiaki katoatoa ne te tamā potukau tenei a fakamoemoega katoa ke ola latou ki te se-gata-mai i te lalolagi e pelā me ne tino e faite ki ‵kano mo toto. Ka pule fakatasi latou mo Keliso i te lagi, ka saga‵saga latou i nofogaaliki o fakamasino a tino katoa. (Fakaasiga 20:4, 6) Ke onoono aka tatou ki nisi tusi siki kolā e fakasino atu fua ki te kau fakaekegina kae fakaasi mai i ei te pogai e se ‵kai kae inu i ei a ‘nisi mamoe’ ki fakatusa o te Fakamanatuga.—Ioane 10:16.

8. Se a te mea e fakaasi mai ne te kau fakaekegina mai te lotou ‵kai ki te falaoa? (Ke onoono ki te pokisi i te itulau e 29.)

⁸ E ‵kau fakatasi a te kau fakaekegina mo Keliso i ana logo‵maega kae lotoma‵lie foki ke ‵mate latou e pelā mo ia. E pelā me se tokotasi o latou, ne fai mai a Paulo me ko toka a ia o fai so se mea faigatā ko te mea ke “maua ne au a Keliso . . . ke iloa ne au a Keliso mo te ‵mana o tena toetu; ke ‵kau fakatasi au i ona puapuagā, ke ‵pau foki maua i tona mate.” E tonu, ne lotomalie a Paulo ‘ke ‵pau laua i tona mate.’ (Filipi 3:8, 10) E tokouke a Kelisiano fakaekegina, i olotou foitino faka-te-foitino, ne kufaki i mea ma‵sei kolā ne iku atu ki te lotou ‵mate e pelā mo “te mate o Iesu.”—2 Kolinito 4:10.

9. Se a te foitino telā e sui ne te falaoa o te Fakamanatuga?

⁹ I te taimi ne kamata ei ne ia te ‵Kaiga a te Aliki i te Afiafi, ne fai mai a Iesu: “Ko toku foitino tenei.” (Maleko 14:22) Ne fakasino atu a ia ki tena foitino faka-te-foitino telā ko pili o ‵kini ke ‵toto valevale. E fetaui ‵lei a te falaoa se faka‵fete mo fai te fakatusa o tena foitino. Kaia? Me i te Tusi Tapu e mafai o fakasino atu a te mea faka‵fete ki te agasala io me ko mea ma‵sei. (Mataio 16:4, 11, 12; 1 Kolinito 5:6-8) Ne ‵lei katoatoa a Iesu, kae ne seki ‵pisi atu foki te agasala ki tena foitino faka-te-tagata. Ne ofo atu ne ia te foitino ‵lei katoatoa tenā e pelā me se taulaga ke fakamagalo ei ‵tou agasala. (Epelu 7:26; 1 Ioane 2:2) Ko aogā ei a te faiga tenā ki Kelisiano fakamaoni katoa, faitalia me fakamoe‵moe latou ke ola i te lagi io me ko te ola se-gata-mai i te lalolagi palataiso.—Ioane 6:51.

10. I te auala fea e ‘‵kau fakatasi ei i te toto o Keliso’ a tino kolā e inu i te uaina o te Fakamanatuga?

¹⁰ E uiga ki te uaina telā e fakaaogā ne Kelisiano fakaekegina i te Fakamanatuga, ne tusi mai a Paulo: “Kafai e fakamanuia ne tatou ki te ‵talo a te ipu uaina i te ‵Kaiga a te Aliki, ko tona uiga ko tino katoa kolā e inu i ei, ko ‵kau fakatasi ki te toto o Keliso.” (1 Kolinito 10:16) I te auala fea e ‘‵kau fakatasi ei i te toto o Keliso’ a tino kolā e inu i te uaina? E se ‵kau fakatasi latou i te tukumaiga o te taulaga togiola me e ma‵nako foki latou ki te fakaolataga. E auala i te lotou fakatuanaki ki te malosi fakaola tino o te toto o Keliso, ko fakamagalo i ei olotou agasala kae ko takugina latou ne tino amio‵tonu kolā e mafai o ola i te lagi. (Loma 5:8, 9; Tito 3:4-7) E auala i te toto maligi o Keliso ne “faka‵ma” ei a te toko 144,000 kolā ka pule fakatasi mo Keliso, ne ‵vae keatea, kae faka‵ma mai te agasala ke fai pelā me ne “tino o te Atua” kolā e tapu. (Epelu 10:29; Tanielu 7:18, 27; Efeso 2:19) E tonu, e auala i tena toto maligi ne mafai ei ne Keliso o “fakasaoloto . . . [a] tino mai fenua katoa, mai matakāiga takitasi, mo ‵gana kese‵kese mō te Atua. Ko oti ne fai ne koe latou ke fai mo malo o faitaulaga e tavini atu ki te ‵tou Atua; kae ka pule latou i te lalolagi.”—Fakaasiga 5:9, 10.

11. Se a te mea e fakaasi mai i te inu o te kau fakaekegina ki te uaina o te Fakamanatuga?

¹¹ I te kamataga ne Iesu a te Fakamanatuga o tena mate, ne tuku atu ne ia te ipu o te uaina ki ana apositolo fakamaoni kae fai atu: “Inu katoa koutou ki ei; me ko toku toto tenei o te feagaiga, telā ne maligi mo te tokoukega e fakamagalo ei agasala.” (Mataio 26:27, 28) E pelā eiloa mo toto o pulumakau mo kouti kolā ne fakamau‵tu ki ei te feagaiga o te Tulafono i te vā o te Atua mo te fenua ko Isalaelu, ne fakamau‵tu ne te toto o Iesu a te feagaiga fou telā ne fai ne Ieova i tena vā mo te Isalaelu faka-te-agaga, i te Penitekoso i te 33 T.A. (Esoto 24:5-8; Luka 22:20; Epelu 9:14-15) Mai te inu ki te uaina telā ko te fakatusa o te ‘toto o te feagaiga,’ e fakaasi mai ne tino fakaekegina i ei me ko aofia latou i loto i te feagaiga fou kae ko maua ne latou a mea aogā mai i ei.

12. E papatiso pefea a tino fakaekegina ki te mate o Keliso?

¹² Kae e fakamasaua atu foki ki tino fakaekegina e uiga ki se isi mea. Ne fai atu a Iesu ki ana soko fakamaoni: “Ka inu eiloa koulua ki te ipu ka inu au i ei, ka papatisogina foki koulua i te papatisoga papatiso au i ei.” (Maleko 10:38, 39) Ne faipati mai fakamuli te apositolo ko paulo e uiga ki Kelisiano kolā e “papatiso . . . mo [Keliso] i tona mate.” (Loma 6:3) Ne ola a tino fakaekegina i se olaga faigatā. E fai te lotou ‵mate e pelā me se taulaga ona ko te mea e tiaki katoatoa ne latou te lotou fakamoemoega ke ola i te lalolagi ki te se-gata-mai. E katoatoa ‵lei a te papatisoga o Kelisiano fakaekegina konei ki te mate o Keliso māfai ko oti ne ‵mate latou i te fakamaoni kae toe faka‵tu aka e pelā me ne tino faka-te-agaga ke ‘pule fakatasi’ mo Keliso e pelā me ne tupu i te lagi.—2 Timoteo 2:10-12; Loma 6:5; 1 Kolinito 15:42-44, 50.

Te Fakaaogāga o Mea Fakatusa

13. Kaia e se fakaaogā ei ne tino kolā e fakamoe‵moe ke ola i te lalolagi a mea fakatusa i te Fakamanatuga, kae kaia e ‵kau atu ei latou ki te Fakamanatuga?

¹³ Ona ko te mea e aofia a mea katoa konei i te fakaaogāga o te falaoa mo te uaina kolā e fakasoa atu i te taimi o te Fakamanatuga, e maina ‵lei me e se ‵tau o fakaaogā a fakatusa konei ne tino kolā e fakamoe‵moe ke ola i te lalolagi. E iloa ne tino kolā e fakamoe‵moe ke ola i te lalolagi me i a latou e se ne tino fakaekegina o te foitino o Keliso, kae e se aofia latou i te feagaiga telā ne fai ne Ieova mo tino kolā ka pule fakatasi mo Iesu Keliso. Ona ko “te ipu” e sui ne ia te feagaiga fou, e ‵tau fua o fakaaogā ne tino kolā e aofia i te feagaiga fou a mea fakatusa konā. A tino kolā e fakamoe‵moe ke ola ki te se-gata-mai i te foitino malosi ‵lei katoatoa i te lalolagi mai lalo i te pulega a te Malo, e se papatiso latou ki te mate o Iesu io me kalagagina ke pule fakatasi mo ia i te lagi. Kafai e fakaaogā ne latou a mea fakatusa konā, e fakaasi atu ei me ko fai ne latou se mea se tonu. Telā la, e se fakaaogā ne latou a fakatusa konā, e tiga te lotou ‵kau atu ki te Fakamanatuga e pelā me ne tino maimoa. E loto fakafetai latou ki mea katoa ko oti ne fai ne Ieova mō latou e auala i tena Tama, e aofia i ei te fakamagaloga o olotou agasala e auala i te toto maligi o Keliso.

14. E fakamalosigina pefea a te kau fakaekegina i te feitu faka-te-agaga mai te fakaaogāga o te falaoa mo te uaina?

¹⁴ Ko pili fua nei o palele a te fakamau‵tūga fakaoti o te aofaki foliki o Kelisiano kolā e kalagagina ke pule fakatasi mo Keliso. Ke oko ki te gataga o olotou olaga i te lalolagi, e fakamalosigina a tino fakaekegina i te feitu faka-te-agaga mai te fakaaogāga o mea fakatusa o te Fakamanatuga. E lagona ne latou te lotou fusi fakatasi mo olotou taina mo tuagane e pelā me ne vaega o te foitino o Keliso. A te fakaaogāga o te falaoa mo uaina fakatusa e fakamasaua atu ei ki a latou a te lotou tiute ke tumau i te fakamaoni ke oko ki te mate.—2 Petelu 1:10, 11.

Te Fakamaopoopomaiga o “Mea i te Lalolagi”

15. Ko oi kolā ko oti ne fakamaopoopo mai ki tafa o Kelisiano fakaekegina?

¹⁵ Talu mai te kogaloto o vāitausaga ko te 1930-1939, ne ‵lago malosi atu ei ki tino fakaekegina se aofaki o ‘nisi mamoe,’ kolā e se aofia i te “lafu foliki” kae fakamoe‵moe ke ola ki te se-gata-mai i te lalolagi. (Ioane 10:16; Luka 12:32; Sakalia 8:23) Ko oti ne fai latou e pelā me ne taugasoa fakamaoni o taina o Keliso, mai te tukuatuga o se fesoasoani lasi i te talaiatuga o te “Tala ‵Lei tenei e uiga ki te Malo” ke fai mo molimau ki fenua katoa. (Mataio 24:14; 25:40) Mai te faiga penā, ko maua ei ne latou te avanoaga ke fakamasino latou ne Keliso e pelā me ne ana “mamoe,” kolā e tuku ne ia i tena “feitu fakaatamai” māfai ko vau a ia o fakamasino a fenua katoa. (Mataio 25:33-36, 46) E auala i te fakatuanaki ki te toto o Keliso, ko fai ei latou mo fai “te vaitino tokouke” kolā ka ‵sao i “te fakasauāga lasi.”—Fakaasiga 7:9-14.

16. Ko oi e aofia i “mea i te lalolagi,” kae ka maua pefea ne tino katoa konei a te avanoaga ke fai pelā me ne “fanau a te Atua”?

¹⁶ Ka ‵tala mai ne te fakamau‵tūga fakaoti o te toko 144,000 te auala ke tiaki mai ei a “matagi” o te fakamaseiga ki luga i te fakanofonofoga matagā a Satani i te lalolagi. (Fakaasiga 7:1-4) I loto i te Pulega a Keliso i te Afe Tausaga fakatasi mo ana tupu mo faitaulaga lagolago, ka ‵kau fakatasi atu ei ki te vaitino tokouke se aofaki lasi ‵ki o tino kolā ka toe faka‵tu aka mai te mate. (Fakaasiga 20:12, 13) Ka maua ei ne tino konei a te avanoaga ke ola ki te se-gata-mai mai lalo i te Tupu Faka-Mesia, ko Keliso Iesu. I te fakaotiga o te Pulega i te Afe Tausaga, ka tofotofogina fakaoti i ei a tino i luga “i te lalolagi” nei. A tino kolā e tumau i te fakamaoni ka puke e pelā me ne “fanau a te Atua” i luga i te lalolagi.—Efeso 1:10; Loma 8:21; Fakaasiga 20:7, 8.

17. Ka fakataunu pefea ne Ieova a tena fuafuaga?

¹⁷ Telā la, e auala i tena “fakatokaga” poto, io me ko te auala e fakagalue ei ne ia a mea, ka fakataunu ei ne Ieova a tena fuafuaga ke “fakamaopoopo mai a mea katoa i a Keliso, ko mea i te lagi mo mea i te lalolagi.” Ko fakaoti ei te fakamaopoopoga o mea ola katoa i te lagi mo te lalolagi i te filemu katoatoa i te lagi mo te lalolagi, kae ka faka‵logo latou mo te fiafia ki te pulega amiotonu a te Tino Fai Fuafuaga Sili, ko Ieova.

18. Ka aoga pefea ki te kau fakaekegina mo olotou taugasoa a te ‵kau atu ki te Fakamanatuga?

¹⁸ Ko oko eiloa i te fakamalosi loto ki te aofaki foliki o tino fakaekegina mo te fia miliona o olotou taugasoa ko nisi mamoe ke maopoopo fakatasi latou i a Apelila 12, 2006! Ka fakamanatu ne latou te Mate o Keliso, e ‵tusa loa mo te fakatonuga a Iesu: “Ke fai mo fakamanatuga ki a au.” (Luka 22:19) E ‵tau o masaua ne tino katoa kolā e ‵kau atu ki ei a mea ko oti ne fai ne Ieova mō latou e auala i tena Tama pele, ko Keliso Iesu.

Ke Toe Onoono Aka ki ei

• Se a te fuafuaga a Ieova mō mea i te lagi mo mea i te lalolagi?

• Ne a “mea i te lagi,” kae ne fakamaopoopo mai pefea latou?

• Ne a “mea i te lalolagi,” kae se a te lotou fakamoemoega?

[Pokisi i te itulau e 29]

“Te Foitino o Keliso”

I pati a Paulo i te 1 Kolinito 10:16, 17, e uiga ki te tāua o te falaoa mō taina fakaekegina o Keliso, ne fakaaogā ne ia a te pati “foitino” i se auala fakapito. Ana muna: “Ka ko te falaoa telā e tofitofi ne tatou, ko tona uiga ko ‵kau fakatasi tatou i te foitino o Keliso, manafai e ‵kai tatou ki te falaoa tenā. E a, e tonu au me ikai? Ona ko te falaoa e tasi, ko fai ei tatou mo foitino e tasi, i te mea a tatou katoa e ‵kai ki te falaoa e tasi.” Kafai ko fakaaogā ne Kelisiano fakaekegina a te falaoa o te Fakamanatuga, ko fakaasi mai ei ne latou te lotou fealofani i loto i te fakapotopotoga o tino fakaekegina, telā e fai pelā me se foitino e tasi, a ko Keliso ko te Ulu i ei.—Mataio 23:10; 1 Kolinito 12:12, 13, 18.

[Ata i te itulau e 29]

Kaia e ‵kai kae inu fua ei a tino fakaekegina ki te falaoa mo te uaina?

[Ata i te itulau e 31]

E auala i te fakatokaga a Ieova, ka‵kau fakatasi katoa ei a tino i te lagi mo te lalolagi