E Mata, e ‵Lei Fua so se Lotu e Fia Kau Koe ki ei?

E MA‵NAKO a te tokoukega o tatou ke uke a mea e mafai o filifili mai i ei māfai e olo atu tatou ki te sitoa. Kafai e maua ne tatou i te maketi a fuagalakau mo laulakau kese‵kese e uke, e mafai o filifili ne tatou a mea e ma‵nako tatou ki ei kolā e aogā ki ‵tou kāiga. Kafai e uke a vaegā gatu ‵lanu kese‵kese i te sitoa, e mafai o filifili ne tatou a toe gatu ‵lei mō tatou. A nisi filifiliga kolā e fai ne tatou i te olaga se fakaasiga fua tenā o mea kolā e fia‵fia tatou ki ei. Kae ko nisi filifiliga kolā e fai ne tatou, e pokotia i ei a ‵tou ola ‵lei, e pelā mo te filifiliga o mea‵kai aogā io me ko taugasoa ‵poto. Kae e pefea la a ‵tou filifiliga e uiga ki lotu? E mata, e ‵tau o fakaasi atu i ‵tou tapuakiga a te mea fua telā e fia‵fia tatou ki ei? Io me se mea telā e pokotia malosi i ei a ‵tou olaga?

E uke a vaegā lotu kese‵kese kolā e mafai o filifili ne tatou mai i ei. E uke a fenua ko oti ne talia ne latou te saolotoga o lotu, kae ko saoloto nei a tino o tiakina a lotu a olotou mātua. Ne maua aka i se sukesukega telā ne fai i te Iunaite Sitete, me e 80 pasene o tino Amelika e “tali‵tonu me i te fakaolataga e mafai o maua māfai e uke au lotu.” E ‵tusa mo te sukesukega tenā, “e tokotasi mai te tokolima o tino ne fai mai me ne ‵fuli tena lotu i te taimi ko matua ei a ia.” E fai mai se sukesukega i Pasili me toeitiiti ko katoa te kuata o tino Pasili katoa ko oti ne ‵fuli olotou lotu.

I aso mua, ne kinau malosi a tino e uiga ki akoakoga kolā e matea i ei te ‵kese o te lotu e tasi mai te suā lotu. A ko te kilokiloga masani i aso nei, ‘E ‵lei fua so se lotu e fia kau koe ki ei.’ E mata, e tonu te mea tenā? E mata, e mafai o pokotia koe i te lotu telā e filifili ne koe?

E pelā eiloa mo tino ‵poto kolā e fesilisili atu e uiga ki te koga ne faite mai i ei se mea telā e ‵togi atu ne latou, se mea poto foki ke fesili ifo koe: ‘Ne māfua mai i fea a lotu kese‵kese katoa konei, kae kaia?’ E tuku mai i te Tusi Tapu a tali e uiga ki ei.

Ne Māfua Mai i Fea a Lotu?

I Isalaelu i aso mua, ne fakatu aka ne te tupu ko Ielopoamo se lotu fou i tausaga toeitiiti kae katoa te afe mai mua o vau a Iesu ki te lalolagi. A Ielopoamo ko te tupu muamua eiloa o te malo tu tokotasi o Isalaelu ki matū. Ne faigata ‵ki ki a ia ke ‵fuli mai a tino ki mea kolā ne manako a ia ki ei. “I te otiga ne mafaufau a ia ki te mea tenā, faite ei ne ia e lua pulumakau aulo kae fai atu ki tino penei, ‘Ko tō ‵mao katoa te olo sāle o koutou ki Ielusalema o tapuaki. Tino Isalaelu, konei otou atua!’ ’’ (1 Tupu 12:28) E manino ‵lei me ne manako te tupu ke fakaaogā ne ia te lotu ke ‵taki atu ei keatea te alofa fakamaoni o tino mai i Ielusalema, te koga ne tapuaki sāle i ei latou. Ne tumau te lotu telā ne fakatu aka ne Ielopoamo i se fia senitenali kae ne iku atu ki te ‵mate o te fia miliona o tino i te taimi ne fakasala aka ei ne te Atua a te fenua aposetate o Isalaelu tenā. A te lotu a Ielopoamo se faifaiga fua fakapolitiki mō tena ‵lei eiloa. E tai penā foki loa a lotu a nisi fenua kolā koi tumau i aso nei, ne faka‵tu aka foki ke fakamalosi atu ei ki olotou pulega fakapolitiki.

Ne fakaasi mai foki ne te apositolo ko Paulo a te suā pogai e maua ne tino ke fakatu aka ei se lotu fou i ana pati: “I toku iloa, kafai e teka au keatea mo koutou, e uke a luko ka o‵mai o fakatasi mo koutou. Kae ka ‵fulu faka‵ma ne latou a te lafu. Ka oko mai foki a te taimi telā ka isi ne tino mai i a koutou ka fai‵pati ki te muna loi, o takitaki a tino tali‵tonu ke tau‵tali i a latou.” (Galuega 20:​29, 30) E fakamāfua aka ne takitaki fakamata‵mata a gasuesuega fakalotu ke ‵saga atu ei a tino ki a latou. A lotu kolā e fai mai i a latou ne Kelisiano ko oti ne kamata o mavae‵vae ki vaega kese‵kese.

Ko oi e Ma‵nako a Lotu ke Fakafiafia Atu ki ei?

A te saga atu ki manakoga lauiloa o tino e fakamalosi atu ei ki nisi tino ke fakatu aka se lotu fou. E pelā mo te mea e lipoti mai i te mekesini ko te Economist e uiga ki lotu kolā e fai pelā me ne lotu ‵lasi i te Iunaite Sitete. Ne fai mai te mekesini me i lotu konei e gasolo eiloa o tokouke, me “e ‵pau eiloa a mea e fakavae latou ki ei mo pisinisi kolā e ola ‵lei: ko te fakamuamua faeloa o manakoga o ana tino ‵togi.” E fakaaogā ne nisi lotu a “fakafiafiaga e auala i vitio, koniseti mo pese ‵fou ke fakagaligali aka ei te lotou lotu.” E fai mai a nisi takitaki lotu i lotu konei me e akoako ne latou olotou tino ke “maumea, ke maua se olaga malosi ‵lei kae ke saoloto mai i te manavase ki fakalavelave.” E tiga eiloa e taku fakamasei a lotu konei ona ko te aofia o latou i faifaiga fakapisinisi i mea tau fakafiafiaga, e fai mai foki te mekesini tenā, “me e ‵saga atu fua latou ki manakoga o olotou kaulotu.” E fakaoti mai te lipoti tenā, penei: “Ko se fuafuagina eiloa te ola ‵lei o pisinisi kolā e ‵kau fakatasi mo lotu.”

E ui eiloa e se lavea malosi atu a te aofia o nisi lotu i faifaiga fakapisinisi, a lotu kolā e “‵saga atu ki manakoga o tino” e fakamasaua mai i ei ki a tatou a pati polopoloki a Paulo. Ne tusi mai a ia: “E oko mai te taimi ko se toe faka‵logo ei tino ki akoakoga ‵tonu, kae ka tau‵tali atu ki olotou manakoga, kae ka fakapotopoto foki ne latou a faiakoga kolā e logosala olotou akoakoga ki olotou taliga. Ka ‵fuli latou keatea mai te mea tonu o faka‵logo ki tala ‵kai.”​​—⁠2 Timoteo 4:​3, 4.

Ona ko lotu e uke ne ‵sae aka mai i te manako ki pulega fakapolitiki, te fia takutakua, mo te fia lauiloa i lō te manakoga ke fakafiafia atu ki te Atua, e se se mea fakapoi ke aofia a lotu i amioga ma‵sei e pelā mo te maneaneaga o tama‵liki, te faitogafiti, taua, mo amioga takafia‵toa. E masani eiloa o fai a lotu e pelā me ne mea faitogafiti. E mafai pefea o se fakaloiloigina koe?

[Fakamatalaga o te Ata i te itulau e 4]

E uke a lotu e fakamalosi aka ne latou te manakoga ki pulega fakapolitiki, te fia takutakua, mo te fia lauiloa i lō te manakoga ke fakafiafia atu ki te Atua