Amioga Ma‵sei—E Mata, ko sē Mafai o Fai se Faiga ki ei?
Ne puke aka ne se tamaliki se mea mai i se malae—se paula—kae ne ‵kivi kae ‵pili ei tou tagata i tena olaga kātoa. Ne tiakina ne se mātua tena pepe fatoā fanau, kae ne ‵funa ne ia i loto i se tulamu kaiga i tafa o te auala. Ne toe foki atu se tino galue telā ne fakatea ki te koga ne galue mua ei a ia, kae ne fana ne ia so se tino e lavea ne ia, oti aka, tamate foki ne ia a ia eiloa. Ne maneanea faeloa a tama‵liki ne se tino telā ne āva malosi a tino ki ei.
SE MEA fakafanoanoa me ko lauiloa valevale a vaegā amioga ma‵sei penā i ‵tou aso nei. Kae e sili atu te fakafanoanoa, me e masani o faka‵galo aka a vaegā tala penei ne tala e uiga ki te fakatau tamatega o matakāiga, mo potukau takafia‵toa. Ne fai mai se mataupu i se nusipepa telā ne ‵lomi i te 1995: “Ona ko te matagā o te tulaga o amioga ma‵sei, ko fai eiloa te 20 senitenali mo kope o Satani. E seai aka eiloa se taimi i aso mua ne fakaasi atu ei ne tino a te atamai mo se manakoga lasi ke tamate ei te fia miliona o nisi tino ona ko olotou telega, lotu io me ko olotou tulaga i te olaga.”
E se gata i ei, e fakalailai ne tino a te ea, te laukele, e fakaoti fakavave ne latou a koloa tāua o te paneta, kae e tamate ne latou te fia o manu kese‵kese. E mata, e mafai o faka‵lei aka ne tino a amioga ma‵sei katoa konei, kae fai te lalolagi mo fai se koga tai ‵lei atu kae saogalēmū? Io me e mata, a te taumafai ke fai penā e fai fua pelā mo te taumafai o taofi aka te tai ki se salu? Ne fai mai se polofesa telā e uke ana tusi ne tusi e uiga ki te mataupu ko amioga ma‵sei: “Ne maua eiloa ne au se manakoga lasi ke fai se ‵fuliga lasi ki te lalolagi, ke faka‵lei aka ei te tulaga o te lalolagi. Kae e se gasolo aka eiloa o ‵lei te tulaga o te lalolagi.” Kāti e penā foki loa ou lagonaga.
A mea e ‵tupu i te lalolagi nei e mafai o fakatusa ki se vaka telā e teletele atu eiloa i se kogā tai telā e gasolo aka faeloa o masei kae fakamataku i aso takitasi. E tiga eiloa e seai se tino e fia fanatu i te auala tenā, ne seki aogā eiloa a taumafaiga katoa ke ‵fuli aka tena auala. Ne tele atu faeloa te vaka ki loto i te afā fakamataku tenā kae e se mafai o fakagata tena tele.
E penā foki eiloa te tulaga o te olaga telā e gasolo aka faeloa o masei atu ona ko te tulaga sē ‵lei katoatoa o tino. (Loma 3:23) Kae ona ko te lasi o te masei, te lauiloa, mo te matagā o amioga ma‵sei, e se ‵tau fua o ‵losi atu a mea katoa konei ki tino. E mata, e mafai o pule atu se malosi sē matea matagā kae ‵mana ki luga i tino katoa? Kafai e penā loa, se a te mea tenā, kae e mafai pefea o puipui tatou mai i ei? Ka tali mai i te suā mataupu a fesili konei.
[Fakamatalaga o te Ata i te itulau e 3]
© Heldur Netocny/Panos Pictures