Ke Tumau i “Tou Alofa i te Kamataga”

“Tausi faka‵lei a te mea tenā e i a koe.”​​—FAKAASIGA 3:​11.

1, 2. E pefea ou lagonaga i te taimi ne talitonu ei koe me i au mea ne tauloto e uiga ki a Ieova ko te munatonu?

E MASAUA ne koe te taimi muamua ne tauloto ei koe ki folafolaga ‵gali ne tuku mai ne Ieova mō tino faka‵logo? Kafai ne nofo muamua koe i se isi talitonuga, e pefea ou lagonaga i te taimi ne fakamatala atu ei ki a koe a fuafuaga a te Atua e ‵tusa mo te mainaga i te Tusi Tapu io me ko malamalama nei koe i nisi akoakoga kolā ne faigata ke malamalama i ei? Kāti ko iloa nei ne koe me ne takitaki‵segina koe. Kae nei la, ko fiafia eiloa koe me ko iloa ne koe te munatonu! Kafai ne puti aka koe ne mātua Kelisiano, e masaua ne koe ou lagonaga i te taimi ne talitonu ei koe me i au mea ne tauloto e uiga ki a Ieova ko te munatonu eiloa, kae fakaiku aka ne koe ke ola e ‵tusa mo mea konā?​​—Loma 12:2.

² E tokouke ‵tou taina faka-te-agaga ka fai mai me ne fia‵fia malosi latou, ne gasolo o ‵pili atu ki a Ieova, kae loto fakafetai foki me ne talia ne ia latou ke fakapilipili atu ki a ia. (Ioane 6:44) Ne fakamalosi aka latou ne te lotou fia‵fia ke ‵kau atu ki faifaiga faka-Kelisiano. Ona ko te lasi o te lotou fia‵fia, ne ma‵nako latou o fakaasi atu olotou mea ne tauloto ki so se tino. E mata, ne penā foki koe?

3. Se a te tulaga ne oko ki te fakapotopotoga i Efeso i te taimi ne avatu ei ne Iesu se fekau ki a latou?

³ I tena faipatiatuga ki te fakapotopotoga Kelisiano i Efeso, ne faipati eiloa a Iesu e uiga ki “tou alofa i te kamataga.” E uke ‵ki a uiga ‵lei o te kau Efeso, kae ne gasolo o matafitafi atu a te alofa ne maua muamua ne latou e uiga ki a Ieova. Tela la, ne fai atu ei a Iesu ki a latou: “E iloa ne au au mea ne fai; e iloa foki ne au a tou galue malosi pelā foki mo tou kufaki. E iloa foki ne au me se mafai o fakasaoloto ne koe a tino amio ma‵sei, ko oti foki ne tofotofo ne koe a latou kolā e fai mai me ne apositolo, kae e se ne apositolo, kae ne maua ake foki ne koe me ne tino ‵loi fua. E iloa ne au i a koe se tino e loto kufaki, ne puapuagatia foki koe ona ko au, kae e seki takavale foki eiloa koe. Kae tenei eiloa te mea ko se malie ei au ki a koe: i a koe ko se alofa mai nei ki a au, e pelā mo tou alofa i te kamataga.”​​—Fakaasiga 2:​2-4.

4. Kaia e tāua ei te fekau a Iesu ki tino Efeso mō aso nei?

⁴ Ne fetaui ‵lei eiloa a pati fakatonutonu a Iesu ki te kau Efeso mo nisi fakapotopotoga kolā ne tusi atu a ia ki ei i te tusi ko Fakaasiga, mo tulaga kolā ne maua ne Kelisiano fakaekegina mō se vaitaimi mai te 1914 o fano ki mua. (Fakaasiga 1:​10) Ke oko mai ki taimi nei, koi mafai eiloa o galo atu i nisi Kelisiano a te “alofa i te kamataga” mō Ieova e pelā foki mō muna‵tonu faka-Kelisiano. Mai te masaua ne tatou te mea tenā, ke na iloilo aka ne tatou me mai te masaua mo te mafaufau ‵loto ki mea kolā ne ‵tupu ki a koe, ko mafai ei o fakatumau, fakafou kae ati aka ne koe te alofa mo te loto finafinau telā ne maua muamua ne koe mō te Atua mo te munatonu.

Ne a Fakamaoniga me ko Maua ne Koe te Munatonu?

5, 6. (a) Se a te mea telā e ‵tau o fakatalitonu aka ne Kelisiano taki tokotasi? (e) Se a te mea ne fakatalitonu atu ki a koe me e akoako ne Molimau a Ieova a te munatonu? (i) Se a te mea e mafai o fesoasoani atu ki se tino ke fakamalosi aka a te alofa ne maua ne ia i te kamataga?

⁵ So se tino telā e tukugina atu ki a Ieova e ‵tau muamua o “fakatalitonu” ne ia me se a “te loto o te Atua, te mea ‵lei, te mea e logomalie mo te gali.” (Loma 12:​1, 2) A te mea e tasi telā e aofia i ei ko te tauloto ki akoakoga ‵tonu mai te Tusi Tapu. A te mea telā e fakatalitonu atu ki se tino e tokotasi me e akoako ne Molimau a Ieova te munatonu e mafai o ‵kese mai te mea telā ne fakatalitonu atu ki te suā tino. E masaua ne nisi tino me ne ‵fuli olotou loto i te taimi ne fai‵tau ei latou ki te igoa o te Atua i te Tusi Tapu io me ko te taimi ne malamalama ei latou e uiga ki te tulaga tonu o tino ‵mate. (Salamo 83:18; Failauga 9:​5, 10) Ako nisi tino ne ofo latou i te alofa telā e maua i tino o Ieova. (Ioane 13:​34, 35) Kae e fia‵fia a nisi tino ki te uiga o te sē fai mo fai ne vaega o te lalolagi. Ne fakaiku aka ne latou me e se ‵tau o aofia a Kelisiano ‵tonu i kinauga fakapolitiki io me ko taua a fenua.​​—Isaia 2:4; Ioane 6:​15; 17:​14-​16.

⁶ Ne fakamalosi atu ki tino e tokouke a te alofa ki te Atua i te kamataga ona ko pogai konei mo nisi pogai aka foki. Ke fakaavanoa a taimi ke mafau‵fau ki mea kolā ne fakatalitonu atu ki a koe e uiga ki te munatonu. E ‵kese ‵ki ou fakanofonofoga mo ou uiga, tela la, kāti e mafai foki eiloa o ‵kese a pogai fakavae mō tou alofa ki a Ieova mo te talitonu ki ana folafolaga mo nisi tino. E se taumate, koi aogā eiloa a pogai konā ki a koe i aso nei e pelā eiloa mo te taimi muamua ne tauloto ei koe ki ei. Ne seki mafuli eiloa te munatonu. Tela la, kafai e toe mafaufau ki mafaufauga mo lagonaga konā, e mafai eiloa o fakafou kae fakamalosi aka ei te alofa telā ne maua ne koe i te kamataga mō te munatonu.​​—Faitau te Salamo 119:​151, 152; 143:5.

Ati Aka te Alofa i te Kamataga

7. Kaia e manakogina ei ke ati aka a te alofa i te kamataga mō te munatonu, kae e mafai pefea o fai tatou penā?

⁷ Kāti e uke a mea ko oti ne ma‵fuli i tou olaga talu mai te taimi ne tuku atu ei koe ki a Ieova. Ne tāua ‵ki tou alofa mō te munatonu i te kamataga, kae i te gasologa o taimi, ne manakogina ke faka‵poko atu tou alofa ko te mea ke mafai o fakafesagai atu ei ki fakalavelave ‵fou kolā ka tofotofogina i ei tou fakatuanaki. Kae ne ‵lago malosi atu eiloa a Ieova ki a koe. (1 Kolinito 10:13) Tela la, e tāua ‵ki foki eiloa a mea kolā e ‵tupu ki a koe i te gasologa o tausaga. Ne fesoasoani atu ei ki a koe ke ati aka a te alofa telā ne maua ne koe i te kamataga, kae ko mea konei se auala foki ke fakamautinoa aka ne koe a te mea ‵lei mo te loto o te Atua.​​—Iosua 23:14; Salamo 34:8.

8. Ne fakaasi atu pefea ne Ieova a ia eiloa ki a Mose, kae ne iloa ‵lei pefea ne tino Isalaelu a te Atua?

⁸ Ke fai se fakatusaga, mafaufau ki te tulaga ne maua ne te kau Isalaelu i te taimi ne fuafua ei ne Ieova ke faka‵sao latou mai te ‵nofo pologa i Aikupito. Ne fakaasi atu ne te Atua a ia eiloa ki a Mose, i ana pati: “Ka fai eiloa ne au so se mea e ‵tau o fai.” (Esoto 3:​7, 8, 13, 14, NW) E pelā me ne fai atu a Ieova me ka fai ne ia so se mea e ‵tau o fai ke fakasaoloto ei ana tino. I mea kolā ne ‵tupu fakamuli ifo kae e ‵tusa mo olotou fakanofonofoga, ne lavea ne te kau Isalaelu a uiga kese‵kese o Ieova​​—e pelā me ko te Atua Malosi Katoatoa, se Famasino, se Takitaki, se Tino faka‵sao tino, se Sotia, mo te Tino tausi foki o latou.​​—Esoto 12:12; 13:21; 14:​24-​31; 16:4; Neemia 9:​9-​15.

9, 10. Se a te vaegā tulaga e mafai o fesoasoani atu ki se tino ke iloa ne ia a te Atua, kae kaia e ‵lei ei ke masaua ne koe a taimi konā?

⁹ E ‵kese eiloa tou tulaga mo te kau Isalaelu mua. E tiga eiloa te feitu tenā, kāti e isi ne mea ne ‵tupu ki a koe kolā ne fakatalitonu atu ei e uiga ki te fiafia o te Atua ki a koe, kae ne fakamalosi atu ei ki tou fakatuanaki. Kāti ko oti ne fai a Ieova e pelā me se Tino tausi, se Tino fakamafanafana io me se Faiakoga. (Faitau te Isaia 30:20e, 21.) Io me kāti ko oti ne iloa ne koe se tali ki tau ‵talo. Kāti ne fepaki koe mo se fakalavelave, kae ne fesoasoani mai se taina Kelisiano ki a koe. Io me kāti ne lavea ne koe i te faiga o sukesukega totino a tusi siki kolā e fetaui ‵lei ona ko au sukesukega totino.

¹⁰ Kafai e fai atu ne koe a vaegā tala penā ki nisi tino, kāti e se ofo malosi latou i ei. Kae ko tala konā e se ne tala e uiga ki mea ne ‵tupu fakavavega. Kae e lavea ne koe te lotou tāua. E tonu, ne fai eiloa a Ieova mo fai a te mea telā ne manako koe ki ei. Ke mafaufau ki te fia tausaga ne nofo ei koe i te munatonu. E mata, e masaua ne koe a taimi e uke i tou olaga ne lagona ei ne koe te tausiga a Ieova ki a koe? Kafai e penā loa, a te masauaga ne koe a taimi konā mo ou lagonaga i te taimi tenā e mafai eiloa o fakamalosi atu ki tou loto a te alofa ne maua ne koe mō Ieova i te taimi tenā. Ke fakatāua ne koe a mea konā. Ke mafaufau ‵loto ki ei. A mea konā ne fakamaoniga me e fiafia eiloa a Ieova ki a koe, kae e seai se tino e mafai o taofi aka ne ia te lagonaga tenā mai i a koe.

Ke Iloilo Ifo ki a Koe Eiloa

11, 12. Kafai ko gasolo o vāivāi te alofa o se Kelisiano mō te munatonu, kaia kāti ko fai ei penā, kae ne a pati fakatonutonu ne fai mai ne Iesu?

¹¹ Kafai ko se ‵pau nei tou alofa ki te Atua mo te munatonu mo te taimi muamua, e se fakauiga i ei me ko isi se mafuliga i a Ia. A Ieova e se mafai eiloa o mafuli. (Malaki 3:6; Iakopo 1:​17) Ne fiafia eiloa a Ia ki a koe i te taimi tenā, kae e penā foki eiloa i aso nei. Kae se a la te mea kāti ko oti ne mafuli i tou fesokotakiga mo Ieova? E mata, e mafaufau koe me ko manavase kae fakalavelave malosi koe ki mea o te olaga? Kāti ne uke a taimi i aso mua ne ‵talo atu ei koe mo te loto kātoa, ne sukesuke malosi kae mafaufau ‵loto faeloa. E mata, ko se loto finafinau malosi nei koe i te galuega talai e pelā foki mo te kau atu faeloa ki fakatasiga e pelā mo taimi mua?​​—2 Kolinito 13:5.

¹² Kāti e se lavea ne koe a vaegā uiga penā i a koe, kae kafai e isi, kaia ne fai ei penā? E mata, ko oti ne fakalavelave atu a te manavase ‵tau ki mea o te olaga e pelā mo te tausiga o te kāiga, tou malosi, io me ko nisi mea aka penā ke puli i a koe te tāua o te pili mai o te aso o Ieova? Ne fai atu a Iesu ki ana apositolo: “Fakaeteete koutou! Ke mo a ma tō fai ‵kaiga kae ko‵nā sāle, io me manava‵se ki mea o te olaga nei, i te mea manafai e fakapoi mai te aso tenā ki a koutou. Me ka vau pelā mo se malei ki tino katoa e ‵nofo i te lalolagi. Tela la, a koutou ke matapula‵pula kae ‵talo sāle, ko te mea ke maua ne koutou te malosi e ‵sao mai ei koutou i mea faiga‵ta katoa ka oko mai.”​​—Luka 21:​34-​36.

13. Se a te mea ne fakatusa ne Iakopo ki ei te Muna a te Atua?

¹³ Ne fakamalosi atu a Iakopo, telā ne tusi ne ia se tusi i te Tusi Tapu, ki taina tali‵tonu ke iloilo ifo a latou eiloa e ‵tusa mo te mainaga i te Muna a te Atua. Ne tusi mai a Iakopo: “Ke fai koutou mo tino kolā e tau‵tali i te muna a te Atua, kae se na ko te faka‵logo fua ki ei, i te mea mana faka‵segina ei koutou ne koutou eiloa. Me ko te tino telā e fakalogologo fua ki te muna kae se fai ne ia, e ‵pau a ia mo te tino telā e onoono ki te kilo kae matea ne ia ona foliga ‵tonu. E onoono fua ki ona foliga, kae kafai e fano keatea mai i ei, puli fakavave ei i a ia me pefea ona foliga. Ka ko te tino e tausi faka‵lei ki te tulafono e fakakatoatoa ne ia te ‵lei, telā ko te tulafono o te saolotoga, kae ola foki i ei a ia, kae se na ko te fakalogologo fua ki ei ko puli ei i a ia, kae e tausi fakamaoni eiloa ki ei, i te fai ne ia a mea e fakatonu mai. A te tino tenā ka fakamanuia ne te Atua i ana mea e fai.”​​—Iakopo 1:​22-​25.

14, 15. (a) E mafai pefea o fesoasoani atu te Tusi Tapu ke momea aka ki mua tou tulaga faka-te-agaga? (e) Ne a fesili e mafai o mafaufau ‵loto koe ki ei?

¹⁴ E mafai o fakaaogā ne se tino a te kilo ke fakamautinoa aka ei me ko ‵lei ana foliga. Kafai e lavea ne se tagata me e se ‵tonu tena fusiua, e mafai o faka‵tonu ne ia. Kafai e lavea ne se fafine me e makosukosu tena ulu e mafai o selu faka‵lei ne ia. I se auala tai ‵pau, e fesoasoani mai te Tusi Tapu ke iloilo ne tatou a tatou eiloa. Kafai e faka‵pau ne tatou a tatou eiloa ki mea kolā e fakaasi mai i te Tusi Tapu, ko tena uiga ko fakaaogā eiloa ne tatou e pelā me se kilo. Kae se a te aogā o te onoono atu ki se kilo māfai e se faka‵tonu ne tatou a mea kolā e lavea atu me e ‵tau o faka‵tonu aka? Ka ‵poto eiloa tatou māfai e ga‵lue tatou e ‵tusa mo mea kolā e lavea ne tatou i te ‘tulafono ‵lei katoatoa’ a te Atua, kae “fai” foki ne tatou. Tela la, se mea poto mō so se tino telā ko gasolo o vāivāi tena alofa mō Ieova mo te munatonu ke mafaufau ‵loto ki fesili konei: ‘Ne a tofotofoga e fepaki nei mo au i te olaga, kae e saga atu pefea au ki ei? Ne saga atu pefea au ki ei i aso mua? E mata, e isi nei se mea ko mafuli?’ Kafai e fakaasi mai ne tau iloiloga me e isi ne vāivāiga o koe, ke se manatu māmā ki ei. Kafai e ‵tau o fai ne fakamafuliga, ke mo a ma fakatalave.​​—Epelu 12:​12, 13.

¹⁵ A te vaegā mafaufau ‵loto penā e mafai foki o fesoasoani atu ki a koe ke fakatoka ne fakamoemoega aogā kolā e fai i ei ke gasolo koe ki mua i te feitu faka-te-agaga. Ne tuku atu ne te apositolo ko Paulo ki tena taina galue ko Timoteo a pati fakatonutonu mai te Atua ke momea aka ei te ‵lei o tena galuega talai. Ne fakamalosi atu a Paulo ki te tamataene tenā: “Ke fai ne koe a mea konei kae tuku katoatoa atu tou ola mō latou, ko te mea ke matea ne tino katoa tou gasolosolo ki mua.” E ‵tusa mo te mainaga i te Muna a te Atua, se mea ‵lei foki ke mafaufau ‵loto tatou ki auala e mafai o fai ei tatou ke gasolo ki mua.​​—1 Timoteo 4:15.

16. Se a te mea fakamataku e ‵tau o masaua māfai ko iloilo ne koe a koe eiloa e ‵tusa mo te mainaga mai te Tusi Tapu?

¹⁶ Kafai e iloilo faka‵lei ifo a koe ki a koe eiloa, kāti ka lavea ne koe ou nisi vāivāiga. E mafai o fai i ei ke loto vāivāi se tino, kae ke se talia eiloa ne koe ke tupu te mea tenā. A te tonuga loa, a te iloiloga tenā e fai fua ko te mea ke galue koe ki auala ke mafai o momea aka tou ‵lei. E manako eiloa Satani ke mafaufau se Kelisiano i a ia e se aogā ona ko tena tulaga sē ‵lei katoatoa. E tonu, e fai mai nisi tino me e takalialia a te Atua ki taumafaiga katoa kolā e fai ke tavini atu ei ki a ia. (Iopu 15:​15, 16; 22:3) A te mea tenā se loi telā ne ‵teke katoatoa atu a Iesu ki ei; e fakatāua malosi eiloa ne te Atua a tatou taki tokotasi. (Faitau te Mataio 10:​29-​31.) A te iloa ne koe ou vāivāiga e ‵tau o fai i ei ke iloa ne koe o galue mo te loto maulalo ki ei, fakatasi mo te fesoasoani o Ieova. (2 Kolinito 12:7e-10) Kafai ko se uke au mea e mafai o fai ona ko masaki io me ko te tulaga matua, ke fai ne fakamoemoega ‵lei ke kausaki atu ki ei, kae ke mo a ma ‵fiu io me fai ei ke matafitafi tou alofa.

Mea Kolā e ‵Tau o Loto Fakafetai ki ei

17, 18. Ne a mea aogā e maua mai te fakamalosiakaga o te alofa telā ne maua muamua ne koe i te kamataga?

¹⁷ Ka maua eiloa a mea aogā e uke mai te tumau eiloa i te ati aka ne tatou a te fakavae o te alofa telā ne maua muamua i te kamataga. E mafai o momea aka ne koe tou iloa e uiga ki te Atua mo tou loto fakafetai ki ana fakatakitakiga alofa. (Faitau te Faataoto 2:​1-9; 3:​5, 6.) “E maua ne au te taui ‵lei i au ne tausi ki [tulafono a Ieova],” ko pati a te faisalamo. “A fakatonuga foki a te Aliki e fakatuagagina, e aumai ne ia te poto ki a latou kolā e va‵lea.” E se gata i ei, “amutia [io me fia‵fia] latou kolā e ‵ma faeloa olotou olaga, a latou e ola i te olaga pelā eiloa mo tulafono a te Aliki.”​​—Salamo 19:​7, 11; 119:1.

¹⁸ Ka lotomalie eiloa koe me e uke ‵ki a mea ‵lei e ‵tau o loto fakafetai koe ki ei. E malamalama koe i pogai e ‵tupu ei a mea konei i te lalolagi. E maua ne koe a mea aogā mai fakatokaga faka-te-agaga katoa e tuku mai ne te Atua ki ana tino i aso nei. E seai se fakalotolotolua me e loto fakafetai foki koe me ko talia ne Ieova ke fakapilipili atu koe ki tena fakapotopotoga i te lalolagi kātoa kae tuku atu ki a koe te tauliaga ke fai pelā me se tokotasi o ana Molimau. Ke loto fakafetai koe mō mea ‵lei ne maua ne koe i tou olaga! Kafai e ‵tau o fai sau fakasologa ki ei, kāti ka ‵loa ‵ki eiloa. E mautinoa eiloa me ka fesoasoani atu te faiga faeloa o te mea tenā ke fakagalue ne koe te fakamalosiga tenei: “Tausi faka‵lei a te mea tenā e i a koe.”​​—Fakaasiga 3:​11.

19. I tafa o te mafaufau ‵loto ki tou fesokotakiga mo te Atua, ne a mea tāua e fakatumau ei tou malosi faka-te-agaga?

¹⁹ A te mafaufau ‵loto ki te gasoloakaga o tou fakatuanaki i tausaga e uke, se mea fua e tasi telā e mafai o fesoasoani atu ke puke ‵mau ki mea ko maua ne koe. Ko oti ne fakasino atu faeloa a te mekesini tenei ki nisi mea tāua e fakatumau ei te malosi faka-te-agaga. E aofia i mea konā ko te ‵talo, te kau atu mo te faiga o tusaga i fakatasiga faka-Kelisiano, mo te kau atu mo te loto finafinau ki te galuega talai. E mafai o fesoasoani atu a mea konei ki a koe ke tumau i te fakamalosi, te fakafouga, mo te atiakaga o te alofa telā ne maua ne koe i te kamataga.​​—Efeso 5:​10; 1 Petelu 3:​15; Iuta 20, 21.

Ka Tali Mai Koe Pefea?

• E mafai pefea o fai a pogai o tou alofa ki a Ieova mo fai se fakamalosiga nei ki a koe?

• Se a te mea e mafai o fakatalitonu atu ki a koe mai te mafaufau ki mea ne ‵tupu ki a koe i tausaga ko ‵teka?

• Kaia e ‵tau ei o iloilo faeloa ne koe a tou alofa mō te Atua?

[Fakamatalaga o te Ata i te itulau e 25]

Ne a mea e uiga ki te munatonu ne fiafia kae talitonu koe ki ei?

[Fakamatalaga o te Ata i te itulau e 27]

E mata, e lavea ne koe a mea e uiga ki a koe eiloa kolā e ‵tau o faka‵tonu aka?