Mea Kolā e Tauloto ne Tatou Mai i a Iesu

E Uiga ki te Olaga i te Kāiga

Se a te kilokiloga e uiga ki te fakaipoipoga e fai ei ke fia‵fia a kāiga?

A te fakaipoipoga se feagaiga tapu. I te taimi ne fesili atu ei me e taga ke ‵tala te avaga, ne fai atu a Iesu: “E a, e seki fai‵tau ne koutou i te Tusi? A ia telā ne faite ne ia a tino i te kamataga, ne faite ne ia a te tagata mo te fafine. Ne fai atu, ‘Tenā te pogai ko tuku ei ne te tagata tena tamana mo tena mātua, kae fakatasi mo tena avaga, ko fai ei lāua mo foitino e tasi.’ Tela la, ko se toe tokolua lāua, ka ko tasi. A lāua kolā ko oti ne fakatasi ne te Atua, e seai se tino e mafai ne ia o ‵tala. . . . So se tino e ‵tala tena avaga kae seki mulilua, e mulilua eiloa a ia manafai e toe avaga ki se isi fafine.” (Mataio 19:​4-6, 9) Kafai e tau‵tali se tauavaga ki pati fakatonutonu a Iesu kae fakamaoni te suā tino ki te suā tino, ka tokagamalie kae fia‵fia a tino katoa i te kāiga.

Kaia e fai ei ne te alofa ki te Atua ke fia‵fia a kāiga?

Ne fai mai a Iesu: “‘E ‵tau mo koe o alofa ki tou Atua mo tou loto kātoa, mo tou agaga kātoa, mo tou mafaufau kātoa.’ Tenā te tulafono tafa sili mō te aoga.” Se a te lua o tulafono tafasili i te tāua? Ne fai mai a Iesu: “E ‵tau mo koe o alofa ki tou tuakoi e pelā eiloa mo koe ki a koe.” (Mataio 22:​37-39) Tela la a te auala ke maua ei se kāiga fiafia ko te mauaga o se fesokotakiga ‵lei mo te Atua me e fai ne te ‵tou a‵lofa ki a ia ke fakatau a‵lofa tatou.

E mafai pefea ne tagata a‵vaga mo fafine a‵vaga o fakatau fakafia‵fia te suā tino ki te suā tino?

E fakafiafia ne tagata a‵vaga olotou a‵vaga māfai e fakaakoako atu latou ki a Iesu. Ne seki alofa fakapito a ia ki tena avaga fakatusa, telā ko te ekalesia. (Efeso 5:25) Ne fai mai a Iesu: “Ne seki vau a te Tama a te Tagata ke tavini atu a tino ki a ia, kae ke tavini atu a ia.” (Mataio 20:​28, The Holy Bible​—⁠New International Version) Ne seki pule fakasaua io me ne fai fakamasei ne Iesu a tino mai lalo i tena tausiga kae ne tuku atu ne ia ki a latou se malologa. (Mataio 11:28) Tela la, e ‵tau o fakagalue ne tagata a‵vaga a olotou pulepulega i se auala telā e mafai ei o aoga ki tino katoa i te kāiga.

E mafai foki o maua ne fafine a‵vaga a mea aoga mai i te fakaakoakoga a Iesu. “Ka ko te Atua e sili foki i a Keliso,” ko muna a te Tusi Tapu. E fai mai foki i ei: “A te tagata e sili foki i tena avaga.” (1 Kolinito 11:⁠3) Ne seki fakalogo fua a Iesu ki te Atua ona ko te mea e sili atu te Atua i a ia. Ne āva malosi a ia ki tena Tamana. E “fai sāle eiloa ne au a mea kolā e fiafia a ia ki ei,” ko pati a Iesu. (Ioane 8:29) A te fafine avaga telā e āva ki tena ulu ona ko tena alofa mo tena āva ki te Atua e fai ne ia a mea e uke ‵ki ke fiafia ei tena kāiga.

Se a te mea e mafai o tauloto ne mātua mai te kilokiloga a Iesu e uiga ki tama‵liki?

Ne ‵nofo fakatasi a Iesu mo tama‵liki kae ne fiafia foki a ia ki olotou manatu mo lagonaga. E fai mai te Tusi Tapu: “Ka ko Iesu ne kalaga atu ki tama‵liki ke o‵mai ki a ia kae fai atu penei, ‘Tuku tama‵liki ke o‵mai ki a au’!” (Luka 18:​15, 16) I te taimi e tasi, ne ‵teke atu a tino ki nisi tama‵liki tagata kolā ne fai‵pati e uiga ki te lotou fakatuanaki ki a Iesu. Kae ne fakamālō atu a Iesu ki tama‵liki konā, kae fai atu ki tino kolā ne ‵liko atu: “E seki fai‵tau eiloa koutou i muna kolā ne tusi i tusi, ‘Ko oti ne akoako ne koe a tama‵liki mo pepe ke tuku atu ne latou a vikiga ‵tonu ki a koe’?”​—⁠Mataio 21:​15, 16.

Se a te mea e mafai o tauloto ne tama‵liki mai i a Iesu?

Ne tuku atu ne Iesu se fakaakoakoga ‵lei e uiga ki te fiafia ki mea faka-te-agaga. I te taimi koi 12 ei ana tausaga, ne maua atu a ia i te “Fale Tapu, e saga‵saga mo faiakoga Iutaia, e fakalogologo kae fai fesili ki a latou.” Se a te mea ne iku mai i ei? “A latou katoa kolā ne fakalogo‵logo ki a ia, ne ofo i tona poto o tali fesili.” (Luka 2:​42, 46, 47) Kae ne seki fakamatamata a Iesu i tena poto. Kae ne fai i ei ke āva a ia ki ana mātua. E fai mai te Tusi Tapu: “Kae ne fakalogo ki a lāua.”​—⁠Luka 2:​51.

Ke maua a fakamatalaga e uke, ke onoono ki te mataupu e 14 o te tusi ko te Ne a Mea e Akoako ‵Tonu Mai i te Tusi Tapu?a

[Fakamatalaga mai lalo]