Ke Maua A Fakamanuiaga E Auala I Te Tupu Telā E Takitaki Ne Te Agaga O Te Atua!
“A te agaga o te Aliki ka aumai ne ia ki a ia a te poto.”—ISAIA 11:2.
1. Ne a mea e manava‵se ki ei a nisi tino e uiga ki te tulaga o fakalavelave i te lalolagi tenei?
“I TE lalolagi telā ko ‵numi valevale i mea fakapolitiki, mea a fenua mo mea tau enivaelomene, e mafai pefea ne tino ola o ‵toe ola atu i te suā 100 tausaga?” Tenā eiloa te mea ne fakasae aka ne se tagata sukesuke ki mea i te lagi ko Stephen Hawking i te 2006. E fai mai ne se mataupu i te New Statesman a te mea ne lavea atu: “Ko se mafai eiloa ne tatou o fakagata a te mativa io me fakamalosi aka te filemu i te lalolagi kātoa. E ‵kese mai i ei, e foliga mai me e maua eiloa ne tatou a mea sē ‵lei. E se fakauiga i ei me ne seki taumafai aka eiloa tatou ki ei. Ne kamata eiloa a taumafaiga a tatou mai i fakapotopotoga kolā e ‵nofo mai lalo i te malo ke oko eiloa ki fakapotopotoga kolā e se ‵nofo mai lalo i te malo; ko Malo ‵Kaufakatasi ki fakapotopotoga kolā e taumafai o taofi a te faitega o meatau. E fai ne tatou a ‘taua e uke ko te mea ke fakagata aka ei a taua’ kae ke fakatalitonu atu foki i ei me e iloa ne tatou o fakagata a taua.”
2. Ka fakagalue aka pefea ne Ieova tena pulega tonu ki luga i te lalolagi tenei?
2 E se ‵poi a tavini a Ieova i vaegā fakamatalaga penā. E fakamatala mai i te Tusi Tapu me ne seki faite a tino ke pule atu ki a latou eiloa. (Ielemia 10:23) Ko Ieova fua te ‵tou Pule tonu. Ona ko te mea tenā, e isi eiloa sena saolotoga ke fai ne ia a tulafono mō tatou, ke fakamatala mai te olaga telā e ‵tau o maua ne tatou, kae ke puipui foki tatou ko te mea ke oko atu ki te olaga tenā. E se gata i ei, ko pili fua nei o fakaaoga tena pulega tenā ko te mea ke fakagata aka ne ia a mea kolā e se mafai o faka‵lei aka ne pulega a tino. Kae i te taimi foki eiloa tenā, ka fakaseai atu ei ne ia a latou kolā e ‵teke atu ki tena pulega ‵lei kae fakapologa ne latou a tino ki te agasala, ki te tulaga sē ‵lei katoatoa, mo te “atua masei o te lalolagi nei,” ko Satani te Tiapolo.—2 Kolinito 4:4.
3. Se a te mea ne folafola mai ne Isaia e uiga ki te Mesia?
3 I te Palataiso i te lalolagi fou, a te pulega alofa a Ieova ka fakaoko atu eiloa ki luga i tino e auala i tena Malo faka-Mesia. (Tanielu 7:13, 14) Ne ‵valo mai ne Isaia e uiga ki te Tupu tenā: “A te laina tupu o Tavita e pelā me se lakau telā ko oti ne ‵kati ki lalo; kae e pelā eiloa mo kaula fou kolā e ola aka i te foitino o te lakau, ka penā te mea ka tupu, me ka isi se tupu telā ka tupu ake mai i te gafa o Tavita. A te agaga o te Aliki ka aumai ne ia ki a ia a te poto, te atamai mo te apo i te pulepulega o ona tino. Ka iloa ne ia te loto o te Aliki, kae ka fakaaloalo foki ki ei.” (Isaia 11:1, 2) Ne a auala mautinoa ne fakamalosi aka ei ne te agaga tapu o te Atua a te “laina tupu o Tavita”—ko Iesu Keliso—ke pule atu ki tino? Ne a fakamanuiaga ka iku mai i tena pulega? Kae ne a mea e ‵tau o fai ke maua ei ne tatou a fakamanuiaga konā?
Ne Tuku Atu ne te Atua ki a Iesu te Pule
4-6. Se a te poto tāua telā ne fai ne ia Iesu ke mafai o fai pelā me se Tupu poto kae alofa, se Faitaulaga Sili mo se Famasino?
4 Ne manako a Ieova ke ola ana tino i se olaga ‵lei katoatoa mai lalo i se puipuiga a se tino telā e fai mo fai se Tupu poto kae alofa atafai tonu, se Faitaulaga Sili, kae se Famasino foki. Tenā eiloa te pogai ne filifili ei ne te Atua a Iesu Keliso, telā ne fakaeke aka ne te agaga tapu ke toka ‵lei a ia mō toe tiute tāua konā. Ke mafau‵fau aka ki nisi pogai kolā ne fakataunu faka‵lei ei ne Iesu a te galuega telā ne tuku atu ne te Atua.
5 Ne iloa ‵lei eiloa ne Iesu a te Atua. E iloa ‵lei atu ne te tama e tokotasi tenei a te Tamana i lō so se isi tino aka, ona ko te mea ne ‵nofo fakatasi lāua i se fia piliona o tausaga. Talu mai te taimi tenā, ne maua katoatoa ei ne Iesu te poto e uiga ki a Ieova kae tenā foki eiloa te pogai e taku ei a ia e pelā me ko te “fakatusa o te Atua telā e se matea ki mata.” (Kolose 1:15) Ne fai atu a Iesu: “Ko te tino ko kilo ki a au, ko kilo foki ki te Tamana.”—Ioane 14:9.
6 I tafa o Ieova, e maua ne Iesu a te iloa tafasili i te maluga i mea ola katoa ne faite, e aofia i ei a tino. E fai mai te Kolose 1:16, 17 penei: “Me ne faite a mea katoa e alatu i a ia [te Tama a te Atua], ko mea i te lagi mo mea i te lalolagi, ko mea e matea mo mea se matea . . . Ne muamua a ia i mea katoa, ka ko akutu fakatasi a mea katoa ki a ia.” Mafaufau la ki te mea tenā! A Iesu, telā ko te “tagata poto i te fakatutu” a te Atua, ne isi sena vaega i nisi mea katoa ne faite. Tela la, e maina ‵lei a ia i mea likiliki i te iunivesi, kamata mai eiloa i tamā mea fo‵liki ke oko eiloa ki te faiai fakaofoofogia o te tino. E tonu, e poto ‵ki eiloa a Keliso!—Faataoto 8:12, 22, 30, 31.
7, 8. Ne fesoasoani atu pefea a te agaga tapu o te Atua ki te faiga ne Iesu o tena galuega talai?
7 Ne fakaeke a Iesu ki te agaga tapu o te Atua. “Ko i luga i a au te Agaga o te Aliki [Ieova],” ko pati a Iesu, me “ne faū ne ia au o lauga atu te Tala ‵Lei ki tino ma‵tiva, ne uga mai ne ia au o takutaku atu te saolotoga ki tino kolā ne ‵kave fakapagota, o faka‵kite mata o tino ‵kivi, kae fakasaoloto latou kolā ko fakasauagina, o takutaku atu foki te tausaga ka fakaola ei ne te Aliki [Ieova] ona tino!” (Luka 4:18, 19) I te taimi ne papatiso ei a Iesu, e foliga mai me ne fai ne te agaga tapu ke masaua ne ia ana mea kolā ne tauloto i te taimi ne liutino ei a ia, e aofia i ei a mea kolā ne manako ki ei te Atua ke fai ne ia i te taimi ne fai ei tena galuega i te lalolagi nei e pelā me ko te Mesia.—Faitau te Isaia 42:1; Luka 3:21, 22; Ioane 12:50.
8 Ona ko te mea e fakamalosigina a ia ne te agaga tapu, kae e maua ne ia se foitino mo te mafaufau ‵lei katoatoa, ne seki fai fua a Iesu mo fai te ‵toe tagata sili telā ne ola i te lalolagi kae ne fai foki a ia mo fai te ‵toe Faiakoga sili. E se gata i ei, “ne ofo masei a te vaitino i ana akoakoga.” (Mataio 7:28) Ne iloa ne Iesu a te auala ke fakafesagai atu ki te māfuaga o fakalavelave—te agasala, te tulaga sē ‵lei katoatoa, mo te sē lava o te poto e uiga ki te Atua. E se gata fua i konā, e iloa faka‵lei ne ia a loto o tino mo te auala ke fakatonutonu aka ei.—Mataio 9:4; Ioane 1:47.
9. E momea aka pefea tou loto talitonu ki a Iesu e pelā me ko te Pule māfai e mafaufau ki tena olaga i te lalolagi?
9 Ne ola a Iesu e pelā me se tino. A te iloa ‵lei ne ia o tino mo te ‵kau fakatasi mo tino sē ‵lei katoatoa e fai ei ke fetaui ‵lei a Iesu mo fai se Tupu. Ne tusi mai te apositolo ko Paulo, penei: “E ‵tau mo [Iesu] o fai ke pelā mo ona taina i mea katoa, ko te mea ke fai a ia mo olotou faitaulaga pule e alofa kae fakamaoni i tena galuega mō te Atua, ko te mea ke fakamagalogina agasala a tino. Kae nei la, ko mafai ne ia o fesoasoani ki a latou kolā e fakaosoosogina, me i a ia ne fakaosoosogina kae puapuagatia foki.” (Epelu 2:17, 18) Ona ko Iesu ko oti ne “fakaosoosogina,” tenā te mea e maua ei ne ia a te loto alofa ki tino kolā e fe‵paki mo fakalavelave. Ne lavea faka‵lei atu a te loto alofa o Iesu i te taimi ne fai ei tena galuega talai. A tino ma‵saki, tino sē katoatoa foitino, tino puapuagatia—ke oko foki eiloa ki tama‵liki—ne seki ma‵taku ma olo atu ki a ia. (Maleko 5:22-24, 38-42; 10:14-16) A tino loto mau‵lalo mo tino kolā e fia‵fia o tauloto ki mea e uiga ki te Atua ne fia‵fia foki o olo atu ki a ia. A ko te suā feitu, a latou kolā e fakamata‵mata, e fakasaua kae e “se ‵nofo i [olotou] loto a te alofa ki te Atua” e fulitua, kaitaua kae ‵teke atu ki a ia.—Ioane 5:40-42; 11:47-53.
10. I auala fea ne fakaasi mai ei ne Iesu a te lasi o tena alofa mō tatou?
10 Ne tuku mai ne Iesu tena ola mō tatou. A te ‵toe fakamaoniga sili o te fetaui tonu o Iesu mo fai te Pule, ko tena loto fiafia ke mate mō tatou. (Faitau te Salamo 40:6-10.) Ne fai mai a Keliso: “A te alofa tafasili e ‵tau o fakaasi ne te tino, ko te tuku atu o tona ola e sui ei a ola o ona taugasoa.” (Ioane 15:13) E ‵kese mai tino pule sē ‵lei katoatoa, kolā e ola i se olaga gali mai i kope o tino kolā e ‵nofo mai lalo i a latou, ne tuku atu eiloa ne Iesu tena ola mō tino e tokouke.—Mataio 20:28.
Ne Fakamalosigina ke Tuku Mai a Mea Aoga Mai te Togiola
11. Kaia e mafai ei o tali‵tonu katoatoa tatou ki a Iesu e pelā me ko te ‵tou Fakaola?
11 Ko oko eiloa i te ‵lei ke fai ne Iesu e pelā me ko te Faitaulaga Sili a te takitakiga i te fakagaluegaga o mea aoga mai i tena taulaga togiola! A te ‵tonuga loa, i te taimi ne fai ei ne Iesu tena galuega i te lalolagi nei, ne tuku mai ne ia se ata foliki o mea kolā ka fai ne ia i tena Pulega i te Afe Tausaga, telā e mafai o maua ne tatou māfai e tumau tatou i te fakamaoni. Ne faka‵lei ne ia a tino ma‵saki, faka‵tu a tino ‵mate, fagai a tino e tokouke, kae e isi foki sena malosi ki luga i matagi mo peau. (Mataio 8:26; 14:14-21; Luka 7:14, 15) E se gata i ei, ne seki fai ne ia a mea konei ko te mea ke ‵saga atu a tino ki a ia io me ke fakamatamata ki tena malosi mo tena ‵mana, kae ke fakaasi atu ei tena atafai mo te alofa. “Au e loto ke ‵ma koe,” ko te tali a Iesu ki te tagata lepela telā ne fakamolemole atu ke faka‵lei aka a ia. (Maleko 1:40, 41) Ka fakaasi mai foki ne Iesu a vaegā uiga penā i tena Pulega i te Meleniuma—i te lalolagi kātoa.
12. Ka fakataunu aka pefea a te Isaia 11:9?
12 Ka tumau eiloa a Keliso mo ana pule lagolago i te faiga o polokalame o akoakoga faka-te-agaga telā ne kamata ne Iesu i te 2,000 tausaga ko ‵teka. Tela la, ka fakataunu faka‵lei eiloa a pati i te Isaia 11:9, penei: “A te laukele ka ‵fonu i te malamalama i uiga o te Aliki, e pelā mo te tai telā e ‵fonu i te suatai.” E mautinoa eiloa me e aofia i akoakoga mai i te Atua a fakatonuga e uiga ki te tausiga o te lalolagi mo mea ola katoa i ei, e pelā mo te galuega telā ne fakatonu atu muamua ke fai ne Atamu. I te fakaotiga o te 1,000 tausaga, a te fuafuaga a te Atua telā ne fakamatala mai i te Kenese 1:28 ka fakataunu, kae ka fakagalue katoatoa ei a te taulaga togiola.
Ne Fakamalosigina ke Fakamasino
13. Ne fakaasi mai pefea ne Iesu a tena alofa ki te amiotonu?
13 A Keliso “ne ‵tofi ne te Atua, ke fai mo Famasino o tino ‵mate mo tino ola.” (Galuega 10:42) Ko oko eiloa i te fakamafanafana ke iloa atu i a Iesu e ‵lei katoatoa, a tena fai mea tonu mo tena fakamaoni e fai pelā me se fusi telā e ‵sai ke ‵mau i tena taugasulu! (Isaia 11:5) Ne fakaasi atu ne ia tena takalialia ki uiga kaima‵nako, loi, mo nisi amioga ma‵sei, kae ne taku fakamasei ne ia a tino kolā ne seki atafai atu ki logo‵maega o nisi tino. (Mataio 23:1-8, 25-28; Maleko 3:5) E se gata i ei, ne fakaasi mai ne Iesu me se kilo a ia ki foliga, ona ko te mea e “iloa ‵lei katoa ne ia loto o tino.”—Ioane 2:25.
14. I te auala fea ne fakaasi mai ei ne Iesu tena alofa ki te amiotonu mo te fakamaoni, kae ne a fesili e ‵tau o ‵sili ifo ne tatou ki a tatou eiloa?
14 Ne tumau eiloa a Iesu i te fakaasi mai o tena alofa ki te amiotonu mo te fai mea tonu mai i te tausi atu ki te faiga o te ‵toe galuega sili ko te talaiatuga mo te faiga o akoakoga i tala fakasolopito o te lalolagi kātoa. E seai lele eiloa se tino, se malo o tagata, mo se agaga masei e mafai ne ia o taofi a te fakataunuga o te galuega tenei ke oko eiloa ki te taimi ko lotomalie katoatoa ei a te Atua. Tela la, e mafai eiloa o tali‵tonu katoatoa tatou me kafai ko oti atu a Amaketo, ka tumau eiloa te fai mea tonu o te Atua. (Faitau te Isaia 11:4; Mataio 16:27.) Ke fesili ifo ki a koe eiloa penei: ‘E mata, e fakaasi atu ne au a te kilokiloga a Iesu ki tino i te taimi e talai atu ei au? E mata, e tuku atu nei ne au ki a Ieova a te ‵toe mea ‵lei, faitalia toku masaki io me ko nisi fakanofonofoga kolā e taofi aka ei a mea e mafai ne au o fai?’
15. Se a te mea telā e ‵tau o masaua faeloa ne tatou kae e fesoasoani mai foki ke tuku atu ne tatou a toe mea ‵lei ki te Atua?
15 E mafai ne tatou o tavini atu ki te Atua mo ‵tou loto kātoa māfai e tuku faeloa i ‵tou mafaufau me i te galuega tenei e fai ne tatou i a Ia. Ne fakatonu mai ne ia; e takitaki ne ia e auala i tena Tama; kae e auala i te agaga tapu, e fakamalosi ne ia a tino kolā e fai ne latou a te galuega tenā. E mata, e fakatāua ne koe a te tauliaga ke fai pelā me se tino galue a te Atua fakatasi mo tena Tama telā e takitaki ne te agaga? Ko oi aka foki i tafa o Ieova, e mafai o fakamalosi aka ne ia a tino e silia atu i te fitu miliona, kae ko te tokoukega o latou ne “tino e seki a‵koga,” ko te mea ke talai atu ne latou a te fekau o te Malo i fenua e 236?—Galuega 4:13.
E Auala i a Keliso, ne Fakamanuia ei Koe!
16. Se a te mea e fakaasi mai i te Kenese 22:18 e uiga ki fakamanuiaga a te Atua?
16 Ne fai atu a Ieova ki a Apelaamo penei: “Ka ka‵laga mai katoa a malo ki a au ke fakamanuia atu a latou e pelā mo te fakamanuiaga ne au a tou gafa—e pogai mea katoa i tou fakalogo ki aku fakatonuga.” (Kenese 22:18) E fakauiga te mea tenei ki tino kolā e fakatāua ne latou a olotou tiute ki te Atua mo tena tama, ko mautinoa eiloa nei me ko olioli fua ke na maua ne latou a fakamanuiaga kolā ka aumai ne te Fanau faka-Mesia. Kae ko tavini atu i aso nei fakatasi mo fakamanuiaga i olotou mafaufau.
17, 18. Se a te tautoga a Ieova telā e fai‵tau ne tatou i te Teutelonome 28:2, kae se a tena uiga mō tatou?
17 Ne fai atu te Atua ki te fanau a Apelaamo telā ko te fenua o Isalaelu penei: “Faka‵logo ki te Aliki te otou Atua, kae ka maua katoa ne koutou a fakamanuiaga konei.” (Teutelonome 28:2) Kae tenā foki eiloa te mea e ‵tau o fai atu ki tavini a te Atua i aso nei. Kafai e manako koe ki fakamanuiaga mai i a Ieova, ke na “fakalogo” la ki tena leo. Kae ka “maua katoa ne koutou a fakamanuiaga konei.” Kae ne a la mea e aofia i te “fakalogo” tenei?
18 E aofia i te fakalogo tenei a te mafaufau ‵loto ki pati kolā e fai mai i te Muna a te Atua mo mea‵kai faka-te-agaga kolā e tuku mai ne ia. (Mataio 24:45) E fakauiga foki ki te fakalogo ki te Atua mo tena Tama. Ne fai mai a Iesu: “E se ‵sao ki te Malo o te lagi a latou katoa kolā e fai mai k au, ‘Te Aliki, te Aliki,’ na ko ia fua tela e fai ne ia te loto o toku Tamana tela i te lagi.” (Mataio 7:21) A te fakalogo foki ki te Atua e fakauiga ki te loto fiafia o se tino o tautali faka‵lei ki fakatokaga kolā ko oti ne fakatoka faka‵lei ne ia, ko te fakapotopotoga Kelisiano mo ‘meaalofa tino,’ ko toeaina kolā ne ‵tofi aka.—Efeso 4:8.
19. E mafai pefea o maua ne tatou a fakamanuiaga?
19 E aofia i ‘meaalofa tino’ konā ko tino o te Potukau Pule, kolā e sui ne latou a te fakapotopotoga Kelisiano kātoa. (Galuega 15:2, 6) A te ‵tonuga loa, a ‵tou faifaiga ki taina faka-te-agaga o Keliso se fakamaoniga lasi o te mafai ne tatou o fakafesagai atu ki te ‵toe fakalavelave lasi telā ko pili o oko mai. (Mataio 25:34-40) Tela la, a te auala e tasi e mafai o maua i ei ne tatou a fakamanuiaga ko te ‵lago atu o tatou mo te fakamaoni ki tino fakaekegina a te Atua.
20. (a) Se a te tiute tāua o ‘meaalofa tino’? (e) E fakaasi atu pefea ne tatou me e fakatāua ne tatou a taina konei?
20 E aofia foki i ‘meaalofa tino’ konei a sui o te Komiti o Ofisa Lagolago, ovasia faima‵laga mo toeaina i fakapotopotoga—a latou katoa konei ne ‵tofi aka ne te agaga tapu. (Galuega 20:28) A te tiute o taina konei ko te fesoasoani atu ki tino o te Atua ko te mea “ke oko atu tatou katoa, ki te tasi o tatou i te ‵tou fakatuanaki mo te ‵tou poto e uiga ki te Tama a te Atua; ke fai foki tatou mo tino ko ma‵tua a mafaufau, ko te mea ke oko tatou ki te katoatoaga o te foitino kātoa o Keliso.” (Efeso 4:13) E tonu la, a tatou katoa ne tino sē ‵lei katoatoa. Kae e fakamanuiagina eiloa tatou māfai e talia mo te fiafia ne tatou a tausiga a‵lofa a latou.—Epelu 13:7, 17.
21. Kaia e tāua ‵ki ei ke faka‵logo tatou ki te Tama a te Atua?
21 Ko pili nei o taua atu a Iesu Keliso ki te fakanofonofoga o te lalolagi masei a Satani tenei. Kafai e tupu a te mea tenā, e faka‵na eiloa a ola o tatou ki lima o Iesu, me ko oti ne tuku atu ne te Atua te malosi ki a ia ke puipui te “vaitino tokouke” ke oko ki te “vai puna o te ola.” (Fakaasiga 7:9, 16, 17) Tela la, e ‵tau o fakaoti ‵tou mafi i te vaitaimi tenei ke fakaasi atu ei te ‵tou faka‵logo katoatoa mo te loto fakafetai ki te puipuiga a te Tupu a Ieova telā e takitaki ne te agaga.
Ne a Mea ne Tauloto ne Koe Mai i te . . .
[Ata i te itulau e 20]
Ne lavea faka‵lei atu a te alofa atafai o Iesu i te taimi ne fakatu mai ei ne ia a te tama fafine a Iailo
[Ata i te itulau e 21]
Ne fai ne Iesu Keliso a te ‵toe talaiga sili i tala fakasolopito katoa