Fesili Mai te Kau Fai‵tau

Kaia ne kaitaua ei a Mose ki tama tagata a Alona ko Eleasalo mo Itamala mai tua o te ‵matega o la taina ko Natapu mo Apiu, kae ne mafai pefea o taofiofi aka tena kaitaua?​​—Levitiko 10:​16-​20.

Mai tua malie eiloa o te fakasopoga o te faitaulaga mō te galuega i te faletapu, ne tamate ne Ieova a tama tagata a Alona ko Natapu mo Apiu me ne fakaopoopo atu foki ne lāua ne mu mea fakama‵nogi ki te afi i mua o te Atua. (Levitiko 10:​1, 2) Ne fakatonu ne Mose a tama tagata a Alona kolā koi ola ke mo a ma fanoa‵noa i lā taina kolā ko ‵mate. Kae mai tua ifo i ei, ne kamata o kaitaua a Mose ki a Eleasalo mo Itamala me ne seki kai ne latou te kouti telā e ‵tau o ofo atu mō agasala. (Levitiko 9:3) Kaia ne fai ei a Mose penei?

A tulafono kolā ne tuku atu ne Ieova ki a Mose ne fakaasi atu i ei me i faitaulaga kolā ne ofo atu ne latou a taulaga o se agasala e ‵tau o ‵kai ki se vaega o te manu tenā i te koga ateatea o te faleie. A te faiga penā ne fai ei ke tali atu ki agasala a tino kolā ne fai olotou taulaga. Kae kafai ne ave a nisi toto o te taulaga ki te Koga Tapu, te potu muamua o te faletapu, e se ‵tau o kai a te taulaga telā e ofo atu. Kae ne ‵tau eiloa o ‵sunu.​​—Levitiko 6:​24-​26, 30.

E foliga mai me mai tua o te fakalavelave i te aso tenā, ne lavea ne Mose a te tāua ke fakamautinoa aka me e ne tau‵tali eiloa ki tulafono katoa a Ieova. I te taimi ne iloa ei ne ia me ko oti ne ‵sunu a te kouti telā e ofo atu mō agasala, ne fai atu a ia mo te kaitaua ki a Eleasalo mo Itamala ki te pogai ne seki ‵kai ei lāua e ‵tusa mo te fakatonuga, me ne seki ofo atu a te toto ki mua o Ieova i te Koga Tapu.​​—Levitiko 10:​17, 18.

Ne tali ne Alona te fesili a Mose, me ne fai eiloa ne faitaulaga kolā koi ola a mea kolā ne talia ne ia ke fai ne latou. I te taimi ne fakasala ei a tama‵liki e tokolua konei, kāti ne mafaufau aka a Alona me e mafai o maua ne so se faitaulaga se loto lagona ‵lei ke kai ki te taulaga mō agasala telā e ofo atu i te aso tenā io me ikai. Kāti ne mafaufau tou tagata me i te ‵kai o latou ki ei e se fakafiafia atu ki a Ieova, faitalia me e se aofia ‵tonu latou i mea ‵se ne fai ne Natapu mo Apiu.​​—Levitiko 10:19.

Ne mafai o fakasakosako atu a Alona me i te taimi muamua ne fai ei ne ia mo tena kāiga a olotou tiute fakafaitaulaga, ne ‵tau o tausi faka‵lei atu latou ki ei ke fakafiafia atu ki te Atua ke oko foki loa ki mea fo‵liki. Kae ne fakamaseigina ne Natapu mo Apiu a te igoa o Ieova, kae ne kaitaua ei te Atua ki a lāua. Tela la, ne mafaufau a Alona me e se ‵tau o aofia a kāiga o faitaulaga kolā ne fai mea ‵se i te ofoatuga o taulaga tapu konā.

E foliga mai me ne talia ne Mose a te tali a tena taina, me e fai mai te fakaotiga o te fuaiupu: “Tenā ne malie ei a Mose, i te lagonaga ne ia a mea konei.” (Levitiko 10:20) E mautinoa eiloa me ne lotomalie foki a Ieova ki te tali a Alona.