Fesili Mai te Kau Fai‵tau

E tiga eiloa ne fakatapu ne Ieova a te ifo ki tupua, kaia seki fakasala ei ne ia a Alona mai i te faitega ne ia o se tamā pulumakau aulo?

I te taimi ne faite ei ne Alona te tamā pulumakau aulo, e pelā mo te mea ne tusi ki lalo i te Esoto mataupu  e 32, ne ofa ne ia a te tulafono a te Atua e uiga ki te ifo ki tupua. (Esoto 20:3-5) A te ikuga, a “te Aliki [ko Ieova] ko oko foki eiloa i tena kaitaua ki a Alona; tena ne ‵talo foki a [Mose] mō Alona i te taimi foki tena.” (Teutelonome 9:19, 20) E mata, a te ‵talo a te tagata amiotonu tenei ko Mose e “lasi tona ‵mana” ki te mea ne tupu ki a Alona? (Iakopo 5:16) Ao. Ona ko te ‵talo fakamolemole tenā mo nisi pogai aka e lua, e foliga mai me ne tali atu a Ieova ki te ‵talo a Mose kae seki fakasala ne ia a Alona.

A te pogai e tasi ko mea kolā ne tusi ki lalo e uiga ki te fakamaoni o Alona. I te taimi ne fakatonu atu ei ki a Mose ke fano ki a Falao kae ke puke mai keatea a te kau Isalaelu mai i Aikupito, ne filifili ne Ieova a Alona ke olo fakatasi mo Mose kae ke sui ne lāua a ia. (Esoto 4:10-16) Ne faka‵logo a te tokolua tagata konei ke olo atu ki mua o te tupu o Aikupito fakafia taimi, kae kufaki ne lāua a te loto makeke o Falao. I te taimi koi ‵nofo ei i Aikupito, ne ati aka ne Alona a uiga konei ko te fakamaoni mo te tumau i te talitonu ki tena taviniga ki a Ieova.​—Esoto 4:21.

Ke mafaufau foki me se a te mea ne takitaki ne ia a Alona ke faite ne ia a te tamā pulumakau aulo. Ne nofo atu a Mose i te mauga o Sinai mō aso e 40. I te “iloaga ne tino i a Mose seki fanaifo eiloa mai i te mauga,” ne fakakolekole ne latou a Alona ke faite se tupua ma latou. Ne fakamaopoopo kae faite ne Alona se tamā pulumakau aulo. (Esoto 32:1-6) E tigā te feitu tenā, ne seki talia katoatoa ne Alona a te faiga o te tupua tenā. E foliga mai me ne fai fua ne ia ona ko fakamalosiga a tino ki a ia. Kae i te taimi ne fakasae aka ei ne Mose a te mataupu e uiga ki te ifo ki tupua mo te ikuga fakaoti, ne ‵mautakitaki katoa loa a tama a Levi​—e aofia i ei Alona—⁠i te feitu o Ieova. E tokotolu afe a tino kolā ne ifo ki tupua ne tamate.​—Esoto 32:25-29.

Fakamuli ifo ne fai atu a Mose ki tino, penei: “Ko oti ne fai ne koutou se agasala tafasili i te mataga.” (Esoto 32:30) Telā la, e sē ko Alona fua tokotasi ne sē ‵lei ana lagonaga ona ko te mea ‵se ne fai ne ia. Ne maua ne ia mo nisi tino a mea ‵lei mai te lasi o te loto fakamagalo o Ieova.

Mai tua o te fakalavelave tenā ki te tamā pulumakau aulo, ne fakatonu atu a Ieova ke fai a Alona mo faitaulaga sili. Ne fai atu a Ieova ki a Mose: “Fakapei Alona ki ona gatu fakafaitaulaga, ‵mili ki te sinu tapu, kae i te faiga tena, ko fakatapu ne koe a ia, ko te mea ke mafai ne ia o tavini mai ki a au i te tofi faitaulaga.” (Esoto 40:12, 13) Se mea tonu me ne fakamagalo eiloa ne Ieova a Alona ona ko ana vāivāiga. A ko te tonuga eiloa, a Alona se vaegā tino telā e tumau tenā loto talitonu ki te tapuakiga tonu, kae e sē se tino ifo ki tupua.