E Salasala ki Tali
“Toeitiiti ko tino katoa e isi ne olotou mau me ko oi a [Iesu]. Faitalia me e pefea ‵tou fakatuanaki io me ko ‵tou fakalotolotolua, e fesili ifo tatou katoa penei, ‘Ko oi la te tagata tenei?’”—TE TINO TUSITALA KO STAN GUTHRIE.
E FIA iloa ne tino a mea e uiga ki a Iesu. E lauiloa ‵ki a tusi e uiga ki a ia. A tamunei e uiga ki a ia ko oko eiloa i te lauiloa. Kae e ui i ei, e tokouke a tino koi isi eiloa ne olotou fesili e uiga ki a Iesu. E kese‵kese a manatu o tino me ko oi tonu eiloa a Iesu.
I nai tausaga ko ‵teka, ne ‵kami ne tino tusitala e tokolua a tino ke tali aka a te fesili “Ko oi a Iesu?” i te itaneti. E aofia i tali konā a mea kolā e ‵soko mai.
● “E manino ‵lei me i a ia se lapi (faiakoga) telā ne fai a tena olaga mo fakaakoakoga o te loto alofa.”
● “A ia se tagata e pelā mo te masani telā ne ola i se olaga fakaofoofogia.”
● “E seai ne fakamaoniga me i a Iesu ne ola.”
● “A Iesu ko te Tama a te Atua telā ne fanau, ne mate, kae ne toe fakatu aka mai te mate ke faka‵sao ei tatou mai ‵tou agasala. E ola a Ia i aso nei, kae ka toe vau a Ia ki te lalolagi.”
● “Au e talitonu i a Iesu Keliso ko te tama eiloa e tokotasi a te Atua, e katoatoa i te feitu faka-te-tagata mo te feitu faka-Atua i te taimi eiloa e tasi.”
● “A Iesu se tala ‵kai fua ki tamaliki kolā ko olo aka o ma‵tua.”
E manino ‵lei me i vaegā kilokiloga kese‵kese e uke penā e se mafai o ‵tonu katoa. E mata, e isi aka foki se koga e fakatuagagina telā e mafai o tuku mai i ei a tali ki ‵tou fesili e uiga ki a Iesu? E tali‵tonu a tino kolā ne tusi ne latou a te tusi tenei me i te Tusi Tapu ko te Muna a te Atua kae tenā fua te koga e maua ne tatou i ei a te katoatoaga o muna‵tonu e uiga ki a Iesu.a—2 Timoteo 3:16.
I te mataupu telā e ‵soko mai, ka mafau‵fau tatou ki tali a te Tusi Tapu ki nisi fesili lauiloa e uiga ki a Iesu. Ne fai mai tou tagata me i te auala ki te fakaolataga e matala eiloa ki “so se tino e fakatuanaki ki a ia.” (Ioane 3:16) E ‵kami ne matou a koe ke sukesuke ki tali kae fakaiku aka me e manako koe o tauloto ki mea e uke atu e uiga ki a Iesu mo te auala e fakatuanaki ei koe ki a ia.
[Fakamatalaga fakaopoopo]
a Mō fakamatalaga e uke atu, ke onoono ki te mataupu e 2, “Te Tusi Tapu—Se Tusi Mai te Atua,” i loto i te tusi ko te Ne a Mea e Akoako ‵Tonu Mai i te Tusi Tapu? telā ne ‵lomi ne Molimau a Ieova.