Se Fesili mō Iesu

E tokouke a tino kolā e ma‵taku ki te Atua e mafau‵fau me e ‵tau eiloa o aofia a lotu i mea fakapolitiki. E tali‵tonu latou me e tāua ‵ki te tusaga o lotu i te faka‵leiga o fakalavelave o tino. Kae ui i ei, e mafau‵fau a nisi tino ‵lotu me e ‵tau eiloa o ma‵vae a lotu mo mea fakapolitiki. Se a tou manatu totino ki te tulaga o lotu i mea fakapolitiki? E mata, e ‵tau o ga‵lue tasi a feitu ma‵losi e lua konā?

IESU KELISO ko “te ‵toe tino tāua eiloa i tala fakasolopito o tino i mea fakalotu.” Tela la, mafaufau me e mafai o fesili atu ne tatou ki a ia a te fesili tenei, E mata, e ‵tau o aofia a lotu i mea fakapolitiki? Ne a ana muna ka fai mai? A koi nofo a ia i te lalolagi, ne tali mai ne tou tagata a te fesili tenā e auala i ana pati mo ana faifaiga. E pelā me se fakaakoakoga, i tena Lāuga takutakua i luga i te Mauga, ne tuku atu ne Iesu a fakatakitakiga kolā e fesoasoani atu ki ana soko ke malamalama i mea kolā e ‵tau o aofia latou i ei i kogā koga kolā e ‵nofo latou i ei. Ke mafau‵fau aka tatou ki nisi manatu mai te lāuga takutakua tenā.

Ke Oko atu ki Ola o Nisi Tino

Ne fakamatala mai ne Iesu a faifaiga e ‵tau o fai ne ana soko ki te lalolagi. Ana muna: “A koutou ko te masima o te lalolagi; kae kafai ko galo te malosi o tena ‵kona, e mafai la pefea o toe ‵kona? Ko se toe aoga ei, na ko te ‵pei atu fua ki tua ke lakalaka ne tino. A koutou ko te mainaga o te lalolagi. . . . Ke penā foki o maina atu te otou mainaga ki tino, ko te mea ke mafai o matea ne latou otou galuega ‵lei kae ‵viki atu ei ki te otou Tamana telā i te lagi.” (Mataio 5:13-16) Kaia ne fakatusa ei ne Iesu ana soko ki te masima mo te mainaga?

E fakauiga a pati a Iesu me i ana soko e pelā mo te masima, e se ki se potukau foliki fua, kae mō tino katoa. E pelā latou me se mainaga, e se ki se aofaki foliki fua o tino, kae mō tino katoa kolā e fia lavea ‵lei ne latou a mea. Mai te fakaaogāga o pati fakatusa konā, ne fakaasi manino mai ei ne Iesu me e se manako a ia ke ‵nofo ma‵vae ana soko mai tino. Kaia?

Masaua a mea konei: E se mafai ne te masima o fakatumau a te ‵lei o te mea‵kai māfai e sē palu tasi a te masima mo se mea e fai ei te meakai. E se mafai o fakaseai a te pouliga o se potu māfai e ave kea‵tea te molī mai te potu tenā. Tela la, e faigofie ke malama‵lama tatou i te pogai ne seki fakatonu atu ei a Iesu ki ana soko ke ga‵sue ki se koga o te lalolagi telā e seai ne tino i ei ke fakatu aka se fenua o tino tali‵tonu i ei. Io me ne fakamalosi atu a ia ki ana soko ke ola fakaa‵tea mai tino o te lalolagi. I lō te fai penā, e ‵tau mo Kelisiano o fai mo fakamalosiga ki olaga o nisi tino, e pelā mo te masima e manakogina ke patele ki luga i te meakai mo te mainaga e manakogina ke fakaseai ki ei a te pouliga.

“E se ne Vaega o te Lalolagi”

Kae e tigā eiloa te feitu tenā, a fakatonuga a Iesu me e ‵tau o fesokotaki atu ana soko ki olotou tino ne fakasae aka i ei se fesili tāua ‵ki e uiga ki faifaiga a se Kelisiano ki mea fakapolitiki. Kaia la? Mai mua malie eiloa o tena mate, ne ‵talo atu a Iesu ki te Atua e sui ei ana soko. “Au e se fakatagi atu ki a koe, ke ave latou keatea mai te lalolagi, kae ke tausi ne koe latou ona ko te tino masei. A latou e se ne vaega o te lalolagi, e pelā eiloa mo au e sē se vaega o te lalolagi.” (Ioane 17:15, 16) Tela la, e mafai pefea o sē fai a Kelisiano mo fai ne vaega o te lalolagi kae e ‵nofo atu eiloa latou i loto i kogā koga kolā e ‵nofo latou i ei? Ko te mea ke iloa te ‵tali, ke mafau‵fau aka tatou ki fesili faopoopo e tolu konei:

• Ne kilo atu pefea a Iesu ki mea fakapolitiki?

• Ne a mea e ‵tau o fai ne Kelisiano i aso nei?

• E pokotia pefea a tino i akoakoga a Kelisiano?