Ne Kilo Atu Pefea a Iesu ki Mea Fakapolitiki?
E FAKAMATALA mai ne tino tusi Evagelia a nāi mea ne ‵tupu i te galuega talai a Iesu telā ne fepaki ei a ia mo mea fakapolitiki. Pelā me se fakaakoakoga, mai tua malie ifo o te papatisoga a Iesu kae ko nofo pelā ki se 30 tausaga tena matua, ne ofo atu ne te Tiapolo ki tou tagata a te tulaga ko te pule o te lalolagi. Fakamuli ifo i te faiga o tena galuega, ne ma‵nako se vaitino ke fai a ia mo fai te lotou tupu. Fakamuli ifo foki, ne taumafai a tino ke fai a ia mo fai se tino galue i mea fakapolitiki. Ne pefea la a faifaiga a Iesu? Ke mafau‵fau aka tatou ki mea ‵tupu konei.
Pule o te lalolagi. E fai mai a tusi Evagelia me ne ofo atu ne te Tiapolo ke pule a Iesu i luga i “malo katoa o te lalolagi.” Mafaufau ki te lasi o te ‵lei ne mafai o fai ne Iesu ki luga i tino kolā e tigāina moi fai ne maua ne ia a te malosi pule e pelā me se pule o te lalolagi! E se ‵teke eiloa se tino telā e talitonu ki te tāua o mea fakapolitiki kae manako tonu o faka‵lei a fakalavelave o tino māfai e ofo atu ki ei se tulaga pule ki te lalolagi. Kae ne seki talia ne Iesu.—Mataio 4:8-11.
Tupu. E tokouke a kautupu o Iesu ne ma‵nako malosi ki se tino pule ke faka‵lei aka olotou fakalavelave i mea tau tupe mo mea fakapolitiki. Ona ko te fia‵fia ki mea e mafai ne Iesu o fai, ne ma‵nako ei a tino ke kau atu a Iesu ki mea fakapolitiki. Ne a la ana mea ne fai? E fai mai a te tino tusi Evagelia ko Ioane: “I te iloaga ne Iesu me ka o‵mai latou o puke a ia mo fai te lotou tupu, ne fano tokotasi ei a ia ki te mauga.” (Ioane 6:10-15) E manino ‵lei me e se manako a Iesu o aofia i mea fakapolitiki.
Tino galue i mea fakapolitiki. Onoono la ki mea ne ‵tupu i se fia aso mai mua o te mate o Iesu. A soko o te kau Falesaio, kolā ne fia tutokotasi mai te Emupaea o Loma, ‵kau atu ki ei a te kau a Helota, sui o te potukau fakapolitiki kolā e fia‵fia ki te kau Loma, ne fai‵pati fakatasi mo Iesu. Ne faimālō ne latou tou tagata ke puke se tulaga fakapolitiki. Ne fesili atu latou me e mata, e ‵tau o ‵togi a lafoga o tino Iutaia ki te malo o Loma io me ikai.
Ne tusi mai ne Maleko te tali a Iesu: “‘Kaia e tofotofo ei ne koutou au? Aumai ki a au se tenali e tasi ke onoono aka au ki ei.’ Ne avatu ne latou ki ei se tenali. Fai atu ei a ia ki a latou: ‘I o oi te ata mo te igoa tenei?’ Ne fai atu latou: ‘I o Kaisala.’ Fai atu ei a Iesu: ‘Toe ‵togi atu a mea a Kaisala ki a Kaisala, a ko mea a te Atua ki te Atua.’” (Maleko 12:13-17) I te faipati ki te pogai o te tali a Iesu, e fai mai penei a te tusi ko te Church and State—The Story of Two Kingdoms: “Ne ita tou tagata ma fai pelā me se mesia fakapolitiki kae ne fakatu faka‵lei aka ne ia a te tuakoi i te va o mea a Kaisala mo mea a te Atua.”
A fakalavelave e pelā mo te oge meakai, faivalevale, mo te sē fai mea tonu ne seki fakauiga i ei me ko sē fia saga mai a Keliso ki logo‵maega o tino. A te tonuga loa, e fakaasi mai i te Tusi Tapu me ne otia malosi tena loto ona ko te tulaga fakaa‵lofa o tino i ana tafa. (Maleko 6:33, 34) E tigā eiloa e otia te loto o Iesu, ne gasuesue eiloa a ia o fakaseai atu a te sē fai mea tonu i te lalolagi, faitalia me taumafai malosi a nisi tino ke aofia a ia i kinauga o te aso.
E manino ‵lei, me e fakaasi mai i fakaakoakoga konei, me ne ita a Iesu ma aofia i mea fakapolitiki. Kae e pefea a Kelisiano i aso nei? Ne a mea e ‵tau o fai ne latou?