Ne a Mea e ‵Tau o Fai ne Kelisiano i Aso Nei?

ESE ‵kau a Kelisiano ‵tonu i aso nei ki mea fakapolitiki. Kaia? Me i a latou e tau‵tali i te fakaakoakoga a Iesu. E penei ana muna e uiga ki a ia: “Au e sē se vaega o te lalolagi.” E uiga ki ana soko, ne fai mai tou tagata: “Koutou e se ne vaega o te lalolagi.” (Ioane 15:19; 17:14) Ke mafau‵fau ki nisi pogai e se ‵tau ei o aofia a Kelisiano i mea fakapolitiki.

1. E fakatapulāgina a te mea e mafai o fai ne te tagata. E fai mai te Tusi Tapu me e se mafai io me seai se saolotoga o tino ke pule atu ki luga i a latou eiloa. Ne tusi mai te pelofeta ko Ielemia: “E se pule te tagata telā e sasāle i te fakatonutonuga o te ala e fanatu ei a ia.”​—Ielemia 10:23, NW.

E pelā mo tino, ne seki faite ke eva mo te manuia i olotou malosi eiloa, ne seki faite foki latou ke pule atu mo te manuia ki luga i a latou eiloa. I te fai‵pati e uiga ki tapulā o te malo, ne tusi mai te tino tusitala ko David Fromkin: “A malo e faite ki tino; tela la, a latou e se ‵lei kātoatoa kae ko olotou fakamoemoega mō aso mai mua e se mautinoa. E fakaaogā ne latou se malosi pule, kae e se tumau.” (The Question of Government) E se tioa eiloa o fakailoa mai te Tusi Tapu ki a tatou ke sē fakalago‵lago atu tatou ki tino!​—Salamo 146:3.

2. E fakama‵losi mai agaga ma‵sei i aso nei. I te taimi ne ofo atu ei ne Satani a te pulega o te lalolagi ki a Iesu, ne seki fakafiti ne Iesu me nofo mo te Tiapolo a te malosi ke ofo atu ki a ia a malo katoa o te lalolagi. A te tonuga loa, ne taku ne Iesu a Satani ko “te pule o te lalolagi nei” i se taimi fakamuli ifo. I se fia tausaga mai tua ifo i ei ne fakamatala mai ne te apositolo ko Paulo a Satani e pelā me ko “te atua o te olaga masani tenei.” (Ioane 14:30; 2 Kolinito 4:4) Ne tusi atu a Paulo ki taina Kelisiano: “E taua eiloa tatou . . . mo takitaki o te lalolagi pouliuli tenei, mo agaga ma‵sei i te lagi.” (Efeso 6:12) A agaga ma‵sei ko pule tonu o te lalolagi tenei kae sē iloa ne tino. E fakamalosi mai pefea a te manatu tonu tenā ki ‵tou kilokiloga ki mea fakapolitiki?

Mafaufau ki te faka‵tusaga tenei: E pelā mo tamā pōti kolā e ‵miti ne te malosi o au o te tai, e ‵futi foki ne te malosi o agaga ma‵sei a fakanofonofoga fakapolitiki a tāgata. Kae pelā mo te foliki o te mea e mafai ne kauvaka i luga i pōti konā o ‵fuli a te malosi o au konā, e foliki foki a te mea e fai ne te kau politiki ke ‵fuli aka a te malosi o fakamalosiga a agaga ma‵sei konā. E taumafai eiloa a malosi konā o fakamasei kātoatoa a tino kae fai ei ke “malaia . . . te lalolagi.” (Fakaasiga 12:12) Tela la, a te ‵fuliga tonu e mafai fua o fai ne se tino telā e malosi atu i a Satani mo ana temoni. A te Tino tenā ko Ieova te Atua.​—Salamo 83:18, NW; Ielemia 10:7, 10.

3. A Kelisiano ‵tonu e ‵lago atu fua ki te Malo o te Atua. Ne iloa ne Iesu mo ana soko me isi se taimi, ka fakatu aka ei ne te Atua se malo i te lagi ke pule mai ki te lalolagi kātoa. E taku ne te Tusi Tapu a te malo tenei ko te Malo o te Atua kae fakaasi mai i ei me i a Iesu Keliso ko oti ne filifili ke fai mo Tupu i ei. (Fakaasiga 11:15) Ona la ko te Malo tenā e pokotia i ei a tino katoa, ne fai ne Iesu a “te tala ‵lei o te Malo o te Atua” mo fai te mataupu fakavae o ana akoakoga. (Luka 4:43) Ne akoako foki ne ia ana soko ke ‵talo penei: “Ke oko mai tou Malo.” Kaia? Me mai lalo i te Malo tenā, ka fai ei a te loto o te Atua i te lagi mo te lalolagi.​—Mataio 6:9, 10.

Kae se a la te mea ka tupu ki malo o tāgata? E tali mai te Tusi Tapu me i malo “o te lalolagi nofoaki kātoa” ka fakaseai. (Fakaasiga 16:14; 19:19-21) Kafai e talitonu fakamaoni se tino me ko pili o tapale ne te Malo o te Atua a fakanofonofoga fakapolitiki katoa a tāgata, ka sē ‵lago atu eiloa a ia ki fakanofonofoga fakapolitiki konā. I te fakaotiga loa, kafai e taumafai tou tagata o ‵lago atu ki malo o tāgata, ka ‵teke tonu atu eiloa a ia ki te Atua.

E tigā eiloa e se ‵kau a Kelisiano ‵tonu ki mea fakapolitiki, e mata, e fakauiga i ei me e se fia‵fia latou o taumafai ke tai faka‵lei aka a kogā koga kolā e ola latou i ei? Mafaufau ki tali kolā e tuku mai i te suā mataupu.

[Ata i te itulau e 6]

E fakalave‵lave faeloa a Molimau a Ieova i te ‵lago atu ki te Malo o te Atua, kae sē ki ‵fuliga fakapolitiki