Se Tino Talitonu Loto Fakamaoni Kae Se Tino Fakatuagagina o te Fenua—Te Auala e Mafai ei o Fai Penā

NE A feitu tāua e lua o te galuega talai a Iesu? A te mea muamua, ne taumafai a Iesu ke ‵fuli a loto o tino taki tokotasi, kae e se ko fakapotopotoga fakapolitiki. Pelā me se fakaakoakoga, onoono la me se a te mea telā ne faka‵mafa mai ne Iesu i tena Lāuga i luga i te Mauga. Mai mua malie o tena faipatiga e uiga ki te manakoga ke fai pelā me se masima mo te mainaga, ne fai atu tou tagata ki ana tino fakalogo‵logo me i te fiafia tonu e maua ne latou kolā e “iloa ‵lei ne latou olotou manakoga faka-te-agaga.” Ne toe fai mai a ia: “E fia‵fia a latou kolā e agamalu, . . . e loto ‵ma, . . . e uiga filemu.” (Mataio 5:1-11) Ne fesoasoani atu a Iesu ki ana soko ke lavea ne latou a te tāua ke fakatonutonu olotou mafaufauga mo lagonaga ki tulaga o te Atua ki te mea ‵lei mo te mea masei mo te tāua ke tavini atu ki te Atua mo te loto kātoa.

A te lua o mea, i te taimi ne lavea ei ne Iesu a te logo‵mae o tino, ne fakaosofia tou tagata ne tena alofa ki ana tino ke fakafeoloolo aka olotou loto māfatia. Kae ui i ei, e seki ai sena fakamoemoega ke fakaseai atu a logo‵maega katoa. (Mataio 20:30-34) Ne faka‵lei ne ia a tino ma‵saki, kae e seki fakaseai atu a masaki. (Luka 6:17-19) Ne aumai ne ia a te fakatapūga ki luga i tino kolā e pule fakasauāgina, kae ko te sē fai meatonu e tumau eiloa i te faka‵mae mai. Ne aumai ne ia mea‵kai mō tino fia‵kai, kae tumau eiloa te pokotia o tino i ogegā meakai.​—Maleko 6:41-44.

Te ‵Fuliga o Loto mo te Fakafeoloologa o Logo‵maega

Kaia ne saga tonu atu ei a Iesu ki te ‵fuliga o loto mo te fakafeoloologa o logo‵maega kae e se ki te ‵fuliga o fakapotopotoga io me ko te fakaseaiga o te loto mafatia? Ne iloa ne Iesu me ko oti ne fuafua ne te Atua ke fakaaoga Tena Malo i se taimi mai mua ke fakagata aka a malo katoa o tāgata kae ‵solo kea‵tea a māfuaga o logo‵maega katoa. (Luka 4:43; 8:1) Tela la, i te taimi e tasi ne fakamalosi atu ei a te kau soko ki a Iesu ke tai fakauke atu a taimi e fakamāumāu i te faka‵leiga o masaki, ne fai atu a Iesu ki a latou: “Tatou ka olo ki se isi koga, ki fa‵kai kolā e ‵pili mai, ko te mea ke talai foki au i ei, me e tenā te pogai ne uga mai ei au.” (Maleko 1:32-38) Ne fakafeoloolo ne Iesu a logo‵maega o tino e tokouke, kae ko te mea telā ne tāua malosi atu ki a ia ko te talaiga mo te akoakoga o te muna a te Atua.

I te lotou galuega talai i aso nei, e taumafai eiloa a Molimau a Ieova o fakaakoako ki a Iesu. Ne fakamalosigina latou ke fakafeoloolo aka a logo‵maega mai te tuku atu o fesoasoani aoga ki tino taki tokotasi kolā e ma‵nako ki ei. Kae e se taumafai a Molimau o fakaseai a te sē fai meatonu o te lalolagi. E tali‵tonu latou me ka ‵solo kea‵tea ne te Malo o te Atua a māfuaga o logo‵maega katoa. (Mataio 6:10) E pelā mo Iesu, e taumafai eiloa latou o ‵fuli a loto o tino kae e se ko fakapotopotoga fakapolitiki. E tonu eiloa te faifaiga tenā me i fakalavelave tonu o te tagata, e se ko mea fakapolitiki, kae ko amioga.

Ne Tino Fakatuagagina o te Fenua

I te taimi foki tenā, e tali‵tonu a Molimau a Ieova me se tiute faka-Kelisiano o latou ke fai pelā me ne tino ‵lei o te fenua. Tela la, e āva kae fakaaloalo latou ki pulega a te malo. E auala i olotou tusi mo te lotou galuega talai, e fakama‵losi atu latou ki olotou tuakoi ke faka‵logo ki te tulafono. Kae tigā te feitu tenā, kāfai e fepaki tonu a te manakoga o te malo mo fakatonuga a te Atua, a Molimau a Ieova e “faka‵logo ki te Atua e pelā me ko te pule i lō tāgata.”​—Galuega 5:29; Loma 13:1-7.

E āsi atu Molimau a Ieova ki tino katoa i koga kolā e ‵nofo latou i ei kae ofo atu akoga faka-te-Tusi Tapu sē ‵togi. Kae ko te ikuga o te akoakoga tenei, e lau i miliona a tino ko oti ne ‵fuli olotou loto. I tausaga takitasi, e fia selau afe o tino ko oti ne fesoasoani ki ei ke mafai o manumalo i vaegā faifaiga matagā e pelā mo te ‵pusi, konā, te fakaaogā ‵se o vailakau tapu, kemupolo, mo te ‵moe fakatauavaga faivalevale. Ko fai latou mo tino fakatuagagina kae amio ‵lei o te fenua me ne tauloto ne latou a fakatakitakiga i te Tusi Tapu kae fakagalue i olotou olaga.

I tafa i ei, e fesoasoani atu a akoga faka-te-Tusi Tapu ki tino i kāiga ke āva malosi te suā tino ki te suā tino kae tai faka‵lei aka a fesokotakiga i va o taki tauavaga e pelā foki a mātua mo tama‵liki mo vasia o tama‵liki i a latou eiloa. E fakamalosi aka ne te fesokotakiga tenei a te sokoga i va o tino katoa i loto i te kāiga. Ko te ma‵losi o kāiga, ko te ma‵losi foki o fenua.

I te otiga ne toe onoono ki manatu kolā ne mafau‵fau ki ei i mataupu konei, se a tau faka‵tau: E mata, e talia ne te Tusi Tapu a tino kolā e palu tasi ne latou a lotu mo mea fakapolitiki? E manino ‵lei a te tali; e se talia. Kae mata, e ‵tau o fai a Kelisiano ‵tonu mo fai ne tino fakatuagagina o te fenua? Ao, e ‵tau. E mafai pefea ne latou o fai penā? Mai i te tautali i te fakatonuga a Iesu ke fai pelā me se masima mo se mainaga ki te lalolagi.

A latou kolā e fakagalue aka a fakatakitakiga aoga konei a Keliso ka maua eiloa ne latou mo olotou kāiga a mea aoga​—e pelā foki mo tino i koga kolā e ‵nofo latou i ei. Ka fia‵fia eiloa a Molimau a Ieova i te koga tenā ke sau‵tala fakatasi mo koe e uiga ki te polokalame o akoga faka-te-Tusi Tapu telā e fai nei i tou fenua.a

[Fakamatalaga fakaopoopo]

[Ata i te itulau e 7]

Ne taumafai a Iesu o ‵fuli a loto o tino, kae e se ko fakapotopotoga fakapolitiki

[Ata i te itulau e 8]

E tali‵tonu a Molimau a Ieova me i o latou a te tiute ke fai pelā me ne tino ‵lei o te fenua