E Aoga I Aso Nei
“A tau muna se moli e takitaki ne ia au, se mainaga foki ki toku auala.”—SALAMO 119:105.
E ‵KESE PEFEA TE TUSI TAPU? Kāti e mafai o ‵kilo atu ki nisi tusi e pelā me e ‵lei, kae e seai ne fakatakitakiga e uiga ki te olaga e tuku mai i ei. Kae ko tusi fakatonutonu i aso nei e manakogina ke fakatonutonu faeloa. I te suā feitu, e fai mai te Tusi Tapu “me i mea katoa kolā ne tusi i te Tusi, ne tusi ke akoako ei tatou.”—Loma 15:4.
SE FAKAAKOAKOGA: E tigā eiloa e seki mafaufaugina ke tuku mai a fakatonuga fakatokitā, e maua i te Tusi Tapu a manatu aoga e uiga ki te mauaga o lagonaga ‵lei mo se foitino malosi. E pelā me se fakaakoakoga, e fai mai i ei me “kafai e tokagamalie tou mafaufau kae ka malosi foki tou foitino.” (Faataoto 14:30) E fakailoa mai foki i te Tusi Tapu: “A tino kolā e se ‵lei te lotou va mo nisi tino e ‵saga fua ki a latou eiloa; e se mafai o loto ki manatu o te tokoukega o tino.” (Faataoto 18:1) I te suā feitu, e fai mai foki i ei me “e sili atu te fiafia o te tino telā e tuku atu ana mea i lō te maua ne ia.”—Galuega 20:35.
IKUGA O SUKESUKEGA KOLĀ NE FAI: A te tokagamalie, te malosi o te va fakataugasoa, mo te kaimalie e mafai o tai fakamalosi aka ei a koe. E li‵poti mai The Journal of the American Medical Association: “A tāgata kolā e oso vave te kaitaūa o latou e vave maua ne te masaki fakamataku ko te ‵mate o te foitino i lō tāgata kolā e taofiofi te lotou kaitaua.” I se sukesukega ne fai i Ausetalia telā e nofo ki te sefulu tausaga te leva, ne maua aka i ei me i tino ma‵tua kolā e “‵lei olotou fesokotakiga mo taugasoa i te itaneti mo tino kolā e mafai o sau‵tala mo latou ki mea totino” e ola leva atu. Kae i te 2008, ne tauloto ne tino sukesuke ki mea mai Kanata mo te Iunaite Sitete me i te “fakamāumāuga o tupe ki nisi tino e maua i ei te fiafia i lō te fakamāumāu o tupe ki a koe eiloa.”
SE A TAU FAKA‵TAU? E mata, ka talitonu koe ki fakatakitakiga i mea fakatokitā mai i so se tusi telā ko oti ne tusi i tausaga ko tai kātoa te lua afe ko ‵teka? Io me e tu ‵kese eiloa te Tusi Tapu?
[Ata i te itulau e 8]
“E gali ‵ki ki a au a te Tusi Tapu . . . me maua i ei a vaegā fakamatalaga tafasili i te ‵lei i mea fakatokitā.”—HOWARD KELLY, M.D., SE SUI GALUE E TOKOTASI O TE JOHNS HOPKINS UNIVERSITY SCHOOL OF MEDICINE