Fakalavelave Kolā ne Fa‵ki i ei a Fāfine
“I te laveaga ne au a faifaiga ne fai ki fāfine, ne sē manako lele eiloa au ke tupu aka e pelā me se fafine.”—ZAHRA, ko 15 TAUSAGA TE MATUA, ne siki mai i te mekesini ko te GEO, i te lōmiga Falani.
I PATI a te tamaliki fafine kolā ne fakaasi mai i te feitu fakaatamai, e fakaasi mai i ei se mea tonu matagā—i te lalolagi kātoa, e pokotia a tamaliki fa‵fine mo fāfine i fakasauāga mo te fakakese‵kesega o tino i olotou olaga kātoa. Mafaufau ki mea ‵tonu konei.
● Te fakakese‵kesega o tino. I Asia, a te tokoukega o mātua e fia‵fia atu ki tamaliki tā‵gata i lō tamaliki fā‵fine. E galue aka ne te lipoti a te Malo ‵Soko i te 2011, me ko tai kātoa te 134 miliona o fāfine e ‵galo mai te aofaki o tino i te feitu tenā o te lalolagi e pelā me ko ikuga o te faka‵toga o pepe, ‵tamatega o tamaliki fo‵liki, mo tamaliki kolā e tuku tiaki.
● Akoakoga. E aofia a fāfine mo tamaliki fā‵fine i te lua-vae-tolu o tino kolā e seki a‵koga aka eiloa io me mu‵tana ifo i te fa tausaga ne a‵koga ei latou.
● E sonafai i faifaiga fakatauavaga. E silia atu i te 2.6 piliona o fāfine e ‵nofo atu i atufenua kolā e se mafau‵fau me i te pukemālō o te fafine ne tena avaga se agasala.
● Ola ‵lei. I atufenua kolā koi ati aka, e isi faeloa se fafine e mate i taki lua minute katoa i te taimi e faitama io me fanau i ei ona ko te sē lava o te fesoasoani o te fa‵kai masaki.
● Saolotoga ke maua se kope totino. E tigā eiloa e silia atu mo te āfa o fuaga o te lalolagi e ‵toki ne fāfine, i nisi atufenua, e seai se saolotoga o latou mai lalo i te tulafono ke maua se fale totino io me se laukele.
Kaia ne se maua ei ne fāfine a saolotoga fakavae kolā ne ‵tau o maua ne tino? E tau‵tali atu a nisi tu mo aganuu ki talitonuga mo faifaiga fakalotu kolā e ‵lago atu io me fakasako‵sako mai foki e uiga ki te fai masei o fāfine kae fakasauā atu ki a latou. Ne siki mai i te nusipepa Falani a pati a te lōia Initia ko Chandra Rami Chopra, penei: “E isi eiloa se mea telā e ‵pau ei a tulafono fakalotu katoa: E ‵lago atu latou ki te fakakese‵kesega o fāfine.”
E a, e kau koe ki te kilokiloga tenei? E mata, e mafaufau koe me e fakamalalo ne te Tusi Tapu a fāfine, e pelā mo te mea e fai ne nisi tusi fakalotu e uke? Ki nisi tino, e foliga mai me tenā te kilokiloga e tuku mai i nāi fuaiupu o te Tusi Tapu. Kae e pefea a te kilokiloga tonu a te Atua o te Tusi Tapu ki fāfine? E tigā eiloa e ma‵losi a lagonaga o tino e tokouke e uiga ki te mataupu tenei, a te iloilo faka‵lei mo te fakamaoni o pati i te Tusi Tapu ka fesoasoani mai ke maua ne tatou a te tali ki ei.
[Ata i te itulau e 3]
© G.M.B. Akash/Panos Pictures