E Maua te Ola i te Toetu O Iesu!

A TE toetu o Iesu e sē se mea fua ne tupu i aso taumua loa telā ko sē aoga malosi ki a tatou i aso nei. Ne fakaasi mai ne te apositolo ko Paulo a te tāua o te mea tenā i te taimi ne tusi mai ei tou tagata: “Ko oti ne toe fakatu aka a Keliso mai te mate, ko te fuataga muamua o latou kolā ko oti ne ‵moe i te mate. Me ona ko te mate ne oko mai e auala i se tagata e tokotasi, ne oko mai foki a te toetu e auala i se tagata e tokotasi. Me e pelā eiloa mo te ‵mate o tino katoa i a Atamu, e penā foki te ‵toe fakaola mai o tino katoa e auala i te Keliso.”​—1 Kolinito 15:20-22.

Ne toe fakatu aka a Iesu i a Nisani 16, 33 T.A., i te aso eiloa telā ne tuku atu ei ne tino Iutaia a fuataga muamua eiloa o te taukai muamua ki mua o Ieova te Atua i te faletapu i Ielusalema. Me ne taku ne ia a Iesu ki te fuataga muamua, ne fakauiga a Paulo me e isi aka foki ne tino taki tokotasi kolā ka toe faka‵tu aka mai te mate.

E fakamatala mai i nisi pati a Paulo a te mea telā ne fai ne te toetu o Iesu. “Ona ko te mate ne oko mai e auala i se tagata e tokotasi,” muna a Paulo, “ne oko mai foki a te toetu e auala i se tagata e tokotasi.” Ona ko te agasala mo te tulaga sē ‵lei katoatoa telā ne faka‵solo mai ne Atamu ki a tatou, e ‵mate katoa tatou. Kae mai i te tukumaiga o tena ola faka-te-foitino ‵lei katoatoa e pelā me se togiola, ne ‵tala mai i ei ne Iesu a te auala e fakasaoloto ei a tino mai te ‵nofo pologa ki te agasala mo te mate e auala i te toe‵tuga. Ne tusi atu a Paulo i te Loma 6:23: “Me i te ‵togi o te agasala ko te mate, a ko te meaalofa telā e tuku mai ne te Atua ko te ola se-gata-mai i a Keliso Iesu te ‵tou Aliki.”

Ne fakamatala mai eiloa ne Iesu a te aoga o tena mate mo tena toetu ki a tatou. Ana muna: “Te Tama a te tagata, e ‵tau o siki aka ki luga, ko te mea ke maua ne tino katoa kolā e tali‵tonu ki a ia a te ola se-gata-mai. Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.”​—Ioane 3:14-16.

Mafaufau ki te ola se-gata-mai e aunoa mo se ‵mae, logo‵maega, io me ko te fanoanoa! (Fakaasiga 21:3, 4) Mafāga o fakamoemoega fakafiafia loto! E fai mai penei se tino akoga e tokotasi: “E ui eiloa e fakamasaua mai ne tanuga a te toetoe o te ola, e fakatalitonu mai ne te toe‵tuga a te toetoe o te mate.” Ao, e maua eiloa te ola i te toetu o Iesu!