Te Toetuga​—Se Akoakoga Telā e Aofia Koe i Ei

“E pau faeloa omotou fakamoemoega ki te Atua . . . me i tino ‵lei mo tino se ‵lei, ka faka‵tu mai katoa mai te mate.”​—GALUEGA 24:15.

1. Ne fai pefea a te toetu mo fai se kinauga i mua o te Sanetulini?

I TE fakaotiga o tena malaga fakamisionale i te tolu i te 56 T.A., ne nofo atu ei te apositolo ko Paulo i Ielusalema. I tena otiga ne puke fakapagota ne te kau Loma, ne fakamasino ei a ia i mua o te fono maluga i Iutaia, ko te Sanetulini. (Galuega 22:​29, 30) I te laveaga ne Paulo a nisi tino i te fono, ne iloa ne ia me i nisi o latou ne Satukaio kae ko nisi ne Falesaio. Ne ‵kese ‵ki eiloa a talitonuga o potukau e lua konei i se mea tāua e tasi. Ne seki tali‵tonu a te kau Satukaio ki te toetuga; kae ne tali‵tonu a te kau Falesaio ki ei. Ko te mea ke fakaasi atu ne ia tena tulaga e uiga ki te mea tenā, ne fai atu ei a Paulo: “Oku taina! Au nei se Falesaio, ko te tama a te Falesaio. Ko fakamasinogina au ona ko au e taofi ki te toe‵tu o tino ‵mate!” Mai i ana pati konā, ne faka‵numi ne ia a tino i konā!​—Galuega 23:​6-9.

2. Kaia ne toka ei a Paulo o ‵pulu tena talitonuga e uiga ki te toetu?

² I te tausaga mai mua atu i ei, i tena auala ki Tamaseko, ne lavea ei ne Paulo se fakaasiga telā ne lagona ne ia i ei a te leo o Iesu. Ne fesili atu a Paulo ki a Iesu: “Te Aliki, se a te mea e ‵tau o fai ne au?” Ne tali atu a Iesu: “Tu ki luga o fano ki Tamaseko, ko te koga telā ka fakaasi atu a mea katoa e loto a te Atua ki ei, ke fai ne koe.” I tena okoatuga ki Tamaseko, ne fakafetaui atu ki a Paulo se soko Kelisiano, ko Anania telā ne fai atu ki ei: “Ko oti ne filifili koe ne te Atua o‵tou tupuga, ke iloa ne koe tena kanoloto, ke lavea foki ne koe tena Tavini amiotonu [ko Iesu telā ne toe fakatu aka mai te mate], ke lagona foki ne koe tena tinā leo e faipati.” (Galuega 22:​6-16) E se tioa eiloa o toka a Paulo o ‵pulu ne ia tena talitonuga e uiga ki te toetu.​—1 Petelu 3:15.

Te Folafolaatuga o te Fakamoemoega e Uiga ki te Toetu

3, 4. Ne fai pefea a Paulo e pelā me se tino ne ‵lago mālō atu ki te toetuga, kae se a te mea e tauloto ne tatou mai tena fakaakoakoga?

³ Ne toe tu atu a Paulo i mua o te Kovana o Loma ko Filiki. I te taimi tenā, ne ‵losi atu a te “loia” ko Tetulo, telā ko te sui o tino Iutaia, me i a Paulo ko te takitaki o se potukau ‵teke kae ko agasala a ia i te tulafono. I tena tali, ne fai ‵tonu atu a Paulo: “Kae e takutonu atu au ki a koe: au e tapuaki ki te Atua o omotou tupuna i toku tautali i te Ala Tonu telā e fai mai ei latou me ‵se.” Oti i ei, faipati atu ei e uiga ki te ‵toe kinauga tāua i ana pati: “E pau faeloa omotou fakamoemoega ki te Atua mo latou, me i tino ‵lei mo tino se ‵lei, ka faka‵tu mai katoa mai te mate.”​—Galuega 23:​23, 24; 24:​1-8, 14, 15.

⁴ I se lua tausaga mai tua ifo, ne ‵kami ne te sui o Filiki, ko Pokio Feso, a te tupu ko Helota Akelipa ke fakafesilisili aka ne laua a te pagota ko Paulo. Ne fakamatala atu a Feso me ne ‵losi atu a tino Iutaia e uiga ki te fakamatalaga a Paulo me i “te tagata ko mate e igoa ki a Iesu; . . . [e] ola nei.” I te fakafesagai atu ki te mea tenā, ne fesili atu a Paulo: “Ai a e faigata ei i a koutou Iutaia o tali‵tonu, i te Atua e fakatu ne ia a tino ‵mate?” Tenā ne fai atu ei a ia: “A te Atua ko oti ne fesoasoani mai ki a au, ke oko mai eiloa ki te aso nei; tenei ko tu atu ei au i konei o fai atu taku molimau ki a koutou katoa, ki tino ma‵lalo, pelā foki ki tino ma‵luga. Ko te mea tenei ne faipati atu ne au, ko te mea eiloa e tasi telā ne fai‵pati ki ei a pelofeta mo Mose, me ka oko mai: i te Keliso e ‵tau o puapuagatia, ka ko ia foki eiloa a te tino muamua ka tu ake mai te mate, o folafola atu a te mainaga o te fakaolataga ki tino Iutaia, pelā foki ki tino o fenua fakaatea.” (Galuega 24:27; 25:​13-​22; 26:​8, 22, 23) Ne ‵lago mālō atu eiloa a Paulo ki te akoakoga e uiga ki te toetu. E pelā mo Paulo, e mafai foki o folafola atu ne tatou mo te tali‵tonu katoatoa me e isi eiloa se toetuga. Kae ne a mea e ‵tau o fakamoemoe tatou me ka fai mai ne tino e uiga ki ei? Kāti ka pelā eiloa mo mea ne fe‵paki mo Paulo.

5, 6. (a) Ne a kilokiloga ne ‵sae aka ona ko te ‵lago mālō o te kau apositolo ki te akoakoga ko te toetu? (e) Se a te mea tāua māfai ko fakaasi atu ne tatou te ‵tou fakamoemoega e uiga ki te toetuga?

⁵ Ke mafaufau ki mea ne ‵tupu mai mua malie o te lua o malaga fakamisionale a Paulo (kāti i te 49-52 T.A.) i te taimi ne āsi atu ei a ia ki Atenai. Ne fakasako‵sako latou mo tino kolā ne tali‵tonu ki atua e tokouke, kae fakamalosi atu ki a latou ke mafaufau ‵mafa e uiga ki te fuafuaga a te Atua ke fakamasino ne ia te lalolagi nofoaki kātoa e auala i te tino telā ko oti ne filifili ne Ia. A te tino tenei ko Iesu eiloa. Ne fakamatala atu a Paulo me ko oti ne fakamautinoa aka ne te Atua a te tonu o te mea tenei i te fakatuakaga ne ia o Iesu. Ne ‵kilo atu pefea a tino i konā ki ei? E fai‵tau tatou penei: “I te lagonaga ne latou a Paulo e faipati ki te toetu mai te mate, e isi ne tino ne fakatauemu ki a ia, ka ko nisi tino ne fai ake penei, ‘A matou e fia faka‵logo ke toe faipati mai koe ki te mataupu tenei.’ ”​—Galuega 17:​29-32.

⁶ Ne tai ‵pau eiloa a faifaiga a tino konā mo mea kolā ne fai ki a Petelu mo Ioane mai tua malie o te Penitekoso i te 33 T.A. Ne aofia malosi foki a te kau Satukaio i te kinauga tenei. E fakamatala mai i te Galuega 4:​1-4 a te mea ne tupu: “Ka koi fai‵pati atu eiloa Petelu mo Ioane ki tino, ne oko mai ki a laua a faitaulaga, te pule o te kau leoleo o te Fale Tapu, mo Satukaio. Ko oko eiloa i te ita ki te tokolua apositolo konei, i te akoako atu ne laua ki tino i a Iesu ko toetu mai te mate, ko te fakamaoniga tenā i tino ‵mate ka toe ola mai.” Kae ne fia‵fia eiloa a nisi tino ki ei. “Ne tali‵tonu a te tokoukega o latou kolā ne fakalogo‵logo ki te lā talaiga; kae kati ko tai katoa te lima afe o latou.” E manino ‵lei me e ‵tau o fakamoe‵moe tatou ke maua a kilokiloga kese‵kese mai tino māfai e fai‵pati atu tatou e uiga ki te toetuga. Ona ko te mea tenā, se mea tāua ‵ki ke fakamalosi aka te ‵tou fakatuanaki e uiga ki te akoakoga tenā.

Te Fakatuanaki mo te Toetuga

7, 8. (a) E pelā mo tena tusi ki Kelisiano i Kolinito i te senitenali muamua, e mafai pefea o se aogā a te ‵tou fakatuanaki? (e) E ‵vae keatea pefea a Kelisiano ‵tonu ne te malamalama tonu e uiga ki te fakamoemoega ko te toetuga?

⁷ Ne seki faigofie ki tino katoa kolā ne fai mo fai ne Kelisiano i te senitenali muamua T.A., ke talia ne latou te akoakoga e uiga ki te toetu. Ne ‵nofo atu a tino kolā ne fui tali‵tonu ki te akoakoga tenā i te fakapotopotoga i Kolinito. Ne tusi atu a Paulo ki a latou: “Ko tuku atu ne au ki a koutou a te mea e tafa sili i te tāua ne maua ne au, i a Keliso ne mate mo o‵tou agasala, e pelā eiloa mo muna a te Tusi. Ne tanu kae ne toetu mai te mate i te tolu o aso, e pelā eiloa mo muna a te Tusi.” Ne fakamaoni atu ei ne Paulo a te ‵tonu o te mea tenei mai te fai atu me i a Iesu telā ne toetu aka mai te mate ne “fakaasi atu foki ki nisi taina e silia atu i te limaselau,” kae ko te tokoukega o latou konā koi ola eiloa. (1 Kolinito 15:​3-8) Ne toe fai mai a ia: “Kafai ne folafolagina Keliso me ne toetu mai tino ‵mate, e pefea la o fai mai a nisi o koutou me seai se toetu o tino ‵mate? Kafai e seai se toetu o tino ‵mate, ko tena uiga e seki toetu a Keliso. Kafai foki e seki toetu eiloa a Keliso, ko tena uiga ko seai se tala ‵lei e folafola atu ne matou, ko seai foki se tala ‵lei e tali‵tonu koutou ki ei.”​—1 Kolinito 15:​12-14.

⁸ Ao, ne malosi ‵ki eiloa a te fakavae o te akoakoga e uiga ki te toetuga, tela la, ka seai lele eiloa se aogā o te talitonuga faka-Kelisiano māfai e se talia ne tino a te ‵tonu o te akoakoga e uiga ki te toetuga. E tonu, e ‵vae keatea a Kelisiano ‵tonu ne te akoakoga e uiga ki te toetuga mai lotu Kelisiano ‵se. (Kenese 3:4; Esekielu 18:4) Tena la, ne aofia eiloa ne Paulo a te akoakoga e uiga ki te toetuga i “akoakoga tāua” o te lotu Kelisiano. Ke na fakaiku aka ne tatou ke “olo ki mua” i te puke ‵mautakitaki ki akoakoga konā. Kae tenā loa “te mea e ‵tau mo tatou o fai,” ko te fakamalosiga a Paulo, “manafai e loto ki ei te Atua.”​—Epelu 6:​1-3.

Te Fakamoemoega ko te Toetuga

9, 10. Se a te mea e fakauiga ki ei te Tusi Tapu māfai e faipati e uiga ki te toetuga?

⁹ Ke sinā fakamalosi aka te ‵tou fakatuanaki ki te toetuga, ke na onoono nei tatou ki fesili konei: Se a te mea e fakauiga ki ei te Tusi Tapu māfai e faipati ki te toetuga? E fakamaluga aka pefea ne te akoakoga e uiga ki te toetuga a te alofa o Ieova? E fai ne tali ki fesili konei ke na fakapili‵pili atu ei tatou ki te Atua kae e fesoasoani mai foki i te akoakoatuga o nisi tino.​—2 Timoteo 2:2; Iakopo 4:8.

¹⁰ A te “toetuga” ko te ‵fuliga mai te pati Eleni telā e fakauiga ki te “‵toe tu aka ki luga.” Ne a mea e aofia i te tugāpati tenā? E ‵tusa mo te Tusi Tapu, a te fakamoemoega ki te toetu ko te talitonu katoatoa me ka toe ola mai se tino mate. E fakaasi mai foki i te Tusi Tapu me ka toe fakaola mai te tino i te feitu faka-te-foitino io me i te feitu faka-te-agaga, e ‵tusa loa mo tena fakamoemoega ke ola i te lalolagi io me i te lagi. E ofo tatou i te alofa, te poto mo te malosi o Ieova telā e fakaasi mai i te fakamoemoega gali e uiga ki te toetu.

11. Se a te fakamoemoega e uiga ki te toetu e maua ne tavini fakaekegina a te Atua?

¹¹ A te toetuakega o Iesu mo ana taina fakaekegina e tuku atu ei ki a latou se foitino faka-te-agaga ke fetaui mo galuega kolā e fai i te lagi. (1 Kolinito 15:​35-​38, 42-​53) Ka tavini fakatasi latou e pelā me ne pule i te Malo faka-Mesia, telā ka aumai i ei a fakanofonofoga faka-Palataiso ki te lalolagi. E fai a tino fakaekegina e pelā me se potukau o faitaulaga mai lalo i te pulega a Iesu telā ko te Faitaulaga Sili. Ka fakaaogā i ei ne latou a te aogā o te taulaga togiola a Keliso ki te lalolagi fou o tino amio‵tonu. (Epelu 7:​25, 26; 9:​24; 1 Petelu 2:9; Fakaasiga 22:​1, 2) I te vaitaimi nei, koi ma‵nako eiloa a tino fakaekegina kolā koi ola i te lalolagi nei, ke maua ne latou te taliaga a te Atua. Kafai ko ‵mate latou, ka maua ei ne latou te lotou “taui” e auala i te toetuga ki te ola faka-te-agaga telā e se toe maua i ei te mate i te lagi. (2 Kolinito 5:​1-3, 6-8, 10; 1 Kolinito 15:​51, 52; Fakaasiga 14:13) “I te mea, kafai ko tasi tatou mo ia i te mate, e pelā mo tona mate,” ko pati a Paulo, “ka tasi foki tatou mo ia i te toetu e pelā mo tena toetu.” (Loma 6:5) Kae pefea la a tino kolā ka toe‵tu mai ki te lalolagi nei? E fakapilipili atu pefea ne te fakamoemoega o te toetu a latou ki te Atua? E uke a mea ka tauloto ne tatou mai te fakaakoakoga a Apelaamo.

Te Toetu mo te vā Fakataugasoa mo Ieova

12, 13. Ne fakavae mai i fea a te malosi o te fakatuanaki o Apelaamo e uiga ki te toetu?

¹² A Apelaamo telā ne taku pelā me se ‘taugasoa o Ieova,’ se tagata ne lasi tena fakatuanaki. (Iakopo 2:23) Ne fakasino fakatolu atu a Paulo ki te fakatuanaki o Apelaamo i tena fakasologa o tāgata mo fāfine fakamaoni i te mataupu e 11 o Epelu. (Epelu 11:​8, 9, 17) Ne fakasino atu a ia i te tolu o taimi ki te fakatuanaki ne fakaasi mai ne Apelaamo i te taimi ne fakalogo ei a ia ki te fakatonuga ke ofo atu a tena tama ko Isaako e pelā me se taulaga. Ne talitonu a Apelaamo me i te folafolaga e uiga ki se fanau e auala i a Isaako ko oti ne fakamautinoa aka ne Ieova. Faitalia me e mate a Isaako e pelā me se taulaga, ne “manatu a Apelaamo me mafai ne te Atua o fakatu ake a Isaako mai te mate.”

¹³ E pelā eiloa mo mea ne ‵tupu, i te laveaga ne Ieova te malosi o te fakatuanaki o Apelaamo, ne fakatoka ei ne ia se manu ke sui ei te taulaga tenā. Kae ne fai eiloa te mea telā ne tupu ki a Isaako e pelā me se fakatusa o te toetu, e pelā mo te fakamatalaga a Paulo: “Ne toe maua ei ne ia [Apelaamo] a ia [Isaako] i se auala fakatusa.” (Epelu 11:19 Tusi Paia, Samoa) E se gata fua i ei, ko leva eiloa ne talitonu katoatoa a Apelaamo ki te talitonuga e uiga ki te toetu. E mata, ne seki mafai ne Ieova o toe fai a Sala ke faitama i a Apelaamo i te taimi ko ma‵tua ei laua, kae fanau mai i ei te lā tama ko Isaako?​—Kenese 18:​10-14; 21:​1-3; Loma 4:​19-​21.

14. (a) E ‵tusa mo te Epelu 11:​9, 10, se a te mea ne fakatalitali ki ei a Apelaamo? (e) Ko te mea ke maua ne ia a fakamanuiaga o te Malo i te lalolagi fou, se a te mea e ‵tau o tupu ki a Apelaamo i aso mai mua nei? (i) E mafai pefea o maua ne tatou a fakamanuiaga o te Malo?

¹⁴ Ne taku ne Paulo a Apelaamo e pelā me se tino fakaalofa kae maumausolo telā ne ‘fakatalitali ki te fa‵kai telā e malosi tena fakavae kae telā ne faite ne te Atua.’ (Epelu 11:​9, 10) A te fa‵kai tenei e se se fa‵kai tonu e pelā mo Ielusalema, ko te koga telā ne tu i ei te faletapu o te Atua. A te fa‵kai tenei se fa‵kai fakatusa. A te fa‵kai ko te Malo faka-te-lagi o te Atua telā e aofia i ei a Keliso Iesu mo ana pule lagolago e toko 144,000. A te toko 144,000 i te lagi e fai foki mo fai te “Fa‵kai Tapu ko Ielusalema fou,” ko te “tamafine io me ko te avaga” a Keliso. (Fakaasiga 21:2) I te 1914, ne fakasopo ne Ieova a Iesu mo fai te tupu faka-Mesia i tena Malo i te lagi kae fakatonu atu ki a ia ke kamata tena pule i vā o ana fili. (Salamo 110:​1, 2; Fakaasiga 11:15) Ko te mea ke maua a fakamanuiaga mai te Malo tenā, e ‵tau o toe ola mai a Apelaamo ‘te taugasoa o Ieova.’ E penā foki tatou, kafai e ma‵nako tatou ki fakamanuiaga mai te Malo, e ‵tau o ola tatou i te lalolagi fou a te Atua, e pelā me ne vaega o te vaitino tokouke kolā e ‵sao atu i Amaketo io me ko tino kolā ka toe faka‵tu aka mai te mate. (Fakaasiga 7:​9, 14) Se a la te fakavae o te fakamoemoega e uiga ki te toetu?

Te Alofa o te Atua​—ko te Fakavae o te Fakamoemoega e Uiga ki te Toetu

15, 16. (a) E fakaasi mai pefea i te valoaga muamua i te Tusi Tapu a te fakavae mō te fakamoemoega e uiga ki te toetu? (e) E fai pefea ne te talitonuga e uiga ki te toetu ke fakapili‵pili atu tatou ki a Ieova?

¹⁵ A te ‵tou vā fealofani ‵pili mo te ‵tou Tamana i te lagi, te ‵tou fakatuanaki e pelā mo Apelaamo, mo te ‵tou faka‵logo ki fakatonuga a te Atua e fai i ei ke takuamiotonugina tatou kae ke kilo mai a Ieova ki a tatou e pelā me ko ana taugasoa. Ko maua ei ne tatou se avanoaga ke maua ne tatou a mea aogā mai te pulega o te Malo. E tonu, ko te valoaga muamua eiloa i te Muna a te Atua, i te Kenese 3:​15, ne tuku mai i ei te fakavae mō te fakamoemoega e uiga ki te toetuga mo te mauaga o se vā fakataugasoa mo te Atua. E se ‵valo mai fua i ei te ‵tuki palaga o te ulu o Satani, kae ko te fakapakiaga foki o te mulivae o te Fanau a te fafine a te Atua. A te mate o Iesu i te sataulo e fai i ei pelā me ko pakia tena mulivae i se auala fakatusa. Ne faka‵lei aka te pakiaga tenā i te tolu o aso e auala i tena fakatuakaga, kae ne ‵tala mai i ei te auala ke gasuesue a ia o fai se faiga mautinoa e uiga ki “te Tiapolo, telā e isi sena pule i te mate.”​—Epelu 2:14.

¹⁶ E fakamasaua mai a Paulo me i “te Atua ne fakaasi mai ne ia ki a tatou a tona alofa, i te taimi koi fai ei tatou mo tino agasala; me ne mate a Iesu mō tatou.” (Loma 5:8) A te loto fakafetai e uiga ki te alofa faivasaga tenei e fai i ei ke fakapili‵pili tatou ki a Iesu mo te ‵tou Tamana alofa faka-te-lagi.​—2 Kolinito 5:​14, 15.

17. (a) Se a te fakamoemoega telā ne fakaasi mai ne Iopu? (e) Se a te mea e fakaasi mai i te Iopu 14:15 e uiga ki a Ieova, kae e pefea ou lagonaga e uiga ki ei?

¹⁷ Ne olioli foki eiloa a Iopu, se tagata fakamaoni i aso mua, ki te toetuga. Ne logo‵mae malosi a ia i galuega ma‵sei a Satani. E ‵kese mo ana taugasoa ‵loi kolā ne seki fai‵pati aka eiloa e uiga ki te toetuga, ne maua ne Iopu se fakamafanafanaga mai te fakamoemoega tenei kae fesili atu: “Kafai e mate se tagata, e mata e mafai o toe ola mai?” I tena tali ki ei ne fai atu ei a Iopu: “Ka ko au ka fakatalitali ki te taimi lei, ka fakatali au ke oti atu a taimi o fakalavelave konei.” Ne fai atu a ia ki tena Atua, ko Ieova: “Ka kalaga mai koe, kae tali atu au.” E uiga loa ki lagonaga o te ‵tou Atua alofa, ne fai mai a Iopu: “Ka fiafia ei koe ki a au, tau mea ola ne faite.” (Iopu 14:​14, 15) E tonu, e nofo fakatalitali eiloa a Ieova ki te taimi telā ka toe faka‵tu mai ei a tino fakamaoni. E fai ne te mea tenei ke na fia fakapili‵pili atu eiloa tatou ki a ia māfai e mafaufau ‵loto tatou ki tena alofa mo tena atafai ki a tatou faitalia te ‵tou tulaga se ‵lei katoatoa!​—Loma 5:21; Iakopo 4:8.

18, 19. (a) Se a te fakamoemoega ka maua ne Tanielu e uiga ki tena ola mai? (e) Ne a mea ka sau‵tala tatou ki ei i te suā mataupu?

¹⁸ A te pelofeta ko Tanielu, telā ne fakamatala mai ne te agelu me i “te Atua e alofa ki a koe,” ne tavini fakamaoni atu ki te Atua i se taimi leva. (Tanielu 10:​11, 19) Ne seki gata eiloa tena fakamaoni ki a Ieova talu mai te taimi ne puke fakapagota ei a ia i te 617 T.L.M. ke oko ki tena mate mai tua o te laveaga ne ia o se fakaasiga i te 536 T.L.M., i te tolu o tausaga o te pulega a Kulesa te tupu o Pelesia. (Tanielu 1:1; 10:1) I se taimi i te tolu tausaga o te pulega a Kulesa, ne lavea ne Tanielu a te fakaasiga e uiga ki pulega a malo o te lalolagi kolā ka fakaseai katoatoa atu i te taimi o te fakalavelave lasi. (Tanielu 11:​1–12:13) Ona ko tena se malamalama ‵lei i te uiga o te fakaasiga tenā, ne fesili atu a Tanielu ki te agelu telā ne fai mai ne ia te fekau tenā: “Tou ‵malu, e gata afea a mea katoa konā?” I tena tali, ne fakasino atu a te agelu ki te “taimi o te gataga,” telā “ko tino poto fua e malamalama i ei.” Kae pelā mo Tanielu, ne a ana fakamoemoega mō aso mai mua? Ne fai ‵tonu atu te agelu: “Ka mate koe, kae ke toe tu mai koe o puke te taui ‵lei o koe i te taimi o te gataga.” (Tanielu 12:​8-10, 13) Ka toe foki mai a Tanielu “manafai e toe‵tu mai a tino amiotonu mai te mate,” i te Pulega a Keliso i te Afe Tausaga.​—Luka 14:14.

¹⁹ Ko ola nei tatou i aso fakaotioti o aso fakaoti kae ko pilipili atu foki tatou ki te Pulega a Keliso i te Afe Tausaga i lō te taimi ne fatoā fai ei tatou mo tino tali‵tonu. Tela la, e ‵tau o ‵sili ifo tatou ki a tatou eiloa, ‘E mata, ka nofo atu au i te lalolagi fou ke ‵kau fakatasi mo Apelaamo, Iopu, Tanielu mo nisi tāgata mo fāfine fakamaoni?’ Ka ‵nofo atu eiloa tatou i konā, māfai e fakapili‵pili faeloa tatou ki a Ieova kae faka‵logo ki ana fakatonuga. I te suā mataupu, ka sau‵tala tatou ki nisi mea e uke e uiga ki te fakamoemoega ko te toetu ko te mea ke iloa ne tatou a tino kolā ka toe faka‵tu aka.

E Masaua ne Koe?

• Ne a faifaiga a tino ne lavea ne Paulo i te taimi ne folafola atu ei ne ia tena fakamoemoega e uiga ki te toetu?

• Kaia e ‵vae keatea ei ne te fakamoemoega e uiga ki te toetu a Kelisiano ‵tonu mai Kelisiano ‵se?

• E iloa pefea ne tatou me ne fakatuanaki a Apelaamo, Iopu mo Tanielu ki te toetu?

[Ata i te itulau e 19]

Ne faipati atu a Paulo mo te loto talitonu e uiga ki te fakamoemoega ko te toetu, i mua o te Kovana ko Filiki

[Ata i te itulau e 20]

Kaia ne lasi ei te fakatuanaki o Apelaamo e uiga ki te toetuga?

[Ata i te itulau e 22]

Ne fakamafanafana atu ki a Iopu a te fakamoemoega ko te toetu

[Ata i te itulau e 22]

Ka toe foki mai a Tanielu i te ‵toe fakatumaiga o tino amio‵tonu