Ne Ofo Atu a Latou Filoa mo te Loto Fiafia i Mexico

SE MEA fakafiafia ke lavea atu a te fanakaga ki luga o te aofaki o talavou Molimau ko fakafaigofie olotou olaga ko te mea ke mafai o fakalauefa atu te lotou galuega talai. (Mata. 6:22) Ne a ‵fuliga ne fai ne latou? Ne a fakalavelave ne fe‵paki mo latou? Ke maua te tali, ke fakamasani aka tatou ki nisi tino kolā koi fai nei te taviniga i Mexico.

“E ‵TAU O FAI NE MĀUA SE ‵FULIGA”

Ne avaga a Dustin mo Jassa mai i te Iunaite Sitete i a Ianuali 2007. Fakamuli ifo, ne matea ne lāua a te mea telā ko leva ne moe‵miti lāua ki ei​—⁠me e mafai o ‵togi ne lāua se pōti-faila kae ‵nofo i ei i tausaga katoa. Ne taula te lā pōti i tafa o Astoria, Oregon, U.S.A., se fa‵kai gali e fakatamilo ne mauga fo‵liki e ola ei a togāvao mo ulu o mauga e ufi ne aisa, e se ‵mao mai te Vasa Pasefika. “So se koga e kilo koe ki ei,” muna a Dustin, “e fakaofoofogia eiloa a mea e lavea ne koe!” Ne ma‵natu aka a te tauavaga konei me ko ola lāua i se olaga faigofie, kae fakalagolago ki a Ieova. ‘Oti aka,’ mafaufau aka ei lāua, ‘e ola māua i se pōti e 26 futu te loa, ga‵lue i galuega sē tumau, ‵kau ki te fakapotopotoga e fai‵pati ki se ‵gana fakaa‵tea, kae ga‵lue e pelā me ne paenia lagolago i nisi taimi.’ Kae fakamuli ifo, ne fakaiku aka ne lāua me ko fakaloiloi a lāua ne lāua eiloa. “I lō te ‵lago atu ki te fakapotopotoga, ne fakalave‵lave faeloa māua i te faka‵leiga o te mā pōti,” ko pati a Dustin. “Ne iloa ne māua me kafai e ma‵nako tonu māua o fakamuamua a Ieova i te mā olaga, e ‵tau o fai ne māua se ‵fuliga.”

Ne toe fai mai a Jassa: “A koi tuai au o avaga, au ne ola i Mexico, te koga telā ne kau ei au ki te fakapotopotoga i te ‵gana Palagi. Ne fiafia au o galue i konā, kae manako eiloa au o toe foki ki ei.” Ko te mea ke fakamalosi aka a te lā manakoga ke tavini atu i nisi koga, ne kamata o fai‵tau a Dustin mo Jassa ki tala o taina mo tuagane kolā ne olo ki fenua kolā e lasi te fia‵fia o tino i ei. (Ioa. 4:35) “Ne fia maua foki ne māua a te fiafia tenā,” ko pati a Dustin. I te lā ‵logoga i taugasoa mai Mexico me e manakogina ne se potukau fou se fesoasoani, ne fai ei ne Dustin mo Jassa se fakaikuga. Ne tiakina ne lāua a lā galuega, fakatau atu ki tua a te lā pōti, kae olo ki Mexico.

“TE ‵TOE MEA ‵LEI NE TUPU KI A MĀUA”

Ne ‵nofo a Dustin mo Jassa i te fa‵kai ko Tecomán​—⁠koi pili loa ki te Vasa Pasefika kae se 2,700 maila (4,345 km) i te feitu ki saute o Astoria. “I lō te mauaga o se ‵sau mokomoko mo mauga i tafatafa, e ‵vela ‵ki eiloa māua, kae ko te uke o te lakau ko te lemoni e oko loa ki te ‵mao o te kilo,” ko pati a Dustin. Ne seki ai ne lā galuega ne maua i te kamataga. Ona ko te se lava o lā tupe, ne ‵kai fakalua lāua i te aso ki laisi mo pīni i vaiaso katoa. “Kae ko te taimi eiloa telā ko se ‵kafi ei ne māua o toe ‵kai ki mā mea‵kai,” ko pati a Jassa, “ne kamata ei o aumai ne mā tino a‵koga ki te Tusi Tapu a mango, futi, olesi, mo taga ei e ‵fonu i lemoni!” E seki leva, kae ga‵lue a te tauavaga tenei i se akoga i mea tau ‵gana i Taiwan e auala i te itaneti. Nei la, a tupe kolā ne maua ne lāua i te galuega tenā ko lava loa ke tausi ki ei a lā manakoga i aso takitasi.

E pefea a lagonaga o Dustin mo Jassa ki te olaga fou o lāua? “A te mea tenei ko te ‵toe mea ‵lei eiloa ne tupu ki a māua,” ko lā pati. “A te mā fesokotakiga mo Ieova mo nisi tino taki tokotasi ko malosi atu i lō te mea ne tali‵tonu māua ki ei. E fai fakatasi ne māua a mea e uke i aso katoa​—⁠olo i te galuega talai, sau‵tala fakatasi ki auala e mafai ei o fesoasoani atu ki mā akoga faka-te-Tusi Tapu, kae fakatoka mō fakatasiga. Ko seai foki ne amoga ‵mafa kolā ne lagona ne māua i taimi ko ‵teka.” Ne toe fai mai lāua: “Ko iloa nei ne māua a te mea telā ne seki malamalama muamua māua i ei​—⁠te ‵tonu o te tautoga i te Salamo 34:8, NW, ‘Tofotofo aka kae ka lavea ne koe i a Ieova e ‵lei.’”

E LAU I AFE A TINO GA‵LUE LOTO FIA‵FIA​—⁠SE A TE MEA E FAKAMALOSI ATU KI A LATOU?

E silia atu i te 2,900 taina mo tuagane​—⁠tino a‵vaga mo tino e seki a‵vaga, a te tokoukega o latou e nofo ki te 20 mo te 30 tausaga te lotou ma‵tua​—ko oti ne olo atu o ga‵lue i kogā koga o Mexico kolā koi lasi te manakogina o tino talai o te Malo i ei. Kaia ne kamata ei ne Molimau katoa konei a te galuega faigata tenei? I te taimi ne ‵sili atu ei a te fesili tenā ki se potukau o latou, ne tuku mai ne latou a pogai e tolu. Ne a la pogai konā?

Ke fakaasi atu te alofa ki a Ieova mo taina tali‵tonu. Ne papatiso a Leticia kae ko 18 ana tausaga. Muna a tou fafine: “I te taimi ne tuku atu ei au ki a Ieova, ne malamalama au me e aofia i te mea tenei a te tavini atu ki a ia mo toku loto kātoa mo toku foitino kātoa. Tela la, ne manako au ke fakaaoga oku taimi e uke mo toku malosi i tena galuega ko te mea ke fakaasi atu toku alofa ki a Ieova mo toku loto kātoa.” (Male. 12:30) A Hermilo, telā ko avaga nei mo Leticia, ko 20 tupu ana tausaga i te taimi ne fanatu ei o galue i koga kolā e manakogina malosi i ei a tino talai o te Malo. Muna a tou tagata: “Ne matea ne au me i te fesoasoani atu ki tino i olotou manakoga faka-te-agaga ko te ‵toe auala ‵lei eiloa ke fakaasi atu ei toku alofa ki tuakoi.” (Male. 12:31) Ne tiakina ne tou tagata te fa‵kai maumea o Monterrey, telā ne galue ei a ia i se pagike kae maua foki ne ia se olaga nofogamalie i ei, kae fanatu o nofo i se tamā fa‵kai foliki.

Ke maua te fiafia tonu kae tumau. Mai tua malie o te papatisoga o tou fafine, ne olo tasi a Leticia mo se tuagane paenia apo ki se fa‵kai e ‵mao telā ne talai lāua i ei mō se masina e tasi. E fai mai a Leticia: “Au ne ofo. Ne fiafia ‵ki eiloa au i te kilo atu ki te fia‵fia o tino ki te fekau o te Malo telā e talai atu ne māua ki a latou. I te fakaotiga o te masina, ne fai ifo au ki a au eiloa, ‘Tenei te mea e manako au o fai ki toku olaga!’” E tai ‵pau foki mo Essly, se tuagane taka telā ko nofo nei ki te 20 tupu ana tausaga, ko te fiafia telā ne lavea ne tou fafine ne fai ei ke fia galue a ia i te vaegā taviniga tenei. A koi nofo atu a ia i te akoga maluga, ne fetaui a tou fafine mo nāi Molimau loto finafinau kolā ne tavini atu i koga kolā e lasi te manakogina o tino talai i ei. Muna a tou fafine, “Mai te kilo atu ki te mata fia‵fia o taina mo tuagane konā ne fai ei ke fia maua ne au a te olaga telā ko maua ne latou.” E tokouke a tuagane ne fai pelā mo Essly. A te tonuga loa, e silia atu mo te 680 tuagane e seki a‵vaga e ga‵lue i koga kolā e lasi te manakogina o tino talai i ei. Ma‵faga o fakaakoakoga gali ne fai ne latou mō talavou e pelā foki mo tino ma‵tua!

Ke ola i se olaga aoga kae fakamalie loto. I te otiga mai te akoga maluga, ne ofo atu ki a Essly se avanoaga ke akoga i te iunivesiti. Ne fakamalosi atu ana taugasoa ke talia ne ia te avanoaga kae kausaki atu ke maua se “olaga masani”​—⁠ke maua se pepa maluga, se galuega ‵togi, se motoka, kae ke lava foki te taimi e fai malaga ei. E ui i ei, ne seki fakalogo eiloa tou fafine ki olotou pati. Muna a Essly: “E isi ne oku taugasoa Kelisiano ne kausaki atu ki mea konei, kae ne matea ne au me ko sē fakatāua malosi ne latou a fakamoemoega faka-te-agaga. Ne matea foki ne au a te fanoa‵noa o latou i fakalavelave e fe‵paki mo latou ona ko te aofia malosi o latou i mea o te lalolagi tenei. Ne manako au o fakaaoga toku tulaga talavou ke tavini katoatoa atu ki a Ieova.”

Ne fai ne Essly ne nāi akoakoga fakamasani kolā e mafai o fesoasoani atu ki tou fafine ke maua sena galuega ke ‵lago atu ki a ia i tena galuega fakapaenia, kae oti aka, fano ei o galue i se koga telā e manakogina malosi i ei a tino talai o te Malo. Ne taumafai foki tou fafine o tauloto a te gana telā e faipati ne tino Otomi mo Tlapaneco. Nei la, i te toe kilo ki tua i te tolu tausaga ne talai ei a ia i kogā koga ‵mao, muna a tou fafine: “A te tavini atu i te koga telā e lasi i ei a te manakoga ne maua mai i ei a te lotomalie mo te aoga tonu ki toku olaga. Kae sili i mea katoa, ne pili ‵ki eiloa toku fesokotakiga mo Ieova.” Ne fai mai mo te lotoma‵lie a Phillip mo Racquel, se tauavaga ko taki 30 tupu a lā tausaga mai te Iunaite Sitete, penei: “Ko oko eiloa i te mafuli vave o te lalolagi telā ko ma‵natu aka ei a tino e tokouke me ko sē tokagamalie olotou olaga. Kae ko te tavini atu i koga kolā koi maua i ei ne tatou a tino e tokouke kolā e faka‵logo ki te fekau i te Tusi Tapu e maua i ei ne tatou a mea aoga i ‵tou olaga. Ko oko eiloa i te fakamalie loto te mea tenā!”

MEA FAIGA‵TA ​—⁠TE AUALA KE FAKAFESAGAI ATU KI EI

E tonu, a te tavini atu i koga kolā e manakogina malosi i ei a tino talai e isi ne mea faiga‵ta i ei. E tasi mai i ei ko te auala e tausi atu ei koe ki a koe eiloa i mea tau tupe. Ke fai penā, e ‵tau o loto fiafia koe o fulifuli tou olaga ke fetaui mo te olaga i te koga telā e galue koe i ei. E fakamatala mai a Verónica, se paenia apo: “I te koga e tasi ne galue au i ei, ne fakatoka kae fakatau atu ne au ki tua a mea‵kai ‵togi māmā. I te suā koga, ne fakatau atu ne au a gatu kae ‵kamu a ulu. I te taimi nei, e ‵fulu ne au se fale kae fai a akoga mō mātua ‵fou mai te akoakoga o latou ke mafai o fesokotaki atu ki olotou tamaliki.”

E mafai o faigata a te fakamasani ki tuu mo aganuu kese‵kese maise eiloa māfai e nofo atu koe i va o tino kolā e ‵nofo i se kogā koga ‵mao. Tenā te mea ne tupu ki a Phillip mo Racquel i te taimi ne ga‵lue ei lāua i te koga telā e fai‵pati ki te gana Nahuatl. “E lasi ‵ki te ‵kese o tuu mo aganuu,” ko muna a Phillip. Se a te mea ne fesoasoani atu ki a lāua ke fai a fakamafuliga? “Ne ‵saga tonu atu māua ki mea kolā ne matea ne māua i tino Nahuatl​—⁠te ‵pili o olotou kāiga, te fakaasiatuga o te loto fakamaoni i olotou faifaiga te suā tino ki te suā tino, mo te fakaasiatuga o te uiga kaimalie.” Ne toe fai mai a Racquel: “Ne tauloto ne māua a mea e uke mai te ‵nofo atu i konā kae ga‵lue fakatasi mo ‵tou taina mo tuagane i te koga tenā.”

TE AUALA E FAKATOKA EI KOE

Kafai e manako koe o galue i se koga ‵mao telā e manakogina i ei se fesoasoani, se a te mea e ‵tau o fakatokatoka nei koe ki ei? E fai mai a taina mo tuagane kolā ko oti ne ga‵lue i te vaegā taviniga tenei, penei: A koi tuai koe o gasue, na kamata o fakafaigofie tou olaga kae tauloto ke iloa ne koe o lotomalie. (Fili. 4:11, 12) Ne a foki nisi mea e mafai ne koe o fai? E fai mai a Leticia: “Ne fakasekeseke au mo galuega ‵togi kolā e manakogina ke nofo leva au i se koga e tasi. Ne manako au o fano ki so se koga i so se taimi e manakogina.” Muna a Hermilo: “Ne tauloto au ke iloa o kuka, ‵ta gatu, kae auli gatu.” E fai mai a Verónica: “A koi ‵nofo tasi au mo oku mātua mo tamaliki, ne fesoasoani au ki te ‵fuluga o te fale kae tauloto ke iloa o fakatoka a mea‵kai ‵togi māmā kae ‵gali i te kai. Ne tauloto foki au ke iloa ne au o ‵teu aku tupe.”

Ne fai mai foki ne Levi mo Amelia mai i te Iunaite Sitete, kolā ko oti ne avaga i tausaga e valu a te auala ne fesoasoani atu ei a te faiga o ‵talo ki a lāua ke fakatoka mō te taviniga i Mexico. Muna a Levi: “Ne galue aka ne māua a te aofaki tupe e manakogina ne māua ke tavini atu i nisi koga i se tausaga kae fakamolemole atu ki a Ieova i te ‵talo ke fesoasoani mai ke maua ne māua te aofaki tonu tenā.” I loto i se fia masina, ne mafai ei ne lāua o ‵teu a te aofaki telā ne taku atu ne lāua i te lā ‵talo, kae ne olo eiloa lāua e aunoa mo te fakatalave. Muna a Levi: “Ko oti ne tali mai a Ieova ki te mā fakamolemole fakapitoa, kae nei la, e ‵tau o fai a te mā tusaga.” Muna a Amelia: “Ne ma‵natu aka māua me e tasi fua te tausaga e ‵nofo ei māua i konei, kae ko fitu nei tausaga i te mā ‵nofoga i konei kae ko sē mafau‵fau māua o tiakina a te koga tenei! Ne fai ne te mā ‵nofo i konei ke iloa ne māua a te fesoasoani o Ieova. E lavea faeloa ne māua i aso katoa a fakamaoniga o tena aga‵lei.”

Ne aoga foki a te faiga o ‵talo ki a Adam mo Jennifer, se tauavaga mai i te Iunaite Sitete kolā e ga‵lue i Mexico i te koga telā e fai‵pati faka-Palagi ei a tino. E fakamalosi mai lāua: “Sa faka‵tali ke toka ‵lei koe. Fakaasi atu a tou manakoga o tavini i nisi koga e auala i te ‵talo, kae gasuesue e ‵tusa mo au ‵talo. Fakafaigofie tou olaga, tusi atu ki te ofisa lagolago i te fenua telā e manako koe o tavini i ei, kae kafai ko lava au tupe, ko fano ei koe!”a Ka faka‵tali mai eiloa ki a koe se olaga maumea i te feitu faka-te-agaga māfai e manako koe ki ei.