Ke Maua A Mea Aoga Katoa Mai Te Faitau Ki Te Tusi Tapu

1-3. Ne a mea aoga e maua mai te faitau ki te Tusi Tapu kae fakagalue aka a akoakoga i ei?

“E FAKAFETAI faeloa au ki a Ieova i taeao katoa mō te fesoasoani mai ke malamalama au i te Tusi Tapu.” A te tuagane Kelisiano matua telā ne fai ne ia a pati konā ne faitau ne ia a te Tusi Tapu kātoa e silia atu i te 40 taimi, kae e seki gata eiloa te faitauga a tou fafine. Ne tusi mai se tuagane talavou me ne fesoasoani atu a te faitau ki te Tusi Tapu ke lavea ne ia i a Ieova se tino tonu eiloa. Kae ko te ikuga, ne gasolo aka eiloa o pili malosi atu tou fafine ki tena Tamana faka-te-lagi. Muna a tou fafine, “Ne seki fiafia aka eiloa au penei i toku olaga!”

² Ne fakamalosi mai te apositolo ko Petelu ki tino katoa ke “fia inu malosi ki susu sē lai‵lai o te muna.” (1 Pe. 2:2) A tino kolā e sukesuke ki te Tusi Tapu kae fakagalue aka a akoakoga i ei, e maua ne latou se loto lagona ‵ma mo se olaga aoga. E ati aka ne latou se va fakataugasoa mo nisi tino kolā e a‵lofa kae tavini atu foki ki te Atua tonu. A mea katoa konei ne pogai ‵lei mō tatou ke “fiafia ki te tulafono a te Atua.” (Lo. 7:22) Kae e uke ‵ki eiloa a mea aoga e maua i ei. Ne a la a mea konā?

³ Ko te uke o mea e tauloto ne koe e uiga ki a Ieova mo tena Tama, ko te gasolo aka o lasi tou alofa ki a lāua mo nisi tino. E fesoasoani atu a te iloaga mai Tusitusiga Tapu ke lavea ne koe a te auala ko pili ei o faka‵sao ne te Atua a tino faka‵logo mai te olaga masei tenei. E isi se tala ‵lei telā e ‵tau o talai atu ne koe ki tino. Ka fakamanuia koe ne Ieova i te taimi e akoako atu ei ne koe ki nisi tino a mea kolā ne tauloto ne koe mai te faitauga ki te Muna a Atua.

FAITAU KAE MAFAUFAU ‵LOTO

4. Se a te uiga ke faitau ki te Tusi Tapu “i se leo malalo”?

⁴ E se manako a Ieova ke fai‵tau fakavave ana tavini ki loto i tena Muna. Ne fai atu a ia ki a Iosua: “A te tusi tenei o te tulafono e se ‵tau o teka kea‵tea mai tou gutu, kae e ‵tau o faitau koe ki ei i se leo malalo i te ao mo te po.” (Iosu. 1:8, NW; Sala. 1:2) E mata, e manakogina i te fakatonuga tenei ke faitau ne koe a pati katoa mai te Kenese ke oko ki te Fakaasiga i se leo malalo? Ikai. E fakauiga i ei me e ‵tau mo koe o faitau i te auala telā e mafai ei koe o mafaufau ‵loto. Kafai koe e faitau ki te Tusi Tapu “i se leo malalo,” ka fesoasoani atu a te mea tenā ke tuku tonu tou mafaufau ki koga kolā e aoga kae fakamalosi atu ki a koe i te taimi eiloa tenā. Kafai e maua ne koe se fuaiupu io me se tala penā, faitau malielie ki ei, kāti mai te taku atu fua o pati i ou laugutu. A te aoga o se manatu mai i Tusitusiga Tapu e mafai eiloa o oko tonu atu ki tou loto. Kaia e tāua ei a te mea tenei? Me kafai e malamalama tonu koe i pati fakatonutonu mai te Atua, e fakamalosi atu ki a koe ke fakagalue aka a mea konā.

5-7. Tuku mai ne fakaakoakoga ki te auala e mafai ei o fesoasoani atu a te faitau ki te Muna a Atua i se leo malalo ke (a) tumau i te ‵ma i mea tau amioga; (e) faipati faka‵lei atu ki nisi tino; (i) ati aka te loto talitonu ki a Ieova ke oko foki ki taimi faiga‵ta.

⁵ A te faitau i se leo malalo e fesoasoani malosi atu māfai koe e mafaufau ki tusi o te Tusi Tapu kolā e se malamalama koe i ei. Ke mafau‵fau tatou ki fakaakoakoga e tolu. Te mea muamua, ke mafaufau ki se taina talavou Kelisiano telā ko oko a tena polokalame faitau ki te tusi ko Hosea. I te mataupu e 4, ne mānava aka tou tagata mai te faitauga o te fuaiupu e 11 ki te 13 i se leo malalo. (Faitau te Hosea 4:11-13.) Kaia? Ne tāua ki a ia a fuaiupu konā me ne taumafai tou tagata o ‵teke atu a fakamalosiga ke fai a amioga sē ‵tau i te akoga. Ne mafaufau tou tagata ki fuaiupu konā kae fai ifo ki a ia eiloa, penei: ‘E lavea ne Ieova a mea ma‵sei e fai ne tino ke oko foki eiloa ki mea e fai ‵funa ne latou. E se manako au o fakafanoanoa a ia.’ Ne fakaiku aka ne te taina tenei ke tumau eiloa a ia i te ‵ma i mea tau amioga i mua o te Atua.

⁶ I te lua o fakaakoakoga, e faitau se tuagane Kelisiano ki te tusi o Ioelu kae ko oko ki te mataupu e lua, fuaiupu e 13. (Faitau te Ioelu 2:13.) I tena faitauga ki te fuaiupu tenā, e fakaataata ne tou fafine i tena mafaufau a te auala e ‵tau ei o fakaakoako atu a ia ki a Ieova, telā “e ‵fonu . . . i te alofa mo te alofa ‵nau; e loto kufaki a ia kae tausi ki tena tautoga.” Ne filifili aka ne tou fafine ke taumafai a ia o fakaseai a pati ita mo pati fakatauemu kolā e fakaaoga sāle ne ia māfai e faipati atu a ia ki tena avaga pelā foki mo nisi tino.

⁷ A te tolu o fakaakoakoga, mafaufau ki se tamana Kelisiano telā ko seai sena galuega kae ko manavase ki te tausiga o tena avaga mo ana tamaliki. I te Nauma 1:7, ne faitau ne tou tagata i se leo malalo me i a Ieova “e tausi faka‵lei ne ia a latou kolā e ‵fuli mai ki a ia” kae “puipui ne ia ona tino i taimi o puapuaga.” Ne fakamafanafana atu a te manatu tenā ki tou tagata. E lagona ne ia a te tausiga alofa a Ieova kae ne fakagata aka i ei a te manavase malosi. Oti aka, faitau ei tou tagata ki te fuaiupu e 15 i se leo malalo. (Faitau te Nauma 1:15.) E lavea ne ‵tou taina me e auala i te talaiga o te tala ‵lei i taimi faiga‵ta, e fakaasi atu ei ne ia me e kilo atu eiloa a ia ki a Ieova e pelā me ko tena ‵pui malosi. A koi salasala te taina ki se galuega ‵togi, ko ‵lago atu foki nei a ia ki te galuega talai i loto i te vaiaso.

8. Fakamatala fakatoetoe mai se mea aoga ne maua ne koe i tau faitauga ki te Tusi Tapu.

⁸ A manatu tāua kolā ne fatoa sau‵tala tatou ki ei ne maua mai i tusi o te Tusi Tapu kolā e mafau‵fau a nisi tino me e faigata ke malamalama i ei. Kae kafai e sukesuke koe ki tusi ko Hosea, Ioelu, mo Nauma mo te manakoga ke tauloto mai i ei, ka manako eiloa koe o faitau ki nisi fuaiupu i ei i se leo malalo. Mafaufau ki te lasi o te poto mo te uke o fakamafanafanaga e mafai o maua ne koe i tusitusiga a pelofeta konā! Kae e pefea la a te Tusi Tapu kātoa? A te Muna a te Atua e fai pelā me se koga keli taemani. Keli faka‵lei a te koga tenā! Ao, ke faitau ki te Tusi Tapu kātoa mo te fakamoemoega ke maua a mea aoga mai i fakatakitakiga mo fakamalosiga mai te Atua.

TAUMAFAI KE MALAMALAMA KOE I AU MEA E FAITAU

9. E mafai pefea o gasolo aka a ‵tou malamalama i te loto o te Atua?

⁹ E ui eiloa e tāua ke faitau koe ki se vaega o te Tusi Tapu i aso katoa, e ‵tau foki mo koe o malamalama i mea kolā e faitau koe ki ei. Tela la, ke fakaaoga faka‵lei a lōmiga a te fakapotopotoga a Ieova ke fai au sukesukega ki olaga o tino, koga, mo mea ‵tupu kolā ne faitau ne koe. Io me kafai e mafaufau koe me e pokotia pefea tou olaga i se akoakoga i te Tusi Tapu, e mafai ne koe o fakamolemole atu ki se toeaina i te fakapotopotoga io me se Kelisiano matua ‵lei ke maua se fesoasoani. Ke fakamatala a te tāua o te gasolo aka ki luga o ‵tou malamalama, ke mafau‵fau tatou ki te fakaakoakoga e tasi o se Kelisiano i te senitenali muamua telā ne taumafai o fai a te mea tenā. A tena igoa ko Apolo.

10, 11. (a) Ne fesoasoani atu pefea ki a Apolo ke gasolo aka o ‵lei e pelā me se faifeau o te tala ‵lei? (e) Se a te mea e mafai o tauloto ne tatou mai te tala o Apolo? (Ke onoono ki te pokisi “E Mata, e Akoako ne Koe a Mainaga ‵Fou?”)

¹⁰ A Apolo se Kelisiano Iutaia telā “e poto foki i muna mai Tusitusiga Tapu” kae “‵fonu i te agaga tapu.” E fai mai te tusi ko Galuega e uiga ki tou tagata: “Ne loto finafinau . . . a ia o faipati kae akoako ‵tonu atu a mea e uiga ki a Iesu, kae ne masani fua a ia mo te papatisoga a Ioane.” Ne akoako ne Apolo se mainaga mua e uiga ki te papatisoga e aunoa mo te iloa me ne akoako ne Iesu se mainaga fou. I te lagonaga ne lāua i tou tagata e akoako atu i Efeso, fakamatala atu ei ne se tauavaga Kelisiano e igoa ki a Pisila mo Akuila a “auala o te Atua” ki a ia. (Galu. 18:24-26) Ne aoga pefea a te mea tenei ki a Apolo?

¹¹ Mai tua o te talaiga i Efeso, ne fanatu a Apolo ki Akaia. “Tela la, i tena okoatuga ki ei, ne fesoasoani malosi a ia ki a latou kolā ko oti ne tali‵tonu ona ko te alofa tauanoa o te Atua; me ne finau malosi a ia o fakamaoni katoatoa atu i mua o tino katoa a te ‵se o tino Iutaia, kae ne fakatalitonu atu foki ne ia mai i Tusitusiga Tapu me i a Iesu ko te Keliso.” (Galu. 18:27, 28) I te taimi tenā, ne fakamatala tonu atu ne Apolo a te uiga o te papatisoga faka-Kelisiano. Mai te momea aka o tena malamalama, ne “fesoasoani malosi” atu ei tou tagata ki tino ‵fou ke gasolo ki mua i te tapuakiga tonu. Se a te mea e mafai o tauloto ne tatou mai te tala tenei? E pelā mo Apolo, e taumafai tatou ke malamalama i mea kolā e faitau ne tatou i te Tusi Tapu. E ui i ei, kafai e tuku mai ne manatu o taina mo tuagane apo ki te auala e magoi ei te ‵tou akoako atu, e loto mau‵lalo eiloa tatou o talia a te fesoasoani tenā mo te loto fakafetai. Kafai e fai tatou penā, ka gasolo aka eiloa o ‵lei a ‵tou taviniga tapu.

FAKAAOGA A MEA KOLĀ NE TAULOTO NE KOE KE FESOASOANI ATU KI NISI TINO

12, 13. Ke fakamatala mai te auala e mafai ei o fakaaoga a Tusitusiga Tapu i se auala poto ke fesoasoani atu ki akoga faka-te-Tusi Tapu ke ga‵solo ki mua.

¹² E mafai foki o fesoasoani atu tatou ki nisi tino e pelā mo Pisila, Akuila, mo Apolo. Kafai ne fesoasoani atu au fakamalosiga ki se tino fiafia ke manumalo i se mea telā ne fakalavelave atu ki tena gasolo ki mua i te feitu faka-te-agaga, e pefea ou lagonaga ki ei? Io me e pelā me se toeaina, e pefea ou lagonaga māfai e fakafetai atu se taina io me se tuagane ki a koe mō pati fakatonutonu ne fesoasoani atu ki a ia i se taimi faigata? E seai se fakalotolotolua me i te fakaaogaga o te Muna a te Atua ke fesoasoani atu ki nisi tino ke tai faka‵lei aka olotou olaga se mea fakamalie loto kae fakafiafia.a Mafaufau me ka fakataunu pefea ne koe a te fakamoemoega tenā.

¹³ I aso o Elia, e tokouke a tino Isalaelu ne seki filifili me e tau‵tali atu latou i te tapuakiga tonu io me ko te tapuakiga ‵se. A pati fakatonutonu a Elia ki tino konā e mafai o fesoasoani atu ki se akoga faka-te-Tusi Tapu telā e se gasolo ki mua i te feitu faka-te-agaga. (Faitau te 1 Tupu 18:21.) Mafaufau ki te suā fakalavelave: Kafai se tino fiafia e mataku i kilokiloga a taugasoa io me ko kāiga, e mafai ne koe o fakamalosi aka a tena fakaikuga ke tapuaki atu ki a Ieova mai te fakaaogaga o pati i te Isaia 51:12, 13.—Faitau.

14. Se a te mea ka fesoasoani atu ke masaua ne koe a fuaiupu i te Tusi Tapu māfai ko manako koe ki ei ke fesoasoani atu ki nisi tino?

¹⁴ E uke a pati i te Tusi Tapu kolā e fakamalosi kae fakatonutonu aka ei ana tino fai‵tau. Kae kāti ka fesili aka koe penei, ‘E mafai pefea o toka aku tusi siki māfai au e manako ki ei?’ Faitau ki te Tusi Tapu kae mafaufau ‵loto ki manatu o te Atua i aso katoa. I te auala tenā, ka momea aka i ei a tou masani ki pati i te Tusi Tapu kolā e mafai o fakamasaua atu ne te agaga o Ieova ki a koe māfai ko manako koe ki ei.​—Male. 13:11; faitau te Ioane 14:26.b

15. Se a te mea ka fesoasoani atu ki a koe ke malamalama katoatoa i te Muna a te Atua?

¹⁵ E pelā mo te tupu ko Solomona, ‵talo atu ki a Ieova ke maua ne koe te poto i te fakataunuga o ou tiute i te fakapotopotoga mo te galuega talai. (2 Nofo. 1:7-10) E pelā mo pelofeta i aso mua, ke “sala‵sala kae suke‵suke fakamaea” ki te Muna a te Atua ke maua a te iloaga tonu e uiga ki a Ieova mo te mea e loto a ia ki ei. (1 Pe. 1:10-12) Ne fakamalosi atu a te apositolo ko Paulo ki a Timoteo ke kai eiloa a ia “ki muna o te fakatuanaki mo akoakoga ‵lei.” (1 Timo. 4:6) Mai te faiga penā ne koe, ka malamalama ‵lei eiloa koe i te auala e mafai ei koe o fesoasoani atu ki nisi tino. I te faiga foki tenā ka ati aka ei ne koe a tou fakatuanaki totino.

A TE PUIPUIGA MAUTINOA E FAKAVAE KI TE MUNA A TE ATUA

16. (a) Ne aoga pefea ki te kau Pelea a te “suke‵suke malosi ki Tusitusiga Tapu i aso katoa”? (e) Kaia e tāua malosi ei ki a tatou i aso nei a te faitau ki te Tusi Tapu i aso katoa?

¹⁶ A tino Iutaia kolā ne ola i te fa‵kai o Maketonia ko Pelea, e masani o “suke‵suke malosi ki Tusitusiga Tapu i aso katoa.” I te taimi ne talai atu ei ne Paulo a te tala ‵lei ki tino Iutaia konā, ne fakatusatusa ne latou ana pati mo te mea e iloa ne latou mai Tusitusiga Tapu. Se a te ikuga? Ne lotoma‵lie a tino e tokouke me ne akoako ne tou tagata a te munatonu, kae ne fai latou mo ‘tino tali‵tonu.’ (Galu. 17:10-12) E fakaasi mai i te mea tenei me i te faitau ki te Tusi Tapu i aso katoa e fakamalosi aka i ei a ‵tou fakatuanaki ki a Ieova. A te vaegā fakatuanaki penā, “te talitonu mo te mautinoa ki mea kolā e fakamoe‵moe tatou ki ei,” e tāua ‵ki eiloa māfai e ma‵nako tatou ke ‵sao atu ki loto i te lalolagi fou a te Atua.​—Epe. 11:1.

17, 18. (a) E puipui pefea ne te alofa mo te fakatuanaki malosi a te loto o se Kelisiano? (e) E puipui pefea tatou ne te fakamoemoega mai mea fakama‵taku?

¹⁷ E isi se pogai ‵lei ne tusi mai ei a Paulo: “Kae ko tatou ne tino o te ao. Ke tausi faka‵lei ‵tou mafaufau, me ko oti ne maua ne tatou a te ufifatafata o te fakatuanaki mo te alofa e pelā me se puloutau, mo te fakamoemoega o te fakaolataga.” (1 Tesa. 5:8) E manakogina ke puipui te fatu o se sotia mai te fili. I se auala tai ‵pau, e manakogina foki ke puipui te loto o se Kelisiano mai te malosi o te agasala. Se a te ikuga e maua māfai e ‵sai tasi ne se tavini a Ieova a te fakatuanaki malosi ki folafolaga a te Atua mo te alofa ki a Ia mo nisi tino? Ko fakaaoga ne se tavini penā se ufi fatafata faka-te-agaga malosi ‵ki. E seai se fakalotolotolua me ka fai ne ia so se mea e mafai o fai ke tumau a ia i te taliaga a te Atua.

¹⁸ Ne taku mai foki ne Paulo se puloutau, “te fakamoemoega o te fakaolataga.” E faigofie o mate se sotia i te taua i taimi o te Tusi Tapu māfai e se puipui a tena ulu. Kae kafai e maua se puloutau ‵lei, e mafai eiloa tou tagata o sao i mea kolā e ‵poko ki te ulu kae sē pakia malosi. E ati aka ne tatou a te fakamoemoega ki te malosi o Ieova o faka‵sao tatou mai te sukesuke ki tena Muna. Ko te malosi o ‵tou fakamoemoega e mafai ei o ‵teke atu tatou ki aposetate mo olotou “pati sē aoga.” (2 Timo. 2:16-19) Ka fakamalosi aka foki tatou ne ‵tou fakamoemoega ke ‵teke atu ki tino kolā e fakamalosi mai ke fai ne tatou a amioga kolā e takalialia a Ieova ki ei.

KO TE KĪ KI TE FAKAOLATAGA

19, 20. Kaia e fakatāua malosi ei ne tatou a te Muna a te Atua, kae fakaasi atu pefea ne tatou a ‵tou loto fakafetai ki ei? (Ke onoono ki te pokisi “E Tuku Mai Fua ne Ieova a Mea Kolā e Manako Au ki ei.”)

¹⁹ Ko te pili malosi o tatou ki te gataga, ko te lasi o te fakalagolago malosi o tatou ki te Muna a Ieova. A pati fakatonutonu kolā e maua ne tatou mai i ei e fesoasoani mai ki a tatou ke faka‵tonu aka a amioga ma‵sei kae pule faka‵lei atu ki ‵tou manakoga agasala. Ona ko fakamalosiga mo fakamafanafanaga mai i ei, ka ‵sao atu eiloa tatou i tofotofoga kolā e fai mai ne Satani mo tena lalolagi ki a tatou. Fakatasi mo fakatakitakiga kolā e tuku mai ne Ieova i loto i tena Muna, ka ‵nofo eiloa tatou i loto i te auala ki te ola.

²⁰ Masaua me ko te loto eiloa o te Atua “ke faka‵sao a tino katoa.” E aofia i ei a latou kolā e mafai o fesoasoani atu tatou ki ei e auala i te ‵tou galuega talai mo te faiga o akoga. Kae ko tino katoa kolā e ma‵nako ke ‵sao atu latou i te gataga o te olaga tenei e ‵tau “ke iloa tonu ne latou a te munatonu.” (1 Timo. 2:4) Tela la, e ‵tau eiloa mo tatou o fai‵tau ki te Tusi Tapu kae fakagalue ana fakatonuga māfai e ma‵nako tatou ke ‵sao atu i te gataga. Ao, a te fai‵tau o tatou ki te Tusi Tapu i aso katoa e fakaasi atu i ei a te fakatāua malosi ne tatou a te Muna a Ieova.​—Ioa. 17:17.