Fakamasinoga a te Atua—E Mata, ne Faifaiga Fakasauā?

KE FAIPATI e uiga ki te fesili tenei, ke onoono malie aka tatou ki fakaakoakoga e lua o fakamasinoga a te Atua i loto i te Tusi Tapu​—te Lolo i aso o Noa mo te tamatega o tino Kanana.

TE LOLO I ASO O NOA

PATI A NISI TINO: “A te Atua ne sauā i te taimi ne fai ei ne ia se lolo telā ne fakaseai ei a tino katoa kae na ko Noa fua mo tena kāiga ne ‵sao.”

PATI A TE TUSI TAPU: Muna a te Atua: “Au e se fiafia ke lavea ne au se tino agasala ke mate. E sili atu toku fiafia ke lavea ne au me ko se toe agasala kae ke ola.” (Esekielu 33:11) Tela la, ne seki fiafia lele te Atua ki te fakaseaiga o tino amio ma‵sei i aso o Noa. Kae kaia la ne fai ei ne ia?

E tali mai te Tusi Tapu me i te taimi ne aumai ei ne te Atua a fakamasinoga penā ki luga i tino sē amio atua i taimi ko ‵teka, ne fai ne ia “se ata o te mea telā ka tupu ki tino sē fakamaoni i aso mai mua.” (2 Petelu 2:5, 6) Se a te ata ne fai ne te Atua?

A te mea muamua, ne fakatalitonu mai ne te Atua me e faitalia te faka‵mae atu ki a ia ke fakaseai a tino, e iloa ne ia a tino sauā kolā e māfua mai i ei a logo‵maega kae taui atu ki a latou e ‵tusa mo olotou faifaiga. I te taimi tonu, ka fakaseai ne ia a logo‵maega mo faifaiga sē ‵tonu katoa.

A te lua o mea, a faifaiga a te Atua i taimi ko ‵teka e fakatalitonu mai i ei me e alofa te Atua o fakailoa muamua atu ki tino koi tuai o fakaoko atu te fakamasinoga. A Noa se tino talai o te amiotonu, kae ne ‵teke atu a tino e tokouke ki tou tagata. Muna a te Tusi Tapu: “Ne seki fia ‵saga atu latou ki ei ke oko eiloa ki te taimi ne poko ei te Lolo, tapea‵pea atu ei latou keatea.”​—Mataio 24:39.

E mata, ne tausi eiloa te Atua ki te faifaiga tenā? Ao. Pelā me se fakaakoakoga, ne fakailoa atu ne ia ki tino o tena fenua ko Isalaelu me kafai e fai ne latou a amioga ma‵sei e pelā mo fenua i olotou tafa, ka talia ne ia ke puke ne te fili a te lotou fenua; fakamaofa a te lotou laumua ko Ielusalema; kae ave fakapagota latou. Ne fai eiloa ne tino Isalaelu a amioga ma‵sei​—ke oko ki te ofoga o tamaliki mo fai a taulaga. E mata, ne gasue a Ieova? Ao, mai tua fua o te uga sāle atu ne ia a pelofeta ke fakailoa atu ki ana tino, ke ‵fuli olotou auala koi tuai o to talimuli. Ne fai atu foki a ia: “E se mafai lele o fai ne te Aliki Sili [Ieova] se mea kae seki fakaasi mai tena fuafuaga ki ana tavini ko pelofeta.”​—Amosa 3:7.

TE AUALA E AOFIA KOE I EI: A te faifaiga ne lavea ne tatou i fakamasinoga a Ieova ne fai i taimi ko ‵teka e tuku mai i ei se fakamoemoega ki a tatou. E mafai o ‵kilo atu tatou mo te loto talitonu ki te fakamasinoga a te Atua i te taimi mai mua ki a latou kolā e māfua mai i ei a logo‵maega. Muna a te Tusi Tapu: “Ka ko tino amio ma‵sei ka afuli keatea . . . ka ko latou kolā e loto malalo, ka fai mo latou te fenua, kae ka maua ne latou te manuia mo te filemu katoatoa.” (Salamo 37:9-11) Se a tau faka‵tau e uiga ki se fakamasinoga telā ka maua ei ne tino se fakatapūga mai i logo‵maega? E mata, e fakasauā io me e alofa fakamagalo?

TE TAMATEGA O TINO KANANA

PATI A NISI TINO: “A te tamatega o tino Kanana se faifaiga fakasauā māfai e faka‵tusa ki te tamatega o tino i aso nei.”

PATI A TE TUSI TAPU: “E tonu kae amiotonu i ana auala katoa; a te otou Atua e fakamaoni kae amiotonu.” (Teutelonome 32:4) A te faiga o te fakamasinoga tonu a te Atua e se faka‵tusa ki se taua a tāgata. Kaia? Me e ‵kese mo tino, i te Atua e iloa ne ia a mea i te loto​—ko mea i loto o tino.

E pelā me se fakaakoakoga, i te taimi ne fakamasino ei ne te Atua a fa‵kai o Sotoma mo Komolo kae fakaiku aka ke fakamaofa, ne manako a te tagata fakamaoni ko Apelaamo ke fakamautinoa aka me e tonu eiloa te fakaikuga a te Atua. Ne seki mafaufau tou tagata me i tena Atua fai mea tonu “ka ta fakapalele eiloa . . . a tino amio‵tonu fakatasi mo tino agasala.” Ne toe fakatalitonu atu te Atua mo te kufaki me kafai foki e tokosefulu a tino amio‵tonu i Sotoma, ka fakasao ne Ia a te fa‵kai ona ko latou. (Kenese 18:​20-33) E manino ‵lei, me e sukesuke ne te Atua a loto o tino konā kae lavea ne ia a te matagā o olotou amioga ma‵sei.​—1 Nofoaiga Tupu 28:9.

I se auala tai ‵pau, ne matea ne te Atua a te matagā o amioga a te kau Kanana kae ne tonu eiloa a te fakaseaiga o latou. Ne lauiloa te kau Kanana i te amio fakasauā, telā ne aofia i ei a te ‵sunu ola o tamaliki mo fai a taulaga.a (2 Tupu 16:3) Ne iloa ne tino Kanana me ne fakatonu atu a Ieova ki tino Isalaelu ke puke ne latou a te fenua. A latou kolā ne ‵toe kae taua atu ne seki ‵teke tonu atu fua ki te kau Isalaelu kae ki a Ieova foki, telā ne fakatalitonu atu ne ia i a ia e kau i ana tino.

E se gata i ei, ne fakaasi atu ne te Atua a te alofa fakamagalo ki tino Kanana kolā ne tiakina olotou amioga ma‵sei kae talia a tulaga ma‵luga o Ieova i mea tau amioga. Pelā me se fakaakoakoga, a te fafine talitāgata Kanana ko Lahapa ne faka‵sao fakatasi mo tena kāiga. I te taimi foki ne ‵sala atu ei a tino o te fa‵kai o Kanana ko Kipeona ki se alofa fakamagalo, ne faka‵sao a latou mo olotou tamaliki katoa.​—Iosua 6:25; 9:​3, 24-26.

TE AUALA E AOFIA KOE I EI: E mafai o tauloto ne tatou se akoakoga tāua mai te fakamasinoga o te kau Kanana. Ko gasolo o pili atu tatou ki te “aso o te fakamasinoga kae ka fakaseai atu ei a tino sē amioatua.” (2 Petelu 3:7) Kafai e a‵lofa tatou ki a Ieova, ka maua eiloa ne tatou a mea aoga i te taimi telā ka fakaseai ei ne ia a logo‵maega o tino e auala i te fakaseaiga o tino kolā e ‵teke ki tena pulega fai mea tonu i te lalolagi.

E alofa a Ieova o fakamasaua mai ki a tatou me i filifiliga kolā e fai ne mātua e pokotia i ei olotou tamaliki. E fai mai te Muna a te Atua: “Ko te ola e ‵tau o filifili ne koutou. A‵lofa ki te Aliki [Ieova] te otou Atua, faka‵logo ki a ia kae tali‵tonu ki a ia. . . . kae ka ‵nofo leva koutou mo tino i otou gafa.” (Teutelonome 30:​19, 20) E mata, konā a pati e fai ne se Atua sauā io me ko pati a se Atua telā e alofa ki tino kae manako ke fai ne latou se filifiliga tonu?