Te Fakailoga Tino Se Fakalavelave i te Lalolagi Kātoa

A IONATANA, se Kolea ne fanau i Amelika, se tino telā ne pokotia i ikuga o te fakailoga tino i te taimi koi tamaliki ei a ia. A koi tuputupu aka tou tagata, ne salasala a ia ki se koga telā ka sē fakavae i ei a fakaikuga a tino ki a ia i ana foliga io me ko tena telega. Ne fai tou tagata mo fai se tokita i se fa‵kai i te feitu ki matū o Alaska, U.S.A., ko te koga telā e tai ‵pau eiloa ana foliga mo te tokoukega o ana tino ma‵saki. Ne fakamoemoe tou tagata me i te nofo atu i konā, i matagi ‵moko o te Arctic Circle, ka sao ei a ia i ikuga o te fakailoga tino.

Ne seki aoga so se fakamoemoega penā i te taimi ne fesoasoani atu ei tou tagata ki te masaki o se fafine ko 25 tausaga te matua. I te taimi ne ‵pula mai ei a mata o te tino masaki, ne kilo atu tou fafine ki mata o Ionatana kae fai atu se pati sē āva, e fakaasi atu i ei a tena takalialia ki tino Kolea. A te mea tenā ne tupu se fakamasauaga faka‵mae loto ki a Ionatana, me i ana taumafaiga katoa ne fai ke fano a ia ki se koga kae fakamasani ki tino, ne seki fesoasoani atu ke sao a ia mai i ikuga o te fakailoga tino.

E faka‵mafa mai i te tala o Ionatana se tulaga fakafanoanoa. E maua a te uiga fakailoga tino i so se koga o te lalolagi. E foliga mai me i so se koga e ‵nofo ei a tino, e isi eiloa se fakailoga tino i ei.

Faitalia a te lauiloa o te uiga fakailoga tino, a te tokoukega o tino e vave o taku fakamasei ne latou a te uiga tenā. E se fetaui eiloa a te manatu tenei. E mafai pefea o salalau se mea telā e se fia‵fia ki ei a tino i te taimi e tasi? E fakaasi manino mai i ei me i te tokoukega o tino kolā e se talia ne latou a te uiga fakailoga tino, e se matea ne latou a te uiga tenā i a latou eiloa. E mata, e penā foki koe? Ka tali aka pefea ne koe a te fesili tenā?

SE FAKALAVELAVE TOTINO

Faitalia me malamalama tatou i ei io me ikai, e faigata o iloa ne tatou māfai e ‵teu ne tatou a uiga fakailoga tino i ‵tou loto. E fakamatala mai i te Tusi Tapu a te pogai e fai ei penei: “Te loto . . . ko te ‵toe mea tafasili foki eiloa i te faka‵se tino.” (Ielemia 17:9, Tusi Tapu Tuvalu) Tela la, e mafai o fakaloiloi ne tatou a tatou eiloa mai te talitonu me e talia ne tatou a vaegā tino kese‵kese katoa. Io me e mafai o fai ‵tou fakamasakoga me e isi se pogai ‵lei e maua ei ne tatou se kilokiloga sē tonu ki nisi tino.

Ke fakamatala a te faigata o malamalama me e ‵funa aka ne tatou se uiga fakailoga tino io me ikai, mafaufau ki tulaga konei e ‵soko mai: E sasale tokotasi atu koe i te auala i se po pouli. E tokolua tamataene kolā e seki lavea muamua aka eiloa ne koe ko sa‵sale tonu mai ki a koe. E mata ma‵losi lāua, kae foliga mai me i te tokotasi o lāua e puke se mea i tena lima.

E mata, e fakaiku aka ne koe me i tamataene konā e taumafai o fakamatakutaku a koe? E tonu, kāti e fakamasaua atu a mea mua ne iloa ne koe me e ‵tau eiloa koe o fakaeteete, kae e mata, e fesoasoani atu a mea mua konā ki te ‵tonu o tau fakaikuga me i tamataene tokolua konei e fakama‵taku? A te fesili telā e ‵tau ke iloilo faka‵lei aka e fai penei, Ko te telega io me ko te fenua fea ne mafaufau koe me ne o‵mai i ei a tāgata konei? E tāua ‵ki tau tali ki te fesili tenei. E mafai o fakaasi mai i ei me ko leva koe ne pokotia i ikuga o te fakailoga tino.

Kafai tatou e fakamaoni ki a tatou eiloa, e ‵tau o fakaasi ‵tonu ne tatou me koi isi eiloa se fakailoga tino i loto i a tatou katoa. E fakaasi mai foki i te Tusi Tapu se vaega lauiloa o te fakailoga tino, penei: “A te tagata e kilo ki te gali o te feitu ki tua.” (1 Samuelu 16:7, Tusi Tapu Tuvalu) Ona ko tatou katoa e pokotia i te kilokiloga faka-te-tagata tenei—e masani o maua a ikuga matagā i ei—e mata, e isi se fakamoemoega ke fakatakavale io me fakaseai ne tatou a te fakailoga tino i ‵tou olaga? Kae e mata, e isi se taimi ka lavea ei ne tatou i te lalolagi kātoa ko seai se fakailoga tino i ei?