Se Lalolagi e Seai se Fakailoga Tino i ei Māfea la?

“E ISI saku moemiti.” I te lima sefulu tausaga ko ‵teka, ne fai ne te takitaki o te saolotoga o tino i Amelika ko Martin Luther King, Jr., a pati konā i tena toe lāuga lauiloa i a Aokuso 28, 1963. I te fakaaogaga o te tugāpati tenā, ne fakaasi mai ne King a tena moemiti, io me ko tena fakamoemoega, ke mafai a tino o fia‵fia i se aso me ko seai se fakailoga tino. E tigā eiloa ne fakaasi atu ana fakamoemoega ki tino i te Iunaite Sitete, ne talia ne tino i atufenua e uke a tena moemiti.

E tolu masina mai tua o te lāuga a King i a Novema 20, 1963, ne talia ne atufenua e silia atu i te 100 a te Faka‵pulaga a te Malo ‵Soko e uiga ki te Fakaseaiga o Vaega Katoa o te Fakakese‵kesega o Tino. A nisi faipatiga ne fai i te lalolagi kātoa ne talia i tausaga e uke fakamuli ifo. Ne fai ne taumafaiga aoga katoa penā ke sae aka a te fesili, Se a la te mea ne iku mai i ei?

I a Mati 21, 2012, ne fai mai a te Failautusi Aoao o te Malo ‵Soko ko Ban Ki-Moon: “E uke a feagaiga mo mea faigaluega tāua—e penā foki mo aofaga fakapolitiki i te lalolagi kātoa—ke fakagata kae fakaseai a te fakakese‵kese o tino, te fakailoga tino, mo nisi faifaiga fakailoga tino. E ui i ei, koi māfua mai eiloa i te fakakese‵kesega o itukāiga o tino a te logo‵mae o te fia miliona o tino i te lalolagi.”

Ke oko ki fenua kolā e isi ne taumafaiga ne fai i ei o taua atu ki te fakakese‵kesega o tino mo nisi vaega o te fakailoga tino, koi tumau eiloa a te fesili tenei: E mata, ne fakaseai tonu ne taumafaiga ne fai a lagonaga tonu o tino io me ne akoako fua ne latou a tino ke sē fakaasi atu olotou uiga fāpito. E tali‵tonu a nisi tino me ne fesoasoani atu fua a taumafaiga penā o taofi aka a te fakakese‵kesega o tino, kae e se mafai o fakaseai a te fakailoga tino. Kaia la? Ona ko te fakakese‵kesega o tino se faifaiga telā e mafai o lavea kae fakasala i te tulafono, kae ko te fakailoga tino ko mafaufauga mo lagonaga ‵poko o te tino kolā e se mafai o pule atu ki ei.

Tela la, so se taumafaiga e fai ke fakaseai a te fakailoga tino, e se ‵tau fua o fakagata aka i ei a faifaiga kolā e iku mai i te fakakese‵kesega o tino, kae ke ‵fuli foki i ei a mafaufauga mo lagonaga o se tino e uiga ki tino o te suā potukau. E mata, e mafai eiloa o fai a te mea tenei? Kafai e mafai, e pefea la? Ke onoono aka tatou ki nāi mea ‵tonu ne ‵tupu i te olaga kolā ka fesoasoani mai ke sē lavea fua ne tatou a ‵fuliga kolā e mafai o fai ne tino i olotou olaga kae ko te mea foki telā e mafai o fesoasoani atu ki a latou ke fai penā.

NE FESOASOANI ATU TE TUSI TAPU KE MANUMALO LATOU I TE FAKAILOGA TINO

Linda: Au ne fanau i Afelika ki Saute. Ne kilo atu au ki so se tino Afelika ki Saute telā e se ‵kena e pelā me fatauvā, e seki akogakae sē fakatuagagina kae ne tavini fua a tino ‵kena. Ne ‵lave au i te matāsele o te fakailoga tino e aunoa mo te iloa ne au. I te taimi eiloa ne kamata ei au o sukesuke ki te Tusi Tapu, ne kamata ei o mafuli a te uiga masani tenā. Ne tauloto ne au me i te “Atua e se fakailoga tino” kae ko te loto e tāua malosi atu i lō te ‵lanu o ‵tou pa‵kili io me ko te ‵gana telā e fai‵pati tatou ki ei. (Galuega 10:34, 35; Faataoto 17:3) Ne fesoasoani mai te Filipi 2:3 ke matea ne au me kafai e kilo atu au ki tino katoa e pelā me e ‵sili atu i a au, ko mafai ei ne au o fakatakavale a te fakailoga tino. Ne fesoasoani mai ki a au a te ola e ‵tusa mo fakatakitakiga fakavae mai te Tusi Tapu ke fiafia au ki nisi tino faitalia me se a te ‵lanu o latou. Nei la, ko oti ne fakasaoloto au mai te uiga ko te fakailoga tino.

Michael: Ne tupu aka au i se kogā koga telā e tokouke malosi i ei a tino Ausetalia ‵kena, kae ne ati aka ei ne au se uiga fakailoga tino ki te kau Asia, maise eiloa a te kau Saina. Kafai au e tele i te motoka kae lavea ne au se tino e foliga mai pelā me se Asia, e vili ne au ki lalo a te kilasi o te motoka kae pakalaga atu ki ei mo pati sē āva penei, “Foki ki tou fenua, tino Asia!” Fakamuli ifo, ne matea ne au te auala e kilo atu ei te Atua ki tino, i te taimi ne sukesuke ei au ki te Tusi Tapu. E alofa a ia ki a latou faitalia te koga ne o‵mai ei latou io me pefea olotou foliga. Ne otia toku loto i te alofa tenei, kae ne ‵fuli i ei a toku takalialia ki te alofa. E fakaofoofogia ke fai se ‵fuliga lasi penei. Ko fiafia malosi nei au o ‵kau fakatasi mo tino mai i atufenua mo telega kese‵kese katoa. Ne fakalauefa ne te mea tenei a taku kilo ki te olaga kae ne maua i ei ne au a te fiafia lasi.

Sandra: A toku mātua se tino mai Umunede i Delta State, Nigeria. A te kāiga o toku tamana ne o‵mai mai i Edo State kae fai‵pati ki te ‵gana Esan. Ona ko kese‵kesega konei, ne pokotia masei toku mātua i uiga fakailoga tino mai kāiga o toku tamana ke oko eiloa ki te aso ne mate ei tou fafine. Tela la, ne tauto au ke seai saku mea e fai ki so se tino telā e faipati ki te ‵gana Esan kae ka sē avaga lele au ki se tino mai Edo State. Kae i te taimi ne kamata ei au o tauloto ki te Tusi Tapu, ne kamata ei au o kilo atu ki mea i se kilokiloga ‵kese. Ona ko pati a te Tusi Tapu i te Atua e se fakailoga tino kae talia ne ia so se tino telā e mataku ki a ia, e mafai pefea o takalialia au ki tino ona ko olotou matakāiga io me ko ‵gana? Ne ‵fuli oku mafaufauga kae fai ke fealofani mo te kāiga o toku tamana. Ne fiafia au i te fakagaluegaga o fakatakitakiga fakavae mai te Tusi Tapu kae tuku mai i ei ki a au a te filemu o te mafaufau. Ne fesoasoani mai foki ki a au ke fealofani mo nisi tino faitalia olotou olaga ne ‵tupu aka i ei, telega, ‵gana, io me ko fenua. Kae ko te tagata telā ne avaga au ki ei? A iane vau mai i Edo State kae faipati ki te ‵gana Esan!

Kaia ne mafai ei o fesoasoani atu a te Tusi Tapu ki a latou konei mo nisi tino aka e tokouke ke manumalo i te takalialia malosi mo te fakailoga tino? Ona ko te Tusi Tapu ko te Muna a te Atua. E isi sena malosi o ‵fuli a te mafaufau mo lagonaga o se tino e uiga ki nisi tino. E se gata i ei, e fakaasi mai i te Tusi Tapu a te suā mea telā e manakogina ke fakaseai ei a uiga fakailoga tino katoa.

KA FAKASEAI NE TE MALO O TE ATUA A UIGA FAKAILOGA TINO KATOA

A koi fesoasoani mai a te iloaga i te Tusi Tapu ke pule faka‵lei kae tapale kea‵tea ne tatou a lagonaga ma‵losi, e lua a mea kolā e ‵tau o fakafesagai tatou ki ei a koi tuai o fakaseai katoatoa atu a uiga fakailoga tino. Te mea muamua, ko te agasala mo te tulaga se ‵lei katoatoa o tino. E manino ‵lei a pati i te Tusi Tapu: “E seai la se tino e se agasala.” (1 Tupu 8:46, Tusi Tapu Tauloto) Tela la, faitalia te taumafai malosi o tatou, e ‵pau eiloa a te mea e fe‵paki mo tatou mo te apositolo ko Paulo telā ne tusi mai, penei: “E se fai ne au a te mea tonu telā e manako au o fai, ona ko te masei telā e nofo i loto i a au.” (Loma 7:21) Tela la, e isi eiloa se taimi ka toe ‵foki ei a ‵tou loto se ‵lei katoatoa ki “mafaufauga ma‵sei” kolā e fai ei tatou ke fakailoga tino.—Maleko 7:21.

A te lua o mea, ko fakamalosiga a Satani te Tiapolo. E fakamatala mai i te Tusi Tapu i a ia “se tino tatino” kae “e takitaki ‵se ne ia te lalolagi nofoaki kātoa.” (Ioane 8:44; Fakaasiga 12:9) E fakamatala mai i te mea tenā a te pogai ko salalau malosi ei a te fakailoga tino mo te pogai e se mafai ei ne tino o fakaseai a te fakailoga tino, fakakese‵kesega o tino, tamatega o tino, mo nisi vaega o fakataputapuga o tino, lotu, mo maopoopoga a tino.

Tela la, a koi tuai o fakaseai katoatoa a te fakailoga tino, e ‵tau o tapale muamua kea‵tea a te agasala, te tulaga sē ‵lei katoatoa, mo te fakamalosiga a Satani te Tiapolo. E fakaasi mai i te Tusi Tapu me ka fakataunu ne te Malo o te Atua a te mea eiloa tenā.

Ne fakaakoako ne Iesu Keliso ana soko ke ‵talo atu ki te Atua i pati konei: “Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.” (Mataio 6:10) A te Malo o te Atua ko te auala fua telā ka fakaseai katoatoa i ei a fakamasinoga sē ‵tonu katoa—e aofia i ei a vaega katoa o fakataputapuga mo te fakailoga tino.

Kafai ko pule mai te Malo o te Atua ki te lalolagi nei, ka “‵sai” a Satani io me ‵loka ‵mautakitaki, ko te mea “ke se toe takitaki ‵se ne ia a fenua.” (Fakaasiga 20:2, 3) I te taimi tenā ka isi se “lalolagi fou,” io me se kaukāiga o tino telā “e maua i ei te amiotonu.”a—2 Petelu 3:13.

A latou kolā e ola i loto i te kaukāiga amiotonu tenā ka maua ne latou te tulaga ‵lei katoatoa, ko saoloto mai te agasala. (Loma 8:21) A te ‵nofo o latou mai lalo o te Malo o te Atua, “ka seai eiloa se mea fakamataku kae masei.” Kaia? Me i “te laukele ka ‵fonu i te malamalama i uiga o te Aliki [Ieova].” (Isaia 11:9) I te taimi tenā, a tino katoa ka tauloto ki auala o Ieova te Atua kae fakaakoako ki ana uiga alofa. Ko tena uiga, a vaega katoa o te fakailoga tino ka fakaseai, “i te Atua e se fakailoga tino.”—Loma 2:11.