E Mafai o Talitonu Koe ki Lotu e Uiga ki Mea Tau Amioga?

“Ne a‵koga fakatasi au mo tino e tokouke kolā ne fai pelā me ne tino ‵lotu,” ko pati a Sylvia, telā e galue i te pisinisi ki te tausiga o te ola ‵lei. “E ui i ei, e fai fakaloi‵loi olotou āsiga kae fakaaoga a vailakau tapu. E seai eiloa se aoga o te lotu ki olotou olaga totino.”

E fai mai te tagata e igoa ki a Lionel: “A tino e ga‵lue tasi mo au e ‵loi kae ma‵saki fakaloi‵loi. E isi ne olotou lotu kae sē fakaaoga ne latou​—e pelā fua me se mea e fai ke lavea ne tino.”

E se lasi te fakamalosi ne te lotu a mea tau amioga i olaga o tino e tokouke. A te tokoukega o tino i aso nei “e foliga mai me e fakamaoni latou ki te Atua” kae e “fakafiti ne latou tena ‵mana.” (2 Timoteo 3:5) Ne seki fai ne olotou takitaki se fakaakoakoga tonu, io me ne tuku atu ne faifeau ki olotou lafu a pati fakatonutonu mai i Tusitusiga Tapu kolā e manakogina i te faiga o amioga ‵lei. E setioa eiloa o tali‵tonu a tino e tokouke i te Atua e se fia saga mai ki te auala e ola ei latou.

SE A TE MEA E AKOAKO MAI I TE TUSI TAPU?

E fai mai te Tusi Tapu i te Atua e isi ne ana lagonaga kae tāua malosi ki a ia a ‵tou amioga. I te taimi ne ‵teke atu ei a tino Isalaelu mua ki te Atua, “ne fakafanoanoa . . . ne latou a ia.” (Salamo 78:40) E tigā te feitu tenā, e lasi te “fiafia e maua i te lagi” māfai e fakamaoni a te tino o ‵fuli ana amioga ma‵sei. (Luka 15:7) Kafai e loto fakafetai se tino ki uiga ‵gali o ‵tou Tamana faka-te-lagi, ka tupu aka a tena alofa ki te Atua, kae fakamalosi aka i ei a ia ke alofa ki te mea telā e alofa ki ei te Atua kae takalialia ki te mea telā e takalialia ki ei te Atua. ​—Amosa 5:15.

E FETAUI ‵LEI PEFEA A MOLIMAU A IEOVA MO TE MEA TENĀ?

A Molimau a Ieova e “fesoasoani ki tino ke faka‵lei aka a fesokotakiga i kāiga kae fesoasoani atu ki nisi tino ke fai mo fai ne tino tonu kae fakamaoni o te fenua,” ko pati i The Deseret News of Salt Lake City, Utah, U.S.A. Ne fakaopoopo mai te nusipepa: “E tau‵tali a tino o te lotu i tulaga ma‵luga i mea tau amioga. E tali‵tonu latou i te ‵pusi, inu malosi, fakaaoga ‵se o vailakau ma‵losi, kemupolo, amioga fakatauavaga faivalevale mo amioga fakasotoma, ne faifaiga kolā e fakamasei ei te feitu faka-te-agaga.”

E fesoasoani atu pefea a uiga totino o te Atua ki Molimau? “E lauiloa a te faitogafiti i te pisinisi ki te tausiga o te ola ‵lei,” ko pati a Sylvia telā ne taku muamua atu. “E faigofie o ‵lave i ei. Kae ne fesoasoani mai a te malamalama i lagonaga o Ieova e uiga ki ei ke fai ne au a te mea tonu.a Ne maua ne au a te fiafia mo te filemu i te loto.” Ne lotomalie a Sylvia i te ola e ‵tusa mo ana talitonuga fakalotu ne faka‵lei aka i ei a tena olaga.