Mafaufau Me Fai Koe Mo Fai Se Vaegā Tino Pefea

1, 2. ‘E ‵tau o fai tatou’ mo vaegā tino pefea ko te mea ke maua ne tatou te taliaga a te Atua?

E SĒ se mea masei ke saga atu ki mafaufauga o nisi tino e uiga ki a tatou. E pelā me ne Kelisiano, e mata, e se ‵tau o manava‵se malosi atu tatou ki te kilokiloga a Ieova ki a tatou? E se gata i ei, a ia ko te ‵toe Tino sili i te iunivesi kae ko ia foki “ko te pogai o te ola.”​—Sala. 36:9.

² I te faka‵mafamaiga o te kilokiloga a Ieova me ko tatou ‘e ‵tau o fai’ mo fai ne vaegā tino pefea, e fakamalosi mai te apositolo ko Petelu ki a tatou ke fai ‵tou “amioga ke ‵ma kae fakamaoni ki te Atua.” (Faitau te 2 Petelu 3:11.) Ke maua ne tatou te taliaga a te Atua, e ‵tau o fai ‵tou “amioga” ke ‵malu, ko tena uiga, ke ‵ma​—i mea tau amioga, i te mafaufau, mo te feitu faka-te-agaga. E se gata i ei, e ‵tau foki mo tatou o “fakamaoni ki te Atua” fakatasi mo te āva ki te Atua kae ‵piki ‵mau atu ki a ia. A te ‵sala atu ki tena taliaga e se aofia fua i ei a ‵tou amioga kae ko ‵tou ‵kanoloto foki. Ona ko Ieova ko te “tino e sukesuke ne ia a loto,” e iloa ne ia me ko ‵tou amioga e ‵malu kae tuku katoatoa atu ki a ia io me ikai.​—1 Nofo. 29:17.

3. E uiga ki ‵tou fesokotakiga mo te Atua, ne a fesili e ‵tau o mafau‵fau tatou ki ei?

³ E se manako a Satani te Tiapolo ke ‵sala tatou ki te taliaga a te Atua. A te tonuga loa, e taumafai a ia ki te ‵toe mea e mafai ne ia ke tiakina ne tatou a ‵tou fesokotakiga mo Ieova. E se fakatamala eiloa a ia o fakaaoga a loi ke fakakolekole ne ia tatou ke sē tapuaki atu ki te Atua. (Ioa. 8:44; 2 Koli. 11:13-15) Tela la, se mea poto ke fesili ifo ki a tatou eiloa: ‘E fakaloiloi pefea ne Satani a tino? Se a te mea e ‵tau o fai ne au ke puipui ei toku fesokotakiga mo Ieova?’

E FAKALOILOI PEFEA NE SATANI A TINO?

4. I te taumafai o fakamasei ‵tou fesokotakiga mo te Atua, se a te mea e taketi ki ei a Satani, kae kaia?

⁴ “E tofotofogina a tino taki tokotasi mai te saga atu ki takolekolega o ana manakoga totino,” e tusi mai te soko ko Iakopo. “Tela la, kafai ko faitama te manakoga, ko fanau mai i ei te agasala, kae kafai ko oti ne fakataunu te agasala, ko oko mai ei te mate.” (Iako. 1:14, 15) I te taumafai ke fakamasei a ‵tou fesokotaki atu ki te Atua, e taketi eiloa a Satani ki te māfuaga o ‵tou manakoga​—ko ‵tou loto.

5, 6. (a) E auala i te ā e fai ei tatou ne Satani mo fai a tena taketi? (e) Ne a auala e fakaaoga ne Satani i te taumafai o fakamasei a manakoga o ‵tou loto, kae pefea te apo o ia i te fakaaogaga o mea konā?

⁵ E auala i te ā e fai ei ne Satani a ‵tou loto mo fai a tena taketi? E fai mai te Tusi Tapu i “te lalolagi kātoa ko nofo mai lalo i te pule a te tino masei.” (1 Ioa. 5:19) E aofia i meatau a Satani “ko mea i te lalolagi.” (Faitau te 1 Ioane 2:15, 16.) E siliga atu i te fia afe tausaga ne fakagaligali ei ne te Tiapolo a te lalolagi tenei ke fakaloiloi ei a tino. Ona ko tatou e ‵nofo i te lalolagi tenei, e ‵tau ke puipui tatou mai i ana aofaga ‵funa.​—Ioa. 17:15.

⁶ E fakaaoga ne Satani auala kolā e fakamasei ei a manakoga o te loto. E fakaasi mai ne te apositolo ko Ioane a auala e tolu kolā e fakaaoga ne Satani: (1) “manakoga o te foitino,” (2) “manakoga o mata,” (3) “mea e fakamata‵mata ki ei a tino i te olaga nei.” Ne fakaaoga ne Satani auala konā ke tofotofo ki ei a Iesu i te koga lavaki. Ona ko te uke o tausaga ne fakagalue ei ne ia vaegā matasele penā, ko magoi atu i aso nei a te fakaaogaga ne Satani a mea konā me ko iloa ‵lei ne ia a te matāsele e ‵tau o fakaaoga ki tino taki tokotasi. A koi tuai o mafau‵fau tatou ki auala kolā e mafai o fakaaoga ke puipui ei tatou i te feitu tenei, ke onoono aka tatou me ne manuia pefea a auala kolā ne fakaaoga ne Satani ki a Eva kae sekimanuia ki te Tama a te Atua.

“MANAKOGA O TE FOITINO”

7. Ne fakaaoga pefea ne Satani a “manakoga o te foitino” ke tofotofo aka ei a Eva?

⁷ E isi se manakoga tāua o tino ke fakamalosi aka ei te foitino​—ko te manako ki te mea‵kai. Ne faite ne te Mafuaga a te lalolagi ke maua mai i ei a mea‵kai e uke. Kāti e taumafai a Satani o fakaaoga a te manakoga masani ki meakai ke tofotofo ei tatou ke fulitua ki te faiga o te loto o te Atua. Ke mafaufau ki te auala ne fai ei ne ia te mea tenā ki a Eva. (Faitau te Kenese 3:1-6.) Ne fai atu Satani ki a Eva me e mafai a ia o kai ki te fuaga o “te lakau telā e iloa ei te mea ‵lei mo te mea masei” kae sē mate, kae fai atu foki ki tou fafine me ko te aso eiloa telā e kai a ia ki ei, ka pelā a ia mo te Atua. (Kene. 2:9) Ne fakauiga te Tiapolo me ne seki ‵tau o fakalogo a Eva ki te Atua ko te mea ke ola ei a ia. Ko oko eiloa i te matagā a te loi tenā! I te taimi eiloa ne ‵toki ei a te manatu tenā ki te mafaufau o Eva, e lua a mea e ‵tau o filifili ki ei tou fafine: Ko te ‵teke atu ki te manatu tenā, io me ko te mafaufau faeloa ki ei, ko talia ei ne ia ke tupu aka a tena manakoga ki te fuaga o te lakau. Faitalia me e mafai ne tou fafine o fakaaoga a nisi lakau aka katoa, ne fakaiku ne ia ke mafaufau faeloa a ia ki pati a Satani e uiga ki te lakau i te kogāloto o te fatoaga, kae “ne puke aka ne ia te fuaga lakau, kai ei ne ia.” Ne fakamāfua aka ne Satani se manakoga i loto i tou fafine ki te mea telā e fakatapu ne tena Mafuaga.

8. Mai te fakaaogaga o “manakoga o te foitino,” ne taumafai pefea a Satani o tofotofo a Iesu, kae kaia ne seki iku manuia ei a te tofotofoga tenei?

⁸ Ne fakaaoga foki ne Satani a te togafiti tenā i te tofotofoga ne ia a Iesu i te koga lavaki. Mai tua o te 40 ao mo te 40 po ne fakalikiliki ei a Iesu, ne taumafai a Satani o tofotofo a ia mai te fakaaogaga o te manako ki meakai. “Kafai a koe se tama a te Atua,” ko pati a Satani, “fai ki fatu konei ke liu falaoa.” (Luka 4:1-3) E lua a filifiliga e ‵tau o fai ne Iesu: Ne mafai o filifili a ia ke fakaaoga tena malosi fai vavega ke fakamalie ei a tena manako ki meakai, io me e se fakaaoga. E ui eiloa ne fiakai a ia, ne seki fakatāua atu ne ia a tena manako ki meakai i lō te fakatumauga o tena fesokotakiga mo Ieova. “E tusi i te tusi,” ko te tali a Iesu, “‘E se ko meakai fua e ola ei te tino kae ko pati katoa kolā e ‵to mai i te gutu o Ieova.’”​—Mata. 4:4.

“MANAKOGA O MATA”

9. Se a te manatu e fakaasi mai i te tugāpati “manakoga o mata,” kae ne fakaaoga pefea ne Satani a te manakoga tenei ki a Eva?

⁹ Ne taku mai foki ne Ioane i “manakoga o mata” e fai pelā me se malei. E fakaasi mai i te tugāpati i te tino e kamata o manako ki se mea mai te kilokilo fua ki ei. Ne fakaaoga ne Satani a te manakoga tenei mai te fai atu ki a Eva: “Kafai e ‵kai koulua ki fuaga o te lakau tenā, ko koulua ka ‵pau mo te Atua.” Ko te lasi o te kilokilo o Eva ki ei, ko te momea aka o tena manako ki te fuaga ne fakatapu. Ne lavea ne Eva i te lakau tenā “se mea ko leva ne fia kilokilo ki ei a mata.”

10. I auala fea ne fakaaoga ei ne Satani a “manakoga o mata” ke tofotofo ei a Iesu, kae ne tali atu pefea a Iesu ki ei?

¹⁰ Kae e pefea a Iesu? Ne fakaasi atu ne Satani ki a Iesu “a malo katoa o te lalolagi nofoaki i se taimi toetoe. Ne fai atu te Tiapolo ki a ia: ‘Ka avatu ne au ki a koe a te pule i luga i mea katoa konei mo olotou ‵malu.’” (Luka 4:5, 6) Ka sē lavea tonu ne Iesu a malo katoa i se taimi toetoe, kae ne manatu aka a Satani me ka fiafia a Iesu ki te ‵malu o malo konei, e pelā mo te mea ne sae mai i se fakaasiga. Ne fai atu a Satani mo te sē ‵ma: “Kafai e tapuaki fakatasi mai fua koe ki a au, ka maua eiloa ne koe a mea katoa konei.” (Luka 4:7) E se manako lele a Iesu ke fai a ia pelā mo te vaegā tino telā e manako ki ei a Satani. E vave a tena tali ki ei. Ana muna: “E tusi i te tusi, ‘E ‵tau o tapuaki koe ki a Ieova tou Atua kae ko ia fua e ‵tau o tavini koe ki ei.’”​—Luka 4:8.

“MEA E FAKAMATA‵MATA KI EI A TINO I TE OLAGA NEI”

11. Ne fakakolekole pefea ne Satani a Eva?

¹¹ I te fakaasimaiga o mea o te lalolagi, ne taku mai ne Ioane a “mea e fakamata‵mata ki ei a tino i te olaga nei.” I te taimi ne ola fua i ei Atamu mo Eva i te lalolagi, ne mafai lāua o sē ‘fakamata‵mata ki mea e ola ei lāua’ i mua o nisi tino. Kae ne fakaasi atu eiloa ne lāua te fakamatamata. I te taimi ne tofotofo ei a Eva, ne fakauiga a Satani me ne taofi aka ne te Atua se mea fakaofoofogia mai i tou fafine. Ne fai atu te Tiapolo ki a ia me ko te aso eiloa e kai ei a ia ki “te lakau telā e fai ne ia te tino ke iloa te ‵lei mo te masei,” a ia “ka ‵pau mo te Atua, ka iloa foki ei ne koulua te mea ‵lei mo te mea masei.” (Kene. 2:17; 3:5) Ne fai atu a Satani me e mafai a Eva o tutokotasi mai i a Ieova. Ona ko te fakamatamata, ne talia ei ne tou fafine a te loi o Satani. Ne kai a ia ki te fuaga ne fakatapu mo te talitonu me ka sē mate tonu a ia. Ne ‵se ‵ki eiloa a ia!

12. Se a te suā auala telā ne taumafai a Satani o tofotofo a Iesu, kae ne tali atu pefea a Iesu ki ei?

¹² E ‵kese mo Eva, ne fai ne Iesu se fakaakoakoga fakaofoofogia o te loto maulalo! Ne taumafai a Satani o tofotofo aka a ia i te suā auala, kae ne ‵teke a Iesu ki ei ke oko foki ki te mafaufau o fai se mea telā ka tofotofo i ei te Atua. Ne mafai o fai a te mea tenā e pelā me se faifaiga fakamatamata! Ne manino ‵lei kae fai ‵tonu atu eiloa te tali a Iesu: “Kae e tusi foki i te tusi, ‘E se ‵tau o tofotofo ne koe a Ieova tou Atua.’”​—Faitau te Luka 4:9-12.

E MAFAI PEFEA O PUIPUI NE TATOU A ‵TOU FESOKOTAKIGA MO IEOVA?

13, 14. Fakamatala mai te auala e fakaaoga ei ne Satani a takolekolega i aso nei.

¹³ I aso nei, e fakaaoga ne Satani a takolekolega tai ‵pau mo mea kolā ne fakaaoga ne ia ki a Eva mo Iesu. Ke matagali ki “manakoga o te foitino,” e fakaaoga ne te Tiapolo a tena lalolagi ke fakatāua a amioga sē ‵tau mo te ‵kai malosi kae inu malosi. E auala i ata ma‵sei, maise eiloa i te Itaneti, e mafai o ‵po ne ia a tino kolā e se fakaeteete kae fai ne ia ke gali ki “manakoga o mata.” Kae ko te manako ki kope, tulaga pule, mo te takutakua e fai pelā me se tofotofoga ki tino fakamata‵mata mo latou kolā ‘e fakamata‵mata ki mea o te olaga tenei’!

¹⁴ “A mea o te lalolagi” e ‵pau mo poa a se tagata faiika. E mata‵gali kae e isi se kafilo e ‵piki ki poa takitasi konā. E fakaaoga ne Satani a mea kolā e ‵kilo a tino ki ei e pelā me ne manakoga masani i aso takitasi ke fakamalosi atu ki a latou ke fai a mea kolā e ‵kese mo tulafono a te Atua. A vaegā tofotofoga fai ‵funa penā ne fai ke fakamalosi aka ei a ‵tou manakoga kae fakamasei a ‵tou loto. A mea konā ne taumafaiga tonu eiloa e fai ke tali‵tonu tatou i te fakamaliega o ‵tou manakoga totino e tulaga muamua atu i lō te faiga o te loto o te Atua. E mata, ka pokotia tatou i takolekolega penā?

15. E mafai pefea o fakaakoako tatou ki a Iesu i te ‵teke atu ki tofotofoga a Satani?

¹⁵ E ui eiloa ne takavale a Eva i tofotofoga a Satani, ne iku manuia eiloa a Iesu i te ‵tekeatuga ki ei. I taimi takitasi ne tofotofo ei a ia ne Satani, ne tuku atu ne ia se tali mai i Tusitusiga Tapu, penei: “E tusi i te tusi” io me “Kae tusi foki i te tusi.” Kafai tatou ne tamaliki a‵koga ‵lei o te Tusi Tapu, ka masani ‵lei tatou mo Tusitusiga Tapu kae mafai o fesoasoani mai ke mafaufau tonu tatou i taimi o tofotofoga. (Sala. 1:1, 2) A te masaua o fakaakoakoga a tino fakamaoni taki tokotasi i Tusitusiga Tapu kolā ne a‵lofa fakamaoni ki te Atua e fesoasoani mai ke fakaakoako tatou ki ei. (Lo. 15:4) A te mataku tonu ki a Ieova mo te alofa ki mea kolā e alofa a ia ki ei kae takalialia ki mea kolā e takalialia a ia ki ei, ka puipui ei tatou.​—Sala. 97:10.

16, 17. E pokotia pefea a tatou taki tokotasi i ‘te malosi o ‵tou mafaufau’?

¹⁶ E fakamalosi mai te apositolo ko Paulo ke fakaaoga a ‘te malosi o ‵tou mafaufau’ ke fai tatou mo tino kolā e fulifuli ne mafaufauga o te Atua, kae e se ko mafaufauga o te lalolagi. (Lo. 12:1, 2) I te faka‵mafamaiga o te manakoga ke pule faka‵lei atu tatou ki mea kolā e mafau‵fau tatou ki ei, ne fai mai a Paulo: “Ko ‵fuli ne matou ki lalo a manatu ‵se mo mea ma‵luga katoa kolā e ‵teke atu ki te poto o te Atua, kae e fakatakavale ne matou a manatu katoa ko te mea ke faka‵logo ki te Keliso.” (2 Koli. 10:5) E lasi ‵ki te fakamalosiga o ‵tou mafaufauga ki a tatou, tela la, e manakogina “ke mafau‵fau faeloa” tatou ki mea kolā e fakafiafia atu ki te Atua.​—Fili. 4:8.

¹⁷ E se fakamoe‵moe tatou me e mafai o ‵malu tatou māfai e fagai ki ‵tou mafaufau a mafaufauga mo manakoga sē ‵tau. E ‵tau mo tatou o a‵lofa ki a Ieova mo “te loto ‵ma.” (1 Timo. 1:5) A te loto ko ia eiloa ko faka‵se tino, kae e mafai o sē lavea ne tatou a te lasi o te pokotia o tatou i “mea o te lalolagi.” (Iele. 17:9) Tela la, e mata, e se ‵tau mo tatou o ‘tumau i te tofotofo me e mata, e ‵piki ‵mau tatou ki te fakatuanaki, tumau i te fakamaoni aka o tatou eiloa’ mai iloiloga o tatou mo te fakamaoni ki mea kolā ko oti ne tauloto ne tatou mai i te Tusi Tapu?​—2 Koli. 13:5.

18, 19. Kaia e ‵tau ei o fakaiku aka ne tatou ke fai tatou mo vaegā tino kolā e manako a Ieova ki ei?

¹⁸ A te suā mea telā e fesoasoani mai ke ‵teke atu tatou ki “mea o te lalolagi” ko te masaua faeloa o pati fakaosofia a Ioane: “Ka fakaseai atu te lalolagi e pelā foki mo ana manakoga, kae ko te tino telā e fai ne ia te loto o te Atua ka tumau eiloa ki te se-gata-mai.” (1 Ioa. 2:17) E foliga mai i te lalolagi a Satani e tumau kae tonu. Kae i se aso e tasi, ko oti atu ei. E seai se mea ne ofo mai ne te lalolagi a Satani e tumau. A te masaua o te manatu tonu tenā ka fesoasoani mai ke sē fakaloiloigina tatou ne takolekolega a te Tiapolo.

¹⁹ E fakamalosi mai te apositolo ko Petelu ke fai tatou mo te vaegā tino telā e talia ne te Atua “a koi fakatali‵tali kae olioli faeloa koutou ki te oko mai o te aso o Ieova. I te aso tenā ka fakaseai atu ei a te lagi telā ka ‵ka i te afi kae ka liu suavai a mea katoa i ei ona ko te lasi o te ‵vela!” (2 Pe. 3:12) Ko pili fua nei o oko mai te aso tenā, kae ka fakaseai ne Ieova a vaega katoa o te lalolagi a Satani. Ke oko atu ki te taimi tenā, ka fakaaoga faeloa ne Satani “a mea o te lalolagi” ke tofotofo ei tatou, e pelā mo te tofotofoga ne ia a Eva mo Iesu. E se ‵tau o fai tatou pelā mo Eva ke fakama‵lie fua a ‵tou manakoga totino. Te faiga penā e pelā eiloa me ko fai a Satani mo fai ‵tou atua. E ‵tau o fai tatou pelā mo Iesu kae ‵teke atu ki takolekolega penā, faitalia te mata‵gali mai o olotou foliga. Ke na fakaiku aka ne tatou taki tokotasi ke fai tatou mo vaegā tino kolā e manako a Ieova ki ei.