Kaia ko Uke Katoa ei a Logo‵maega?

Ke malamalama i te pogai ko uke ‵ki ei a logo‵maega mo te pogai ne seki iku manuia ei a taumafaiga a tino ke fakagata aka, e ‵tau o iloa ne tatou a te māfuaga tonu o logo‵maega katoa. E ui eiloa e kese‵kese kae faigata a te māfuaga o latou, e fakafetai tatou me e mafai o fesoasoani mai te Tusi Tapu ke iloa ne tatou a mea konā. I te mataupu tenei, ka suke‵suke tatou ki pogai fakavae e lima e uke ‵ki ei a fakalavelave. E fakamalosi atu matou ki a koe ke mafaufau faka‵lei ki pati a te Tusi Tapu kae onoono me e fesoasoani mai pefea te Muna a te Atua ke malamalama faka‵lei tatou i te māfuaga tonu o te fakalavelave tāua tenei.—2 Timoteo 3:16.

◼ IKUGA O TE PULEGA MASEI

Muna a te Tusi Tapu i tino “e se fia‵fia manafai e pule a tino amio ma‵sei.”—Faataoto 29:2.

E ‵fonu a tala fakasolopito i tino pule kolā e pule fakasauā, e maua i ei ne olotou tino a logo‵maega e uke. E tonu, e se ko tino pule katoa e fai penā. Kāti e ‵saga tonu a nisi tino ki olotou tino. Kae, ko te taimi eiloa e nofo ei mo latou te malosi, e masani o lavea ne latou me ka sē taunu olotou taumafaiga mai i te fakamasei io me fakatau‵fai ki te tulaga pule. Io me kāti e fakaaoga ‵se olotou malosi ke aoga ki a latou eiloa, kae masei ki tino. “A te tala fakasolopito se tala o taumafaiga kolā ne fakatamala o fai, se tala o fakamoemoega kolā ne seki taunu,” ko pati a te failautusi mua o te Iunaite Sitete ko Henry Kissinger.

E fai mai foki te Tusi Tapu: “Te Aliki [Ieova], e iloa ne au me e seai se tino e fai mo pule o tona fakaikuga.” (Ielemia 10:23, T.T.Tauloto) E se lava te poto mo te iloa o tino sē ‵lei katoatoa o pule ki olotou mea totino mo te manuia. Kafai e se mafai ne tino o pule ki olotou auala totino, e mafai pefea o fakatonutonu ne latou se atufenua? E mata, e lavea ne koe te pogai e se mafai ei ne tāgata pule o fakaseai a logo‵maega? A te tonuga loa, e māfua mai i se malo masei io me se pulega a logo‵maega!

◼ FAKAMALOSIGA A LOTU ‵SE

Muna a Iesu: “Ona ko te mea tenei ka iloa ei ne tino katoa i a koutou ko oku soko, manafai e fakatau a‵lofa koutou.”—Ioane 13:35.

E folafola ne takitaki lotu o talitonuga mo potukau fakalotu katoa a te alofa mo te ‵kau fakatasi. A te tonuga loa, ne fakata‵mala latou o ‵toki se alofa lasi ki loto i olotou tino ke lava o fakaseai a uiga fapito. I lō te fesoasoani o ati aka te alofa, e masani o ‵lago atu a te lotu ki mavae‵vaega, fapito mo fakatau‵faiga i va o tino mo potukau fakafenua. I te fakaotiga o tena tusi Christianity and the World Religions, ne tusi mai te faifeau ko Hans Küng: “A toe fakatau‵faiga fakapolitiki fakasauā kae fia ‵sili ko fakatau‵faiga kolā e fakamalosi, fakaoso, kae talia ne lotu.”

I tafa i ei, ko oti ne talia ne faifeau o lotu e uke a te ‵moe tasi kae seki avaga, te mulilua, mo te avaga o te tagata ki te tagata mo te fafine ki te fafine. Ne iku atu a te mea tenei ki te salalau o masaki, faka‵toga o pepe, fai‵tama fo‵liki, mo avaga ma‵vae mo kāiga mavae‵vae, kolā e iku atu ki te ‵mae mo te tigāina.

◼ TE SĒ ‵LEI KATOATOA O TINO MO MANAKOGA KAIMA‵NAKO

“Kae e tofotofogina a tino taki tokotasi mai te saga atu ki takolekolega o ana manakoga totino. Tela la, kafai ko faitama te manakoga, ko fanau mai ei te agasala.”—Iakopo 1:14, 15.

Ona ko te tulaga sē ‵lei katoatoa telā ne togi mai, e faigofie o fai ne tatou a agasala mo mea ‵se kae ‵tau o taua atu tatou ki “te faiga o mea e manako ki ei te foitino.” (Efeso 2:3) E mafai o faigata a te ‵teke atu ki se manakoga masei māfai e isi se avanoaga ke fakataunu. Kafai e taka‵vale tatou i se manakoga masei, e fakafanoanoa ‵ki a te ikuga e maua mai i ei.

Ne tusi mai a te tino tusitala ko P. D. Mehta: “A te ukega o logo‵maega e pogai mai i ‵tou manakoga totino, ‵tou fiafiaga sē pulea kae aofia malosi i ei, ‵tou kaima‵nako mo ‵tou fia ‵sili.” Ko oti ne fakamasei ne te manako malosi mo te umiti ki vaega katoa—meainu ma‵losi, vailakau tapu, kemupolo, faifaiga fakatauavaga, mo nisi mea aka—a tino e tokouke kolā e “fakaaloalogina” i olotou fenua kae e logo‵mae i ei olotou kāiga, taugasoa, mo nisi tino. I te ‵kilo atu ki te tulaga sē ‵lei katoatoa o tino, e ‵tau o lotoma‵lie tatou ki pati a te Tusi Tapu: “E manino ‵lei ki so se tino telā e isi ne ana mata ke kilo atu ki te mānava fi‵ta o mea katoa kolā ne faite i te taimi nei i se taumafaiga telā e fai i te lalolagi kātoa.”—Loma 8:22, The New Testament in Modern English, by J. B. Phillips.

◼ TE MA‵LOSI O AGAGA MA‵SEI

E fakaasi mai i te Tusi Tapu i a Satani ko “te atua o te olaga masani tenei” kae e ‵kau atu ki a ia agaga ma‵sei kae ma‵losi ko temoni.—2 Kolinito 4:4; Fakaasiga 12:9.

E pelā mo Satani, e aofia malosi a temoni i te pule atu kae takitaki ‵se a tino. Ne fakailoa mai ne te apositolo ko Paulo a te mea tenei i ana pati: “Tatou e se taua mo tino kolā e faite ki ‵kano mo ivi, kae e taua eiloa tatou mo malo, mo pulega, mo takitaki o te lalolagi pouliuli tenei, mo agaga ma‵sei i te lagi.”—Efeso 6:12.

E ui eiloa e fia‵fia a temoni i te maneaneaga o tino, e se tenā te fakamoemoega tonu o latou. E ma‵nako latou o ‵fuli a tino kea‵tea mai te Atua Tafasili i te Maluga, ko Ieova. (Salamo 83:18, NW) A faifaiga pelā mo te matematega o fetu, faivailakau, faitapune, mo te fai kaiva ko nāi togafiti kolā e fakaaoga ne temoni ke fakaloiloi kae pule atu ki tino. Tenā te pogai e fakailoa mai ei ne Ieova ki a tatou a tulaga fakama‵taku konā kae tuku mai se puipuiga ki tino katoa kolā e ‵teke ki a Satani mo te kau temoni.—Iakopo 4:7.

◼ KO OLA TATOU I “ASO FAKAOTI”

I se lua afe tausaga ko ‵teka, ne ‵valo mai te Tusi Tapu: “Ke iloa ne koe te mea tenei, me ka oko mai eiloa a toe taimi faiga‵ta i aso fakaoti.”

I te fakasino atu ki te mea telā ka fai ei ke faiga‵ta aso fakaoti, ne toe fai mai a ia: “Me ka a‵lofa fua a tino ki a latou eiloa, ka va‵lea ki tupe, ka fakamata‵mata, ka fia ‵sili, . . . ka galo te alofa masani i a latou, ka se lotoma‵lie ki so se feagaiga, ka gutu fatu‵fatu, e seai se loto pulea, e amio fakasaua, e se ma‵nako ki mea ‵lei, e fai togafiti, e ma‵keke olotou ulu, e ‵fonu i te fakamatamata, e va‵lea ki fakafiafiaga i lō te a‵lofa ki te Atua.” E mautinoa ‵lei i te pogai tonu o logo‵maega katoa kolā e lavea ne tatou i aso nei, e fakaasi mai i ei me ko ‵nofo tatou i “aso fakaoti.”—2 Timoteo 3:1-4.

I te kilo atu ki pogai kolā ko oti ne mafau‵fau tatou ki ei, e mata, e se manino mai i ei te pogai e se mafai ei ne tino o fakagata aka a logo‵maega, faitalia a fakamoemoega ‵lei o latou? Tefea la te koga e maua i ei ne tatou se fesoasoani? E ‵tau o ‵kilo atu tatou ki ‵tou Mafuaga, telā ne tauto mai “ke lepe ne ia a galuega a te Tiapolo” mo ana soko. (1 Ioane 3:8) Ka faipati a te suā mataupu ki te mea telā ka fai ne te Atua ke fakaseai a māfuaga katoa o te logo‵mae.

[Ata i te itulau e 4]