Ko Pili o Oti Atu a Logo‵maega!
Mafaufau i a koe e ola i se lalolagi e seai ne logo‵maega i ei—se lalolagi e seai ne amioga solitulafono, taua, masaki, mo fakalavelave o te natula. E ala aka koe i taeao katoa e aunoa mo te manavase ki fakamaseiga, fakasauāga, io me ko te sē mautinoa o mea tau tupe. E a, ko to ‵tagi gali katoa a te mea tenei ke tali‵tonu ki ei? E tonu, e seai se tino io me se fakapotopotoga ne fai ne tino e mafai o aumai ne ia a tulaga penā. Kae ko oti ne tauto mai te Atua me ka ave kea‵tea ne ia a māfuaga katoa o logo‵maega o tino, e aofia i ei a latou kolā ne sau‵tala tatou ki ei i te mataupu mai mua atu. Onoono la ki tautoga mai i te Muna a te Atua, ko te Tusi Tapu kolā e fakasolo mai:
◼ TE PULEGA A TE MALO ‵LEI
“Ka fakatu ne te Atua o te lagi a te malo telā ka sē toe gata mai. Ka sē toe mafai o takavale a te malo tenā. Ka fakatakavale ne ia a malo katoa konā, kae ka tumau ki te se-gata-mai.”—Tanielu 2:44.
A te Malo o te Atua se malo faka-te-lagi. Ka sui ne tena Pule filifilia, ko Iesu Keliso, a te tulaga o pulega katoa a tāgata kae ka fai a te loto o te Atua, e se i te lagi fua kae i te lalolagi foki nei. (Mataio 6:9, 10) Ka sē toe sui a te malo tenei ne se malo o tāgata i te mea ko “te Malo se-gata-mai o te ‵tou Aliki mo te ‵tou Fakaola ko Iesu Keliso.” E mautinoa me ka maua a te filemu se-gata-mai.—2 Petelu 1:11.
◼ KA SĒ TOE AI NE LOTU ‵SE
“A Satani e fulifuli faeloa ne ia a ia eiloa ko te mea ke fai a ia e pelā me se agelu o te mainaga. Tela la, e sē se mea fakaofoofogia māfai e tumau foki ana tavini i te fulifuliga ne latou a latou eiloa ke fai pelā me ne tavini o te amiotonu. Kae ko te lotou ikuga e fakavae eiloa ki olotou galuega ne fai.”—2 Kolinito 11:14, 15.
Ka fakaasi faka‵sau mai a lotu ‵se e pelā me ko galuega a te Tiapolo kae ka tapale kea‵tea mai te lalolagi. Ka ‵galo atu katoa a te fāpito mo te fakamaligi toto o lotu. E tuku mai i ei a te avanoaga ki tino tapuaki katoa o “te Atua ola kae tonu” ke tapuaki atu ki a ia i te ‘tasi o te fakatuanaki’ kae “i te agaga mo te munatonu.” Ka iku atu a te mea tenei ki te filemu mo te ‵kau fakatasi!—1 Tesalonia 1:9; Efeso 4:5; Ioane 4:23.
◼ KA SĒ TOE AI SE TULAGA SE ‵LEI KATOATOA O TINO
“Ka ‵nofo fakatasi eiloa te Atua mo latou. Kae ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.”—Fakaasiga 21:3, 4.
E fai ne Ieova te Atua a te mea tenei e auala i tena Tama ko Iesu, telā ne mate mō tino. (Ioane 3:16) Mai lalo i te takitakiga a Iesu, ka toe maua ne tino a te tulaga ‵lei katoatoa. Ka sē toe ai ne logo‵maega me “ka ‵nofo fakatasi eiloa te Atua mo latou” kae ka ‵solo ne ia kea‵tea a “loimata katoa mai i olotou mata.” Ka fai a te sē ‵lei katoatoa mo logo‵maega o tino pelā me se mea mua; kae ko “tino amio‵tonu ka fai mo latou te fenua, kae ka ‵nofo faeloa i ei ki te se-gata-mai.”—Salamo 37:29.
◼ KA ‵GALO ATU AGAGA MA‵SEI
“Kae ne puke ne ia [Iesu Keliso] te talako, ko te gata taumua, telā ko te Tiapolo io me ko Satani, kae ne ‵sai atu a ia i loto i te 1,000 tausaga. Kae ne ‵pei atu ne ia a Satani ki te lua ‵poko kae ne ‵pono faka‵mau ne ia a ia i loto i ei, ko te mea ke se toe takitaki ‵se ne ia a fenua.”—Fakaasiga 20:2, 3.
Ka ‵galo atu katoa a fakamalosiga fakasatani māfai ko saisai a Satani mo te kau temoni kae ‵pei ki loto i te “lua ‵poko,” se tulaga telā ko sē gasuesue eiloa. Ka sē toe mafai o pule atu latou ki mea e fai ne tino. Mafāga o fakatapūga ke ola i se lalolagi ko seai ne fakamalosiga a Satani mo agaga ma‵sei i ei!
◼ KA PALELE ATU “ASO FAKAOTI”
Ka fakaoti atu “aso fakaoti” ki te mea telā e taku ne Iesu ko te “fakalavelave lasi.” Ana muna: “Ko te taimi eiloa tenā ka tupu ei te ‵toe fakalavelave lasi telā e seki tupu aka eiloa talu mai te kamataga o te lalolagi ke oko mai eiloa ki te aso nei, kae ka se toe tupu eiloa se mea penā.”—Mataio 24:21.
Ka lasi a te fakalavelave i mea kolā ka ‵tupu ne mea kolā e seki ‵tupu aka eiloa muamua. Ka oti atu a mea konei i “te taua i te aso lasi o te Atua Malosi Katoatoa,” telā e lauiloa e pelā me ko “Amaketo.”—Fakaasiga 16:14, 16.
E ‵kilo atu eiloa a tino kolā e a‵lofa ki te mea tonu i koga katoa ki te gataga o te olaga masei tenei. Ke mafau‵fau ki nāi fakamanuiaga kolā e faka‵tali mai ki a latou mai lalo i te Malo o te Atua.
KA UKE ATU FOKI A MEA E FAI NE TE ATUA!
Ka ‵sao atu “se vaitino tokouke” ki loto i se lalolagi fou kae filemu: E fai mai te Muna a te Atua me e isi “se vaitino tokouke” e se maua o lau ka “‵sao i te fakalavelave lasi” kae ka ola i loto i se lalolagi fou kae amiotonu. (Fakaasiga 7:9, 10, 14; 2 Petelu 3:13) Ka tuku atu a te lotou faka‵saoga ki a Iesu Keliso, “te Tamā Mamoe a Atua telā ka ave ne ia keatea a agasala a te lalolagi.”—Ioane 1:29.
Ka maua a mea aoga e uke mai i akoakoga a te Atua: I te lalolagi fou, “a te laukele ka ‵fonu i te malamalama i uiga o te Aliki [Ieova].” (Isaia 11:9) Ka aofia i te akoakoga mai te Atua a fakatonuga ki te auala e ola filemu ei mo tino katoa e ‵tusa mo te koga e ola tatou i ei. E tauto mai te Atua: “Au ko te Aliki [Ieova] te otou Atua, telā e manako o akoako koutou kae fakatonutonu foki koutou i te auala e ‵tau o olo koutou i ei.”—Isaia 48:17.
Ka toe faka‵tu aka a tino pele kolā ne ‵mate mai te tanuga: Ne fakatu aka ne Iesu a tena taugasoa ko Lasalo mai te mate i tena nofoga i te lalolagi. (Ioane 11:1, 5, 38-44) Tela la, ne fakaasi mai ne ia a te mea telā ka fai ne ia i se auala e lasi atu mai lalo i te fakatokaga a te Malo o te Atua.—Ioane 5:28, 29.
Ka tumau eiloa a te filemu mo te amiotonu ki te se-gata-mai: Mai lalo i te pulega a Keliso, ka fai amioga solitulafono mo fai se mea mua. E iloa pefea ne tatou a te mea tenā? Me e iloa ne Iesu a mea i loto o tino, kae ka fakaaoga ne ia te mea tenā ke fakamasino ki ei a tino amio‵tonu mo tino ma‵sei. A latou kolā e ita ma ‵fuli olotou auala ma‵sei ka sē talia ke ola i te lalolagi fou a te Atua.—Salamo 37:9, 10; Isaia 11:3, 4; 65:20; Mataio 9:4.
Ko oti ne mafau‵fau tatou ki nāi mea fua o valoaga e uke i te Tusi Tapu kolā e fakasino atu ki te taimi fakaofoofogia telā ka oko mai. Kafai ko pule mai te Malo o te Atua ki te lalolagi, ka tumau eiloa o maua a “te filemu katoatoa” ki te se-gata-mai. (Salamo 37:11, 29) Ka fakaseai a māfuaga katoa o te tigāina mo logo‵maega kolā ne pokotia i ei a tino. E mautinoa i a tatou a te mea tenei ona ko te tautoga a te Atua: “Kiloke! Ko faka‵fou ne au a mea katoa. . . . Tusi a pati konei ki lalo, me e fakamaoni kae ‵tonu a pati konei.”—Fakaasiga 21:5.
[Ata i te itulau e 6]
[Ata]
© Silke Woweries/Corbis