Ne Ofo Atu a Latou Eiloa mo te Loto Fia‵fia i Filipaina

E NOFO ki se sefulu tausaga ko ‵teka, ne ga‵lue a te tauavaga ko taki 30 sefulu tupu lā tausaga, ko Gregorio mo Marilou, e pelā me ne paenia i Manila kae isi foki eiloa ne lā galuega ‵togi tumau. Se mea faigata kae ne iku manuia eiloa lāua i ei. I konā, ne fakamasiki aka a Marilou ki te tulaga o te menetia i te pagike telā ne galue a ia i ei. “Ne fai ne mā galuega ‵lei ke tokagamalie mā olaga,” ko pati a tou fafine. Ona ko te ‵lei o mea tau tupe, ne fakaiku aka ne te tauavaga konei ke faite te lā fale telā ko leva ne moe‵miti ki ei i se kogā koga gali e nofo ki se 12 maila (19 km) i te feitu ki te saegalā o Manila. Ne ‵togi ne lāua se kamupane ke faite te fale kae ne fai se fakatokaga ke togitogi a te faitega o te fale i te masina i loto i te sefulu tausaga.

“NE MAFAUFAU AKA AU ME KO FAKALOILOI NE AU A IEOVA”

Muna a Marilou: “Ko oko eiloa i te uke oku taimi mo toku malosi e fakamāumāu ki taku galuega fou telā ko ala ei o galo toku loto finafinau ki mea faka-te-agaga. Ne mafaufau aka au me ko fakaloiloi ne au a Ieova.” E fakamatala mai a tou fafine: “Ko sē mafai ne au o tuku atu ki a Ieova a te taimi telā ko oti ne tuku atu ki te taviniga ki a ia.” Ona ko te sē fia‵fia ki te tulaga tenā, ne saga‵saga a Gregorio mo Marilou i te aso e tasi o fai‵pati ki te auala e fakaaoga ei te lā olaga. Muna a Gregorio: “Ne ma‵nako māua o fai se ‵fuliga kae e se iloa tonu ne māua a te mea e ‵tau o fai. Ne sau‵tala māua ki te auala e mafai ei o fakaaoga katoatoa te mā olaga i te galuega a Ieova, maise eiloa me e seai ne mā tamaliki. Ne ‵talo atu māua ki a Ieova mō se takitakiga.”

I te taimi tenā, ne lagona ne lāua a nāi lāuga e uiga ki te tavini atu i se koga telā e lasi ei te manakoga ki tino talai o te Malo. “Ne mafaufau aka māua i lāuga konei ko tali a Ieova ki mā ‵talo,” ko pati a Gregorio. Ne ‵talo atu a te tauavaga ke momea aka te lā fakatuanaki ko te mea ke maua te malosi o fai a fakaikuga ‵tonu. A te fakalavelave lasi e tasi ko te galuega ki te lā fale. Ko oti ne ‵togi ne lāua te aofaki tupe e manakogina mō te tolu tausaga. Ne a la mea e ‵tau o fai ne lāua? Muna a Marilou: “Kafai e fakagata ne māua te feagaiga, ka ‵galo katoa a mea kolā ko oti ne ‵togi ne māua​—⁠se aofaki lasi ‵ki. Kae ne ‵kilo atu eiloa māua ki ei e pelā me se filifiliga i te va o te fakamuamua o te loto o Ieova mo mā manakoga totino.” Mai te masaua o pati a te apositolo ko Paulo e uiga ki te ‘‵galo atu o mea katoa,’ ne fakaseai ei ne lāua a te feagaiga ki te faitega o te fale, tiakina a lā galuega ‵togi, fakatau ki tua a te ukega o lā kope, kae olo ki se fa‵kai tai ‵mao i te motu ko Palawan, i se 300 maila (480 km) i te feitu ki saute o Manila.​—⁠Fili. 3:⁠8.

“KO OTI NE ILOA” NE LĀUA

A koituai o olo, ne taumafai a Gregorio mo Marilou ke toka lāua o ola i se olaga faigofie, kae ne seki iloa ne lāua me pefea te faigofie te lā olaga fou seiloga ko oko lāua ki te lā koga ‵nofo. “Se mea fakapoi,” ko muna a Marilou. “E seai se iti, e seai eiloa ne mea kolā e fakafaigofie aka ei a te olaga. I lō te fakaaoga o te ulo tunu laisi ki te iti, e ‵tau o ‵kati a fafie kae kuka i luga i te afi. Ko manatunatu au ki te fano ki sitoa ‵lasi, kai i fale‵kai, mo nisi mea aka kolā e fai i te olaga i fa‵kai ‵lasi.” Kae ne tumau a te tauavaga tenei i te fakamasaua ki a lāua eiloa a te pogai ne ga‵sue ei lāua, ne seki leva, ko te mea eiloa ko masani lāua ki ei. Muna a Marilou: “Ko fiafia nei au o kilokilo ki te gali o te natula, e aofia i ei a fetu maina i te po. Kae sili i mea katoa, se mea fakafiafia ke kilo atu ki te mata fia‵fia o tino māfai e talai atu māua ki a latou. Mai te ga‵lue i konei, ‘ko oti ne iloa’ ne māua a te auala e maua ei te tokagamalie.”​—⁠Fili. 4:⁠12.

Muna a Gregorio: “I te mā okomaiga, e tokofa fua a Molimau i konei. Ko oko eiloa i te fia‵fia o latou i te taimi ne kamata ei o fai ne au a lāuga mō tino katoa i vaiaso taki tasi fakatasi mo te usuga o pese o te Malo kae ta ki taku kitala.” I loto i se tausaga, ne molimau ne te tauavaga tenei a te vave gasolo ki mua o te potukau foliki tenā ke fai mo fai se fakapotopotoga e toko 24 tino talai i ei. E fai mai a Gregorio: “Ne otia ‵ki mā loto i fakaasiga o te alofa kolā ne maua ne māua mai te fakapotopotoga tenei.” I aso nei, kafai e toe ‵kilo lāua ki te ono tausaga tupu ne ga‵lue ei lāua i te kogā koga ‵mao tenā, e fai mai lāua: “E seai se mea e mafai o faka‵tusa ki te fiafia telā e maua mai te ‵kilo atu ki te tokouke o tino ‵fou ko fai mo fai ne vaega o te fakapotopotoga. Ko sili atu nei te mafau‵fau o māua ki te aoga o te mā olaga i lō so se taimi aka.”

“KO OTI AU NE ‘TAMI KI EI KAE LAVEA AKA I A IEOVA E ‵LEI’!”

I Filipaina, e tai kātoa te 3,000 taina mo tuagane ko oti ne olo ki kogā koga kolā e lasi te manakogina o tino talai o te Malo i ei. E nofo ki te 500 mai i a latou ne tuagane seki a‵vaga. Ke mafau‵fau ki a Karen e pelā me se fakaakoakoga.

Ko 20 tupu nei tausaga o Karen, kae ne tupu aka i Baggao, Cagayan. Ne mafaufau faeloa tou fafine ki te fakalauefaga o tena galuega talai a koi talavou a ia. Ana muna: “Mai te iloa o te toetoe o te taimi koi ‵toe kae ‵tau o lagona ne tino katoa a te fekau o te Malo, ne manako ei au o galue i se koga telā e manakogina malosi i ei a tino talai.” E ui eiloa ne fakamalosi atu a nāi tino o tena kāiga ke kausaki atu tou fafine ki akoga ma‵luga i lō te fano ki nisi koga ‵mao o talai i ei, ne ‵talo atu a Karen ki a Ieova mō se takitakiga. Ne fai‵pati foki a ia mo latou kolā ne ga‵lue i se koga ‵mao. I te taimi ko 18 ei ana tausaga, ne fano tou fafine ki se kogā koga e nofo ki se 40 maila (64 km) te ‵mao mai i tena fa‵kai.

A te fakapotopotoga foliki telā ne fano a Karen o fesoasoani ki ei e tausi atu ki se kogā koga maugā i tafatafa o te feitu ki te Pasefika. E fai mai a Karen: “Ko te mea ke oko atu fua ki te fakapotopotoga fou mai Baggao, e tolu aso ne sa‵sale ei matou, ‵kake i mauga kae olo ifo ki lalo, kae silia atu i te 30 taimi e olo ei i loto i vaitafe.” Ne toe fai mai tou fafine: “E ono itula e sasale ei au ke oko ki nisi akoga faka-te-Tusi Tapu, moe i te fale o te tino akoga i te po, kae i te suā aso, ko sasale ei au i te suā ono itula o foki ki te fale.” E mata, ne aoga a taumafaiga katoa konā? “I nisi taimi a oku vae ko ‵mae, kae,” faopoopo mai a Karen mo te kata, “ne fai ne au akoga faka-te-Tusi Tapu e 18. Ko oti au ne ‘tami ki ei kae lavea aka i a Ieova e ‵lei’!”​—⁠Sala. 34:​8, NW.

“NE TAULOTO NE AU KE FAKALAGOLAGO KI A IEOVA”

Se a te mea ne fakamalosi atu ki a Sukhi, se tuagane seki avaga kae ko 40 tupu ana tausaga mai te Iunaite Sitete, ke fano ki Filipaina? I te 2011, ne kau tou fafine ki se fono o te fenua kae ne fakasau‵tala i ei se tauavaga. Ne fakamatala mai ne lāua te auala ne fakatau atu ei ne lāua ki tua a te ukega o lā kope ko te mea ke olo atu lāua ki Mexico o fesoasoani ki te galuega talai i konā. Muna a Sukhi: “Mai te fakasau‵talaga tenā, ne kamata ei au o mafaufau ki fakamoemoega kolā ne seki mafaufau muamua au ki ei.” I te taimi ne iloa ei ne Sukhi, telā se tino Initia, a te lasi o te fesoasoani e manakogina ne tino Punjabi kolā e ‵nofo i Filipaina, ne fakaiku aka ne tou fafine ke fano a ia o fesoasoani ki ei. E mata, e isi ne fakalavelave ne fepaki mo ia?

“A te fakaikuga me ko fea a kope e tausi kae ko fea a kope e ‵togi ki tua ne faigata atu i lō te mea telā ne fakamoemoe au ki ei,” ko pati a Sukhi. “Kae mai tua foki o te nofoga i se olaga tokagamalie i tausaga e 13 i toku fale totino, ne fano ei au o nofo i oku kāiga kae ko sē tokagamalie te olaga e pelā mo te taimi muamua. E sē se mea faigofie, kae se auala ‵lei ke fakatoka au o ola i se olaga faigofie.” Ne a mea faiga‵ta ne fepaki mo tou fafine i te fanoga ki Filipaina? “Ko toku mataku i tamā manu fo‵liki mo te solopū ko toe mea faiga‵ta ki a au. Ne tauloto ei au ke momea aka toku fakalagolago malosi ki a Ieova i te taimi nei!” E mata, ne aoga? E kata a Sukhi kae fai mai: “E fai mai a Ieova ki a tatou, ‘Tofotofo mai au kae ka ‵ligi ifo a vaegā mea ‵lei katoa.’ Ko lavea nei ne au a te tonu o pati konei i te taimi ne fesili mai ei a te tino i te fale ki a au, ‘Ka foki mai koe mafea? Koi uke ‵ki aku fesili.’ E lasi ‵ki te fiafia mo te lotomalie e maua ne au me e mafai ne au o fesoasoani atu ki tino kolā e fia‵kai i te feitu faka-te-agaga!” (Mala. 3:10) E toe fai mai a Sukhi: “A te tonuga loa, a te toe vaega faigata ko te faiga o se fakaikuga ke fano ki se koga. I te otiga ne fai ne au a te mea tenā, ne fakaofoofogia a te auala ne fakatoka ei ne Ieova a mea mō oku.”

“NE MANUMALO AU I TOKU MATAKU”

Ne tiaki ne Sime, se taina avaga ko 30 tupu ana tausaga, a Filipaina o fano o galue i se galuega ‵togi ‵lei i se fenua i te Middle East. A koi nofo atu i konā, ne maua ne Sime se fakamalosiga mai i se ovasia o fenua mo te lauga ne fai ne se sui o te Potukau Pule ke fakamuamua ne ia a Ieova i tena olaga. “Kae ko te mafaufau ke tiakina taku galuega ‵togi ne fai ei ke manavase malosi au,” ko pati a Sime. E ui i ei, ne tiakina ne ia a tena galuega kae toe foki ki Filipaina. I aso nei, e ga‵lue atu a Sime mo tena avaga ko Haidee i Davao del Sur, se kogā koga i te feitu ki saute o te fenua telā e manakogina a tino talai o te Malo ke talai i te koga lasi ‵ki tenā. “Kafai au e toe kilo ki tua,” ko pati a Sime, “ko oko eiloa i toku fakafetai me ne manumalo au i toku manavase ma tiaki a taku galuega ko te mea ke fakamuamua a Ieova. E seai aka se mea e sili atu i te fakamalie loto i lō te tuku atu o te ‵toe mea e maua ne koe ki a Ieova!”

“E MAUA I EI NE TATOU A TE LOTOMALIE KATOATOA!”

I te iloaga ne Ramilo mo Juliet, se tauavaga paenia ko taki 30 tupu lā tausaga, i te fakapotopotoga telā e nofo fua ki te 20 maila (30 km) te ‵mao mai te lā fale e ma‵nako ki se fesoasoani, ne ofo atu lāua ke ‵lago ki ei. Tela la, i vaiaso katoa, e ‵tele atu a Ramilo mo Juliet i te lā pasikaiti ki fakatasiga mo te galuega talai faitalia me ‵lei io me ma‵sei aso. E tigā eiloa te fakamataku o te faima‵laga i auala ma‵sei mo piliti fakatautau, e fia‵fia eiloa lāua me ko fakalasi aka a te lā galuega talai. Muna a Ramilo: “E 11 akoga faka-te-Tusi Tapu e fai ne māua mo taku avaga! E aofia i te tavini atu i se koga telā e lasi te manakoga i ei a te tuku katoatoa atu, kae e maua i ei ne māua se lotomalie katoatoa!”​—1 Koli. 15:58.

E fia tauloto ne koe a mea e uke e uiga ki te tavini atu i se koga telā e lasi te manakogina o tino talai o te Malo i tou fenua tonu io me i tua atu? Kafai e penā, faipati atu ki tou ovasia o fenua, kae faitau ki te mataupu “E Mafai ne Koe o ‘Fanatu ki Maketonia’?” i ‵Tou Galuega Talai i a Aokuso 2011.