“Ke Pologa Mō Ieova”

1. Faka‵tusa aka a te kilokiloga masani e uiga ki te pologa mo te mea telā ne fakamalosi mai i te Loma 12:11.

E ‵KESE ‵ki eiloa te pologa o te Kelisiano mai te pologa telā e mafau‵fau ki ei a tino e tokouke. E mafau‵fau latou i te fai mo pologa e ‵sae aka ei a mafaufauga o te pule fakasauā, fakafi‵ta, mo te fai masei. Kae e faipati eiloa te Muna fakaosofia a te Atua ki te pologa telā e aofia i ei a te tavini atu mo te loto fiafia ki se Matai alofa. I te taimi ne fakatonu atu ei te apositolo ko Paulo ki Kelisiano i te senitenali muamua ke “pologa mō Ieova,” ne fakamalosi aka ne tou tagata a te taviniga tapu telā e fakamalosi aka ne te alofa o te Atua. (Loma 12:11) Se a te mea e aofia i te vaegā pologa tenei? E mafai pefea o ‵kalo tatou kea‵tea mai te pologa ki a Satani mo tena lalolagi? Kae ne a taui o te tavini fakamaoni e pelā me se pologa a Ieova?

“A IA E ALOFA EILOA KI TENA PULE”

2. (a) Se a te mea e mafai o fakaseaoga i ei ne se pologa Isalaelu a tena saolotoga? (e) Se a te mea e tāua ei a te ‵suki o te taliga o se pologa loto fiafia?

² Mai te Tulafono telā ne tuku atu ne te Atua ki te kau Isalaelu, ne tauloto ei tatou ki te vaegā pologa telā e manako ki ei a Ieova mai i a tatou. Ne ‵tau o fakasaoloto te pologa Epelu i te fitu tausaga ne galue ei a ia. (Eso. 21:2) Kae ko te pologa telā e alofa tonu ki tena matai kae manako o tumau i tena taviniga, ne fai ne Ieova se fakatokaga fakaofoofogia ki ei. E ‵tau o aumai ne te matai a tena pologa o fakapale ki te mataloa io me ko te pou o te mataloa kae ‵suki a tena taliga ki se mea makaikai. (Eso. 21:5, 6) Se mea tāua i te fakatokaga tenei e aofia i ei a te taliga. I te ‵gana Epelu, a te manatu fakavae e uiga ki te fakalogo e fakaaoga i ei se pati telā e tau atu ki te lagona mo te fakalogologo. Ne manako a te pologa telā e loto fiafia o tumau i te fakalogo ki tena matai i tena taviniga. E fesoasoani mai te mea tenei ke amanaia tatou ki mea kolā e aofia i ‵tou tukuatuga ki a Ieova​—ko te loto fia‵fia o faka‵logo telā e fakamalosi aka ne te alofa ki te Atua.

3. Se a te fakavae o ‵tou tukuatuga ki te Atua?

³ I te taimi ne tuku atu ei tatou mō te papatisoga faka-Kelisiano, ko leva ne fakaiku aka ne tatou ke tavini atu ki a Ieova, ke fai mo ana pologa. Ne māfua ‵tou tukuatuga mai ‵tou ma‵nako o faka‵logo ki a Ieova kae fai tena loto. E seai se tino ne faimālō ne ia tatou ke fai te mea tenei. E tonu, a tamaliki foki kolā ko oti ne papatiso, ne fai penā i te otiga ne fai te lotou tukuatuga totino ki a Ieova, kae e se mai te fakafiafia atu ki olotou mātua. A te fakavae o ‵tou tukuatuga faka-Kelisiano ko te alofa ki ‵tou Matai faka-te-lagi, ko Ieova. “Tenei eiloa te uiga o te alofa ki te Atua,” ne tusi mai te apositolo ko Ioane, “ko te fakalogo ki ana fakatonuga.” ​—1 Ioa. 5:3.

E SAOLOTO, KAE POLOGA EILOA

4. Se a te mea e manakogina ke fai ei tatou mo “pologa a te amiotonu”?

⁴ Ko oko eiloa i te loto fakafetai o tatou ki a Ieova mō te faiga ke fai tatou mo ana pologa! Ko ‵tou fakatuanaki ki te taulaga togiola a Keliso e fakasaoloto ei tatou mai te ‵nofo pologa ki te agasala. Faitalia me koi sē ‵lei katoatoa tatou, ne loto fia‵fia eiloa tatou o ‵nofo mai lalo i te pulega a Ieova mo Iesu. Ne fakamatala faka‵lei mai ne Paulo a te mea tenei i tena tusi fakaosofia e tasi: “Koutou kolā e tali‵tonu i a koutou ko oti ne ‵mate e uiga ki te agasala kae ko ola nei koutou mō te Atua e auala i a Keliso Iesu.” I konā ne faka‵pula mai ei ne tou tagata: “E a, e se iloa ne koutou me kafai e tuku atu faeloa ne koutou a koutou ki se tino e pelā me ne pologa mai te faka‵logo ki a ia, a koutou ne pologa a te tino telā e faka‵logo koutou ki ei, me ko te agasala telā e iku atu ki te mate, io me ko te fakalogo telā e iku atu ki te amiotonu. Kae ke fakafetai atu ki te Atua i a koutou ne fai mo pologa a te agasala kae ko oti ne faka‵logo koutou mo te loto kātoa ki akoakoga kolā ne tuku atu ki a koutou. E tonu, ona ko koutou ko oti ne fakasaoloto mai te agasala, ko fai nei koutou mo pologa a te amiotonu.” (Loma 6:11, 16-18) Onoono la me e fakasino atu a te apositolo ki te ‘fakalogo mai te loto.’ E tonu, a ‵tou tukuatuga ki a Ieova e fai ei tatou mo “pologa a te amiotonu.”

5. Se a te taua i loto i a tatou telā e fakafesagai mo tatou katoa, kae kaia?

⁵ E tigā te feitu tenā, e isi ne fakalavelave e ‵tau o manumalo tatou i ei i te ola e ‵tusa mo ‵tou tukuatuga. E fe‵paki tatou mo taua e lua. Te mea muamua, ko te fepakiga telā ne fakafesagai ki ei a Paulo. “Kae ko toku ‵kanoloto tonu eiloa e fiafia ki te tulafono a te Atua,” ne tusi mai tou tagata, “kae e lagona foki ne au i toku foitino se isi tulafono telā e taua atu ki te tulafono i toku mafaufau kae e takitaki ne ia au ke pologa ki te tulafono o te agasala telā e nofo i toku foitino.” (Loma 7:22, 23) E tumau foki i a tatou a te tulaga sē ‵lei katoatoa. Kae ko te ikuga, e taua faeloa tatou mo ‵tou manakoga faka-te-foitino. Ne fakamalosi mai te apositolo ko Petelu ki a tatou: “Ke fai koutou mo fai ne tino saoloto, kae ke se fakaaoga te otou saolotoga ke ‵funa aka ei a mea ma‵sei, kae ke fai pelā me ne pologa a te Atua.”​—1 Pe. 2:16.

6, 7. E fai pefea ne Satani a te lalolagi tenei ke fia‵fai a tino ki ei?

⁶ A te lua o taua e fe‵paki mo tatou, ko ‵tou taua ki te lalolagi tenei e nofo mai lalo i fakamalosiga a temoni. E fakasaga mai eiloa a meatau a te pule o te lalolagi ko Satani ki a tatou, i te taumafai o fakamakosu a ‵tou a‵lofa fakamaoni ki a Ieova mo Iesu. E taumafai a ia o fakapologa tatou mai te tofotofoga o tatou ke tau‵tali i ana fakamalosiga ma‵sei. (Faitau te Efeso 6:11, 12.) A te auala e tasi e fai ei ne Satani a te mea tenei ko te fakagaligaliga o tena lalolagi ke fia‵fai a tino ki ei. “So se tino e alofa ki te lalolagi,” ne fakailoa mai te apositolo ko Ioane, “e se alofa a ia ki te Tamana i tena loto, me i mea katoa i te lalolagi​—ko manakoga o te foitino mo manakoga o mata mo mea e sona fakamata‵mata ki ei a tino i te olaga nei​—e se māfua mai i te Tamana, kae māfua mai eiloa i te lalolagi.”​—1 Ioa. 2:15, 16.

⁷ A te manakoga ke maumea i mea faka-te-foitino ko salalau i te lalolagi kātoa. E fakamalosi ne Satani a te manatu me e maua fua te fiafia māfai e isi ne tupe. Ko gasolo o uke a sitoa ‵lasi. E fakamalosi aka ne faka‵pulaga se vaegā olaga telā e ‵saga fua ki te mauaga o kope mo fakafiafiaga. E ofo mai ne kamupane oloolo malaga a malaga ki kogā koga ‵gali kolā e masani o olo ki ei a tino kolā e maua ne latou a kilokiloga faka-te-lalolagi. Ao, ne fai a mea katoa i ‵tou tafa mo te mafaufau ke “tai ‵lei” atu tatou—kae fai faeloa e ‵tusa mo tulaga o te lalolagi.

8, 9. Se a te tulaga fakamataku ‵ki e mafai o maua, kae kaia?

⁸ I te fakasino atu ki tino i te fakapotopotoga Kelisiano i te senitenali muamua kolā ne talia ne latou se kilokiloga faka-te-lalolagi, ne fai mai a Petelu: “E maua ne latou te fiafia i te lotou ola i se olaga fakafiafia i te feitu faka-te-foitino i te ao malamalama. A latou ne pona mo lailaiga kae e fia‵fia i olotou akoakoga faitogafiti i taimi e fai i ei otou fakaala. Me e fai ne latou a pati fia ‵sili kolā e seai ne olotou aoga. Kae mai te fakatāua ne latou o manakoga o te foitino mo te amio matafatu mo te sē āva, ne fakalata ei ne latou a tino fatoā ‵sao aka eiloa mai i tino kolā e ola i se olaga fai mea ‵se. E folafola atu ne latou te saolotoga ki tino konā, kae e ‵nofo eiloa latou e pelā me ne pologa ki amioga ma‵sei. Me ko so se tino e takavale i se isi tino ko fai ei a ia mo fai se pologa a te tino tenā.”​—2 Pe. 2:13, 18, 19.

⁹ A te fakamaliega o “manakoga o mata” e se fakasaoloto i ei se tino. Kae e fakapologa i ei a ia ki te matai sē lavea o te lalolagi tenei, ko Satani te Tiapolo. (1 Ioa. 5:19) Se tulaga fakamataku ‵ki a te pologa ki te mauaga o kope faka-te-foitino kae faigata ke sao mai i ei.

SE GALUEGA FAKAMALIE LOTO

10, 11. Ko oi e taua ki ei a Satani i aso nei, kae e mafai pefea ne akoga ma‵luga o te lalolagi o fai a mea ke faiga‵ta ki a latou?

¹⁰ E taua atu foki a Satani ki a latou kolā e se lasi te lotou iloa i aso nei e pelā mo te mea ne fai ne ia i Etena. Ko talavou eiloa kolā e taua atu ki ei. E se fiafia a Satani māfai e volenitia se talavou io me ko so se tino ke pologa ki a Ieova. E manako a te fili o te Atua ke sē iku manuia a te a‵lofa malosi mo te a‵lofa fakamaoni o tino katoa kolā ne tuku atu olotou ola ki a Ieova.

¹¹ Ke toe ‵foki tatou ki te fakaakoakoga o te pologa telā ne talia ne ia ke ‵suki a tena taliga. Kāti ne ‵mae malie a te pologa tenei; e seki leva ko galo atu ei te ‵mae, kae ‵toe mai i ei ko fakamailoga tumau o te tulaga pologa. A te filifiliga o se vaegā olaga telā e ‵kese mo ou taugasoa e mafai o faigata kae faka‵mae foki ki se talavou. E fakamalosi ne Satani a te manatu me i te mauaga o se galuega i tena lalolagi ka fakamalie ei se tino, kae e ‵tau mo Kelisiano o fakatāua a te fakamaliega o olotou manakoga faka-te-agaga. Kae ne akoako mai a Iesu: “E fia‵fia a latou kolā e iloa ‵lei ne latou olotou manakoga faka-te-agaga.” (Mata. 5:3) E ola a Kelisiano tukugina atu o fai te loto o te Atua, kae e se ko Satani. E fia‵fia latou ki te tulafono a Ieova, kae mafau‵fau ‵loto latou ki ei i te ao mo te po. (Faitau te Salamo 1:1-3.) E ui i ei, a te ukega o akoakoga i akoga ma‵luga i aso nei ko fai mo mea e se lava ei taimi mō tavini a Ieova ke mafaufau ‵loto kae fakamalie aka ei ana manakoga faka-te-agaga.

12. Se a te filifiliga e fe‵paki mo talavou e tokouke i aso nei?

¹² E mafai eiloa ne se matai faka-te-lalolagi o fakafaigata te olaga mō se pologa Kelisiano. I tena tusi ki te kau Kolinito, ne fesili atu a Paulo: “A koe ne kalagagina a ko koe se pologa?” Ne fakatonutonu atu a ia ki a latou: “Sa manavase ki ei; kae kafai e mafai o saoloto koe, ke fakaaoga la ne koe te avanoaga tenā.” (1 Koli. 7:21) A te mea telā e manakogina ko te saoloto mai te nofo pologa. I te ukega o fenua i aso nei, a te fano ki te akoga se mea e ‵tau o fai ke oko ki se tausaga mautinoa. Mai konā ko fai ei ne te tamaliki se filifiliga. A te faka‵soko o akoakoga a se tamaliki ke maua se galuega i te lalolagi tenei e mafai o fakatapulā i ei a tena kausaki atu ki te taviniga tumau.​—Faitau te 1 Kolinito 7:23.

AKOGA MA‵LUGA IO ME KO ‵TOE AKOAKOGA MA‵LUGA?

13. Se a te vaegā akoakoga ka aoga malosi ki tavini a Ieova?

¹³ Ne fakailoa atu a Paulo ki Kelisiano i Kolose: “Ke fakamautinoa aka ke mo a eiloa e fakapologa koutou ne se tino ki poto mo takolekolega mo munatuku a tino e ‵tusa mo tuu mo aganuu, mo poto fakavae o te lalolagi kae e se fakavae ki a Keliso.” (Ko. 2:8) E ‵sae aka a “poto mo takolekolega mo munatuku a tino” i aso nei i mafaufauga faka-te-lalolagi kolā e fakatāua ne tino ‵poto e tokouke. A latou kolā e oti mai i akoga ma‵luga, e masani o se apo latou i te faiga o mea ko ala ei o sē toka latou o fakafesagai ki te olaga masani. E ‵kese mai i ei, e filifili eiloa ne tavini a Ieova a akoakoga kolā e fesoasoani atu ki a latou ke ati aka te atamai telā e manakogina ke mafai latou o tumau i se olaga faigofie i te tavini atu ki te Atua. Ne talia ne latou a pati fakatonutonu a Paulo ki a Timoteo: “Kae ko te ‵tonuga loa, e uke a mea e maua mai te taviniga ki te Atua māfai e lotoma‵lie tatou ki mea kolā ko maua ne tatou. Tela la, kafai ko maua a ‵tou meakai mo ‵tou gatu, ke lotoma‵lie eiloa tatou i ei.” (1 Timo. 6:6, 8) I lō te kausaki atu ke maua a pepa mo tofi ma‵luga, e ‵saga tonu eiloa a Kelisiano ‵tonu ki te mauaga o “pepa fakatalitonu” mai te ‵kau katoatoa atu ki te galuega talai.​—Faitau te 2 Kolinito 3:1-3.

14. E ‵tusa mo te Filipi 3:8, ne kilo atu pefea a Paulo ki tena tauliaga ke fai mo pologa a te Atua mo Keliso?

¹⁴ Ke mafaufau ki te apositolo ko Paulo. Ne akoga a ia i te faiakoga o te Tulafono Iutaia ko Kamalielu. A te akoakoga telā ne maua ne Paulo e mafai o faka‵tusa ki se iunivesiti i aso nei. Kae ne kilo atu pefea a Paulo ki ei māfai e faka‵tusa ki tena tauliaga ke fai mo pologa ki te Atua mo Keliso? Ne tusi mai tou tagata: “E mafaufau . . . au me ko se aoga a mea katoa ona ko te sili atu o te aoga o toku iloa e uiga ki a Keliso Iesu, toku Aliki.” Kae ne toe fai mai a ia: “Ona ko ia ko talia ei ne au ke ‵galo atu a mea katoa kae ke kilo atu foki ki ei e pelā me ne kaiga ko oko eiloa i te uke, ko te mea ke maua ne au a Keliso.” (Fili. 3:8) E fesoasoani atu te fakaikuga tenā ki talavou Kelisiano mo olotou mātua kolā e ma‵taku ki te Atua ke fai se filifiliga poto e uiga ki akoakoga. (Onoono ki te ata.)

KE MAUA A MEA AOGA MAI TE ‵TOE AKOAKOGA MALUGA

15, 16. Ne a akoakoga e tuku mai i te fakapotopotoga a Ieova, kae se a tena aoga?

¹⁵ Se a te tulaga o te olaga i akoga ma‵luga e uke o te lalolagi tenei? E mata, e se fakavae mai i ei a mea fakapolitiki mo te sē tokagamalie o tino i nisi taimi? (Efe. 2:2) E ‵kese mai i ei, e tuku mai i te fakapotopotoga a Ieova a toe vaega o akoakoga ma‵luga i fakatokaga filemu a te fakapotopotoga Kelisiano. E maua ne tatou taki tokotasi te avanoaga ke maua a mea aoga mai te Akoga mō Tino Talai i vaiaso takitasi. E isi foki se akoga mō taina paenia kolā seki a‵vaga (Te Akoga mō Taina Taka) mo paenia kolā ko oti ne a‵vaga (Te Akoga mō Tauavaga Kelisiano). E fesoasoani mai akoga penā ke faka‵logo tatou ki a Ieova, te ‵tou Matai i te lagi.

¹⁶ E mafai o sukesuke ‵loto tatou ki koloa faka-te-agaga i te Watch Tower Publications Index io me ko te Watchtower Library i CD-ROM. A te tapuaki ki a Ieova ko te fakavae o te taumafaiga tenei. E akoako mai ki a tatou a te auala e mafai ei o fesoasoani atu tatou ki nisi tino ke faka‵lei te lotou va mo te Atua. (2 Koli. 5:20) I te suā feitu, ka fesoasoani atu te mea tenei ke akoako atu latou ki nisi tino.​—2 Timo. 2:2.

TE TAUI O TE POLOGA

17. Ne a taui o te filifiliga o te ‵toe akoakoga maluga?

¹⁷ I te tala fakatusa a Iesu ki taleni, ne maua ne tavini fakamaoni e tokolua a pati fakamālō kae fia‵fia fakatasi mo te lā matai mai te tuku atu o galuega e uke atu. (Faitau te Mataio 25:21, 23.) A te filifiliga o te ‵toe akoakoga maluga i aso nei e maua i ei te fiafia mo taui ‵lei. Ke mafaufau ki te fakaakoakoga a Michael. Ona ko te ‵lei o ia i te akoga ne ‵kami ei tou tagata ne tena faiakoga ki se faipatiga ke sau‵tala fakatasi mo ia ki ana fakamoemoega ke fano ki te iunivesiti. Kae ‵poi eiloa latou i a Michael ne filifili eiloa ke fai se akoga fakaakoako telā e mafai o fesoasoani fakavave atu ke tausi ne ia a ia eiloa e pelā me se paenia tumau. E mata, ne mafaufau tou tagata me ne galo i a ia se mea? “A te akoakoga telā ne maua ne au pelā me se paenia​—kae nei e pelā me se toeaina i te fakapotopotoga​—ne seai se ‵togi,” ko ana pati. “A fakamanuiaga mo tauliaga kolā ne maua ne au e ‵lei fakafia atu i lō so se tupe ne mafai o maua ne au. E fiafia eiloa au me ne filifili ne au ke sē kausaki atu ki akoakoga ma‵luga.”

18. Se a te mea e fakamalosi atu ki a koe ke filifili a te ‵toe akoakoga maluga?

¹⁸ E akoako mai ne te ‵toe akoakoga maluga a te loto o te Atua kae fesoasoani mai ke pologa tatou ki a Ieova. E tuku mai i ei ki a tatou a te fakamoemoega ke “fakasaoloto . . . mai te pologa ki te masei” kae maua i te fakaotiga a “te saolotoga ‵malu, ko te fai mo fai a fanau a te Atua.” (Loma 8:21) Kae sili i mea katoa, e tauloto tatou ki te ‵toe auala ‵lei e fakaasi atu ei ne tatou me e a‵lofa tonu tatou ki ‵tou Matai i te lagi, ko Ieova.​—Eso. 21:5.