Kaia e Fesili ei Penā?

“E mata, a koe se tokotasi telā e talitonu me e se manakogina ne koe te Atua? E tali‵tonu eiloa penā a te fia miliona o tino.” Ko pati ne faka‵pa i luga i se laupapa lasi i te auala telā ne ‵togi ne se potukau o tino sē tali‵tonu ki te Atua. E fakamaoni mai ei me e se manakogina ne latou te Atua.

I te suā feitu la, a tino e tokouke kolā e fai mai me e tali‵tonu latou ki te Atua e fai ne latou a fakaikuga e pelā me e seai se Atua. A Salvatore Fisichella, se faifeau o te Lotu Katolika, ne fai atu e uiga ki tino o tena lotu: “Kāti kafai e ‵kilo mai a tino ki a matou, e seai se tino e iloa ne ia me i a matou ne Kelisiano i aso nei ona ko te mea ko ‵pau eiloa te motou vaegā olaga mo tino sē tali‵tonu.”

Ko tō fakalavelave a nisi tino ke ‵saga tonu atu ki te Atua. E mafau‵fau latou me ko tō ‵mao io me ko tō faigata ke fesoasoani atu a ia ki te faka‵leiga o olotou olaga. Kae ko te ‵tonuga loa, e ‵fuli atu fua a vaegā tino penā ki te Atua māfai ko oko atu a fakalavelave io me e ma‵nako latou ki se mea​—e pelā eiloa mo se tavini telā e ‵tau o toka faeloa māfai ko ma‵nako latou ki se mea.

E maua ne nisi tino se kilokiloga me e aoga malie fua a akoakoga fakalotu io me e fakata‵mala latou o fakagalue aka a mea kolā e talai atu ne olotou lotu. Ke taku atu se fakaakoakoga e tasi, e 76 pasene o tino Lotu Katolika i Siamani e tali‵tonu me e ‵lei eiloa ke ‵nofo fakatasi se tagata mo se fafine a koi tuai o fakaipoipo​—se kilokiloga telā e ‵teke atu ki akoakoga a te lotou lotu mo te Tusi Tapu. (1 Kolinito 6:18; Epelu 13:4) E tonu, e se ko tino Lotu Katolika fua e iloa ne latou a te sē fetaui te lotou fai mo fai ne tino ‵lotu mo olotou vaegā olaga. E fanoa‵noa eiloa a faifeau mai lotu kese‵kese e uke me e fai eiloa olotou tino ‵lotu e pelā me ne “tino sē tali‵tonu ki te Atua.”

E se tioa eiloa o iku atu a vaegā tala penā ki te fesili tenei: E mata, e manakogina eiloa ne tatou te Atua? E se fai eiloa te mataupu tenei e pelā me se mea fou. Ne fakasae aka foki te mea tenā i itulau kamata o te Tusi Tapu. Ko te mea ke maua se tali ki te fesili, ke na ‵saga atu nei tatou ki nai mataupu kolā ne ‵sae aka i te tusi o te Tusi Tapu ko Kenese.